ʼE ʼAu Fia Kamata He Ako Tohi-Tapu!
1 Tokolahi ia tatou kua tou fakahā tatatou loto ʼaē ke tou kamata he ʼu ako Tohi-Tapu, pea ʼe ko he meʼa lelei ʼaia. ʼAki te fai ʼo he ʼu ako Tohi-Tapu, ʼe tou fakahoko tatatou fakatuʼutuʼu ʼaē ke tou fai ni ʼu tisipulo foʼou. (Mateo 28:19, 20) Kae ko ʼihi ia tatou, kua lagi fakalaka he ʼu māhina, peʼe ko he ʼu taʼu, ka mole heʼeki tou maʼu te fiafia lahi ʼaē ke tou akoʼi te moʼoni ki he tahi. Koteā ʼaē ʼe feala ke tou fai ʼo ʼuhiga mo te faʼahi ʼaia ʼi Novepeli? Mai tona ʼuhiga ʼaē ʼe tou tufa te tohi Te ʼAtamai Mālama ʼi te māhina ʼaenī, koia ʼaē ʼe tou faiga anai ke tou fakaʼaogaʼi te tohi ʼaia moʼo kamata ʼaki he ʼu ako Tohi-Tapu foʼou.
2 Koutou Fakatuʼutuʼu Kiai He Fakaʼosi Vāhaʼa e Tahi Peʼe Laka Age: ʼE fakaloto mālohiʼi tatou fuli ke tou fakatuʼutuʼu he temi ʼi te māhina ʼaenī ke tou faiga tāfito ke tou kamata he ʼu ako Tohi-Tapu foʼou. Ko te ʼu tēhina takitaki ʼo te ʼu Ako Tohi ʼo te kokelekasio, ʼe tonu ke nātou fakatuʼutuʼu he ʼu fakaʼosi vāhaʼa ʼaē ka fai tāfito ai te faʼahi ʼaia, pea mo uga te kau fai faka mafola ke nātou fai fakalelei te ʼu ʼaʼahi.
3 ʼI te ʼu fono fuli ʼaē ʼe fai ki te fai faka mafola, koutou ʼave mo koutou takotou ʼu kiʼi nota ʼo ʼuhiga mo takotou ʼu ʼaʼahi. Pea koutou ʼaʼahi ia nātou fuli ʼaē neʼe fia logo, pe neʼe nātou toʼo he ʼu tohi, pe neʼe nātou kau ki te ʼu fono. ʼI te ʼu ʼaʼahi fuli ʼaē ʼe koutou fai, koutou fakatuʼutuʼu ke koutou kamata he ako Tohi-Tapu.
4 Koutou Fakahā Peʼe Feafeaʼi Te Fai ʼo Te Ako Tohi-Tapu: ʼI te ʼu fono ʼaia ʼaē ʼe fakatuʼutuʼu ai ke kamata he ʼu ako Tohi-Tapu, ʼe lelei anai ke fai he kiʼi faʼifaʼitaki neʼe teuteuʼi lelei, moʼo fakahā peʼe feafeaʼi te kamata ʼo he ako Tohi-Tapu mokā tou fai te ʼaʼahi. ʼE feala ke koutou ʼui fēnei: “ ʼE tokolahi te hahaʼi ʼaē ʼe ʼi ai hanatou Tohi-Tapu, kae mole mahino kia nātou ko te tohi ʼaia ʼe maʼu ai te ʼu tali ki te ʼu fehuʼi maʼuhiga ʼo te maʼuli. [Koutou fakahā te kumiʼaga ʼo te tohi Te ʼAtamai Mālama, pea koutou lau te ʼu kupu tāfito ʼo te ʼu kapite 3, 5, 6, 8, pea mo te 9.] Kapau ʼe ke vakaʼi te tohi ʼaenī ʼi te hola pe e tahi peʼe laka atu ʼi te vāhaʼa, pea ʼe feala anai ke ke mālama ki te Tohi-Tapu ʼi he ʼu kiʼi māhina pe. Kapau ʼe ke filifili he kapite ʼi te ʼu kapite ʼaenī, pea ʼe ʼau fakahā atu anai peʼe feafeaʼi tona ako.” Kapau ʼe mole faʼa loto kiai heʼe maʼumaʼua fau ʼi te vāhaʼa, pea koutou fakamahino age ʼe toe ʼi ai mo te ako ʼe nounou age. Koutou fakahā age te kaupepa Fakamaʼua, ʼo fakamahino age ʼe feala ke fai te ako nounou ia minuta e 15 peʼe 30 ʼi te vāhaʼa fuli.
5 Kapau ʼe tou faiga fuli ke tou kamata he ʼu ako Tohi-Tapu pea mo tou faikole ke tapuakina e Sehova tatatou ʼu faiga, pea ʼe mahino ia ʼe tou maʼu anai he ʼu ako foʼou! (1 Soane 5:14, 15) Kapau ʼe koutou fia kamata he ako Tohi-Tapu, pea ko te māhina ʼaenī e lagi ko he faigamālie lelei ke koutou fai ai te faʼahi ʼaia.