Ke Fakapotopoto Totatou Temi Fakafiafia
1 ʼI te ʼu ʼaho faigataʼa ʼaenī, ʼe ʼaoga kia tatou fuli ʼi ʼihi temi ke tou ʼai hatatou kiʼi mālōlō. ʼE lelei anai he kiʼi temi fakafiafia. Kae kapau ʼe lahi fau te temi mālōlō, mo te fakafiafia pea mo te fakatahitahi mo te hahaʼi, pea ʼe mole kei lahi anai he temi moʼo kumi ʼo te ʼu meʼa fakalaumālie. ʼE tonu ke fakapotopoto totatou temi fakafiafia. (Mat. 5:3) E lava feafeaʼi te faʼahi ʼaia? ʼE lava anai mo kapau ʼe tou mulimuli ki te tokoni ʼaē ʼe tou maʼu ia Efeso 5:15-17.
2 Fakatuʼu He ʼu Tuʼakoi: Neʼe tohi e Paulo ʼe tonu ki te kau Kilisitiano, ke nātou “tokakaga fakalelei” peʼe feafeaʼi hanatou fakaʼaogaʼi fakalelei ʼo tonatou maʼuli. ʼE ʼaoga te fakapotopoto pea mo te loto lolomi moʼo tuku kehe he temi ʼe ʼaoga moʼoni ki te fakafiafia. ʼE lelei ke tou fakakaukauʼi te faʼahiga fakaʼaogaʼi ʼo totatou temi faigamālie. ʼE tonu ke ʼaoga lelei te ʼu temi fakafiafia, kae ke ʼaua naʼa pulinoa ai totatou temi peʼe fakatupu gaʼegaʼe. Kapau ʼi takotou ʼosi fakafiafia, ʼe koutou sio kua koutou gaʼegaʼe, neʼe mole koutou maʼu ai hokotou fiafia kae ʼe koutou lotohoha, pea ʼe lagi ʼaoga ke koutou fai he ʼu fetogi ’ʼo ʼuhiga mo te fakaʼaogaʼi ʼo tokotou temi.
3 Koutou Fakapotopoto: Neʼe foaki e Paulo te tokoni ʼaē ke ‘totogi . . te temi faigamālie’ ki te ʼu meʼa maʼuhiga ʼo te maʼuli, kae ke ʼaua naʼa tou liliu ʼo ‘vavale.’ Ko te kau Kilisitiano ʼaē kua papitema ʼe mole feala ke nātou fakatafito tonatou maʼuli ki te ʼu temi fakafiafia. Logola ʼe feala ʼaki te temi mālōlō ke tou toe maʼu he mālohi, kae ko te matapuna ʼo te mālohi fakalaumālie ʼe ko te mālohi gāue ʼa te ʼAtua. (Isa. 40:29-31) ʼE tou maʼu te laumālie ʼaia ʼi te ʼu gāue faka teokalatike—te ako ʼo te Tohi-Tapu, te ʼu fono, pea mo te fai faka mafola—kae mole tou maʼu ʼi te ʼu temi fakafiafia.
4 Fakamuʼamuʼa Te ʼu Meʼa ʼAē ʼe Maʼuhiga: Neʼe fakatotonu e Paulo ki te kau Kilisitiano ke nātou “mahino pe kotea te finegalo o te Aliki.” Neʼe akoʼi mai e Sesu ke fakatafito tatatou ʼu gāue ki te Puleʼaga ʼa te ʼAtua, ke tou fakamuʼamuʼa ʼi totatou maʼuli. (Mat. 6:33) ʼE maʼuhiga ke tou ʼuluaki fai te ʼu gāue ʼaē ʼe mulimuli ki te fakapapau ʼaē neʼe tou fai kia Sehova. Pea ʼe feala leva ke fakatuʼutuʼu he temi fakapotopoto ki te fakafiafia. Kapau ʼe tou fai te faʼahi ʼaia, pea ʼe tou maʼu anai he ʼu fua lelei pea ʼe tou fiafia lahi anai.—Taag. 5:12.