E Feafeaʼi Hatatou Totogi Te Temi Faigamālie
1 Ko te lahi ʼaupito ʼo te ʼu meʼa ʼaē ʼe tou fai ʼi te gāue kia Sehova ʼe tokoni kia tatou ke tou maʼumaʼua! (1 Ko. 15:58) ʼE tou ʼiloʼi ʼe tonu ke tou fai hatatou ako takitokotahi, pea mo hatatou ako faka famili, ke tou lau te Tohi-Tapu ʼi te ʼaho fuli, ke tou teuteuʼi te ʼu fono ʼo te kokelekasio, pea mo tou kau kiai, pea ke tou kau tuʼumaʼu ki te minisitelio. ʼE ʼi ai te ʼu maʼua ʼo te ʼu tagata taupau ʼo ʼuhiga mo te gāue faka tauhi ōvi, pea ʼe nātou tokakaga ki te tahi ʼu gāue ʼo te kokelekasio. Ko ʼihi ʼe faigataʼa tonatou ʼu maʼua faka famili peʼe lagi lahi honatou ʼu maʼua ki te hahaʼi. Moʼo fakahoko fakalelei te ʼu meʼa ʼaia, ʼe tonu ke tou fakafuafua lelei tatatou gāue, pea ke tou fakaʼaluʼalu lelei te ʼu meʼa ʼo totatou maʼuli.
2 Tou Fakamuʼamuʼa Te ʼu Meʼa ʼAē ʼe Maʼuhiga Tāfito: Kapau ʼe tou loto ke tou ‘totogi te temi faigamālie,’ pea ʼe fakalogo te faʼahi ʼaia ki tatatou fakasiosio tonu. (Ef. 5:15, 16) ʼE tonu ke tou vakaʼi pe koteā “te ʼu meʼa ʼaē ʼe maʼuhiga tāfito,” pea ke tou fakamuʼamuʼa te ʼu meʼa ʼaia ʼi te lisi ʼo te ʼu meʼa ʼaē ʼe tonu ke tou fai. (Filp. 1:10) Neʼe ʼui fēnei e te taumatuʼa ʼo ʼuhiga mo tanā fakatuʼutuʼu faka teokalatike ʼi te faʼahi ʼaia: “ ʼE maʼuhiga ʼaupito te moʼoni ʼi tomā maʼuli . . . Ko te moʼoni ʼe mole ko he koga pe ʼo tomā maʼuli, kae ʼe ko tomā maʼuli ʼaia. Ko te ʼu meʼa fuli ʼaē ʼe ma fai, ʼe ma fakatafito kiai.” ʼE ko he meʼa maʼuhiga kia tatou, tatatou fakamuʼamuʼa te tauhi kia Sehova pea mo tana gāue ʼi totatou maʼuli.
3 Ke Tou ʼIloʼi Te ʼu Meʼa ʼAē ʼe Pulinoa Ai Totatou Temi: Ko hola e 168 ʼi te vāhaʼa, pea ʼe tonu ke tou fakaʼaogaʼi fakapotopoto totatou temi. Kapau ʼe tou loto ke feʼauga totatou temi moʼo fai ʼo te ʼu gāue faka teokalatike, pea ʼe tonu ke tou ʼiloʼi te ʼu meʼa ʼaē ʼe pulinoa ai totatou temi pea mo tou fakasiʼisiʼi tatatou fai te ʼu meʼa ʼaia. Neʼe fakahā ʼi te sivi, ʼe fakafuafua ko te hahaʼi lalahi ʼi Amelika, ʼe nātou fakaʼaogaʼi te ʼu hola e 30 tupu ʼi te vāhaʼa moʼo sioʼi ʼo te televisio! Ko ʼihi, ʼe lahi te temi ʼaē ʼe nātou fakaʼaogaʼi moʼo lau ʼo te ʼu tohi ʼo te mālama. Ko ʼihi ʼe nātou fakatokagaʼi ʼe lahi fau te temi ʼaē ʼe nātou fakaʼaogaʼi ki te ʼu gāue faka sosiale, ki te ʼu temi mālōlō, ki te ʼu fakafiafia, peʼe ko he faʼahiga gāue ʼe fai ʼi he olotinatea. ʼE tonu ke tou vakavakaʼi te ʼu meʼa ʼaē ʼe tou fai māhani ʼi te ʼaho fuli, peʼe mole feala hatatou fakaʼaogaʼi fakalelei totatou temi. ʼE maʼuhiga ke tou popoto, ʼo tou faka tuʼakoi te temi ʼaē ʼe tou fakaʼaogaʼi ki te ʼu meʼa ʼaē ʼe mole maʼuhiga.
4 Ke Tou Fakatuputupu He Aga Māhani ʼe Lelei: Tatau aipe pe koteā totatou ʼu ʼaluʼaga takitokotahi, ʼe feala ke tou totogi totatou temi moʼo fai ʼo te ʼu gāue fakalaumālie. Neʼe fakatokagaʼi e ʼihi, ko tanatou foimo ʼala vave ʼi te ʼaho fuli, ʼe tokoni ai kia nātou ke lahi te ʼu gāue ʼaē ʼe nātou fai. Kapau ʼe loaloaga tatatou ʼolo ki te gāue peʼe ko tatatou fakatalitali ki niʼihi, ʼe feala ke tou fakaʼaogaʼi te temi ʼaia moʼo lau ʼo te Tohi-Tapu, moʼo teuteuʼi ʼo te ʼu fono, peʼe mo fakalogo ki te ʼu fime ʼa te Sosiete. ʼE lahi te ʼu fua lelei ʼaē ʼe maʼu e te ʼu famili, mokā nātou fakatuʼutuʼu he temi ke nātou ako fakatahi ai te Tohi-Tapu. Kapau ʼe mulimuli lelei te famili ki te temi ʼaē kua fakatuʼutuʼu kiai tanatou ako, pea ʼe mole feala anai ke pulinoa tonatou temi.
5 ʼAki te fakalaka ʼo te ʼu ʼaho, ʼe tonu ke toe ʼāsili tatatou mahino ki “te nounou ʼo te temi ʼaē ʼe kei toe.” (1 Ko. 7:29) ʼE fakalogo totatou maʼuli ki tatatou faʼahiga fakaʼaogaʼi ʼo te temi maʼuhiga ʼaē ʼe kei toe. ʼE tou maʼu anai he ʼu tapuakina, mo kapau ʼe tou totogi te ʼu temi faigamālie ʼaē ʼe tou maʼu, ke feala ai hatatou fakamuʼamuʼa tuʼumaʼu te ʼu meʼa ʼo te Puleʼaga!—Mat. 6:33.