Ke Taupau
He ʼu Palalau Ki Te Fai Faka Mafola
Te Fakaʼaoga ʼo Te Pepa ʼAenī
Ko ʼihi palalau ʼaē ʼe hoa mai neʼe kua tā ʼi te ʼu Minisitelio ʼo Te Puleʼaga ki muʼa atu. Koutou fakaʼaogaʼi lahi te ʼu palalau ʼaia ʼi takotou gāue fai faka mafola, pea mo koutou sio ki tona ʼu fua lelei. Koutou taupau te pepa ʼaenī, pea mo koutou fakaʼaogaʼi mokā koutou teuteu ki te fai faka mafola.
ʼE koutou lava uga he tahi ke ina fia ʼiloʼi te Tohi-Tapu, mo kapau ʼe koutou foimo palalau ki te manatu tāfito. Koutou lagaʼi he fehuʼi ʼo ʼuhiga mo te manatu tāfito ʼaia, pea koutou lau te tali nounou ʼi te Tohi-Tapu. ʼE feala hakotou fakaʼaogaʼi te ʼu manatu ʼaenī:
“Ka ke fakakaukau ki te ka haʼu, ʼe ke loto falala koa peʼe ke lotolotolua? [Tuku ke fai mai hana tali.] Neʼe fakakikite e te Tohi-Tapu te ʼu maveuveu ʼaē ʼe tou sio kiai ʼi te temi nei pea mo tonatou ikuʼaga.”—2 Tim. 3:1, 2, 5; Taag. 2:21, 22.
“Ia ʼaho nei, ʼe lahi te tuʼania ʼa te hahaʼi ʼo ʼuhiga mo te mahaki. ʼE ke ʼiloʼi koa ʼe fakapapau mai e te ʼAtua ʼe ina pulihi anai te ʼu mahaki fuape, ʼo talu ai?”—Isa. 33:24; Apk. 21:3, 4.
“ ʼE ke ʼiloʼi koa la ʼe fakakikite e te Tohi-Tapu ʼe hoko mai anai he temi ʼe ko te puleʼaga pe e tahi ʼaē ka ina puleʼi te malamanei?”—Tan. 2:44; Mat. 6:9, 10.
“ ʼI tau manatu la, ʼe feafeaʼi anai te kele mo kanapaula neʼe puleʼi e Sesu Kilisito?”—Pes. 72:7, 8.
“Tokolahi te hahaʼi ʼe nātou lotomamahi heʼe meʼa noaʼi nātou, ʼuhi ko tanatou lotu peʼe ko tanatou lanu. Kia koe la, koteā te manatu ʼa te ʼAtua ʼo ʼuhiga mo te fakapalatahi ʼaia ʼa te hahaʼi?”—Gaue 10:34, 35.
“ ʼE tou ʼiloʼi neʼe fakahoko e Sesu Kilisito te ʼu tuʼuga milakulo ʼi tona temi. Kapau neʼe feala hau kole kia te ia ke ina fakahoko he tahi milakulo, koteā anai te milakulo ʼaia?”—Pes. 72:12-14, 16.
“Tokolahi te hahaʼi kua nātou fiu ʼi te logo ki he ʼu fihifihia. ʼE nātou fia logo ki he ʼu puleʼaki ki tanatou ʼu fihifihia. Kae ʼe tou lava maʼu koa ʼifea he ʼu puleʼaki moʼoni ki tatatou ʼu fihifihia?”—2 Tim. 3:16, 17.
“ ʼE ke ʼiloʼi koa pe koteā te Puleʼaga ʼaē ʼe ke faikole kiai ʼi Te Tāmai ʼi Selo?”—Apk. 11:15.
Moʼo Kamata He Fai Palalau
Ko te lisi ʼo te ʼu fehuʼi ʼaē ʼe tuʼu ʼi lalo, neʼe toʼo mai te kaupepa Te ʼu Tokoni Ki Te ʼu Fai Palalau Faka Tohi-Tapu, ʼe fakahā ai te ʼu pasina ʼaē ʼe tuʼu ai te ʼu tali:
Koteā ʼaē ʼe feala ke tou ako mai te hisitolia ʼo Malia ʼi te Tohi-Tapu? (15-16)
Neʼe koteā te ʼu “kalavi” ʼaē neʼe foaki age kia Petelo? (24-25)
ʼE fakahā koa e te Tohi-Tapu ʼe mamahi te kau mate? (30)
ʼE ʼui koa e te Tohi-Tapu ʼe ʼolo te hahaʼi faitotonu ki ʼifeli? (31)
Ko te ʼui ʼaē ʼe fakamamahi heʼegata te kau agakovi, ʼe ʼalutahi koa mo te ʼulugaaga ʼo te ʼAtua? (35-36)
He koʼe koa, ʼi te ʼu tohi ʼo te Sosiete Watch Tower, ʼe hā ai Sesu ʼi he pou, mo tona ʼu nima ʼi tona fuga ʼulu, kae mole ʼi te koluse ohage ko te meʼa ʼaē ʼe tou sio māhani kiai? (46-47)
ʼE fetogi moʼoni koa te pane pea mo te vino ʼo liliu ko te sino pea mo te taʼataʼa ʼo Kilisito? (50-51)
Koteā te faka ʼuhiga ʼo te ʼu palalau ʼaenī ʼa Sesu: “Ko te meʼa ʼaenī ʼe ko toku sino” pea “Ko te meʼa ʼaenī ʼe ko toku taʼataʼa?” (51-52)
ʼE maʼuli koa te nefesi mokā mate te sino? (56)
He ʼu Manatu Moʼo Fakahā Te Kaupepa Fakamaʼua
“ ʼE ke fakamoʼoni anai ki te ʼui ʼaē ko te hahaʼi tokolahi ʼe nātou tui ki te ʼAtua. Ko nātou fuli ʼaē ʼe nātou tui kia te ia ʼe nātou fakamoʼoni, ko te ʼAtua ʼe ina fakamaʼua mai he meʼa kia tatou. Kae ʼe mole tatau anai te tali ʼa te hahaʼi fuli ki te fehuʼi ʼaenī, Koteā ʼaē ʼe fakamaʼua mai e te ʼAtua kia tatou?” Koutou fakahā age te kaupepa lahi Fakamaʼua, koutou fuli age te ako 1, pea koutou fai palalau kiai.
“ ʼI te temi nei, ʼi te kua lahi ʼo te ʼu fihifihia faka famili, ʼe mole ke fia ʼiloʼi koa la pe koteā te puleʼaki ke feala hau maʼu te fiafia faka famili?” ʼI tana ʼosi tali atu, koutou fakamahino age, ʼi te Tohi-Tapu, ʼe fakahā e te ʼAtua te puleʼaki moʼoni ke fiafia ai te famili. Koutou lau ia Isaia 48:17. Koutou fakahā age te ako 8 ʼi te kaupepa lahi Fakamaʼua, pea koutou fakahā age ʼihi vaega faka Tohi-Tapu ʼe tuʼu ai, ʼe foaki ai he takitaki lelei maʼa nātou fuli ʼi te famili. Koutou lau age te ʼu fehuʼi ʼi te kamataʼaga ʼo te ako. Koutou kole age peʼe ina fia lau te ʼu tali.
“ ʼE maʼu ʼi te kaupepa lahi ʼaenī te ako katoa ʼo ʼuhiga mo te ʼu akonaki tāfito ʼo te Tohi-Tapu. ʼI tona ʼu pasina, ʼe ke maʼu anai te ʼu tali ki te ʼu fehuʼi neʼe fia ʼiloʼi e te hahaʼi talu mai fualoa. Ohage la, Koteā te fakatuʼutuʼu ʼa te ʼAtua ki te kele?” Koutou fakahā age te ako 5, pea mo lau te ʼu fehuʼi ʼaē ʼi te kamataʼaga ʼo te ako. Koutou kole age ki ai pe ko te fehuʼi fea ʼaē ʼe ina fia vakaʼi tāfito, pea koutou lau age te palakalafe peʼe ko te ʼu palakalafe ʼaē ʼe faka ʼuhiga kiai, ʼo koutou vakaʼi te ʼu vaega ʼaē ʼe ʼalutahi mo te faʼahi ʼaia. Koutou fakamahino age ʼe feala ke ina maʼu te ʼu tali ki te ʼu fehuʼi ʼaē ʼe hoa kiai, mo kapau ʼe ina fai feiā. Koutou kole age ke koutou toe liliu mai moʼo fai palalau ki te tahi fehuʼi.
“ ʼI tau manatu, he koʼe kua lahi feiā te agamālohi ʼi te ʼu faleako? ʼE tupu koa heʼe mole akoʼi e te ʼu mātuʼa tanatou ʼu fānau? Peʼe ko he tahi age meʼa, ohage la ko te fakaneke ʼa te Tevolo?” Tuku ke fai mai hana tali. Kapau ʼe ina ʼui atu ʼe tupu ko te fakaneke ʼa te Tevolo, pea koutou lau age ia Apokalipesi 12:9, 12. Koutou fakahā lelei age te gāue ʼa te Tevolo ʼi te ʼu maveuveu ʼaē ʼe hoko ʼi te malamanei. Pea koutou avahi te kaupepa lahi Fakamaʼua ʼi te ako 4, pea koutou fehuʼi age peʼe ina fia ʼiloʼi peʼe haʼu maifea te Tevolo. Koutou lau te ʼu ʼuluaki palakalafe e lua pea mo koutou fai palalau kiai. Kapau ʼe ina tali atu ʼe tupu te agamālohi ʼi te faleako ʼuhi ko “te mole akoʼi e te ʼu mātuʼa tanatou fānau,” pea koutou lau age ia 2 Timoteo 3:1-3 pea mo fakatokagaʼi kia ia te ʼu aga ʼaē ʼe tupu ai te fihifihia ʼaia. Pea koutou avahi te kaupepa lahi Fakamaʼua ʼi te ako 8, koutou lau te palakalafe 5 pea mo hoko atu te fai palalau.
“ ʼE ke manatu koa ʼe fakapotopoto hatatou ʼamanaki ke fakahā mai e te Tupuʼaga te meʼa ʼaē ʼe ʼaoga kia tatou ke maʼuli fiafia ai totatou famili?” ʼI tana ʼosi tali atu, koutou fakahā age te kaupepa lahi Fakamaʼua. Fakahā age te ako 8, pea mo koutou fakamahino age ʼe maʼu ai te ʼu pelesepeto mai te Tohi-Tapu ki te famili katoa. Koutou kole age peʼe feala hakotou fakahā age peʼe feafeaʼi te fakaʼaogaʼi ʼo te kaupepa lahi pea mo te Tohi-Tapu, ke feala hona fua lelei kia ia.
“ ʼAki te ʼatu ʼu fihifihia ʼo te maʼuli ʼaē ʼe tou tauʼi ʼi te temi nei, ʼe ke manatu koa ʼe feala ke tokoni moʼoni mai te faikole kia tatou? [Tuku ke fai mai hana tali.] Tokolahi ʼe nātou ʼui, ʼaki te faikole ʼe nātou maʼu te mālohi ʼi tonatou loto. [Koutou lau ia Filipe 4:6, 7.] Kae ʼe lava manatu he tahi ʼe mole tali anai tana ʼu faikole e te ʼAtua. [Koutou avahi te kaupepa lahi Fakamaʼua ʼi te ako 7.] ʼE fakamahino mai e te kaupepa lahi ʼaenī peʼe feafeaʼi hatatou maʼu he ʼu lelei lahi ʼaki te faikole.”
“Neʼe mātou fai palalau mo tokotou ʼu vāhaʼa fale pe koʼe kua lahi te ʼu lotu kehekehe ʼi te malamanei, kae ʼe ko te Tohi-Tapu pe e tahi. ʼI tau manatu, he koʼe kua lahi feiā te ʼu lotu? [Tuku ke fai mai hana tali. Koutou avahi te kaupepa lahi Fakamaʼua ʼi te ako 13, pea koutou lau te ʼu ʼuluaki fehuʼi.] ʼE ke maʼu anai he ʼu tali lelei ki te ʼu fehuʼi ʼaia mo kapau ʼe ke lau te kapite ʼaenī.”
ʼI takotou ʼosi tuku ki he tahi Te Tule Leʼo pea mo te Réveillez-vous !, koutou kole age peʼe feala ke koutou lau age he kiʼi palakalafe nounou. Kapau ʼe lotolelei kiai, pea koutou avahi te kaupepa lahi Fakamaʼua ʼi te ako 5. Koutou fakatokagaʼi age te ʼu fehuʼi ʼi te kamataʼaga, pea koutou kole age ke ina fakalogo te tali ki te ʼuluaki fehuʼi ʼi te ʼuluaki palakalafe ʼaē ka koutou lau. ʼI takotou ʼosi lau ʼaia, koutou fai te fehuʼi pea ke ina tali kiai. Koutou foaki age te kaupepa lahi, pea kapau ʼe ina tali, koutou fai he fakatuʼutuʼu ke koutou toe liliu mai moʼo vakaʼi tana ʼu tali ki te ʼu fehuʼi e lua ʼaē ʼe hoa kiai.
He ʼu Manatu Moʼo Fakahā Te Tohi Te ʼAtamai Mālama
Koutou toʼo takotou Tohi-Tapu, pea koutou ʼui fēnei: “ ʼI te ʼaho ʼaenī, ʼe mātou fia vaevae mo te hahaʼi fuli ʼo tokotou kolo ia te vaega faka Tohi-Tapu ʼaenī: . . .” Koutou lau ia Soane 17:3 pea koutou fehuʼi age fēnei: “Neʼe ke fakatokagaʼi koa te meʼa ʼaē ʼe fakapapau mai mo kapau ʼe tou maʼu te ʼatamai mālama totonu? [Tuku ke fai mai hana tali.] ʼE tou lava maʼu koa ʼifea te ʼatamai mālama ʼaia?” ʼI tana ʼosi tali atu, koutou fakahā age te tohi Te ʼAtamai Mālama, pea koutou ʼui fēnei: “ ʼE fakahā lelei e te tohi ʼaenī te ʼatamai mālama ʼaē ʼe ina taki ki te maʼuli heʼegata, pea ʼe tali ai ki te ʼatu ʼu fehuʼi ʼaē ʼe tau fai e te hahaʼi ʼo ʼuhiga mo te Tohi-Tapu.” Koutou fakahā age te tānakiʼaga ʼo te ʼu kapite, pea koutou fehuʼi age peʼe ʼi ai he fehuʼi ʼe ina fia vakaʼi.
“Neʼe kua ke feʼekeʼaki koa peʼe tokaga moʼoni koa te ʼAtua ki te heʼe faitotonu ʼaē ʼe fai ki te hahaʼi peʼe ko ʼaē neʼe hoko kia tatou totonu? [Tuku ke fai mai hana tali.] ʼE ʼui papau mai e te Tohi-Tapu ko te ʼAtua ʼe ʼofa kia tatou pea ʼe tokoni mai anai kia tatou ʼi te ʼu temi mamahi.” Koutou lau he ʼu vaega ʼo Pesalemo 72:12-17. Koutou avahi te tohi Te ʼAtamai Mālama ʼi te kapite 8, pea koutou fakahā lelei age ʼe foaki e te kapite ʼaia he tali fakaloto fīmālie ki te fehuʼi ʼaenī ʼe fai e te lauʼi miliona hahaʼi, He koʼe ʼe fakagafua e te ʼAtua te mamahi? Kapau ʼe feala, pea koutou fai palalau ki ʼihi vaega faka Tohi-Tapu ʼo te ʼu palakalafe 3 ki te 5, peʼe koutou fai ʼi takotou toe ʼaʼahi mai ia ia.
“Tokolahi ia tatou neʼe tou mamahi ʼi te mate ʼa he tahi neʼe tou ʼoʼofa ai. Neʼe mole heʼeki ke feʼekeʼaki koa la peʼe feala anai hatatou toe sisio kia nātou? [Tuku ke fai mai hana tali.] Neʼe fakamoʼoni e Sesu ʼe toe fakatuʼuake anai ia nātou ʼaē ʼe tou ʼoʼofa ai. [Koutou lau ia Soane 11:11, 25, 44.] Tatau aipe pe neʼe hoko te ʼu meʼa ʼaia kua hili kiai ni ʼu sēkulō, kae ʼe ina fakahā mai te meʼa ʼaē neʼe fakapapau e te ʼAtua ke ina fai maʼa tatou.” Koutou avahi te tohi Te ʼAtamai Mālama ʼi te paki ʼo te pasina 85, pea koutou lau te talanoa ʼaē ʼe tuʼu ai. Pea koutou fakahā age te paki ʼo te pasina 86, pea koutou fakamatala. Koutou lagaʼi te fehuʼi ʼaenī moʼo fakatafito kiai takotou ʼaʼahi: “ ʼE ke fia ʼiloʼi koa pe koʼe ʼe liliu te hahaʼi ʼo matutuʼa pea mo mamate?” Koutou toe liliu kia ia moʼo fai palalau mo ia ki te kapite 6.
“Neʼe kua ke fakakaukauʼi koa la pe koʼe ʼe loto e te hahaʼi ke nātou maʼuʼuli fualoa?” ʼI tana ʼosi tali atu, koutou avahi te tohi Te ʼAtamai Mālama ʼi te kapite 6, pea koutou lau te palakalafe 3. Koutou fai palalau ki te ʼu vaega Tohi-Tapu ʼaē ʼe tuʼu ai. ʼO ʼuhiga mo te ʼu fehuʼi e lua ʼi te fakaʼosi ʼo te palakalafe, koutou fehuʼi age peʼe ina fia ʼiloʼi tona ʼu tali. Kapau ʼe loto kiai, pea koutou vakaʼi he ʼu kiʼi palakalafe ʼe hoa kiai.
“ ʼE mātou fehuʼi ki te hahaʼi peʼe nātou tui ki te ʼu palalau ʼaenī . . .” Koutou lau ia Senesi 1:1, pea koutou fehuʼi age fēnei: “ ʼE ke tui koa ki te ʼu palalau ʼaenī?” Kapau ʼe ʼio atu kiai, pea koutou ʼui fēnei: “Mo ʼau la ʼe ʼau faka tui kiai. Kae ʼi tau manatu la, kapau ko te ʼAtua ʼaē neʼe ina fakatupu ia meʼa fuli, pea neʼe ina toe fakatupu koa mo te agakovi?” ʼI tana ʼosi tali atu, koutou lau age ia Tagata Tānaki 7:29. Koutou avahi te tohi Te ʼAtamai Mālama ʼi te kapite 8, pea koutou lau te palakalafe 2. Kapau ʼe mole tui ia kia Senesi 1:1, pea koutou fakaloto mālohi ia ia ke koulua vakaʼi te fakamoʼoni ki te maʼuli moʼoni ʼa te Tupuʼaga.—Vakaʼi te tohi Comment raisonner, ʼi te ʼu pasina 72 ki te 74.
“ ʼE ke manatu koa, ʼuhi ko te fetogi vave ʼo te ʼu pelesepeto ʼo ʼuhiga mo te aga ʼaē ʼe tonu ke fai, kua ʼaoga kia tatou he takitaki ʼe feala hatatou falala kiai? [Tuku ke fai mai hana tali.] Logola ʼe ko he tohi kua ʼāfea, kae ʼe foaki mai e te Tohi-Tapu he ʼu tokoni ʼaoga ki te maʼuli ʼi te temi ʼaenī pea mo he maʼuli faka famili fiafia.” Pea koutou fakahā te kapite 2 ʼo te tohi Te ʼAtamai Mālama, pea mo koutou lau te palakalafe 10 pea mo te kamata ʼo te palakalafe 11, pea mo 2 Timoteo 3:16, 17.
“ ʼE ke fia ʼiloʼi koa pe koteā anai totatou ka haʼu pea mo te ka haʼu ʼo te kele? [Tuku ke fai mai hana tali.] ʼE fakamatala e te Tohi-Tapu ʼi te ka haʼu, ʼe tou maʼuʼuli anai ʼi te Palatiso. Neʼe tuku kiai e te ʼAtua te ʼuluaki taumatuʼa ʼi tana ʼosi fakatupu nāua. Sio te fakamatala ʼo tona agaaga.” Koutou avahi te tohi Te ʼAtamai Mālama ʼi te pasina 8, pea koutou lau te palakalafe 9, ʼi te kupu tāfito “Te Maʼuli ʼi Te Palatiso.” Pea koutou fai palalau ki te ʼu manatu ʼi te palakalafe 10, mo lau te vaega ʼaē ʼe tuʼu ai, ia Isaia 55:10, 11. Koutou kole age ke hoko atu takolua fai palalau ʼi te palakalafe 11 ki te 16 ki te ʼu agaaga ʼo te maʼuli ʼi te Palatiso.
Ka koutou toe ʼaʼahi ia nātou ʼaē neʼe koutou tuku age Te Tule Leʼo pea mo te Réveillez-vous !, ʼe koutou lava ʼui fēnei:
“ ʼI taku haʼu fakamuli, neʼe ʼau fiafia ʼi taku tuku atu Te Tule Leʼo. Neʼe lagi ke tokagaʼi ko te kupu tāfito ʼo te nusipepa ʼaia ʼe Ko Te Tule Leʼo ʼe Ina Kalagaʼi Te Puleʼaga ʼo Sehova. ʼE ʼau fia fakamahino atu leva ʼi te temi nei pe koteā te Puleʼaga ʼaia, pea koteā ʼaē ka ina fai maʼa koe pea mo tou famili.” Koutou avahi te kaupepa lahi Fakamaʼua ʼi te ako 6, pea koutou lau pea mo fai palalau mo ia ʼo mulimuli ki tona temi faigamālie.
“Mole heʼeki faʼa fualoa, neʼe ʼau haʼu pea neʼe ʼau tuku atu te ʼu nusipepa Te Tule Leʼo pea mo te Réveillez-vous ! ʼAki te ʼu nusipepa ʼaia ʼe fakaʼapaʼapa lahi ai te hahaʼi ki te Tohi-Tapu pea mo tana ʼu pelesepeto ʼo ʼuhiga mo te aga ʼaē ʼe tonu ke fai. ʼI taku mahino ʼaē ʼe maʼuhiga ki te hahaʼi fuli ke nātou mālama ki te Folafola ʼa te ʼAtua, koia neʼe ʼau toe liliu mai ai moʼo fakahā atu te faʼahi maʼuhiga ʼe tokoni atu anai ke ke mālama kiai.” Koutou fakahā age te kaupepa lahi Fakamaʼua peʼe ko te tohi Te ʼAtamai Mālama, pea koutou kole age peʼe ina loto ki he ako Tohi-Tapu.
Ka koutou fakahā age he tohi e pasina 192, ʼe feala hakotou ʼui fēnei:
ʼE faka maʼuhigaʼi ʼaupito te foaki ki te hahaʼi he ako ʼe lelei. ʼI tau manatu, ko te faʼahiga ako feafeaʼi ʼe tonu ke mulimuli kiai he tahi, ke fiafia pea mo manuʼia lahi ai tona maʼuli? [Tuku ke fai mai hana tali. Koutou lau age ia Tāʼaga Lea 9:10, 11.] Ko te tohi ʼaenī [fakahā age te kupu tāfito ʼo te tohi] ʼe fakatafito ki te Tohi-Tapu. ʼE talanoa ʼāteaina ki te matapuna pe e tahi ʼo te ʼatamai mālama ʼaē ʼe ina taki ki te maʼuli heʼegata.” Koutou fakahā age he puani ʼi te tohi, pea koutou fakaloto mālohiʼi ia ia ke ina lau.
Kapau neʼe koutou maʼu he ʼu ʼuluaki palalau ʼe fakatupu ai te fia logo ʼa te hahaʼi, pea koutou haga fakaʼaogaʼi tuʼumaʼu! Koutou fai ke ʼalutahi mo te tufa ʼo te māhina.
Te Tahi ʼu Tohi
Ko te ʼu faʼifaʼitaki ʼo he ʼu fai palalau ʼo ʼuhiga mo te tahi ʼu tohi pea mo te ʼu kaupepa lalahi, ʼe feala ke koutou maʼu ʼi te tohi Index des publications de la Société Watch Tower, ʼi te kupu tāfito ʼaenī:
Te ʼu ʼUluaki Palalau
ʼE tuʼu ai te lisi ʼo te ʼu tohi
Kole Fakahagatonu Age
Koutou ʼahiʼahi te kole fakahagatonu ki te hahaʼi ke kamata hanatou ako Tohi-Tapu, ʼo koutou ʼui fēnei:
“ ʼE ke ʼiloʼi koa, ʼi he ʼu kiʼi minuta pe ʼe feala ke ke maʼu he tali ki he fehuʼi maʼuhiga ʼo te Tohi-Tapu? Ohage la, . . .” Koutou fai he fehuʼi ʼe tuʼu ʼi he kapite ʼi te kamataʼaga ʼo te kaupepa Fakamaʼua pea ʼe koutou manatu ʼe fia logo anai kiai te hahaʼi.
“Neʼe ʼau fia fakahā atu peʼe feafeaʼi tamatou fai te ako Tohi-Tapu, pea ʼe mole totogi. ʼE minuta nima pe taku fakahā atu tona fai. ʼE ke maʼu koa hou temi?” Kapau ʼe ʼio atu, pea koutou vakaʼi te ako 1 ʼo te kaupepa lahi Fakamaʼua moʼo fakahā peʼe feafeaʼi te ako, ʼo koutou lau he vaega Tohi-Tapu e tahi peʼe lua. Pea koutou fehuʼi age fēnei: “Ko ʼafea ʼaē ʼe feala ai ia minuta e 15, ke tā vakaʼi ai te ʼu manatu ʼaē kei toe?”
“Tokolahi te hahaʼi ʼe ʼi ai tanatou Tohi-Tapu, kae ʼe mole nātou ʼiloʼi ʼe maʼu ai te ʼu tali ki tatatou ʼu fehuʼi maʼuhiga ʼo ʼuhiga mo totatou ka haʼu. Kapau ʼe ke ako te tohi ʼaenī [te kaupepa lahi Fakamaʼua peʼe ko te tohi Te ʼAtamai Mālama] ʼi he hola katoa peʼe laka atu ʼi te vāhaʼa, pea hili pe ni ʼu māhina pea kua ke lava mahino ai ki te Tohi-Tapu. ʼE ʼau fiafia anai ʼi haku fakahā atu peʼe feafeaʼi tona fai.”
“ ʼE ʼau ʼaʼahi mai koe moʼo vakaʼi peʼe ke loto ki he ako Tohi-Tapu. Kapau ʼe feala, pea ʼe ʼau fia toʼo pe he ʼu kiʼi minuta moʼo fakahā atu peʼe feafeaʼi ia fenua e 200, te fai palalau ʼa te hahaʼi ki te Tohi-Tapu ʼi tonatou ʼapi mo tonatou famili. ʼE feala hatatou fai palalau ki he kapite e tahi ʼi te ʼu kapite ʼaenī. [Koutou fakahā age te tānakiʼaga ʼo te ʼu kapite ʼi te tohi Te ʼAtamai Mālama.] ʼE ʼi ai he kapite ʼe ke leleiʼia?” Koutou tuku kia ia he temi ke ina filifili. Koutou fuli te kapite ʼaē neʼe ina fili, pea mo kamata te ako ki te ʼuluaki palakalafe.
“ ʼE ʼau fai te ako Tohi-Tapu mo te hahaʼi, ʼe mole totogi, pea ʼe feala pe ke ʼau fai te ako ʼaia mo te hahaʼi ʼaē ʼe nātou fia ako. ʼE mātou fakaʼaogaʼi te tohi ako ʼaenī ʼe fakatafito ki te Tohi-Tapu. [Koutou fakahā age te tohi Te ʼAtamai Mālama.] ʼE fai te ako ʼi he ʼu kiʼi māhina pea ʼe tali ki te ʼu fehuʼi ʼaenī: He koʼe koa ʼe fakagafua e te ʼAtua ia te ʼu mamahi? He koʼe ʼe tou matutuʼa pea mo tou mamate? Koteā te meʼa ʼe hoko ki te ʼu mate ʼaē ʼe tou ʼoʼofa mamahi ai? ʼE lava feafeaʼi hakotou fakaōvi ki te ʼAtua? ʼE feala haku fakahā atu peʼe feafeaʼi te fai ʼo te ako?”