Tou Fakaʼaogaʼi Fakapotopoto Totatou Temi
1 ʼE tou loto ke fiafia ia Sehova, koia ʼaē ʼe tou fakatafito ai totatou maʼuli ki te ʼu gāue fakalaumālie. ʼE fakatotonu mai ʼi tana Folafola ‘ke takimuʼa kiā tatou ia te puleʼaga,’ pea ke ‘tou ʼiloʼi papau te ʼu meʼa ʼaē ʼe maʼuhiga tāfito.’ (Mat. 6:33; Filp. 1:10) Koteā ʼaē ʼe tonu ke tou fai ke takimuʼa kiā tatou ia te ʼu gāue ʼo te Puleʼaga, pea mo tou tuku ki muli ia te ʼu gāue ʼaē ʼe mole faʼa maʼuhiga tāfito?—Ef. 5:15-17.
2 Ke Takimuʼa Te ʼu Gāue ʼo Te Puleʼaga: Tou fakaʼaogaʼi lelei totatou temi, ke ʼaua naʼa pulinoa ʼi he ʼu meʼa ʼe mole maʼuhiga. Ko ʼihi ʼi te kamata ʼo te māhina fuli, ʼe nātou tohi ʼi tanatou kaletalio he ʼu temi kua nātou tukupau ki te gāue fai faka mafola. Pea ʼe nātou tōkakaga leva ke mole ʼi ai he tahi ʼu meʼa ʼe nātou fakaʼalunoa tanatou ʼu fakatuʼutuʼu ʼaia. ʼE feala ke fai he fakatuʼutuʼu feiā ʼo ʼuhiga mo te ʼu fono, mo te ako takitokotahi, pea mo te ʼu fakatahi lalahi. Ko te tokolahi kua nātou fai tanatou polokalama, ke nātou lau te Tohi-Tapu ʼi te kamata peʼe ʼi te fakaʼosi ʼo te ʼaho fuli. Tou tāʼofi he temi kua tukupau ki te ʼu gāue ʼaē ʼe maʼuhiga tāfito, pea ʼaua naʼa tou tuku ki he ʼu meʼa noa ke nātou faka ʼalunoa ia te ʼu fakatuʼutuʼu ʼaia.—Tnk. 3:1; 1 Ko. 14:40.
3 Tou Fakatuʼakoi Tatatou Fakaʼaogaʼi Te Malamanei: ʼI ʼihi fenua ʼe faigafua ki te hahaʼi hanatou kau ki te ʼu faigaoʼi, mo te ʼu fakafiafia, mo te ʼu meʼa ʼaē ʼe nātou manako kiai, pea mo ʼihi atu meʼa. Ko te tokolahi ʼe nātou fakaʼaogaʼi lahi tonatou temi ki te televisio peʼe ko te ʼolotinatea. Heʼe kapau ʼe tou maʼumaʼua fau ki te ʼu fakafiafia pea mo te ʼu kiʼi meʼa foʼou ʼaē ʼe holi kiai te mālama, ʼe mole tou maʼu ai anai hona ʼu fua lelei. (1 Soa. 2:15-17) Koia ʼe fakatokaga mai ʼi te Tohi-Tapu, ke ʼaua naʼa tou fakaʼaogaʼi te ʼu meʼa fuli ʼaē ʼi te malamanei. (1 Ko. 7:31) Kapau ʼe tou mulimuli ki te tokoni fakapotopoto ʼaia, pea ʼe tou fakahā anai kiā Sehova, ʼe takimuʼa kiā tou ia tana tauhi.—Mat. 6:19-21.
4 ʼE kei toe he kiʼi temi nounou maʼa te malamanei. Ko nātou ʼaē ʼe takimuʼa kiā nātou ia te ʼu gāue ʼo te Puleʼaga, ʼe nātou fiafia anai pea mo tapuakina anai nātou e te ʼAtua. (Taag. 8:32-35; Skp. 1:25) Koia, ʼofa pe ke tou fakaʼaogaʼi fakapotopoto te potu maʼuhiga ʼaē ko totatou temi.