Tou Falala Kia Sehova ʼAē ʼe Ina Fakatuputupu Te ʼu Meʼa
1 “Ko taku hoki ʼiloʼi pe ʼaē te fiafia ʼi te lagolago ki te fakatuʼu ʼo he kokelekasio foʼou. Ko te gāue ʼaia neʼe hoko ʼo fakalaka ia taʼu e lua, ʼaki te faikole tuʼumaʼu pea mo te falala kia Sehova ʼaē ‘ ʼe ina fakatuputupu te ʼu meʼa.’ ” Ko te tohi ʼaia ʼa te pionie neʼe ina ako ʼe tonu ke falala kia Sehova ke feala ai he tuputupu. (1 Ko. 3:5-9) ʼI tatatou kumi te hahaʼi ʼaē ʼe fia fai ki te ʼu meʼa fakalaumālie, ʼe toe ʼaoga foki kia tatou te tokoni ʼa te ʼAtua ke fua tatatou minisitelio.—Taag. 3:5, 6.
2 Ke Feala He Tuputupu ʼe Tonu Ke Gāueʼi: Ke feala he tuputupu ʼo te pulapula ʼo te moʼoni ʼe tonu ke gāueʼi. Ko te fai ʼo te ʼu ʼaʼahi ʼi te hili ʼo he ʼaho e tahi peʼe lua ki te ʼuluaki fai palalau ʼe kita maʼu ai he ʼu fua ʼe lelei ʼi te agamāhani. Koutou loto fiafia pea mo aga fakakāiga. Koutou fai he ʼu palalau fakaloto fīmālie kia ia ʼaē ʼe palalau mo koutou. ʼAua naʼa koutou palalau tuʼumaʼu. Koutou faka fealagia kia ia ke ina ʼiloʼi koutou, pea koutou fakahā ki ai ʼe koutou tokaga kia ia.
3 Lolotoga te māhina ʼo Sūlio pea ʼo hoko atu mo ʼAukusito, ʼe tou tokakaga anai ʼo tufa te ʼu kaupepa kehekehe ki te hahaʼi ʼe felāveʼi mo tatou. Kae ʼe tonu foki ke tou toe ʼaʼahi te hahaʼi ʼaē neʼe fia logo ki te moʼoni pea mo nātou ʼaē neʼe nātou toʼo te ʼu kaupepa. ʼE tou fai te faʼahi ʼaia ʼaki tatatou ʼaʼahi te hahaʼi pea mo tou fai he ʼu ako Tohi-Tapu. (Mat. 28:19, 20) ʼI te faʼahi ʼaia, ko te kaupepa Fakamaʼua ʼe feala ke fakaʼaogaʼi moʼo kamata ʼaki he ʼu ako Tohi-Tapu. ʼE feala ke koutou mulimuli ki te ʼu faʼifaʼitaki ʼaoga ʼaenī e fā.
4 Kapau neʼe koutou palalau mo he tahi ʼe ina tuʼaniaʼi te ʼaluʼaga ʼo te malamanei, ʼe feala ke koutou ʼui fēnei:
◼ “ ʼE ʼau ʼiloʼi papau ʼe ke tuʼania ohage pe ko ʼau ʼuhi ko te mole kei fai ʼo te ʼu aga ʼaē ʼe tonu ke fai ʼi te sosiete fakatagata ʼaenī. ʼE tou logo ki te ʼu fakamatala fakatupu lotomamahi ʼo te ʼu agamālohi ʼi te ʼu famili, te gaohi koviʼi ʼo te ʼu fānau, te ʼu mātuʼa, pea mo te ʼu agamālohi ʼa he taumatuʼa. Pea ʼe hage ʼi te manatu ʼa te tokolahi ʼe mole kovi te loi peʼe ko te kaihaʼa moʼo fakahoko ʼo te ʼu meʼa ʼaē ʼe nātou holi kiai. ʼI tau manatu ʼe tokagaʼi koa e te ʼAtua te maʼuli ʼo te ʼu hahaʼi ʼaia? [Tuku ke fai atu hana tali.] Neʼe fakatuʼu e te ʼAtua he ʼu lekula ke maʼuliʼi e te tagata, pea ʼe mole mamafa ia kia tatou.” Lau ia 1 Soane 5:3. Pea tou fakahā te kaupepa Fakamaʼua, pea tou avahi te ako 10. Tou lau te ʼuluaki palakalafe. Tou fakahā te ʼu kupu ʼaē ʼe tohi faka italike ʼi te kamataʼaga ʼo te palakalafe 2 ki te 6, pea tou fehuʼi age ki ai pe ko te aga fea ʼaē ʼe kovi ʼaupito ʼi te sosiete. Lau te palakalafe pea vakaʼi he vaega e tahi peʼe lua ʼo mulimuli ki te fealagia ʼo te temi. Fakaʼosi te palalau ʼo lau te palakalafe 7, pea fai he ʼu fakatuʼutuʼu ke toe liliu ʼo hoko atu te fai palalau.
5 Kia nātou ʼaē ʼe nātou tuʼaniaʼi tonatou famili, ʼe feala ke koutou ʼui fēnei:
◼ “ ʼI tau manatu ʼe fakapotopoto koa hatatou fakaʼamu ʼe foaki mai anai e te Tupuʼaga te ʼu meʼa ʼaē ʼe ʼaoga moʼo laga ʼo he maʼuli faka famili ʼe fua lelei?” Tuku ke fai atu hana tali. Fakahā te kaupepa Fakamaʼua, tou fuli ki te ako 8, pea tou fakamahino age ʼe tuʼu ai te ʼu pelesepeto ʼe haʼu mai te Tohi-Tapu ʼe ʼaoga ki te famili katoa. Fai he faʼifaʼitaki ʼo fakahā ai peʼe feafeaʼi te fakaʼaogaʼi ʼo te kaupepa mo te Tohi-Tapu ke maʼu ai he ʼu fua lelei lahi. Tou mulimuli ki te ʼu tokoni ʼaē ʼe tuʼu ʼi te pasina 2 ʼo te kaupepa. Tou fai he ʼu fakatuʼutuʼu ke tou toe liliu mai ʼo hoko atu te ako, peʼe kapau kua ʼosi te ako ʼaia, pea tou fai he tahi ako neʼe ina fili ʼi te kaupepa.
6 Koʼeni te faʼahiga palalau fakahagatonu ʼe feala ke koutou fakaʼaogaʼi moʼo fakahā ʼo tatatou polokalama ako Tohi-Tapu. Koutou fakahā te kaupepa “Fakamaʼua,” pea koutou ʼui age:
◼ “Ko te kaupepa ʼaenī ʼe tuʼu ai te ako lelei, ko te ʼu akonaki tāfito ʼo te Tohi-Tapu. ʼI te ʼu pasina fuli, ʼe koutou maʼu ai anai te ʼu tali ki te ʼu fehuʼi ʼaē neʼe tuʼaniaʼi e te hahaʼi talu mai te ʼu sēkulō. Ohage la, Koteā te fakatuʼutuʼu ʼa te ʼAtua ki te kele?” Tou fuli age ki te ako 5, pea tou lau te ʼu fehuʼi ʼi te kamata ʼo te ako. Tou fehuʼi age ki ai pe ko te meʼa fea ʼaē ʼe fia logo tāfito kiai, pea tou lau te (ʼu) palakalafe ʼe ʼalutahi mo tana manatu, tou kumi mo te ʼu vaega faka Tohi-Tapu ʼaē ʼe ʼaoga kiai. Tou fakamahino age ʼe feala ke ina toe maʼu he tahi ʼu tali fakaloto fīmālie ki he tahi ʼu fehuʼi ohage pe ko te fai ʼaenī. Tou ʼui age ʼe tou toe liliu mai anai ʼo hoko atu te fai palalau ki he tahi fehuʼi pea mo he tahi tali.
7 Peʼe koutou loto ke koutou ʼahiʼahi he palalau faigafua moʼo kamata he ako Tohi-Tapu ʼo koutou ʼui age:
◼ “ ʼI he kiʼi temi nounou, ʼe feala ke ke ʼiloʼi ai he tali ki he fehuʼi maʼuhiga ʼo te Tohi-Tapu? Ohage la, . . .” ʼOsi ʼaia pea koutou lau he fehuʼi ʼe tuʼu ʼi te kamataʼaga ʼo te ʼu ako ʼo te kaupepa, he fehuʼi ʼe koutou ʼui ʼe fia logo anai kiai. ʼO ʼuhiga mo he tahi ʼu fehuʼi ʼe feala ke koutou fakaʼaogaʼi, koutou vakaʼi te ʼu palakalafe 15 ki te 16 ʼo te pepa ʼaē ʼe ʼalutahi mo Te Minisitelio ʼo Te Puleʼaga ʼo Malesio 1997, ko tona kupu tāfito: “Ke Tou Lototoʼa ʼo Fai Te ʼu ʼAʼahi.”
8 Ko te tali fakafiafia ʼo te fai ʼo te ʼu ʼaʼahi pea mo te ʼu ako Tohi-Tapu ʼe ko te koga tāfito ʼe fai e te ʼu “kaugā gāue” ʼa te ʼAtua. (1 Ko. 3:9) ʼI tatatou gāue kinakina moʼo uga te fia logo ʼa te hahaʼi ʼaē ʼe felāveʼi mo tatou pea mo tatatou falala kia Sehova ʼaē ʼe ina fakatuputupu te ʼu meʼa, ʼe tou maʼu ai anai te fīmālie moʼoni ʼe mole feala ke foaki mai e he tahi age gāue.