Tohi ʼo Te ʼu Fakamanatu ʼo Te Ako ʼo Te Minisitelio Faka Teokalatike
Ko te fakamanatu ʼo te ʼu puani neʼe vakaʼi ʼi te lolotoga ʼo te Ako ʼo te minisitelio faka teokalatike ʼo te vāhaʼa ʼo te ʼaho 7 ʼo Sepetepeli ki te vāhaʼa ʼo te ʼaho 21 ʼo Tesepeli 1998. Koutou tali ʼo tohi ki he laupepa te ʼatu ʼu tali ʼo te ʼu fehuʼi ʼe koutou fealagia tona tali ʼi te kiʼi temi neʼe tuku mai.
[Nota: ʼI te lolotoga ʼo te fakamanatu, koutou fakaʼaogaʼi pe te Tohi-Tapu. Ko te ʼu kumiʼaga ʼaē ʼe foaki ʼi te ʼu fakaʼosi fehuʼi ʼe faka faigafua ki ʼakotou ʼu kumi takitokotahi. Ko te ʼu numelo ʼo te ʼu pasina pea mo te ʼu palakalafe ʼe mole fakahā tuʼumaʼu pe ki te ʼu kumiʼaga ʼo Te Tule Leʼo.]
Koutou tohi “moʼoni” peʼe “hala” moʼo tali ki te ʼu palalau ʼaē ʼe hoa mai:
1. Ko “te fealagia” ʼaē ʼe talanoa kiai ia 2 Timoteo 1:6, ʼe faka ʼuhiga ki te poto palalau ʼi te ʼu lea kehekehe ʼaē neʼe foaki age kia Timoteo ʼaki te laumālie maʼoniʼoni ʼo te ʼAtua. [Lau ʼo te Tohi-Tapu; vakaʼi te w85 1/5 p. 16 § 15.]
2. Ko he Kilisitiano kua fakapotopoto, ʼe ina ‘akoʼi tona ʼu fealagia fakakaukau moʼo fakakeheʼi te meʼa ʼaē ʼe lelei pea mo te meʼa ʼaē ʼe kovi’ pea ʼe fakamāmāhani ʼi te fakaʼaogaʼi ʼo te ʼu meʼa ʼaē kua ina ako ʼi te Folafola ʼa te ʼAtua. (Hep. 5:14) [Lau ʼo te Tohi-Tapu; vakaʼi te w85 15/6 p. 9 § 7.]
3. Neʼe tohi e Paulo tana ʼUluaki tohi kia Timoteo ʼi te temi ʼaē neʼe faka ʼāteaina ai mai tona ʼuluaki pilisoni ʼi Loma, pea mo tona puke fakaʼosi ʼo toe ʼave ʼo pilisoniʼi ʼi Loma. [si p. 220 § 2]
4. Ko te Sake ʼaē neʼe ina tohi te Tohi-Tapu ʼe ko te Sake ʼaē neʼe lea maʼa “te kau ʼapositolo pea mo te kau tagata ʼāfea” ʼi te ʼaho ʼaē neʼe fai ai te tonu ʼo ʼuhiga mo te silikosisio. (Gāue 15:6, 13; Sake 1:1) [si pp. 233-4 §§ 2-3]
5. Logope la ʼe fakahā mai ia 1 Petelo 5:13 neʼe nofo ia Petelo ʼi Papiloni ʼi te temi ʼaē neʼe ina tohi ai tana ʼuluaki tohi, kae ʼe hā mai ia ko Papiloni neʼe ko he higoa fakalilo ʼo Loma. [si p. 237 § 4].
6. Ko te kupuʼi palalau ʼo 1 Soane 2:18 ʼaē ina ʼui “ ʼe haʼu te fakafeagai kia Kilisito” ʼe faka ʼuhiga pe ki te tokotahi. [Lau ʼo te Tohi-Tapu; vakaʼi te rs p. 34 § 4.]
7. ʼE fakahā ia 1 Timoteo 3:16, ko Sesu “neʼe fakatonuhia ʼi te laumālie,” ko tona faka ʼuhiga kua fakatuʼuake ki te maʼuli fakalaumālie; pea neʼe fakahā ai e te ʼAtua kua tāu mo Sesu ke ina fakahoko he tahi ʼu gāue ʼe maʼuhiga ake. [Lau ʼo te Tohi-Tapu; vakaʼi te w90 15/1 p. 13 § 12.]
8. Neʼe maʼu e Seoiakini tona ʼu foha e toko fitu, koia neʼe lagi ko he faihala ʼi te tohi ʼaē ʼi te Tohi-Tapu, “Koutou tohi ko te tagata ʼaenī ʼe mole maʼu fānau.” (Sel. 22:30) [ad p. 766 § 2]
Koutou tali ki te ʼu fehuʼi ʼaenī:
9. Koteā te faka ʼuhiga ʼo te ʼui ʼaē ko te tagata taupau ʼe mole tonu ke “tātā”? (Tito 1:7) [Lau ʼo te Tohi-Tapu; vakaʼi te w90 9/1 p. 27 § 21.]
10. He koʼe ʼe tonu ke tokagaʼi e te kau Kilisitiano te tokoni ʼaē neʼe fai e Paulo ia 1 Timoteo 6:4 ki “te ʼu fetalanoaʼaki ʼo ʼuhiga mo he ʼu kupu”? [si p. 222 § 15]
11. Koteā te faka ʼuhiga ʼo te ʼui ʼaē e Sesu “Ko te sakilifisio pea mo te mōlaga neʼe mole ke loto kiai”? (Hep. 10:5) [Lau ʼo te Tohi-Tapu; vakaʼi te w96 7/1 p. 14 § 3.]
12. ʼE lava feafeaʼi ki te kau Kilisitiano hanatou ‘mālo ʼi te malamanei’? (1 Soane 5:3, 4) [si p. 243 § 12]
13. Koteā te faka ʼuhiga ʼo te ʼui ʼa Petelo ke ‘koutou taupau lelei ʼi tokotou ʼatamai te ʼaho ʼo Sehova’? (2 Pe. 3:12) [Lau ʼo te Tohi-Tapu; vakaʼi te w97 1/9 p. 19 § 2.]
14. Koteā ʼaē ʼe kau ki te maʼa ʼi te faʼahi fakalaumālie, pea e feafeaʼi tana tokoni ki te puipui ʼo te famili? (2 Ko. 7:1) [fy p. 46 § 14]
15. Neʼe fakahā feafeaʼi e Sailusi tana tui ʼaē ʼe feala kia Sesu ke ina fakamālōlō te hahaʼi? (Maleko 5:22-24) [ad p. 747 § 2]
16. He koʼe neʼe mole lava fakahoko e Itilele tana ʼui ʼaē ʼe ina pulihi anai te hahaʼi ʼa Sehova? [jv p. 553 §§ 2-4]
17. Koteā te faka ʼuhiga ʼa te ʼu palalau ʼa te ʼapositolo ko Paulo ʼi tana ʼui ʼaē ʼe ina loto ki te hahaʼi fafine ‘ke nātou teuteu ʼaki he agavaivai’? (1 Tim. 2:9) [Lau ʼo te Tohi-Tapu; vakaʼi te g90 22/6 p. 19 § 1.]
Koutou tohi te ʼu kupu ʼaē ʼe ʼaoga moʼo fakakatoa ʼo te ʼu kupuʼi palalau ʼaenī:
18. Ko te tagata pea mo tona ʼohoana ʼe tonu ke nā ․․․․․․․․ , pea mo manatuʼi ko ․․․․․․․․ ʼaē ʼe maʼuhiga age ʼi te meʼa ʼaē ʼe hā ki tuʼa. [fy p. 26 te ʼu puani fakamanatu]
19. Ko te tohi ʼa Paulo ki te kau Hepeleo ʼe ina fakahā ai ko te ʼu agaaga kehekehe ʼo te ․․․․․․․․ , neʼe ko he faʼifaʼitaki neʼe fai e te ʼAtua moʼo fakahā te ʼu meʼa ʼe maʼuhiga age neʼe tonu ke hoko, pea neʼe tonu ke iku te ʼu meʼa fuli ʼaia kia ․․․․․․․․ , ʼaē ko te fakahoko ʼo te Lao. [si p. 232 § 23]
20. Ia 2 Petelo 1:5-8, ʼe fakatotonu mai e te ʼapositolo ko Petelo ke tou ․․․․․․․․ ʼo fakatuputupu te ʼu kalitate faka Kilisitiano ʼaē ka tokoni anai kia tatou ke ʼaua naʼa tou ․․․․․․․․ peʼe ․․․․․․․․ . [si p. 240 § 9]
21. Ka felogoi he taumatuʼa, pea ʼe maʼuhiga ʼaupito ke ․․․․․․․․ tonā ․․․․․․․․ pea mo nā ․․․․․․․․ ʼaē ka nā fai. [fy p. 36 § 21]
22. Ko te faʼifaʼitaki ʼo ․․․․․․․․ , te Kitite, ʼaē neʼe ina fakahā tana agatonu kia ․․․․․․․․ , ʼe tonu ke ina uga tatou ke tou fakahā te kalitate ʼaia kia nātou ʼaē ʼe nātou takitaki te kautahi ʼa Sehova ia ʼaho nei. (2 Sam. 15:21) [ad p. 735 § 6]
Koutou fakaʼiloga te ʼu tali ʼaē ʼe totonu:
23. ʼI te ʼuluaki pilisoniʼi ʼo Paulo ʼi Loma, (ko Onesifolo; ko Onesimo; ko Onane), ʼaē neʼe ko he tagata kaugana neʼe hola mai te ʼapi (ʼo Filipe; ʼo Feseto; ʼo Filemone), neʼe kau ia nātou ʼaē neʼe fakalogo ki tana fai faka mafola. [si p. 227 § 2]
24. (Ko te ʼofa; te fakaʼapaʼapa; te tali kāiga) ko tona faka ʼuhiga ko he “fakahā ʼo he loto tokaga ki te hahaʼi, ʼo faka maʼuhigaʼi nātou.” [fy p. 30 § 7]
25. Ia Luka 14:28, ʼe palalau ia Sesu ʼo ʼuhiga mo (te meʼa ʼe fakatuʼutuʼu fakatomuʼa; mole maumau falā; mole kole maʼua). [fy p. 40 § 4]
26. Ko te “fai pule” ʼaē ʼe tuʼu ia Suta 8 ʼe faka ʼuhiga ki te (tuʼulaga ʼo Sesu; ki te pule faʼifaʼitaliha ʼo Sehova; ki te fai pule ʼaē neʼe fakatuʼu e te ʼAtua ʼi te loto kokelekasio faka Kilisitiano). [si p. 247 § 9]
27. Ko te kaugamālie ʼaē ʼe kau ki te fagonogono ʼo te logo lelei, ʼe ko (te hahaʼi maʼu koloā; te hahaʼi ʼiloa; te hahaʼi māhani). [jv p. 548 § 3]
Fakatahiʼi te ʼu vaega faka Tohi-Tapu ʼaē ʼe ʼalutahi mo te ʼu kupuʼi palalau ʼaenī:
2 Hau 10:15, 16; Taag. 8:30; Mateo 19:13-15; Loma 9:10-12; Hep. 2:1; Sake 4:15; 1 Pe. 3:4; Suta 1
28. ʼAua naʼa tou fakaʼaogaʼi totatou ʼu vāhaʼa faka famili moʼo faka maʼuhigaʼi ʼo tatou. [Lau ʼo te Tohi-Tapu; vakaʼi te ad p. 870 § 9]
29. Neʼe fakahā e Sehova ʼe feala ke ina ʼiloʼi te ʼuhiga ʼo he tahi ʼi muʼa ʼo tona tupu, pea ʼe ina fakaʼaogaʼi te faʼahi ʼaia mo filifili fakatomuʼa ia ia ʼaē ka ina fakaʼaogaʼi moʼo fakahoko tana ʼu fakatuʼutuʼu. [ad p. 738 § 3]
30. ʼE tonu ke tou agatonu ʼo lagolago kia nātou ʼaē ʼe nātou takitaki te tauhi ʼa Sehova. [ad p. 837 § 7]
31. Ke feala hatatou tauʼi te ʼu manatu ʼo te malamanei ʼaē ʼe feala ke ina fakahalaʼi tatou, ʼe tonu ke “makehe age tatatou tokagaʼi” te Folafola ʼa te ʼAtua, ʼo tou tokaga ke tou fai tuʼumaʼu hatatou ako takitokotahi, pea mo tou mulimuli lelei ki hatatou polokalama lau Tohi-Tapu. [Lau ʼo te Tohi-Tapu; vakaʼi te w98 1/1 p. 7 § 9.]
32. Ka tou fai hatatou ʼu fakatuʼutuʼu ʼo ʼuhiga mo te ka haʼu, tou vakaʼi te faʼahi ʼaia ʼi te faikole peʼe ʼalutahi mo te finegalo ʼo te ʼAtua. [Lau ʼo te Tohi-Tapu; vakaʼi te w97 11/15 p. 21 §§ 10-11.]
33. “Ko he laumālie tokalelei mo agamālū” ʼa he fafine Kilisitiano pea mo maʼu fānau, ʼe mole gata pe ʼi tana fakafiafia tona ʼohoana, kae ko te meʼa ʼaē ʼe maʼuhiga heʼe ina fakafiafia te ʼAtua. [Lau ʼo te Tohi-Tapu; vakaʼi te w89 5/15 p. 18 § 12.]
34. Moʼo mulimuli ki te faʼifaʼitaki ʼa Sehova, ʼe tonu anai ki he tāmai ke agalelei pea mo ʼofa ki tana tamasiʼi mokā fānauʼi anai. [fy p. 54 § 7]
35. Mai tona ʼuhiga ʼaē neʼe mole fakapalatahi ia Sesu ʼi tana tapuakina te ʼu kihiʼi tamaliki, koia ʼe mole ko he meʼa lelei anai te faka maʼuhigaʼi ʼo te tamasiʼi tagata kae fakamālaloʼi te tamasiʼi fafine. [fy p. 52 § 4]