Koutou Fakaʼaogaʼi Te ʼu Kaupepa Lalahi Kehekehe ʼi Takotou Minisitelio
1 Ko te hahaʼi ia ʼaho nei ʼe nātou fia logo ki he ʼu fakamatala kehekehe. Ka koutou kau ki te gāue fai faka mafola ʼi Sūlio, ʼe feala ke koutou toʼo he ʼu kaupepa kehekehe, ʼo koutou fakaʼaogaʼi he kaupepa ʼe fia toʼo anai e te hahaʼi ʼi te telituale. E lagi ʼe koutou fia fakaʼaogaʼi anai he faʼifaʼitaki ʼi te ʼu faʼifaʼitaki ʼaenī:
2 Ka Koutou fakahā te kaupepa lahi ʼaenī “Kote puleaga ae ka ina fakatuu anai te Palatiso,” ʼe feala ke koutou fehuʼi age:
◼ “ ʼI takotou manatu ʼe feafeaʼi anai te mālama mo ka na pau la neʼe puleʼi pe e te ʼAtua tokotahi? [Faka fealagia ke fai mai hana tali.] Ke fai te pule ʼa te ʼAtua ki te kele ʼe ko te meʼa tāfito ʼaia ʼe tou kole mokā tou fai te Faikole ʼaē ko Tatatou Tāmai, ʼaē neʼe akoʼi mai e Sesu. [Fakahā age te pasina 3, pea koutou lau te ʼuluaki palakalafe, ʼaē ʼe tuʼu ai ia Mateo 6:10.] Kapau ʼe koutou fia maʼuli anai ʼi he mālama ohage ko te mālama ʼaē ʼe tuʼu ʼi te paki ʼaenī, ʼe tonu anai ke koutou lau te kaupepa ʼaenī.” Koutou tuku ki ai te kaupepa ʼi muʼa ʼo takotou mavete.
3 “Mokā Mate He Tahi ʼe Tou ʼOfa Mamahi Ai” ʼe feala hakotou ʼui age fēnei:
◼ “ ʼI takotou manatu ʼe ʼi ai anai koa he ʼaho ʼe mole toe mate ai anai he tahi ʼe tou ʼofa mamahi ai? [Faka fealagia ke fai mai hana tali.] Ko te kaupepa matalelei ʼaenī neʼe ina fakafimālie te lauʼi miliona hahaʼi ʼaki te fakapapau moʼoni ʼa te Tohi-Tapu ʼo ʼuhiga mo te ʼaho ʼaia kua ōvi mai. [Fakahā age te pasina 5, pea lau age te palakalafe nima, ʼo kau ai mo te tohi ʼo 1 Kolonito 15:21, 22. ʼOsi ʼaia pea koutou fakahā age te paki ʼo te pasina 30.] Ko ia ʼaē neʼe ina fai te paki neʼe ina fakahā lelei te fiafia ʼaē ʼe feala ke tou maʼu ʼi tatatou toe felāveʼi mo te hahaʼi ʼaē neʼe tou ʼofa mamahi ai ʼi te fakatuʼuake. Kae ko te fiafia ʼaia ʼe hoko anai ʼifea? Ko te kaupepa ʼaenī ʼe ina fakahā atu anai te tali ʼa te Tohi-Tapu ki te fehuʼi ʼaia.” Kapau neʼe toʼo te kaupepa ʼaia, ʼe feala ke koutou toe ʼui age ki ai: “ ʼE ʼau fia liliu mai anai moʼo hoko atu te fai palalau ʼo ʼuhiga mo te manatu ʼaia.”
4 ʼE feala ke koutou fakahā te kaupepa lahi ʼaenī “ ʼE tokaga moʼoni koa te ʼAtua kia tatou?” ʼo koutou fakaʼaogaʼi te palalau fakahagatonu ʼaenī moʼo kamata ʼo he ako faka Tohi-Tapu:
◼ Tokolahi te hahaʼi ʼe ʼi ai tanatou ʼu fehuʼi ʼo ʼuhiga mo te Tohi-Tapu. E lagi neʼe koutou feʼekeʼaki pe koteā te tali ʼo te fehuʼi neʼe fia mahino kiai te tokolahi: ‘ ʼE tokaga moʼoni koa te ʼAtua kia tatou?’ Kapau ʼe koutou fai palalau ki te ʼu palakalafe ʼo te pasina 3 ki te 4 pea mo lau age ia Isaia 14:24, ʼe koutou teuteuʼi anai te fakatafito ʼo he ako faka Tohi-Tapu. Fakaʼosi te fai palalau ʼaki takotou tuku ki ai te kaupepa pea koutou fai he fakatuʼutuʼu ke koutou toe liliu mai ke hoko atu takotou palalau ki he tahi ʼu fehuʼi.
5 E lagi ʼe koutou fia ʼahiʼahi anai te faʼifaʼitaki faigafua ʼaenī ʼaki te kaupepa “Fiafia Kite Mauli Heegata Ite Kele”:
◼ “Ko te ʼuluaki meʼa neʼe ʼau ako ʼi te Tohi-Tapu neʼe ko te huafa ʼo te ʼAtua. ʼE koutou ʼiloʼi koa pe ko ai tona huafa? [Faka fealagia ke fai mai hana tali.] ʼE ʼau fia fakahā atu te huafa ʼaia. ʼE tuʼu te huafa ʼaia ʼi te Tohi-Tapu ia Pesalemo 83:18. Koutou lau age.] Ko te kaupepa ʼaenī ʼe ina fakamahino mai peʼe feafeaʼi te atolasioʼi ʼo te ʼAtua ʼo mulimuli pe ki tona finegalo. Kapau ʼe lahi takotou fia ʼiloʼi ia Sehova pea mo tana ʼu fakatuʼutuʼu, ʼe tonu anai ke koutou lau te kaupepa ʼaenī.” Koutou foaki age te kaupepa kia ia ʼaē ʼe palalau mo koutou.
6 ʼAki te lahi ʼo te ʼu kaupepa lelei ʼaē ʼe tou fakaʼaogaʼi, ʼe mahino ia kua tou teuteu lelei moʼo “fakahā ki te kau agavaivai he logo lelei.”—Is. 61:1.