Koutou Fakatafito Tokotou Maʼuli Ki Te Tauhi Kia Sehova
1 Neʼe fakatatau e Sesu te hahaʼi ʼaē neʼe fagono kia te ia ki te ʼu faʼahiga tagata laga fale e lua. Ko te tahi tagata neʼe ina laga tona maʼuli ki te fuga maka, ʼaē ʼe faka ʼuhiga ki tana fakalogo kia Kilisito ʼo mole feala ai ke holo ʼi te hoko mai ʼo te ʼu afā, ʼaē ʼe faka ʼuhiga ki te ʼu fakafeagai pea mo te ʼu mamahi ʼaē ʼe hoko kia ia. Ko te tahi tagata neʼe ina fakatafito tona maʼuli ki te ʼone, ko tona faka ʼuhiga ʼe mole fia fakalogo pea neʼe holo ia ʼi te ʼu ʼahiʼahi. (Mateo 7:24-27) ʼI tatatou maʼuʼuli ʼi te fakaʼosi ʼo te tuʼu ʼo te ʼu faʼahiga meʼa ʼaenī, ʼe hoko kia tatou te ʼatu ʼu faigataʼaʼia. Kua ʼamanaki hoko mai te mamahi lahi. ʼE tou loto kātaki anai koa ʼo aʼu ki te fakaʼosi, ʼo tou taupau tatatou tui ke haohaoa? (Mateo 24:3, 13, 21) ʼE fakalogo tāfito te faʼahi ʼaia ki te meʼa ʼaē ʼe tou fakatafito kiai totatou maʼuli ʼi te temi nei. Koia ʼe maʼuhiga ai ke tou feʼekeʼaki, ‘ ʼE ʼau laga koa toku maʼuli faka Kilisitiano ki te tauhi ki te ʼAtua?’
2 Koteā tona faka ʼuhiga ʼo te ʼui ʼaē ke tou laga totatou maʼuli ʼo fakatafito ki te tauhi kia Sehova? Ko tona faka ʼuhiga, ʼe tonu ke liliu ia Sehova ko te meʼa ʼaē ʼe tou faka maʼuhigaʼi tāfito ʼi totatou maʼuli. Ko tona faka ʼuhiga ke tou fakamuʼamuʼa te Puleʼaga ʼo te ʼAtua. ʼE tonu ke tou fakalogo ki te ʼAtua ʼi te ʼu gāue fuli ʼaē ʼe tou fai ʼi te ʼaho fuli. ʼE maʼua ke tou fai ʼaki totatou loto katoa tatatou ako takitokotahi ʼo te Tohi-Tapu, mo tatatou ako faka famili, pea mo te ako ʼi te kokelekasio, pea mokā tou fai faka mafola, ʼo tou fakamuʼamuʼa tāfito te ʼu meʼa ʼaia. (Tnk. 12:13; Mateo 6:33) ʼE mālohi anai tatatou tui, mo kapau ʼe tou mulimuli ki te ʼu tokoni ʼaia, pea ʼe mole vaivai anai mokā hoko mai he ʼu faigataʼaʼia.
3 ʼE ko he meʼa fakafiafia tatatou sio ʼaē ki te toko lauʼi miliona hahaʼi ʼe nātou fakatafito tonatou maʼuli pea mo tanatou ʼamanaki ki te ka haʼu ki te tauhi ki te ʼAtua, ohage ko te meʼa ʼaē neʼe fai e Sesu. (Soane 4:34) ʼE nātou fakahoko tuʼumaʼu he ʼu gāue faka teokalatike pea ʼe lahi te ʼu tapuakina ʼaē ʼe nātou maʼu ai. Neʼe fakamatala e te faʼe pe neʼe feafeaʼi tana taupau mo tona ʼohoana tanā ʼu tama e lua ke nā tauhi kia Sehova: “Neʼe maʼuhiga te moʼoni ʼi tomatou maʼuli—neʼe mātou kau ki te ʼu fakatahi fuli, neʼe mātou teuteuʼi te ʼu fono pea mo kau kiai, pea neʼe mātou fai faka mafola.” Neʼe toe ʼui fēnei e te tagata: “Ko te moʼoni ʼe mole ko he koga ʼo tomatou maʼuli, kae ʼe ko tomatou maʼuli. Ko meʼa fuli ʼaē ʼe mātou fai ʼe fakalogo ki te moʼoni.” ʼE koutou fakamuʼamuʼa koa te tauhi kia Sehova ʼi tokotou famili?
4 Koutou Fakatuʼutuʼu He Polokalama Ki Te Vāhaʼa ʼe Koutou Lava Mulimuli Kiai: ʼE tokoni mai te kautahi ʼa Sehova ke tou mulimuli ki he polokalama fakalaumālie, he neʼe ina fakatuʼutuʼu te ʼu fono e nima ʼi te vāhaʼa fuli. Ko te kau Kilisitiano ʼaē ʼe nātou fakatafito tonatou maʼuli ki te tauhi kia Sehova, ʼe nātou fakatuʼutuʼu tanatou gāue pea mo tanatou ʼu meʼa faka famili ke feala hanatou kau ki te ʼu fono maʼuhiga fuli ʼaia. ʼE mole nātou tuku he ʼu meʼa noa ke nātou tāʼofi tanatou kau ki te ʼu fono.—Filp. 1:10; Hep. 10:25.
5 ʼE ʼiloʼi e te kau Kilisitiano ʼaē kua fakapotopoto, ohage pe ko te maʼuhiga ʼaē ke tou kakai ʼi te ʼaho fuli, koia ʼe toe maʼuhiga foki ke tou fakatuʼutuʼu he polokalama ke tou ako takitokotahi pea mo tou ako mo tatatou famili, ʼo kau ai mo te teuteuʼi ʼo te ʼu fono. (Mateo 4:4) ʼE feala koa ke koutou fakaʼaogaʼi ia minuta e 15 peʼe 20 ʼi te ʼaho fuli ke koutou fai ai takotou ako takitokotahi? ʼE mole tonu ke kita fakaʼaogaʼi te temi ʼaia ki he tahi ʼu gāue. Koutou fakamāhani ʼi te fai ʼo te faʼahi ʼaia. ʼE lagi tonu anai ke koutou ʼalaʼala uhuuhu ʼi te ʼaho fuli. ʼI te malamanei katoa, ko te toko 17 000 hahaʼi ʼo te famili ʼo te Petele ʼe nātou ʼaʼala uhuuhu ki tanatou fai palalau ki te koga tohi ʼo te ʼaho. ʼE mahino ia, kapau ʼe koutou fia ʼaʼala uhuuhu, pea ʼe mole tonu ke koutou momoe tauhala ʼi te pōʼuli, ke feala hakotou ʼaʼala ake ʼe mole koutou gaʼegaʼe, kae ʼe koutou mālolohi he neʼe koutou mālōlō lelei.
6 ʼU tāmai, koutou fakatuʼutuʼu te ʼu gāue faka teokalatike ʼaē ʼe koutou fai mo takotou famili. Ko ʼihi famili ʼe nātou lau fakatahi te Tohi-Tapu, te Annuaire, peʼe ko he tahi tohi ʼi tanatou ʼosi kakai ʼi te afiafi. Ko te tokolahi ʼo te ʼu mātuʼa ʼaē neʼe nātou sio ki te liliu ʼo tanatou fānau ko he kau Kilisitiano mālohi ʼi te faʼahi fakalaumālie, ʼe nātou ʼui ko te meʼa ʼaē neʼe tokoni kia nātou ke nātou lava lelei ʼi te faʼahi ʼaia, neʼe ko tanatou agamāhani faka famili, ʼaē ko te ako ʼi he afiafi ʼi te vāhaʼa fuli, ke nātou fefakaloto mālohi fakatahi ʼi te faʼahi fakalaumālie. Neʼe ʼui fēnei e te tāmai: “ ʼE ʼau manatu neʼe tuputupu tamā fānau ʼi te faʼahi fakalaumālie ʼuhi tāfito ko tamatou ako faka famili ʼaē neʼe mātou fai tuʼumaʼu ʼi te Feliafā afiafi, pea ko te faʼahi ʼaia neʼe mātou kamata fai kua hili kiai taʼu e 30.” Neʼe papitema tana ʼu toe e toko tolu ʼi tanatou kei tūpulaga, pea ki muli age neʼe nātou kau ki te minisitelio temi katoa. ʼO hilifaki ki te ako faka famili, ʼe feala ke toe fakamanatuʼi he ʼu faʼifaʼitaki ʼo te fai faka mafola peʼe ko he ʼu puani ʼo te fono, pea ʼe ʼi ai te tahi ʼu gāue lelei ʼe feala ke nātou fai fakatahi.
7 ʼI takotou polokalama ki te vāhaʼa, neʼe koutou ‘toʼo koa hokotou temi’ ki te faka mafola ʼo te Puleʼaga? (Kol. 4:5) Tokolahi ia tatou ʼe tou maʼumaʼua heʼe tonu ke tou tokakaga ki totatou ʼu maʼua faka famili pea mo te ʼu meʼa ʼo te kokelekasio. Kapau ʼe mole fakatuʼutuʼu lelei he temi ke kau ki te gāue fai faka mafola pea mo akoʼi te hahaʼi, pea ʼe faigafua anai te fakamuʼamuʼa ʼo he tahi ʼu meʼa ʼi te gāue maʼuhiga ʼaia. Neʼe ʼui fēnei e te tagata ʼe ʼi ai tana fale tauhi manu: “ ʼI te lagi taʼu 1944 neʼe mahino ai kia ʼau, ʼe tonu ke ʼau tāʼofi he ʼaho ke feala haku kau ki te fai faka mafola. Ia ʼaho nei, ʼe kei ʼau tāʼofi te ʼaho ʼaia ʼi te vāhaʼa fuli ki taku fai faka mafola.” ʼE ʼui e te tahi tagata ʼāfea, kua feala kia ia, ʼaki tana fakatuʼu he polokalama fai faka mafola, ke ina fai hola e 15 ʼi te māhina ʼi te gāue fai faka mafola. Kapau ʼe tonu ke ina fai he gāue ʼi te Moeaki, pea ʼe ina fakatuʼutuʼu ke ina fai te gāue ʼaia ʼi te hili hoʼatā, ʼi tana ʼosi fai faka mafola ʼi te uhu. Ko koutou pea mo tokotou famili ʼe feala koa ke koutou fakatuʼutuʼu he ʼaho ʼi te vāhaʼa fuli ki te minisitelio, ke liliu te faʼahi ʼaia ko he koga maʼuhiga ʼo tokotou maʼuli fakalaumālie?—Filp. 3:16.
8 Koutou Vakavakaʼi Te ʼu Meʼa ʼAē ʼe Koutou Fai Māhani ʼi Tokotou Maʼuli: ʼE ʼi ai te ʼu meʼa ʼe feala ke nātou tāʼofi te fakatafito ʼo totatou maʼuli ki te tauhi kia Sehova. Kapau ʼe hoko kia tatou he ʼu meʼa fakapunamaʼuli, pea ʼe lagi nātou fetogi anai te temi ʼaē neʼe tou fakatuʼutuʼu ki te ako, ki te ʼu fono, pea ki te fai faka mafola. Pea ko Satana, totatou Fili, ʼe ina fai anai ia meʼa fuli moʼo “tāʼofi tatatou haʼele” pea mo fetogi tatatou ʼu fakatuʼutuʼu. (1 Tes. 2:18; Efesi 6:12, 13) ʼAua naʼa koutou tuku ke fakaloto vaivai koutou e te ʼu meʼa ʼaia, ke tupu ʼaki ai hakotou līaki takotou ʼu fakatuʼutuʼu ʼaia. ʼE lagi tonu anai ke koutou fai he ʼu fetogi, ke feala hakotou mulimuli ki takotou polokalama faka teokalatike. ʼE maʼua ke tou maʼu he lotomālohi pea mo tou faʼa kātaki ke tou fakahoko ai te ʼu gāue ʼaē ʼe tau mo feʼauga.
9 ʼE mole tonu ke tou tuku ki te mālohi ʼo te mālama pea mo te mālohi ʼo totatou kakano agahala, ke nā uga tatou ke tou fai he ʼu gāue ʼe mole ko he ʼu gāue fakalaumālie, ʼo feala māmālie ai ke nā kaihaʼa totatou temi, pea mo tou tokakaga tāfito ki te ʼu faʼahi ʼaia. ʼE tonu ke tou sivisivi ia tatou totonu, ʼo tou fai te ʼu fehuʼi ʼaenī: ‘ ʼE fakahaʼuhaʼu koa ke mole kei ʼau fakapotopoto ʼi toku maʼuli, ʼo ʼau tokaga fau ki te ʼu meʼa ʼaē ʼe mole faʼa maʼuhiga? Kua ʼau kamata laga koa toku maʼuli ki te ʼu meʼa faka temi ʼo te mālama ʼaenī? (1 Soane 2:15-17) ʼO fakatatau ki te temi ʼaē ʼe ʼau kau ai ki te ʼu gāue fakalaumālie, ʼe lahi feafeaʼi te temi ʼaē ʼe ʼau fakaʼaogaʼi ki taku gāue, ki te ʼu folau, ki te faigaoʼi, peʼe ki he tahi fakafiafia—ʼo feiā mo taku sioʼi te televisio?’
10 Kapau ʼe koutou fakatokagaʼi kua koutou tokaga fau ki te ʼu meʼa ʼaē ʼe mole maʼuhiga, koteā te meʼa ʼaē ʼe tonu ke koutou fai? Ohage ko te faikole ʼaē neʼe fai e Paulo ʼo ʼuhiga mo tona ʼu tēhina, ke nātou fai he ʼu “fetogi,” peʼe ke nātou “toe fakatonutonuʼi lelei ia nātou,” he koe koa ʼe mole koutou kole kia Sehova ke tokoni atu ke feala hakotou toe tokagaʼi tāfito tana tauhi? (2 Ko. 13:9, 11, kiʼi nota ʼi te lalo pasina) Koia koutou lotomālohi ʼo koutou mulimuli ki te meʼa ʼaē kua koutou fakatotonu ke koutou fai, pea mo koutou fai te ʼu fetogi ʼaē ʼe ʼaoga. (1 Ko. 9:26, 27) ʼE tokoni atu anai ia Sehova ke mole koutou hēʼia ʼi takotou fakalogo ʼo tauhi kia te ia.—Vakaʼi ia Isaia 30:20, 21.
11 Koutou Maʼumaʼua ʼi Te Tauhi Fakafiafia Ki Te ʼAtua: Ko te toko lauʼi miliona hahaʼi ʼe nātou faiga ki te ʼu fiafia, kae ʼe nātou fakatokagaʼi te nounou ʼo tonatou maʼuli, pea ko te ʼu koloā ʼaē neʼe nātou kumi fakamalotoloto neʼe mole nātou maʼu ai he fiafia ʼe tologa. Neʼe ko he “faiga ia ki te matagi.” (Tnk. 2:11) ʼI te tahi faʼahi, kapau ʼe tou fakamuʼamuʼa tāfito ia Sehova ʼi totatou maʼuli, ‘ ʼo tuku tuʼumaʼu ia ia ki muʼa,’ pea ʼe tou maʼuli fiafia anai. (Pes. 16:8, 11) ʼE tou maʼuli fiafia anai heʼe tou maʼuʼuli maʼa Sehova. (Fkhā. 4:11) Kanapaula neʼe mole ʼi ai he ʼAtua, ia ia ʼaē ʼe ʼi ai tana fakatuʼutuʼu lahi, kanaʼauala ʼe mole he ʼuhiga ʼo te maʼuli. ʼE ʼi ai anai he ʼuhiga ʼo totatou maʼuli, mo kapau ʼe tou tauhi kia Sehova, pea mo tou fai he gāue ʼe ʼaoga fualoa anai kia tatou pea mo te hahaʼi.
12 ʼE mole tonu ke tou fakafīfīmālie, ʼo mole kei tou tokagaʼi te maʼuhiga ʼo te temi, heʼe kua ōvi mai te fakaʼosi ʼo te mālama ʼa Satana. Ko totatou faʼahiga maʼuli ʼi te temi nei, ʼe fakalogo ia ki tatatou faʼahiga sio ki te ka haʼu. Ko te hahaʼi ʼo te temi ʼo Noe, ʼaē neʼe mole nātou tui ʼe hoko anai te lōmaki ki te kele katoa, “neʼe mole nātou fakatokagaʼi he meʼa,” he neʼe nātou tokakaga tāfito ki tonatou ʼu holi fakasino—neʼe nātou kakai, mo ʼiʼinu, pea mo ʼohoana—ʼo aʼu ki te ʼaho ʼaē neʼe “ ʼave ai ia nātou fuli” e te lōmaki. (Mateo 24:37-39) Ia ʼaho nei, ko nātou ʼaē ʼe nātou faka maʼuhigaʼi ʼi tonatou maʼuli te ʼu meʼa ʼo te mālama ʼaenī, ʼe nātou mamata anai ki te maumau ʼo tanatou ʼu ʼamanaki ki te ka haʼu, ʼi te fakaʼauha lahi ʼaē ka hoko ki te tagata, ʼi “te ʼaho ʼo Sehova.”—2 Pet. 3:10-12.
13 Koutou haga fakatafito tokotou maʼuli kia Sehova ʼAtua, pea mo koutou fai tona finegalo. ʼE mole he tahi meʼa ʼe tonu ke koutou falala kiai, kae ʼe tonu ke tou falala ʼāteaina pe kia Sehova. ʼE mole gutuloi—heʼe ina fakahoko anai tana ʼu fakapapau. (Tito 1:2) ʼE mole feala ke mate—pea ʼe mole ina galoʼi he meʼa. (Hap. 1:12; 2 Tim. 1:12) Ko tatatou fakalogo pea mo tatatou tui, ʼe ko te kamataʼaga ʼaia ʼo he maʼuli ʼe heʼegata anai ʼi tatatou tauhi fakafiafia ki totatou ʼAtua fiafia!—1 Tim. 1:11; 6:19.
[Talanoa ďo te pasina 3]
“Ko te moʼoni ʼe mole ko he koga ʼo totatou maʼuli, kae ʼe ko totatou maʼuli. Ko te ʼu meʼa fuli ʼaē ʼe mātou fai ʼe fakalogo ki te moʼoni.”