Koutou Fakamuʼamuʼa Te ʼu Meʼa ʼAē ʼe Maʼuhiga Tāfito
1 Koteā te ʼu meʼa maʼuhiga ʼaē ʼe ʼaoga ke tou mālohi ai ʼi te faʼahi fakalaumālie? ʼE mahino papau ia ʼe kau ki te ʼu meʼa ʼaia te ako takitokotahi, te kau ki te ʼu fono, mo te faikole tuʼumaʼu, mo te fakatahi mo he ʼu hahaʼi agalelei, pea mo te minisitelio faka Kilisitiano. ʼE mole feala ke tou mālohi ʼi te faʼahi fakalaumālie mo kapau ʼe mole tou fakamuʼamuʼa te ʼu meʼa maʼuhiga ʼaia ʼi totatou maʼuli.
2 Kae ko tatou fuli ʼe tou tauʼi te ʼu holi ʼo te kakano pea ʼe ʼaoga ʼi ʼihi temi ke fakatonutonuʼi tatou. (Kal. 5:17) ʼAua naʼa tou manatu ʼi he temi ʼe lahi anai te ʼu meʼa ʼaē ka tou maʼu ʼi tatatou kumi te ʼu meʼa ʼo te kakano. (Sel. 17:9) Koia, kapau ʼe tou fia hāofaki totatou loto pea ke ʼaua naʼa tou hēʼia, pea ʼe maʼuhiga ke tou fai ʼi ʼihi temi he sivisivi ʼo tatou totonu.—Taag. 4:23; 2 Ko. 13:5.
3 Koutou Sivisivi Tokotou Loto: ʼE feala ke koutou fai te faʼahi ʼaia ʼo koutou lagaʼi te ʼu fehuʼi ʼaenī: ʼE ʼau holi mālohi koa ke ʼau lau te Folafola ʼa te ʼAtua? (1 Pet. 2:2) ʼE maʼuhiga koa kia ʼau ke ʼau kau ki te ʼu fono fuli ʼo te kokelekasio? (Hep. 10:24, 25) ʼE ʼau faikole tuʼumaʼu koa? (Loma 12:12) ʼE ʼau fia fakatahi koa mo te hahaʼi ʼaē ʼe nātou leleiʼia te ʼu meʼa fakalaumālie? (Loma 1:11, 12) ʼE mahino koa kia ʼau toku maʼua ʼaē ke ʼau tala te logo lelei? (1 Ko. 9:16) Kapau ʼe koutou ʼio ki te ʼu fehuʼi ʼaia, pea ʼe fakahā ai anai ʼe koutou fia fakamuʼamuʼa te ʼu meʼa ʼaē ʼe maʼuhiga tāfito.
4 Koutou Sivisivi Te ʼu Meʼa ʼAē ʼe Koutou Fai Māhani ʼi Te ʼAho Fuli: ʼI takotou ʼosi sivi te ʼu holi ʼo tokotou loto, pea ʼe tonu anai ke koutou fakatuʼutuʼu te fakaʼaogaʼi ʼo tokotou temi ki te ʼu meʼa ʼaē ʼe maʼuhiga tāfito. ʼE kau kiai he polokalama ki te lau tuʼumaʼu ʼo te Tohi-Tapu pea mo te ʼu nusipepa fuli ʼo Te Tule Leʼo pea mo te Réveillez-vous!, pea mo te teuteuʼi ʼo te ʼu fono. ʼE tonu ke toe fakaʼaogaʼi he temi ki te ako faka famili pea mo te faikole fakatahi. Koutou faka tuʼakoi te temi ʼaē ʼe koutou fakaʼaogaʼi ki te sioʼi ʼo te televisio peʼe ko te gaoʼi mo te olotinatea. Koutou fakatuʼutuʼu ke koutou kau ki te ʼu fono fuli ʼo te kokelekasio, pea koutou fakatuʼutuʼu leva takotou tahi ʼu gāue. Koutou fakatuʼutuʼu ke kau te famili katoa ki te fai faka mafola ʼi te vāhaʼa fuli.
5 ʼE mahino papau ia, ʼe koutou maʼuli fiafia anai mo kapau ʼe koutou fakamuʼamuʼa te ʼu meʼa ʼaē ʼe maʼuhiga tāfito.