Kotou Fai He ʼu Ako ʼAki Ia Te Kaupepa Lahi Logo Lelei
1. Neʼe feafeaʼi te faʼufaʼu ʼo te kaupepa Logo Lelei?
1 Ohage ko tatatou kua ʼosi vakaʼi ʼi Te Minisitelio ʼo Te Puleʼaga ʼo Sulio, ʼe tou maʼu tatatou meʼa gaue maʼuhiga ʼae ko te kaupepa Te ʼu Logo Lelei Mai Te ʼAtua. Ko te ʼu vaega ʼae ʼe tuʼu ai ʼe mole tohi fuli, ke feala ai ki te hahaʼi ke natou lau ʼi ʼanatou Tohi-Tapu. ʼE lahi ʼatatou tohi ako neʼe fai ke feala ki te hahaʼi ke natou mahino ki te moʼoni. Kaʼe ko te kaupepa ʼae Logo Lelei, neʼe fai ia ke fakaʼaogaʼi e he faiako moʼo fai he ʼu ako. Ko te tupuʼaga la ʼaia, moka foaki ia te kaupepa ʼe tonu ke tou fakaha age pe ʼe feafeaʼi te fai ʼo he ako. ʼI tatatou fai ia te faʼahi ʼaia, ʼe fiafia anai ʼi tana iloʼi ia te logo lelei ʼi te Tohi-Tapu.—Mat. 13:44.
2. ʼE feafeaʼi hatatou fakaʼaogaʼi ia te kaupepa Logo Lelei ʼi tatatou ʼuluaki felaveʼi?
2 Te ʼUluaki Felaveʼi: ʼE feala ke kotou ui fenei: “Tokolahi ʼe natou tuʼania ʼo ʼuhiga mo te ka haʼu. Kotea la tau manatu? ʼE feala anai koa ke lelei age te maʼuli? [Tuku ke fai mai hana tali.] ʼE tou maʼu ʼi te Tohi-Tapu te ʼu logo ʼe lelei ʼe ina foaki mai he ʼamanaki. Pea ke sio, ʼe tali mai ʼi te Tohi-Tapu ki te ʼu fehuʼi la ʼaeni.” Foaki age ia te kaupepa, pea mo kole age ke ina filifili he fehuʼi ʼe ina leleiʼia, ʼi te ʼu fehuʼi ʼae ʼe tuʼu ʼi te pasina fakaʼosi. Fai he faʼifaʼitaki pe ʼe feafeaʼi te fai ʼo he ako Tohi-tapu ʼo fakaʼaogaʼi ia te ʼuluaki palakalafe ʼo te kapite ʼae neʼe ina fili. ʼE toe feala pe ke tou fehuʼi age ke ina filifili he fehuʼi ʼi he kapite neʼe tou teuteuʼi. Tou fakaha age pe ʼe tokoni feafeaʼi anai te kaupepa ke ina maʼu ia te ʼu tali ʼi te Tohi-Tapu. Kapau ʼe maʼu te ako ʼaia ʼi he ʼata viteo ʼi te Neti jw.org, ʼe feala ke tou fakaha age te ʼata viteo.
3. ʼE feafeaʼi tatatou fai he ako ʼaki te kaupepa Logo Lelei?
3 ʼE Feafeaʼi Hatatou Takitaki He Ako Tohi-Tapu: (1) Lau te fehuʼi ʼae neʼe tohi fakamata lalahi moʼo tokoni ki ai ke ina tokagaʼi te manatu tafitō. (2) Lau ia te palakalafe. (3) Lau ia te ʼu vaega ʼe tuʼu ʼi te fakaʼosi ʼo te palakalafe. Fai ia he ʼu fehuʼi ke mahino pe ʼe tali feafeaʼi age te ʼu vaega ki te fehuʼi. (4) Kapau ko he ʼu palakalafe ʼe lua ki he fehuʼi pe ʼe tahi, toe fakaʼaogaʼi ia te 2 pea mo te 3 puani. Kapau ʼe ʼi ai he ʼata viteo ʼe alu tahi mo te ako, ʼe feala ke kotou fakaha age ki ai. (5) Toe fai ki ai te fehuʼi ʼo tou vakaʼi fakalelei pe ʼe kua mahino.
4. Kotea anai ka tokoni mai kia tatou ke tou fakaʼaogaʼi lelei ia te meʼa gaue maʼuhiga ʼaia?
4 Tou fakamamahani ki tatatou meʼa gaue maʼuhiga ʼaeni. Tou fakaʼaogaʼi tuʼumaʼu ʼi te ʼu faigamalie fuli. ʼI muʼa ʼo te fai ʼo te ako, tou manatuʼi ia ia ʼae ʼe ako. Tou fakakaukauʼi pe ʼe feafeaʼi anai tatatou fakaʼaogaʼi ia te ʼu vaega moʼo fakamahino age ia te ako. (Taag. 15:28; Gaue 17:2, 3) ʼAki tatatou fakaʼaogaʼi tuʼumaʼu ia te kaupepa ʼaia, ʼe tou mahino ai ʼe ko te meʼa gaue lelei ʼaupito moʼo akoʼi te moʼoni ki te hahaʼi.