Tou Tala Te Logo Lelei ʼo Te Puleʼaga ʼAki Te ʼu Kaupepa
1 ʼE ko he meʼa fakafiafia te ʼiloʼi ʼo te moʼoni, pea mo te kau kia nātou ʼaē ʼe faiva ʼi te fakahā ʼo te logo lelei! Ko te hahaʼi ʼaē ʼi tuʼa ʼo te kautahi ʼa te ʼAtua ʼe ʼaoga ʼaupito ke nātou fagono ki te logo lelei ʼo te Puleʼaga. Ko te moʼoni ʼo ʼuhiga mo te Puleʼaga ʼe fakamahino fakalelei ʼi te kaupepa Fiafia Kite Mauli Heegata Ite Kele!, pea mo te kaupepa Kote puleaga ae ka ina fakatuu anai te Palatiso. ʼE nā fakahā fakalelei ai te ʼu paki ʼo te maʼuli ʼi te kele, ʼi te pule ʼa te Puleʼaga ʼo te ʼAtua, pea ʼe nā taki te kau lautohi ki te ʼu moʼoni ʼo te Puleʼaga ʼaē ʼe fakamahino ʼi te Folafola ʼa te ʼAtua. ʼE mahino ia, ko te tufa ʼo he kaupepa ki he tahi ʼe fia logo ki te moʼoni, ʼe ko te kamataʼaga ʼaia ʼo tatatou gāue. (1 Ko. 9:23) Tou ʼolo fakavilivili ʼo ʼaʼahi ia nātou ʼaē neʼe nātou toʼo te ʼu kaupepa, ʼo tou fakatuʼutuʼu ke tou fai he ako ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. ʼE lava feafeaʼi hatatou fakahoko te faʼahi ʼaia lolotoga te māhina ʼo ʼAukusito?
2 ʼE feala ke koutou tufa te kaupepa “Fiafia Kite Mauli Heegata Ite Kele!” ʼaki he palalau fakanounou. ʼI takotou fakahā te takafi ʼo te kaupepa, ʼe feala ke koutou ʼui fēnei:
◼ “ ʼE ʼau fia fakahā atu te kaupepa ʼe maʼu ai te logo lelei.” Koutou avahi te kaupepa Mauli Heegata Ite Kele, pea koutou lau te ʼuluaki palakalafe ʼo te ʼuluaki pasina. Pea koutou ʼui fēnei: “Tahi ʼaē meʼa ʼe ina tali ki te fehuʼi ʼaenī [tou toʼo te paki numelo 8]: ‘Kotea e mate ai te tagata?’ ʼE ke leleiʼia anai te fakasiosio ʼo te ʼu paki pea mo te lau ʼo te ʼu vaega ʼaē ʼi te kaupepa ʼaenī. Koia, kapau ʼe ke lotolelei kiai, pea ʼe ʼau tuku atu te kaupepa, ko tona totogi fakaʼofa pe ko te falā 50.”
3 Koteā te meʼa ʼaē ʼe feala ke koutou ʼui mokā koutou liliu ʼo ʼaʼahi he tahi, neʼe koutou tuku kiai te kaupepa “Mauli Heegata Ite Kele”? ʼE feala ke koutou ʼahiʼahiʼi te ʼu palalau ʼaenī:
◼ Koutou fakahā te paki numelo 49 ʼi te kaupepa Mauli Heegata Ite Kele, pea koutou fehuʼi fēnei age, “ ʼE mole matalelei koa la te paki ʼaenī? [Tuku ke fai atu hana tali.] Ko te paki ʼaenī ʼe tuʼu ʼi te kaupepa ʼaē neʼe ʼau tuku atu ʼi taku ʼaʼahi talu mai ai. ʼE ʼau fia fai atu pe te fehuʼi ʼaē ʼe tuʼu ʼi te pasina ʼe hoa mai.” Koutou fuli ki te paki numelo 50 pea mo koutou lau te fehuʼi: “ ‘ E kotou fia mauli o heegata ʼi te palatiso taulekaleka aeni?’ [Tuku ke fai atu hana tali.] Kapau ʼe ke loto kiai, pea fakatokagaʼi te meʼa ʼaē ʼe tonu ke ke fai: ‘ ʼE tonu ke koutou mālama lelei ki te ʼu folafola ʼa te ʼAtua.’ [Lau ia Soane 17:3.] ʼE ʼau fiafia anai ʼi te ako ʼo te Tohi-Tapu mo koe. ʼE ke loto koa kiai?” Koutou fakatuʼutuʼu he ʼaho ke koutou toe ʼaʼahi ia ia.
4 Peʼe, mokā koutou tufa te kaupepa “Mauli Heegata Ite Kele,” ʼe feala ke kamata takotou palalau ʼo koutou fakahā age te paki ʼo te takafi pea mo koutou fehuʼi age:
◼ “Koteā tau manatu ki te fakaliliu ʼo te kele ke hage ko te paki ʼaenī?” Tuku ke fai mai hana tali. Koutou talanoa ki te paki. ʼOsi ʼaia pea koutou ʼui age fēnei: “ ʼE lahi ʼaupito te hahaʼi ʼe nātou ʼui mai ʼe faigataʼa te fakatuʼu ʼo he mālama ke tatau mo te paki ʼaenī. Kae ʼe mole faigataʼa ki te ʼAtua ke ina fakahoko te faʼahi ʼaia. [Tou fakahā age te ʼu puani ʼo te paki numelo 41; pea tou lau ia Isaia 9:6.] Neʼe fakapapau e te ʼAtua ʼe ina fakatuʼu anai he mālama foʼou ko he palatiso taulekaleka, pea ʼe maʼuli fiafia ai anai te hahaʼi ʼe ʼōmai mai te ʼatu ʼu puleʼaga fuli. ʼE ʼau fia tuku atu te kaupepa ʼaenī ke ke lau, ko tona totogi fakaʼofa pe ko te falā 50. ʼE ina fakahā atu anai peʼe lava feafeaʼi hau maʼu mo tou famili te ka haʼu fakafiafia ʼaē ka foaki mai anai e te ʼAtua.”
5 ʼI te fai ʼo te ʼaʼahi, ʼe feala ke koutou fakaʼaogaʼi te kaupepa “Mauli Heegata Ite Kele” moʼo fakamahino pe koʼe ʼe tonu ke lahi tatatou ako te Tohi-Tapu. E lagi ʼe lelei ke koutou toe fakahā age te takafi ʼo te kaupepa pea koutou ʼui fēnei age:
◼ “ ʼI taku ʼuluaki fakahā atu te paki ʼaenī, neʼe tā manatu tahi ki te ʼui ʼaē, ʼe tou fia maʼuʼuli ʼi he mālama taulekaleka feiā. Ke feala te faʼahi ʼaia, ʼe ʼi ai te meʼa ʼe tonu ke tou fai fuli.” Tou vakaʼi te paki numelo 50; tou lau te fehuʼi pea mo te vaega ʼo Soane 17:3. ʼOsi ʼaia pea tou fakamahino age ko te kau Fakamoʼoni ʼa Sehova ʼe nātou fai te ʼu ako Tohi-Tapu ʼe mole totogi. Tou fakahā age te faʼahiga fai ʼo te ako, ʼo tou fakaʼaogaʼi te tohi Te ʼAtamai Mālama.
6 Mokā koutou tufa te kaupepa “Kote puleaga ae ka ina fakatuu anai te Palatiso,” ʼe feala ke koutou ʼui fēnei:
◼ “Ko te tokolahi ʼo te hahaʼi ʼe nātou ʼui ʼe nātou fia maʼuʼuli ʼi he puleʼaga ʼe feala ke ina fakatokatoka moʼoni te ʼu fihifihia lahi ʼaē ʼe tau mo tatou ia ʼaho nei. [Koutou talanoa ki te ʼu fihifihia ʼo te telituale ohage ko te mole maʼu ʼo he gāue, te fai fakapō, peʼe ko te fakaʼaogaʼi fakavale ʼo te toloke.] Ko te ʼu meʼa ʼaia ʼe tupu ai tatatou maʼuli tuʼania ʼo ʼuhiga mo totatou ka haʼu, pea mo te ka haʼu ʼo te ʼu hahaʼi ʼaē ʼe tou ʼofa mamahi ai. ʼI takotou manatu ʼe ʼi ai anai koa he puleʼaga ʼe ina fakatokatoka anai te ʼu fihifihia ʼaia? [Tuku ke fai atu hana tali.] E lagi koutou fai te kole ʼaē ko te Tāmai ʼe ʼi selo. Kapau koia ʼaia, pea ʼe koutou ʼiloʼi koa la ʼe koutou faikole ai ʼo ʼuhiga mo he puleʼaga faitotonu?” Koutou fuli age ki te pasina 3 ʼo te kaupepa Puleaga, ʼo lau age te ʼu ʼuluaki palakalafe e lua, ʼosi ʼaia pea koutou tuku age te kaupepa ko tona totogi fakaʼofa ko te falā 50.
7 Kapau neʼe koutou tuku te kaupepa “Kote puleaga ae ka ina fakatuu anai te Palatiso,” ʼe feala ke koutou kamata takotou ʼaʼahi ʼo koutou ʼui fēnei:
◼ “ ʼI taku haʼu talu mai ai, neʼe tā palalau ki te ʼaoga ʼaē, ke ʼi ai he puleʼaga faitotonu ke ina fakatokatoka te ʼu fihifihia ʼa te tagata. Ko te kaupepa ʼaē neʼe ʼau tuku atu, ʼe ina fakahā ai ko te Puleʼaga ʼo te ʼAtua ʼe ko tatatou falalaʼaga pe ʼaia e tahi. Ko ʼihi hahaʼi ʼe nātou feʼekeʼaki pe koteā te meʼa ʼaē ka fai anai e te puleʼaga ʼaia moʼo hikihiki ʼo te ʼaluʼaga ʼo totatou maʼuli. ʼE fakahā mai e te Tohi-Tapu, neʼe kua fakamoʼoni e Kilisito ʼe ina fakahoko anai te ʼu meʼa ʼaē neʼe mole feala ke fakahoko e te ʼu puleʼaga fakatagata.” Koutou avahi te kaupepa Puleaga ʼi te pasina 29, pea koutou lau te ʼu palakalafe fakamuli ʼaē e fā. Pea tou ʼui fēnei: “ ʼE mole koa la ko he ka haʼu taulekaleka ʼaenī? ʼE koutou fia sio koa ki te faʼahi ʼaia?” Koutou tuku ke fai atu hana tali. Koutou lau ia Soane 17:3. Koutou fakaloto mālohiʼi ke fai hana ako Tohi-Tapu.
8 Kapau ʼe koutou fakaʼaogaʼi he tahi ʼu kaupepa, pea ʼe feala ke koutou teuteuʼi hakotou ʼu faʼahiga palalau, ʼo koutou fakaʼaogaʼi te ʼu faʼifaʼitaki ʼaē ʼe tuʼu ʼi ʼoluga. Koutou teuteuʼi lelei pea mo koutou kole kia Sehova ke tokoni atu kia koutou ʼi takotou tala te logo lelei ʼo te Puleʼaga.