Koteā ʼAē ʼe Takimuʼa Kiā Koutou?
1 Koteā anai ia takotou tali ki te fehuʼi ʼaia? ʼE mahino ia, ko tātou fuli ʼe tou fakaʼamu ke takimuʼa ia te ʼu gāue ʼo te Puleʼaga. (Mat. 6:33) Kae ʼe feala ke tou tahi fai kiā tātou ia te fehuʼi ʼaenī: ‘ ʼE ʼiloga koa taku fakaʼamu ʼaia ʼi taku ʼu fakatuʼutuʼu?’ ʼE tuʼu ʼi te Tohi-Tapu ia te fakaloto mālohi ʼaenī kiā tātou: “Kotou haga ʼahiʼahiʼi ia koutou.” (2 Ko. 13:5, MN ) ʼE feafeaʼi hatatou ʼahiʼahiʼi ia tātou totonu moʼo vakaʼi peʼe takimuʼa kiā tātou ia te Puleʼaga?
2 Totatou Temi: ʼUluaki, tou vakaʼi peʼe tou fakaʼaogaʼi feafeaʼi totatou temi. (Efe. 5:15, 16) Ko temi e fia ʼaē ʼe tou fakaʼaogaʼi ʼi te vāhaʼa fuli ki te ʼu fakafiafia, ki te televisio, ki te Internet, peʼe ki te ʼu temi mālōlō? ʼE lagi tou punamaʼuli anai mo kapau ʼe tou tohi ki he moʼi pepa te temi ʼaē ʼe tou fakaʼaogaʼi ki te ʼu faʼahi ʼaia ʼo fakatatau ki te temi ʼaē ʼe tou fakaʼaogaʼi ki te ʼu gāue fakalaumālie. ʼE tou fai koa ni ʼu hola fakalaka ʼi tatatou gāue faka mālama ʼo fua kovi ai ki tatatou tauhi taputapu, ʼuhi pe ko tatatou fia totogi ʼo ni ʼu koloa? ʼE hoko putuputu koa tatatou tō fono peʼe ko tatatou mole fai faka mafola, ʼuhi ko hatatou ʼu fai folau moʼo mālōlō?
3 Te ʼu Gāue ʼAē ʼe Tonu Ke Takimuʼa: Tokolahi iā tātou ʼe mole tou maʼu he temi feʼauga moʼo fai ia meʼa fuli ʼaē ʼe tou fakaʼamu kiai. Koia, ke feala ke takimuʼa ia te ʼu gāue ʼo te Puleʼaga, ʼe tonu ke tou vakavakaʼi pe koteā ʼaē ʼe takimuʼa kiā tātou, pea hoki tou fai ai leva he polokalama ki “te ʼu meʼa ʼaē ʼe maʼuhiga tāfito.” (Filp. 1:10, MN ) ʼE kau kiai te ako ʼo te Folafola ʼa te ʼAtua, mo te fai faka mafola, mo te tokaga ki tota loto fale, pea mo te kau ki te ʼu fono faka Kilisitiano. (Pes. 1:1, 2; Loma 10:13, 14; 1 Tim. 5:8; Hep. 10:24, 25) ʼE ʼi ai te tahi ʼu faʼahi ʼe lelei, ohage lā ko te fai fakapotopoto ʼo he faigaoʼi pea mo he ʼu kiʼi fakafiafia. (Mko. 6:31; 1 Tim. 4:8) Kae ko te ʼu meʼa ʼaia ʼaē ʼe mole faʼa maʼuhiga, ʼe mole tonu anai ke natou kaihaʼa te temi ʼaē ki te ʼu gāue tāfito.
4 Neʼe ʼi ai te tūpulaga neʼe takimuʼa kiā ia te ʼu gāue ʼo te Puleʼaga, ʼo ina toʼo ia te selevisi temi kātoa, kae mole ina hoko atu tana ako ʼi te ʼu ako lalahi ke maʼu hana gāue lelei ʼi te mālama. Neʼe ina ako te tahi lea, pea neʼe ʼalu ʼo gāue ʼi te fenua neʼe ʼaoga ai he tahi kau fai faka mafola. Neʼe ina ʼui fēnei: “ ʼE mole he tahi age meʼa ʼi toku maʼuli ʼe lelei age ʼi te ʼu meʼa ʼaenī ʼe au lolotoga fai. ʼI meʼa lelei foki ia te fai faka mafola ʼi henī! ʼE au fakaʼamu ke ʼahiʼahi e te kau tūpulaga fuli ia te gāue ʼaia, pea ke natou logoʼi ia te ʼu meʼa ʼaē ʼe au logoʼi ʼi toku loto. ʼE mole he tahi age meʼa ʼe lelei age ʼi tata tauhi ʼaē kiā Sehova, ʼaki ia meʼa fuli ʼaē ʼe tou maʼu.” ʼEī, kā takimuʼa kiā tātou ia te Puleʼaga, pea ʼe tou maʼu ai te ʼu tapuakina, kae tāfito ʼe tou fakafiafia ai ia te loto ʼo Sehova, tatatou Tamai ʼaē ʼe ʼi selō.—Hep. 6:10.