Te Fakaʼaogaʼi ʼo Te Kaupepa Lahi Te ʼu Logo Lelei Mai Te ʼAtua
ʼE Tokoni Mai Te Kaupepa Lahi Foʼou ʼAeni Ke Tou Fai He ʼu ʼAʼahi Pea Mo Kamata Ni Ako Tohi-Tapu
1. He ko ʼe ʼe tokoni mai anai te kaupepa foʼou ʼae neʼe tou maʼu ʼi te Fakatahi Fakatisitilike “Taupau Tou Loto!” moʼo fai he ʼu ʼaʼahi pea mo kamata ni ako Tohi-Tapu?
1 ʼI te Fakatahi Fakatisitilike “Taupau Tou Loto!,” neʼe tou fiafia ʼi te maʼu he kaupepa lahi foʼou moʼo tokoni mai ke tou fai he ʼu ʼaʼahi pea mo kamata ni ako Tohi-Tapu. Ko te kaupepa lahi Te ʼu Logo Lelei Mai Te ʼAtua ʼe ina fetogi te kaupepa lahi Fakamaʼua, kaʼe ʼe tatau pe heʼe nounou ʼona kapite. ʼE ʼaoga anai te faʼahi ʼaia moʼo fai he ʼu ako ʼi te ʼu muʼa matapa. ʼI te kaupepa lahi Fakamaʼua, neʼe talanoa ai ki te ʼu faʼahi ʼe fakamaʼua ki he Kilisitiano, ʼo lagi faigataʼa ai ki te kau ako foʼou hanatou mulimuli ki ai. Kaʼe ʼi te kaupepa foʼou ʼaeni, ʼe talanoa tafitō ki te ʼu logo lelei ʼe tuʼu ʼi te Tohi-Tapu.—Gaue 15:35.
2. He ko ʼe neʼe ta te kaupepa lahi Te ʼu Logo Lelei?
2 He ko ʼe neʼe ta te kaupepa lahi ʼaia? He neʼe kole ʼe ni tehina ʼi te malamanei he meʼa gaue ʼe faigafua, ʼe uga ai anai te hahaʼi ke natou fia iloʼi te moʼoni, pea ʼe feala ke fakaʼaogaʼi leva te tohi Te Ako Mai Te Tohi-Tapu, te tohi ʼae ʼe tou fai tafitō ki ai te ʼu ako. ʼI te agamahani, ʼe leleiʼia age e te hahaʼi hanatou ako te Tohi-Tapu ʼaki he kaupepa, ʼi hanatou ako ʼaki he tohi. Tahi ʼae, ʼe faigafua age te fakaliliu ʼi ni lea kehekehe ia he kaupepa.
3. He ko ʼe ʼe kehe age te kaupepa lahi ʼaeni mo te tahi ʼu tohi ako?
3 Tona Faʼahiga Fakaʼaoga: ʼE lahi ʼatatou tohi ako ʼe feala pe ki he tahi hana lau pea mo mahino ki te moʼoni, ʼo mole ʼaoga ki ai he tokoni. Kaʼe ʼe kehe age te kaupepa lahi ʼaeni. Heʼe ʼaoga ke ʼi ai he tahi moʼo fakamahino te ʼu vaega Tohi-Tapu. Koia, ka tou foaki he kaupepa lahi ki he tahi, ʼe lelei ke tou faipalalau ki he palakalafe ʼe tahi pe lua. ʼE nounou te ʼu palakalafe, ʼo feala ai ke tou vakaʼi mo ia ʼi tona muʼa matapa pe ʼi tona fale gaue. Logola ʼe lelei ke tou kamata ʼi te kapite 1, kaʼe ʼe feala pe hatatou kamata ʼi he kapite pe.
4. ʼE tokoni feafeaʼi mai te kaupepa lahi ʼaeni ke tou fai he ako ki te Tohi-Tapu?
4 ʼI ʼatatou tohi, ʼe tuʼu te ʼu tali ki te ʼu fehuʼi ʼi te ʼu palakalafe. Kaʼe ʼi te kaupepa lahi ʼaeni, ʼe maʼu tafitō ʼona tali ʼi te Tohi-Tapu. Tokolahi te hahaʼi ʼe natou fia fai tanatou ako ki te Tohi-Tapu kaʼe mole ʼaki hatatou tohi. Koia, ʼe lahi te ʼu vaega Tohi-Tapu ʼe tuʼu ʼi te kaupepa lahi ʼaeni, kaʼe ʼe tonu ke vakaʼi ʼi te Tohi-Tapu. ʼE mahino ai kia ia ʼe ako, ʼe ko te ʼu manatu ʼa te ʼAtua ʼae ʼe ina ako.—Esa. 54:13.
5. He ko ʼe ʼe maʼuhiga kia ia ʼae ʼe ina fai te ako ke ina teuteuʼi lelei tuʼumaʼu te ako?
5 ʼE mole fakamahino ʼi te kaupepa lahi ʼaeni te ʼu vaega Tohi-Tapu fuli. Kotea tona tupuʼaga? Ke uga ai ia ia ʼe ako ke faifehuʼi, pea ʼe feala kia ia ʼe ina fai te ako ke ina fakaʼaogaʼi tona poto faiako. Koia ʼe maʼuhiga ai ke tou teuteuʼi lelei tuʼumaʼu te ako. Kaʼe kotou tokakaga ke mole lahi fau takotou palalau. ʼE moʼoni, ʼe tou leleiʼia te fakamahino ʼo te ʼu vaega. Kaʼe ʼe fua lelei anai tatatou faiako, mo kapau ʼe tou fakalavelave pe kotea tana mahino ki te vaega. Ka tou fakafuafua lelei ʼatatou fehuʼi, pea ʼe tou ʼekenaki anai ia ia ke fakakaukau ki te fakaʼuhiga ʼo te ʼu vaega Tohi-Tapu takitahi.—Gaue 17:2.
6. ʼE feafeaʼi hatatou fakaʼaogaʼi te kaupepa lahi: (1) moka ʼe mole tui te hahaʼi ki te ʼAtua mo te Tohi-Tapu? (2) ʼi tatatou faifakamafola ʼi te ʼu ʼapi? (3) moʼo kole fakahagatonu ki he tahi ke fai hana ako Tohi-Tapu? (4) moka tou fai te ʼu ʼaʼahi?
6 Ohage ko tatatou tahi ʼu tohi ako, ʼe feala ke tou tufa te kaupepa lahi ʼaeni ʼi he temi pe, tatau aipe pe kotea te tufa ʼo te mahina. Tokolahi ʼe natou fia fakaʼaogaʼi anai te kaupepa ʼaeni moʼo kole fakahagatonu ki he tahi ke fai hana ako. Pea ohage ko tona fakaha ʼi te fakatahi fakatisitilike, ka tou fakaʼaogaʼi te kaupepa ʼaeni ʼi tatatou fai ʼaʼahi, pea “ ʼe tou fiafia moʼoni anai ʼi te fai ʼo te ʼu ʼaʼahi!”—Vakaʼi te ʼu fakamatala ʼe ʼatakai ʼi te ʼu pasina 7-9.
7. ʼE lava feafeaʼi hakotou fakaʼaogaʼi te kaupepa lahi moʼo fai he ako Tohi-Tapu?
7 Te Faʼahiga Fai ʼo Te Ako: ʼE feala ke tou kamata te faipalalau ʼaki tatatou lau te fehuʼi ʼae ʼe tohi fakamatolu. Pea tou lau leva te palakalafe mo te vaega, pe ko te ʼu vaega, ʼae ʼe tohi fakahipa. Tou fakafuafua lelei te ʼu fehuʼi ʼae ʼe tou fai moʼo tokoni kia ia ke mahino ki te ʼu vaega. Pea ʼi muʼa ʼo takotou hiki ki te tahi puani, kotou kole age ke ina tali ki te fehuʼi ʼae ʼe tohi fakamatolu, ke kotou iloʼi pau ai pe kua mahino. ʼI ʼakotou ʼuluaki ʼaʼahi, ʼe lagi lelei age hakotou vakavakaʼi he fehuʼi pe e tahi ʼe tohi fakamatolu. ʼAki te temi, ʼe feala anai hatatou fakaloaloaga age ʼatatou faipalalau ki te kapite katoa.
8. Kapau ʼe tou toʼo he vaega, kotea ʼae ʼe tonu ke tou ui, pea kotea tona tupuʼaga?
8 Ko te ʼu vaega Tohi-Tapu ʼae ʼe tohi ke lau, ʼe maʼu tafitō ai te tali ki te fehuʼi ʼae ʼe tohi fakamatolu. Ka tou toʼo he vaega, ʼaua naʼa tou ui “neʼe tohi fenei e te apositolo ko Paulo,” pe “neʼe fakakikite fenei e Selemia.” ʼE lagi manatu anai ʼe tou lau pe tatou ni palalau neʼe fai e te tagata. ʼE lelei age moka tou ui “ ʼe ui fenei ʼi te Folafola ʼa te ʼAtua,” pe “neʼe fakakikite fenei ʼi te Tohi-Tapu.”
9. ʼE tonu koa ke tou lau te ʼu vaega Tohi-Tapu fuli moka tou fai te ako?
9 ʼE tonu koa ke tou lau te ʼu vaega Tohi-Tapu fuli, pe ko te ʼu vaega pe ʼae ʼe tohi ke lau? ʼE fakalogo pe anai ki te ʼu aluʼaga. ʼE ʼi ai te tupuʼaga ʼo te tuʼu ʼo te ʼu vaega ʼaia. ʼE maʼu ai ni manatu maʼuhiga ke tou faipalalau ki ai. Kaʼe ʼi ʼihi aluʼaga, ʼe tou lau pe anai mo ia te ʼu vaega ʼae ʼe tohi ke lau, heʼe lagi mole maʼu hona temi, pe mole ina faʼa leleiʼia te faʼahi ʼae ʼe tou palalau ki ai, pe mole poto lelei ʼi te lautohi.
10. Ko te temi fea ʼe tou hiki ai ki te tohi Te Ako Mai Te Tohi-Tapu?
10 Ko Te Temi Fea ʼe Tou Hiki Ai Ki Te Tohi Te Ako Mai Te Tohi-Tapu?: Moka kua tuʼa lahi tatatou faipalalau pea mo fai hoholo te ako, ʼe feala ai leva ke tou hiki ki te tohi Te Ako Mai Te Tohi-Tapu pe tou hoko atu te kaupepa lahi Te ʼu Logo Lelei ʼo kaku ki tona fakaʼosi. ʼE fakafuafua pe anai e te kau fai fakamafola te temi ʼae ke natou hiki ai ki he tahi tohi. Ka tou hiki ki te tohi Te Ako Mai Te Tohi-Tapu, ʼe tonu koa ke tou kamata ʼi te ʼuluaki kapite? ʼE mole he lao ki ai heʼe mole tou tatau fuli. Kaʼe ʼe fua lelei anai ki ʼihi kau ako moka ʼe tou vakaʼi loloto age ʼi te tohi Te Ako Mai Te Tohi-Tapu te ʼu manatu neʼe tou vakaʼi ʼi te kaupepa lahi.
11. He ko ʼe ʼe tou fakaʼaogaʼi lelei anai te kaupepa lahi foʼou ʼaeni?
11 ʼI te malama ʼaeni ʼae kua tahitahiga te logo ki he ʼu logo lelei, ʼe tou maʼu te pilivilesio lahi ke tou tala te ʼu logo ʼae ʼe lelei tokotahi, ʼae ʼe kua ʼafio te Puleʼaga ʼo te ʼAtua pea kua vave pe anai tana haga fakatuʼu he malama foʼou faitotonu! (Mat. 24:14; 2 Pet. 3:13) ʼE tou falala, tokolahi ʼe natou logo ki te logo lelei ʼaia pea ʼe natou manatu tahi anai mo te ʼu palalau ʼaeni ʼa te ʼAtua: “E natou matalelei osi i te u mouga, te u vae o ia ae e ina ave ni logo lelei, o ia ae e ina fakaha te tokalelei! O ia ae e ina ave ni logo lelei, o ia ae e ina fakaha te fakamauli! O ia ae e ina ui ki Sione: E hau tou Atua!” (Esa. 52:7) ʼOfa pe ke tou fakaʼaogaʼi te kaupepa lahi foʼou ʼaeni moʼo ʼave te ʼu logo lelei mai te ʼAtua ki te hahaʼi ʼo totatou telituale ʼae ʼe fia iinu!
[Fakamatala ʼo te pāsina 7]
Moka Mole Tui Te Hahaʼi Ki Te ʼAtua Mo Te Tohi-Tapu:
● Neʼe tokagaʼi e te kau faifakamafola ʼe fakatuʼu e ʼihi te faipalalau moka natou logo ki te ʼu kupu “ ʼAtua” pea mo “Tohi-Tapu.” Koia, ka tou olo ki ʼonatou ʼapi, ʼe lelei age ke tou faipalalau ki he ʼu faʼahi ʼe natou fia logo ki ai, ohage la ko te fia maʼu ʼo he kau takitaki fenua ʼe lelei, mo te maʼu ʼo he ʼu tokoni lelei ki te maʼuli fakafamili, pea mo te ka haʼu. ʼE lagi feala ke tou fakaha te kaupepa lahi Te ʼu Logo Lelei moka kua tuʼa lahi tatatou faipalalau mo natou, ʼo tou vakaʼi ai pe feafeaʼi hatatou iloʼi ʼe maʼuli moʼoni te ʼAtua pea he ko ʼe ʼe tuha te Tohi-Tapu mo te falala.
[Fakamatala ʼo te pāsina 7]
Moka Tou Faifakamafola ʼi Te ʼu ʼApi:
● “ ʼE ma ʼomai ʼi te ʼaho nei ʼo fakaha atu te manatu ʼa te ʼAtua ʼo ʼuhiga mo te ka haʼu ʼo te malamanei. Neʼe heʼeki ke feʼekeʼaki koa la pe pulihi anai e te ʼAtua ʼotatou mamahi? [Tuku ke fai mai hana tali.] ʼE fakaha ʼi te kaupepa lahi ʼaeni te vaega Tohi-Tapu ʼe tali ki te fehuʼi ʼaia. [Fakatoʼo age hana kaupepa lahi, pea lau te ʼuluaki palakalafe ʼo te kapite 1, pea mo Selemia 29:11.] Kia koe la, ʼaki te ʼu palalau ʼaeni, ʼe loto koa e te ʼAtua ke tou maʼu he maʼuli lelei ʼi te ka haʼu? [Tuku ke fai mai hana tali.] Kapau ʼe ke loto ki ai, ʼe au tuku atu te kaupepa lahi ʼaena. ʼI he tahi ʼaho, ʼe feala ke ta vakaʼi ʼi te lua palakalafe te tali ʼi te Tohi-Tapu ki te fehuʼi ʼaeni: ʼE pulihi feafeaʼi anai e te ʼAtua te ʼu faʼahi ʼae ʼe tupu ai te mamahi ʼo te malamanei?” Kapau ʼe kotou tokagaʼi ʼe maʼu pe hona temi, pea ʼe feala ke kotou lau te lua palakalafe mo ʼona vaega Tohi-Tapu ʼe tolu, pea mo faipalalau ki ai. Kotou fakatuʼutuʼu ke kotou toe liliu age ʼo vakaʼi te lua fehuʼi ʼo te kapite.
● “Tokolahi ʼe natou faikole, tafitō moka natou tau mo ni fihifihia. ʼE lagi ke toe faikole la mo koe? [Tuku ke fai mai hana tali.] ʼI tau manatu, ʼe fakalogo koa e te ʼAtua ia te ʼu faikole fuli, pe ʼe ʼi ai koa ni faikole ʼe mole ina tali? [Tuku ke fai mai hana tali.] Neʼe au haʼu mo te kaupepa lahi ʼe fakaha ai te tali ki te ʼu fehuʼi ʼaia ʼi te Tohi-Tapu. [Fakatoʼo age hana kaupepa lahi, pea kotou lau te ʼuluaki palakalafe ʼo te kapite 12 pea mo te ʼu vaega ʼae ʼe tohi ke lau.] ʼE tou fakafetaʼi ki te lotolelei ʼa te ʼAtua ke fakalogo ki ʼatatou faikole. Kaʼe ke tou maʼu te ʼu lelei katoa ʼo te faikole, ʼe ʼaoga ke tou iloʼi lelei te ʼAtua. [Fuli age te kapite 2 pea mo lau age te ʼu fehuʼi ʼae ʼe tohi fakamatolu.] Kapau ʼe ke loto ki ai, ʼe au tuku atu te kaupepa lahi ʼaena, pea ʼi he tahi ʼaho, ʼe feala ke ta lau te ʼu tali ʼi te Tohi-Tapu ki te ʼu fehuʼi maʼuhiga ʼaia.”
● “Neʼe ma ʼomai ʼi te ʼaho nei heʼe tokolahi natou ʼe tuʼania ʼo ʼuhiga mo te ʼu aluʼaga ʼo te malamanei. ʼI tau manatu la, ʼe fakaʼaluʼalu anai koa ʼo lelei? [Tuku ke fai mai hana tali.] Tokolahi ʼe natou punamaʼuli ʼi tanatou lau ʼi te Tohi-Tapu te ʼu logo lelei, ʼe feala ai ke tou loto falala. Koʼeni te ʼu fehuʼi ʼe tali ki ai te Tohi-Tapu.” Fakatoʼo age hana kaupepa lahi, pea fakaafe ia ia ke ina filifili ʼi te tuʼa takafi he fehuʼi ʼe fia palalau ki ai. Pea kotou fuli te kapite, pea mo fakaha age pe feafeaʼi te fai ʼo he ako. Kotou fakatuʼutuʼu ke kotou toe liliu age ʼo vakaʼi te fehuʼi ʼae ʼe hoa ki ai.
[Fakamatala ʼo te pāsina 7]
Kotou Kole Fakahagatonu:
● “ ʼE ma ʼaʼahi koe ʼi te ʼaho nei, heʼe ma fia fakaha atu te faʼahiga fai foʼou ʼo he ako Tohi-Tapu. Ko te kaupepa lahi ʼaeni mo ʼona kapite ʼe 15, ʼe fakaha ai te ʼu tali ki te ʼu fehuʼi maʼuhiga ʼe ke lava maʼu ʼi tau Tohi-Tapu. [Fakaha age te takafi ʼo te kaupepa lahi.] Neʼe kua ke faiga koa ke ke mahino ki te Tohi-Tapu? [Tuku ke fai mai hana tali.] ʼE au fia fakaha atu te faigafua ʼo te ʼu kapite ʼaeni. [Vakaʼi te ʼuluaki palakalafe ʼo te fehuʼi 3 ʼi te kapite 3, pea lau ia Apokalipisi 21:4, 5. Kapau ʼe feala, lau te palakalafe ʼae ʼe hoa ki ai mo te ʼu vaega Tohi-Tapu ʼae ʼe tonu ke lau.] Kapau ʼe ke loto ki ai, ʼe feala haku tuku atu te kaupepa ʼaia. ʼE feala ke ke ʼahiʼahiʼi te faʼahiga fai foʼou ʼaeni ʼo te ako. Kapau ʼe ke leleiʼia, pea ʼe feala hatatou hoko atu. ʼI he tahi ʼaho, ʼe feala ke tou vakaʼi te ʼuluaki kapite. ʼE ke tokagaʼi, ʼe ko tona pasina pe ʼe tahi.”
[Fakamatala ʼo te pāsina 7]
Moka Tou Fai He ʼAʼahi:
● “ ʼE au fiafia ʼi tatā toe felaveʼi. Neʼe au haʼu mo te kaupepa lahi ʼaeni ʼe maʼu ai te ʼu tali ʼi te Tohi-Tapu ki te ʼu fehuʼi maʼuhiga. [Fakatoʼo age hana kaupepa lahi, pea fakaafe ke ina vakaʼi te tuʼa takafi.] Ko te fehuʼi fea la ʼae ʼe ke fia iloʼi tona tali? [Tuku ke fai mai hana tali. Pea kotou fuli te kapite ʼae neʼe ina filifili.] ʼE au fia fakaha atu peʼe feafeaʼi te fakaʼaogaʼi ia te kaupepa lahi ʼaeni moʼo maʼu te tali ʼi te Tohi-Tapu.” Kotou fakaha age pe feafeaʼi te fai ʼo he ako, ʼaki takotou vakaʼi he palakalafe ʼe tahi pe lua mo te ʼu vaega ʼae ʼe tonu ke lau. Kua kotou kamata leva he ako Tohi-Tapu! Kotou tuku kia ia hana kaupepa lahi, pea mo fakatuʼutuʼu ke kotou toe liliu age. Ka ʼosi te kapite, ʼe feala hakotou vakaʼi he tahi kapite ka ina filifili anai, pe kotou kamata ʼi te ʼuluaki kapite.