Tou Totogi Te Temi Ki Te Lautohi Pea Mo Te Ako
“Koutou totogi maʼa koutou te temi faigamālie, koteʼuhi ko te ʼu ʼaho ʼe ko te ʼu ʼaho ʼo te agakovi.”—Efeso 5:16, MN.
1. He koʼe ʼe lelei ke tou fakatuʼutuʼu totatou temi, pea koteā ʼaē ʼe hā ʼi tatatou faʼahiga fakaʼaogaʼi ʼo totatou temi?
NEʼE ʼui fēnei ka kita “filifili tokita temi pea ʼe mole pulinoa ai te temi.” Ko he tahi kua ina fakatuʼutuʼu tona temi moʼo fai ʼo te ʼu meʼa ʼaē ʼe tonu ke ina fai, ʼi te agamāhani ʼe ina fakaʼaogaʼi lelei te temi ʼaia. Neʼe tohi fēnei e te Hau poto ko Salomone: “Kia meʼa fuli ʼe ʼi ai tona temi kua fakakatofa, ei, ʼe ʼi ai he temi kia meʼa fuli ʼi te lalo lagi.” (Tagata Tānaki 3:1, Moffatt) ʼE tatau fuli te temi ʼaē ʼe tou maʼu, kae ʼe ʼa tatou takitokotahi te vakaʼi peʼe feafeaʼi tona fakaʼaogaʼi. Ko te ʼu meʼa ʼaē ʼe tou fakamuʼamuʼa, pea mo tatatou vaevae totatou temi kiai ʼe hā ai pe koteā te meʼa ʼaē ʼe maʼuhiga tāfito ʼi totatou loto.—Mateo 6:21.
2. (a) ʼI tana Akonaki ʼi te Moʼuga, koteā ʼaē neʼe ʼui e Sesu ʼo ʼuhiga mo te ʼu meʼa fakalaumālie? (b) Koteā anai te sivi ʼe tonu ke tou fai?
2 ʼE tonu ke tou fakaʼaogaʼi he temi ki te kai pea mo te moe, koteʼuhi ko te ʼu meʼa ʼaia ʼe ʼaoga ki totatou kakano. Kae e feafeaʼi ʼo ʼuhiga mo te ʼu meʼa ʼaē ʼe ʼaoga kia tatou ʼi te faʼahi fakalaumālie? ʼE tou ʼiloʼi ʼe tonu ke tou toe tokaga ki te ʼu meʼa ʼaia. ʼI tana akonaki ʼi te Moʼuga, neʼe ʼui fēnei e Sesu: “Manuʼia ia nātou ʼaē ʼe nātou ʼiloʼi tonatou masiva fakalaumālie, heʼe ʼa nātou te puleʼaga ʼo selo.” (Mateo 5:3, MN ) Ko tona tupuʼaga la ʼaia ʼo te fakamanatuʼi tuʼumaʼu mai e “te kaugana agatonu mo fakapotopoto,” te maʼuhiga ʼaē ke tou fakaʼaogaʼi he temi moʼo lau pea mo ako te Tohi-Tapu. (Mateo 24:45) ʼE lagi koutou ʼiloʼi te maʼuhiga ʼaupito ʼo te faʼahi ʼaia, kae lagi koutou manatu ʼe mole maʼu hokotou temi ke koutou ako ai peʼe koutou lau ai te Tohi-Tapu. Kapau koia ʼaia, pea tou vakaʼi te ʼu ʼaluʼaga pea mo te ʼu tokoni ke tou lava fakaʼaogaʼi hotatou temi lahi moʼo lau ʼo te Folafola ʼa te ʼAtua, mo fai tatatou ako takitokotahi, pea mo tou metitasio kiai.
Tou Maʼu He Temi Ke Tou Lau Pea Mo Ako Te Tohi-Tapu
3, 4. (a) Koteā te tokoni ʼaē neʼe fai e te ʼapositolo ko Paulo ʼo ʼuhiga mo te fakaʼaogaʼi ʼo totatou temi, pea koteā ʼaē ʼe kau kiai? (b) Koteā ʼaē neʼe fia ʼui e Paulo ʼi tana tokoni mai ʼaē ke tou ‘totogi te temi ʼaē ʼe faigamālie’?
3 Ka tou vakaʼi te ʼu temi ʼaenī ʼe tou maʼuʼuli ai, pea ʼe maʼua ke tou manatuʼi fuli te ʼu palalau ʼaenī ʼa te ʼapositolo ko Paulo: “Koutou tokakaga fakalelei ki takotou faʼahiga haʼele: ke ʼaua naʼa hage ko he kau vavale, kae ke hage ko ni kau popoto, ʼo koutou totogi maʼa koutou te temi faigamālie, koteʼuhi ko te ʼu ʼaho ʼe ko te ʼu ʼaho ʼo te agakovi. Koia, tuku takotou liliu ʼaē ʼo vavale, kae koutou haga mahino pe koteā te finegalo ʼo Sehova.” (Efeso 5:15-17, MN ) ʼE mahino ia, ʼe faka ʼuhiga te tokoni ʼaia ki te ʼu faʼahi fuli ʼo totatou maʼuli faka Kilisitiano, ʼo kau kiai te temi ki te faikole, mo te ako, mo te ʼu fono, pea mo tatatou kau lahi ki te faka mafola ʼo te “Logolelei . . . o te Puleaga,” ʼo mulimuli ki totatou ʼu fealagia.—Mateo 24:14; 28:19, 20.
4 Ia ʼaho nei, ʼe tokolahi te ʼu kaugana ʼa Sehova ʼe hage ʼe faigataʼa kia nātou ke nātou fakaʼaogaʼi honatou temi ke nātou lau pea mo ako loloto te Tohi-Tapu. ʼE moʼoni, ʼe mole feala ke tou hilifaki he tahi hola ki te ʼu hola ʼo te ʼaho, koia ko te tokoni ʼaē ʼe fai e Paulo ʼe faka ʼuhiga ki he tahi meʼa. ʼI te faka Keleka, ko te ʼui ʼaē ke “totogi te temi faigamālie” ko tona faka ʼuhiga ʼe kita totogi he meʼa moʼo fetogi ʼaki he tahi meʼa. ʼI tana tohi Expository Dictionary, ʼe fakamahino mai e W. E. Vine ko te faʼahi ʼaia ʼe ko te “fai ʼo he ʼu tuʼuga meʼa ʼi te ʼu temi fuli ʼaē ʼe faigamālie, ke ʼaoga lahi kia tatou heʼe mole tou toe maʼu anai te ʼu temi ʼaia.” Ko te ʼu faʼahi fea ʼaē ʼe tou lava totogi ai te temi faigamālie ke tou lau pea mo ako te Tohi-Tapu?
ʼE ʼi Ai Te ʼu Meʼa ʼe Tonu Ke Tou Fakamuʼamuʼa
5. He koʼe ʼe tonu ke tou “ ʼiloʼi papau te ʼu meʼa ʼaē ʼe maʼuhiga tāfito,” pea ʼe tou lava ʼiloʼi feafeaʼi te ʼu meʼa ʼaia?
5 ʼO hilifaki ki totatou ʼu maʼua ʼi totatou maʼuli, ʼe lahi te ʼu meʼa fakalaumālie ʼe tonu ke tou fakahoko. ʼI totatou ʼuhiga Kilisitiano ʼaē kua foaki totatou maʼuli kia Sehova, ʼe ‘lahi tatatou ʼu gāue ʼi te ʼAliki.’ (1 Kolonito 15:58) Ko tona tupuʼaga la ʼaia ʼo te fakatotonu e Paulo ki te kau Kilisitiano ʼo Filipe, ke nātou “ ʼiloʼi papau te ʼu meʼa ʼaē ʼe maʼuhiga tāfito.” (Filipe 1:10, MN ) Ko tona faka ʼuhiga ʼe ʼi ai te ʼu meʼa ʼe tonu ke tou fakamuʼamuʼa. ʼE tonu ke tou fakamuʼamuʼa tuʼumaʼu te ʼu meʼa fakalaumālie, kae tou tuku ki muli te kumi ʼo te ʼu meʼa fakamālama. (Mateo 6:31-33) Kae ʼe toe maʼua foki ke tou fakapotopoto mokā tou fakahoko totatou ʼu maʼua fakalaumālie. ʼE tou vaevae feafeaʼi totatou temi ʼi te ʼu faʼahi kehekehe ʼo totatou maʼuli faka Kilisitiano? ʼE ʼui e te ʼu taupau feʼoloʼaki, ʼi “te ʼu meʼa ʼaē ʼe maʼuhiga tāfito” ʼaē ʼe tonu ke tokaga kiai te Kilisitiano, kua meʼa noaʼi ia te ako takitokotahi pea mo te lau ʼo te Tohi-Tapu.
6. Koteā te faka ʼuhiga ʼo te totogi ʼo te temi faigamālie ʼo ʼuhiga mo te gāue fakamālama peʼe ʼi te loto fale?
6 Ohage ko te meʼa ʼaē neʼe tou vakaʼi, ko te totogi ʼo te temi faigamālie ko tona faka ʼuhiga, ke tou “fai he ʼu tuʼuga meʼa ʼi te ʼu temi faigamālie fuli” pea ke “ ʼaoga lahi te ʼu temi fuli ʼaia.” Koia, kapau ʼe mole tou māhani ʼi te lau ʼo te Tohi-Tapu pea mo fai hatatou ako, pea ʼe lelei ke tou sivi ia tatou takitokotahi moʼo vakaʼi peʼe tou fakaʼaogaʼi feafeaʼi totatou temi. Kapau ʼe lahi ʼaupito te temi ʼaē ʼe tou maʼumaʼua ai ʼi tatatou gāue fakamālama, ʼo tou fakaʼaogaʼi lahi ai totatou temi pea mo totatou mālohi, pea ʼe tonu ke tou palalau ki te faʼahi ʼaia ʼi tatatou ʼu faikole kia Sehova. (Pesalemo 55:22) ʼE feala ke tou fai he ʼu fetogi ke tou maʼu ai he temi moʼo fai te ʼu meʼa ʼaē ʼe maʼuhiga ʼi te tauhi kia Sehova, ohage ko te ako pea mo te lau ʼo te Tohi-Tapu. ʼE moʼoni te ʼui ʼaē ʼe lahi te ʼu gāue ʼa te fafine. Kae ʼe toe maʼua foki ki te ʼu tuagaʼane ke nātou fakamuʼamuʼa te ʼu meʼa ʼaē ʼe maʼuhiga, pea mo fakatuʼutuʼu he temi totonu ke nātou lau pea mo ako fakalelei te Tohi-Tapu.
7, 8. (a) Koteā te ʼu gāue ʼaē ʼi te agamāhani ʼe feala ke tou totogi mai ai te temi moʼo lautohi pea mo ako? (b) Koteā te fakatuʼutuʼu ʼo te temi mālōlō, pea kapau ʼe tou manatuʼi te faʼahi ʼaia, pea ʼe lava tokoni feafeaʼi mai ke tou fakamuʼamuʼa te ʼu meʼa ʼaē ʼe maʼuhiga?
7 Tokolahi ia tatou ʼe tou lava totogi te temi moʼo ako ʼo te Tohi-Tapu mo kapau ʼe tou līaki te ʼu gāue ʼaē ʼe mole maʼuhiga. ʼE feala ke tou fai kia tatou te ʼu fehuʼi ʼaenī: ‘Ko temi ʼe fia ʼe ʼau fakaʼaogaʼi moʼo lau ʼo te ʼu sulunale ʼo te mālama, moʼo sioʼi ʼo te televisio, moʼo fakalogo ʼo te musika, peʼe moʼo gaoʼi ʼi te ʼu meʼa gaoʼi viteo? ʼE lahi age koa te temi ʼaē ʼe ʼau nofo ai ʼi muʼa ʼo taku olotinatea ʼi te temi ʼaē ʼe ʼau lau ai te Tohi-Tapu?’ ʼE ʼui fēnei e Paulo: “Tuku takotou liliu ʼaē ʼo vavale, kae koutou haga mahino pe koteā te finegalo ʼo Sehova.” (Efeso 5:17, MN ) Neʼe fakatokagaʼi, tokolahi ʼi te kau Fakamoʼoni ʼe lahi fau tanatou sioʼi te televisio, ko te tupuʼaga tāfito ʼaia ʼo te mole maʼu honatou temi moʼo ako takitokotahi pea mo lau ʼo te Tohi-Tapu.—Pesalemo 101:3; 119:37, 47, 48.
8 ʼE lagi ʼui e ʼihi ʼe mole feala ke nātou ako ʼi te temi fuli pe, heʼe nātou fia maʼu honatou temi ke nātou mālōlō ai. Logola ʼe moʼoni te faʼahi ʼaia, kae ʼe lelei anai mo kapau ʼe tou vakaʼi peʼe lahi feafeaʼi te temi ʼaē ʼe tou fakaʼaogaʼi ki te mālōlō, pea mo tou fakatatau mo te temi ʼaē ʼe tou fakaʼaogaʼi moʼoni ki te ako pea mo te lau ʼo te Tohi-Tapu. ʼE lagi tou punamaʼuli anai kiai! Ko te ʼu fakafiafia pea mo te ʼu temi mālōlō, logola ʼe ko he ʼu meʼa ʼe ʼaoga, kae ʼe tonu ke tou fai fakapotopoto. Ko te ʼu temi ʼaia ʼe tonu ke nātou fakaloto mālohiʼi ia tatou ke tou haga fai tatatou ʼu gāue fakalaumālie. ʼE lahi te ʼu polokalama televisio pea mo te ʼu meʼa gaoʼi viteo ʼe fakatupu gaʼegaʼe, kae ko te lau pea mo te ako ʼo te Folafola ʼa te ʼAtua ʼe ina fakamokomoko totatou loto pea mo fakatupu lotomālohi.—Pesalemo 19:7, 8.
Te ʼu Meʼa ʼAē Neʼe Fai e ʼIhi Moʼo Tāʼofi He Temi Ki Te Ako
9. Koteā te ʼu fua lelei ʼo te mulimuli ki te tokoni ʼaē ʼe tuku mai ʼi te tohi Tou Vakaʼi Te Tohi-Tapu ʼi Te ʼAho Fuli—1999?
9 ʼE tou lau fēnei ʼi te ʼu ʼuluaki palalau ʼo te kaupepa Tou Vakaʼi Te Tohi-Tapu ʼi Te ʼAho Fuli ʼo te taʼu 1999: “ ʼE lelei ʼaupito ke koutou lau ʼi te uhu te vaega ʼo te ʼaho pea mo te ʼu fakamatala ʼo te kiʼi kaupepa ʼaenī. ʼE hage anai ʼe fakaʼala ake koutou e Sehova, te Faiako Lahi, ʼaki tana ʼu fakatotonu. Neʼe lea fakakikite ʼo ʼuhiga mo Sesu Kilisito, ʼe foaki age ki ai te ʼu fakatotonu ʼa Sehova ʼi te uhu fuli: ‘[Ko Sehova] ʼe ina fakaʼala ʼi te uhu mo te uhu; ʼe ina fakaʼala toku taliga ke fakalogo ohage ko nātou ʼaē ʼe akoʼi.’ ʼAki te ʼu tokoni ʼaia neʼe maʼu e Sesu ‘te lea ʼo nātou ʼaē ʼe akoʼi,’ pea neʼe feala ai ke ‘poto ʼi te tali ʼaki he palalau ki ʼaē ʼe gaʼegaʼe.’ (Isaia 30:20; 50:4; Mateo 11:28-30) Kapau ʼe koutou ʼala ake ʼi te uhu fuli ʼo koutou vakaʼi he tokoni ʼo te Folafola ʼa te ʼAtua, pea ʼe mole gata pe anai mo tana tokoni atu kia koutou ke koutou tauʼi tokotou ʼu fihifihia, kae ʼe koutou toe maʼu anai ‘te lea ʼo nātou ʼaē ʼe akoʼi’ ke feala ai hakotou tokoni ki ʼihi.”a
10. ʼE maʼu feafeaʼi e ʼihi honatou temi moʼo lau pea mo ako ʼo te Tohi-Tapu, pea koteā tona ʼu fua lelei?
10 ʼE tokolahi te kau Kilisitiano ʼe nātou mulimuli ki te tokoni ʼaia, ʼo nātou lau te vaega Tohi-Tapu ʼo te uhu pea mo tona fakamatala, pea mo nātou lau te Tohi-Tapu pea mo ako ʼi te uhu. ʼI Falani, ko te pionie agatonu ʼe ʼala ake ʼi te uhu fuli pea ina lau te Tohi-Tapu ʼi te vaeluaʼi hola. Koteā ʼaē neʼe feala ai ke ina haga fai te faʼahi ʼaia lolotoga ni ʼu taʼu? ʼE ina ʼui fēnei: “ ʼE ʼau leleiʼia ʼaupito te faʼahi ʼaia, pea ʼe ʼau mulimuli fakalelei ki taku polokalama lautohi, tatau aipe pe koteā te ʼu meʼa ʼaē ʼe feala ke hoko!” Tatau aipe pe ko te lakaga fea ʼaē ʼe tou filifili, kae ko te meʼa ʼaē ʼe maʼuhiga ko tatatou mulimuli fakalelei ki tatatou polokalama. Ko René Mica, ʼaē neʼe kau ki te selevisi pionie ia taʼu e 40 tupu ʼi Eulopa pea mo te Potu Noleto ʼo Afelika, ʼe ina ʼui fēnei: “Talu mai te taʼu 1950, neʼe ʼau fakatuʼutuʼu ke ʼau lau te Tohi-Tapu katoa ʼi te taʼu fuli, pea ko te meʼa ʼaia kua tuʼa 49 nei taku fai. Maʼaku, ʼe maʼuhiga te faʼahi ʼaia ke feala haku taupau taku ʼu felogoi lelei mo toku Tupuʼaga. Ko te metitasio ki te Folafola ʼa te ʼAtua ʼe tokoni mai kia ʼau ke lahi age taku mahino ki te faitotonu ʼa Sehova, pea mo tona tahi ʼu kalitate pea neʼe ʼau maʼu ai he toe mālohi lahi.”b
Te “Meʼa Kai ʼi Tona Temi Totonu”
11, 12. (a) Koteā te “meʼa kai” fakalaumālie ʼaē neʼe foaki e “te tagata tauhi ʼapi agatonu”? (b) Neʼe foaki feafeaʼi te “meʼa kai” ʼi tona temi totonu?
11 ʼE tou maʼuli lelei mo kapau ʼe tou kakai tuʼumaʼu, ʼo toe feiā pe, ʼe tou maʼuli lelei anai ʼi te faʼahi fakalaumālie mo kapau ʼe ʼi ai hatatou polokalama ako pea mo tou lau tuʼumaʼu ia te Tohi-Tapu. ʼI te Evaselio ʼo Luka, ʼe tou lau ai te ʼu palalau neʼe fai e Sesu: “Ko ai moʼoni koa te tagata tauhi ʼapi agatonu, ia ia ʼaē ʼe poto, ʼaē ka fakanofo anai e tona pule ki tana kaugā hahaʼi ke ina foaki age kia nātou tonatou ʼinasi meʼa kai ʼi tona temi totonu?” (Luka 12:42, MN ) Kua hili nei kiai taʼu e 120 tupu, mo tatatou maʼu te “meʼa kai [fakalaumālie] ʼi tona temi totonu” ʼi Te Tule Leʼo, pea mo te tahi ʼu tohi faka Tohi-Tapu.
12 Koutou fakatokagaʼi te ʼui ʼaē “ ʼi tona temi totonu.” ʼI te lakaga ʼaē ʼe lelei, ko tatatou “Faiako Lahi,” ko Sehova, ʼaki tona ʼAlo pea mo te kalasi ʼo te kaugana, neʼe ina takitaki tana hahaʼi ʼo ʼuhiga mo te ʼu akonaki pea mo tanatou ʼu aga. Neʼe hage neʼe tou logo fuli ki he leʼo ʼe ina ʼui fēnei mai: “ ‘Koʼeni te ala. Koutou haʼele ai,’ mo kapau ʼe tonu ke koutou ʼolo ki te faʼahi mataʼu peʼe tonu ke koutou ʼolo ki te faʼahi hema.” (Isaia 30:20, 21) Tahi ʼaē meʼa, ka lau fakalelei e ʼihi te Tohi-Tapu pea mo te ʼu tohi faka Tohi-Tapu fuli, pea ʼi te agamāhani ʼe nātou ʼui ko te ʼu manatu ʼaē ʼe tuʼu ʼi loto ʼe faka ʼuhiga kia nātou totonu. Ei, ko te ʼu tokoni pea mo te takitaki fakaʼatua ʼe foaki mai kia tatou ʼi tona temi totonu, ʼo feala ai ke tou tauʼi te ʼu fakahala peʼe tou fai he ʼu tonu ʼe fakapotopoto.
Tou Fakamāhani ʼi Te Kakai Lelei
13. Koteā te faʼahiga kai ʼaē ʼe kovi ʼi te faʼahi fakalaumālie?
13 Kapau ʼe tou fia maʼu te ʼu fua lelei ʼo te “meʼa kai” ʼaē ʼe foaki mai ʼi tona temi totonu, pea ʼe maʼua ke tou fakamāhani ʼo kakai lelei. ʼE maʼuhiga ke ʼi ai hatatou polokalama moʼo lau tuʼumaʼu ʼo te Tohi-Tapu, pea mo fai tatatou ako takitokotahi ʼo tou mulimuli fakalelei kiai. ʼE koutou māhani koa ʼi te kai ki te ʼu meʼa fakalaumālie, pea mo maʼu he temi moʼo fakaloloto takotou ʼu ako takitokotahi? Peʼe koutou lau feiā pe koutou te alatike ʼaē neʼe teuteuʼi fakalelei maʼa tatou, ohage ko hakotou kai fakatevili, peʼe lagi mole koutou kai pe la te meʼa kai ʼaia? ʼI tanatou mole māhani ʼi te kai ʼi te faʼahi fakalaumālie, neʼe liliu ai ʼihi ʼo vaivai ʼi te tui—peʼe nātou līaki tanatou tui.—1 Timoteo 1:19; 4:15, 16.
14. He koʼe ʼe lelei ke tou tokakaga ʼo lau fakalelei te ʼu alatike ʼaē ʼe lagi hage kua tou māhani kiai?
14 ʼE lagi manatu ʼihi kua nātou ʼiloʼi te ʼu akonaki tāfito pea ʼe mole maʼu ʼi te ʼu alatike fuli he manatu foʼou. ʼO mole kei nātou faka maʼuhigaʼi te ako pea mo te kau ki te ʼu fono. Kae ʼe fakahā mai e te Tohi-Tapu ʼe maʼua ke fakamanatuʼi mai kia tatou te ʼu meʼa ʼaē kua tou ʼiloʼi. (Pesalemo 119:95, 99; 2 Petelo 3:1; Suta 5) Ohage pe ko he tagata fai kuka lelei ʼe ina teuteuʼi he ʼu meʼa kai kehekehe ʼaki te ʼu meʼa fai kuka ʼe tatau, ko te kalasi ʼo te kaugana ʼe ina foaki te meʼa kai fakalaumālie ʼi hona ʼu ʼaluʼaga kehekehe. Māʼiape la mo te ʼu alatike ʼaē ʼe talanoa ki he ʼu manatu neʼe kua tou talanoa tuʼumaʼu kiai, ʼe ʼi ai te ʼu puani ʼe tonu ke tou mahino kiai. Kapau ʼe tou fia tāʼofi he ʼu puani ʼi te alatike ʼaē ʼe tou lau, pea ʼe fakalogo tāfito te faʼahi ʼaia ki te temi ʼaē ʼe tou fakaʼaogaʼi kiai pea mo tatatou ʼu faiga mokā tou ako te alatike.
Te ʼu Fua Lelei Fakalaumālie Mai Te Lautohi Mo Te Ako
15. ʼE tokoni feafeaʼi mai te lau ʼo te Tohi-Tapu pea mo tona ako ke tou liliu ko he ʼu minisi ʼe lelei age ʼo te Folafola ʼa te ʼAtua?
15 ʼE lahi te ʼu fua lelei ʼe tou maʼu mokā tou lau pea mo ako te Tohi-Tapu. ʼE tokoni mai ai kia tatou ke tou lava fakahoko totatou tahi ʼu maʼua tāfito faka Kilisitiano, ko tona faka ʼuhiga, ke tou tahi liliu ko “he tagata kua tuha ke . . . tuu ia mua o te Atua, ko he tagata gaue e mole ufiufi, e ina ave fakahagatonu te folafola o te mooni.” (2 Timoteo 2:15) Kapau ʼe lahi tatatou lau pea mo tatatou ako te Tohi-Tapu, pea ʼe toe fonu ai anai tatatou ʼatamai ʼaki te ʼu manatu ʼa te ʼAtua. Pea ohage ko Paulo, ʼe feala anai ke tou ‘fakaʼaogaʼi te Tohi-Tapu moʼo uga ʼo te hahaʼi ke nātou fakakaukau, ʼo fakamahino pea mo fakamoʼoni ʼaki te ʼu vaega’ ia te moʼoni fakatalakitupua ʼo te ʼu fakatuʼutuʼu ʼa Sehova. (Gaue 17:2, 3) ʼE hikihiki anai totatou poto ʼi te faiako, pea ko tatatou ʼu fai palalau, mo tatatou ʼu faiakonaki, pea mo te ʼu tokoni ʼaē ka tou fai ʼe fakaloto mālohiʼi anai ʼi te faʼahi fakalaumālie.—Tāʼaga Lea 1:5.
16. Koteā te ʼu fua lelei ʼaē ka tou maʼu mo kapau ʼe tou lau pea mo ako ia te Folafola ʼa te ʼAtua?
16 Tahi ʼaē meʼa, ko te temi ʼaē ʼe tou fakaʼaogaʼi moʼo vakaʼi te Folafola ʼa te ʼAtua, ʼe faka fealagia anai kia tatou ke faka ʼalutahi totatou maʼuli mo te ʼu ala ʼa Sehova. (Pesalemo 25:4; 119:9, 10; Tāʼaga Lea 6:20-23) ʼE fakatuputupu ai anai tatatou ʼu kalitate fakalaumālie, ohage ko te agavaivai, mo te agatonu, pea mo te fiafia. (Teutalonome 17:19, 20; Apokalipesi 1:3) Ka tou maʼuliʼi te ʼatamai mālama ʼaē ʼe tou maʼu ʼi tatatou lautohi pea mo te ako ʼo te Tohi-Tapu, pea ʼe tou maʼu lahi ai te laumālie ʼa te ʼAtua ʼi totatou maʼuli, ʼo mahu ʼaupito te ʼu fua ʼo te laumālie ʼi te ʼu meʼa fuli ʼaē ʼe tou fai.—Kalate 5:22, 23.
17. ʼE malave feafeaʼi ki tatatou ʼu felogoi mo Sehova te lahi pea mo te lelei ʼo tatatou lau ʼo te Tohi-Tapu pea mo tona ako?
17 Ko te tahi meʼa ʼe maʼuhiga, ko te fakaʼaogaʼi te temi ʼaē ʼe tou fai ai te tahi ʼu gāue, moʼo lau pea mo ako te Folafola ʼa te ʼAtua, heʼe fua lelei anai ki tatatou ʼu felogoi mo te ʼAtua. Neʼe faikole ia Paulo ʼo ʼuhiga mo tona ʼu tēhina Kilisitiano ke feala hanatou “fonu ʼi te ʼatamai mālama totonu ki [te] finegalo [ʼo te ʼAtua], ʼaki te poto katoa pea mo te mahino fakalaumālie, ke feala [hanatou] haʼele ʼi he ʼaluʼaga ʼe tau mo feʼauga mo Sehova, [pea] ke [nātou] lelei katoa [kia te ia].” (Kolose 1:9, 10, MN ) ʼO toe feiā pe, ke feala hatatou “haʼele ʼi he ʼaluʼaga ʼe tau mo feʼauga mo Sehova,” ʼe tonu ke tou “fonu ʼi te ʼatamai mālama totonu ki tona finegalo, ʼaki te poto pea mo te mahino fakalaumālie.” ʼE hā lelei mai, ko te maʼu ʼo te tapuakina pea mo te ʼofa ʼa Sehova, ʼe fakalogo tāfito ki te temi pea mo te fai fakaleleiʼi ʼo tatatou lau ia te Tohi-Tapu pea mo tona ako.
18. Koteā te ʼu tapuakina ʼaē ʼe tou lava maʼu mo kapau ʼe tou mulimuli ki te ʼu palalau ʼa Sesu ia Soane 17:3?
18 “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) ʼE kau te vaega ʼaia ki te ʼu vaega ʼaē ʼe fakaʼaogaʼi lahi e te kau Fakamoʼoni ʼa Sehova, moʼo tokoni ki te hahaʼi ke nātou mahino ki te maʼuhiga ʼo te ako ʼo te Folafola ʼa te ʼAtua. ʼE mahino ia ʼe toe maʼuhiga kia tatou takitokotahi ke tou fai te faʼahi ʼaia. Ko tatatou ʼamanaki ʼaē ke tou maʼuʼuli heʼegata, ʼe fakalogo ki tatatou tuputupu ʼi te ʼatamai mālama ʼo ʼuhiga mo Sehova pea mo tona ʼAlo, ia Sesu Kilisito. Ko tona faka ʼuhiga ʼe mole ʼi ai anai he gataʼaga ʼo te ʼu meʼa ʼaē ka tou ako ʼo ʼuhiga mo Sehova—pea ʼe tonu anai ke ʼi ai he temi ʼe heʼegata ke tou ako ai ʼo ʼuhiga mo ia!—Tagata Tānaki 3:11; Loma 11:33.
[Kiʼi nota]
a Neʼe tā e te Watchtower Bible and Tract Society of New York, Inc.
b Vakaʼi te alatike “E Feafeaʼi Tanatou Polokalama ʼo ʼUhiga Mo Te Lau ʼo Te Tohi-Tapu Pea Koteā Tona ʼu Fua Kia Nātou,” ʼi Te Tule Leʼo ʼo te ʼaho 1 ʼo Maio 1995, pasina 20-21.
Te ʼu Fehuʼi Fakamanatu
• Koteā ʼaē ʼe hā ʼi tatatou faʼahiga fakaʼaogaʼi ʼo totatou temi?
• Koteā te ʼu meʼa ʼaē ʼe feala ke tou tuku keheʼi moʼo fakaʼaogaʼi totatou temi moʼo lau pea mo ako ʼo te Tohi-Tapu?
• He koʼe ʼe tonu ke tou tokakaga ki tatatou faʼahiga kai ʼi te faʼahi fakalaumālie?
• Koteā te ʼu fua lelei ʼe tou maʼu mai te lautohi pea mo te ako ʼo te Tohi-Tapu?
[Paki ʼo te pasina 20, 21]
Ko te lau pea mo te ako tuʼumaʼu ʼo te Tohi-Tapu, ʼe tokoni mai anai ke tou ‘fakaʼaogaʼi lelei te folafola ʼo te moʼoni’
[Paki ʼo te pasina 23]
Kapau ʼe tou maʼu he fakafuafua lelei ʼi tatatou ʼu tuʼuga gāue ʼo totatou maʼuli pea mo tatatou kumi te ʼu meʼa fakalaumālie, pea ʼe tou maʼu anai he ʼu fua lelei