Tou Kamata He ʼu Ako Tohi-Tapu ʼAki Te Kaupepa Fakamaʼua

¹ ʼE fakahā mai e te ʼu tānaki ʼaē neʼe fai ʼi te malamanei katoa, ko te kaupepa Koteā ʼAē ʼe Fakamaʼua Mai e Te ʼAtua Kia Tatou? ʼe ko he meʼa gāue lelei ʼaupito moʼo akoʼi te moʼoni ki te hahaʼi. ʼI te vāhaʼa fuli, ʼe kamata te ʼu ako Tohi-Tapu ʼe lauʼi afe ʼo fakatafito ki te kaupepa ʼaia. Neʼe koutou lava kamata koa pea mo takitaki he ako Tohi-Tapu ʼo fakatafito ki te kaupepa Fakamaʼua?

² ʼE faigafua ki te tokolahi tanatou tuku te kaupepa, kae ʼe faigataʼa ki ʼihi hanatou ʼiloʼi pe koteā te ʼu palalau ʼaē ʼe tonu ke nātou fai moʼo kamata te ako Tohi-Tapu. Koteā te ʼu puleʼaki lelei ʼaē neʼe fai e ʼihi moʼo kamata he ʼu ako Tohi-Tapu ʼaki te kaupepa Fakamaʼua? ʼE ʼaoga anai kia koutou te ʼu faʼifaʼitaki ʼaē ʼe hoa mai.

³ Tou Fakahā Peʼe Feafeaʼi Te Fai ʼo Te Ako: ʼI tatatou ʼuluaki felāveʼi mo he tahi, peʼe ʼi tatatou lua ʼaʼahi ia ia, ʼe mole tonu ke gata ʼaki pe tatatou palalau age ki te ako Tohi-Tapu, kae ʼe lelei ke tou fakahā age peʼe feafeaʼi te fai ʼo te ako. ʼAki te faʼahi ʼaia, ʼe mole toe tuʼania anai te hahaʼi ʼi tanatou logo ki te kupu “ako.” ʼE tou fakatokagaʼi anai ʼi tatatou ʼosi ako peʼe feafeaʼi te fai ʼo te ako, ʼe mole maʼua ke fualoa te faʼifaʼitaki moʼo kamata te ako Tohi-Tapu.

⁴ ʼE Maʼuhiga Ke Tou Teuteuʼi Lelei: Ko tatatou lotomālohi ʼaē ke tou kamata he ʼu ako Tohi-Tapu, ʼe pipiki ki te lelei ʼo tatatou teuteu ki te gāue. Kapau ʼe tou teuteuʼi fakatomuʼa, pea ʼe mole tou fakameʼameʼa anai ʼi te fakahā ki te hahaʼi, ʼe feala ke fai hanatou ako Tohi-Tapu. Kapau ʼe tou akoako lelei te ʼu palalau ʼaē ka tou fai ki te hahaʼi, pea ʼe faigafua anai tatatou palalau, ʼo tou palalau faʼitaliha pea mo fai ʼaki tatatou faʼahiga palalau māhani. ʼE mole tou tuʼania anai, pea ʼe toe lelei anai mo ia ʼaē ʼe fagono mai kia tatou.

⁵ Ka koutou akoako takotou fai palalau, pea ʼe lelei ke koutou vakaʼi tona loaloaga, ke feala hakotou fakahā age kia ia ʼo te ʼapi peʼe minuta fia te loaloaga ʼo te fakahā ʼo te ako. Koʼeni te ʼu palalau ʼaē ʼe fai e te tēhina: “ ʼE ʼau haʼu ki tou ʼapi moʼo fakahā atu peʼe feafeaʼi te fai ʼo he ako Tohi-Tapu. Ia minuta pe e nima, ʼe feala ke ʼau fakahā atu peʼe feafeaʼi te fai ʼo te ako. ʼE ke maʼu koa hou kiʼi temi ke ʼau fakahā atu te faʼahi ʼaia?” ʼE feala ke tou fakahā te ʼuluaki ako ʼo te kaupepa Fakamaʼua ʼi he ʼu kiʼi minuta pe e nima. ʼE mahino papau ia, ʼe mole feala ke tou lau fuli te ʼu vaega faka Tohi-Tapu ʼo te ako ʼi te kiʼi moʼi temi ʼaia, kae kapau ʼe tou fakaʼosi te ʼuluaki ako ia minuta pe e nima, pea kua tou kamata he ako Tohi-Tapu mo te tagata pe ko te fafine ʼaia. ʼOsi ʼaia, pea koutou ʼui age ʼe koutou liliu mai anai moʼo vakaʼi te ako 2, pea ʼe koutou fai pe anai ia minuta e 15.

⁶ Neʼe Maʼu He ʼu Fua Lelei ʼo Te Faʼifaʼitaki ʼAenī:

◼ “ ʼE ʼau fia fakahā fakanounou atu peʼe feafeaʼi te fai ʼo he ako Tohi-Tapu ʼaki te kaupepa ʼaenī, Koteā ʼAē ʼe Fakamaʼua Mai e Te ʼAtua Kia Tatou? Kapau ʼe ke vakaʼi te kaupepa ʼaenī lolotoga minuta e 15 ʼi te vāhaʼa fuli ia māhina e fā, pea ʼe ke maʼu anai he ʼu tali lelei ki he ʼu fehuʼi maʼuhiga ʼo ʼuhiga mo te Tohi-Tapu.” Koutou fakahā fakanounou age te tānakiʼaga ʼo te ʼu kupu tāfito. Fuli age te Ako 1, pea koutou ʼui fēnei: “Kapau ʼe ʼi ai hou ʼu kiʼi minuta e nima, pea ʼe ʼau fakahā atu anai peʼe feafeaʼi te fakaʼaogaʼi ʼo te kaupepa. Ko te kupu tāfito ʼaenī ʼo te Ako 1, ‘ ʼE Koutou Lava ʼIloʼi Feafeaʼi Te ʼu Meʼa ʼAē ʼe Fakamaʼua Atu e Te ʼAtua.’ ” ʼOsi ʼaia, pea koutou lau te ʼu fehuʼi e tolu, pea mo koutou fakamahino age te ʼaoga ʼo te ʼu mataʼi numelo. Koutou lau te ʼuluaki palakalafe, ʼo koutou fakahā age peʼe feafeaʼi te maʼu ʼo te tali. ʼE lagi feala hakotou kole age ke ina lau te palakalafe 2. ʼOsi ʼaia, pea koutou ʼui fēnei: “ ʼAki te meʼa ʼaē neʼe ke lau mai, koteā tau tali ki te fehuʼi ʼaenī? [Koutou toe lau te fehuʼi, pea koutou tuku ke fai hana tali.] ʼE ke fakatokagaʼi, ʼe ʼi ai te ʼu vaega faka Tohi-Tapu ʼe ʼalutahi mo te ʼu palakalafe fuli, pea ʼe nātou fakahā mai pe koteā te tali ʼa te Tohi-Tapu ki te ʼu fehuʼi. Ohage la, tā lau ia 2 Timoteo 3:​16, 17, pea tā vakaʼi peʼe ʼalutahi mo te tali ʼaē neʼe ke fai mai ʼo ʼuhiga mo ia ʼaē neʼe ina tohi te Tohi-Tapu.” ʼI takotou ʼosi lau te palakalafe 3, koutou lau te fehuʼi, pea koutou lau ia Soane 17:3, ʼo koutou fakahā age kia ia te ʼu meʼa ʼaē kua mahino kiai ʼo koutou fakamanatuʼi te ʼuluaki ako. Pea ʼe feala ke koutou fuli age te ako 2 pea mo koutou lau te fehuʼi fakaʼosi, “Koteā te ʼu faʼahi e lua ʼaē ʼe feala ai ke tou ako ʼo ʼuhiga mo te ʼAtua?” ʼOsi ʼaia, pea koutou fehuʼi age: “Ko te ʼaho fea ʼaē ʼe feala ai ke ʼau toe liliu mai ke tā tali ki te fehuʼi ʼaia ʼi te ako 2?”

⁷ ʼE maʼuhiga ke faigafua te fai palalau pea ke tou fakamālo kia ia ʼaē ʼe tou fai palalau mo ia. Ka koutou fakatuʼutuʼu ke koutou liliu ʼo ʼaʼahi ia ia, ʼaua naʼa koutou kole age peʼe lotolelei ke hoko atu te fai palalau, kae koutou fakaloto mālohiʼi ia ia ke ina teuteuʼi e ia totonu te ako ka hoa mai, ʼo mulimuli ki te meʼa ʼaē kua koutou fakahā age ki ai. Koutou fakahā age, ʼe koutou fiafia mokā koutou toe liliu age kiō ia. Ko ʼihi fai faka mafola, neʼe nātou fai te ako ʼi te telefoni mo kapau neʼe faigataʼa tanatou felāveʼi mo te hahaʼi. Tahi ʼaē meʼa, ʼe lagi feala ke koutou kole age kia ia ʼaē ʼe fia ako, ke ina taupau tana kaupepa ʼi he faʼahi ʼe faigafua anai ke ina maʼu ai mo kapau ʼe tonu ke ina fai te ako.

⁸ Tou Lotomālohi: Kapau ʼe tou fia maʼu he ako Tohi-Tapu, pea ʼe maʼuhiga ke tou teuteuʼi lelei, kae ʼe toe maʼuhiga foki ke tou lotomālohi. ʼE lagi faigataʼa anai kia koutou te fakahā fakanounou ʼo te ako Tohi-Tapu ʼi he ʼu kiʼi minuta pe, kae koutou lotomālohi ʼo koutou akoako liuliuga te faʼahi ʼaia, ke faigafua takotou fai ʼo te ako ʼaia mokā koutou fakahā ʼi te ʼu ʼapi. Koutou faiga ke koutou fakahā peʼe feafeaʼi te ako Tohi-Tapu ki te hahaʼi fuli ʼaē ʼe koutou felāveʼi mo nātou ʼi tonatou ʼapi, ʼi te fagonogono faigamālie, peʼe ʼi te telefoni. Kapau ʼe faigataʼa takotou kamata he ako Tohi-Tapu, pea ʼaua naʼa koutou lotovaivai. Ke feala hakotou maʼu he ʼu ako Tohi-Tapu, ʼe maʼua ke koutou lotomālohi pea mo koutou holi fakamalotoloto ke koutou fakahā te moʼoni ki te hahaʼi.​—Kal. 6:9.

⁹ Kapau ʼe koutou mulimuli ki te ʼu tokoni ʼaia, pea ʼe lagi koutou maʼu anai mo koutou te pilivilesio ʼaē ke koutou tokoni ki he tahi ke haʼele ʼi te ala ʼaē ʼe ina taki ki te maʼuli, ʼo koutou kamata pea mo fai he ako Tohi-Tapu ʼaki te kaupepa Fakamaʼua.​—Mat. 7:​14.