Te ʼu Tonu

◼ Ko te tufa ʼo te māhina ʼo Tesepeli: Te ʼAtamai Mālama ʼAē ʼe Ina Taki Ki Te Maʼuli Heʼegata pea mo te Traduction du monde nouveau ki te 750. Sanualio: Ko he ʼu kaupepa ʼe pasina 32 ki 50: ʼE tokaga moʼoni koa te ʼAtua kia tatou?; Koteā ʼAē ʼe Fakamaʼua Mai e Te ʼAtua Kia Tatou? pea Mokā mate he tahi ʼaē ʼe tou ʼofa mamahi ai. ʼE feala foki ke fakahā mo te kaupepa Te ʼu laumālie ʼo te kau mate​—ʼE feala koa hanatou tokoniʼi koutou peʼe nātou fakahalaʼi koutou? ʼE nātou maʼuʼuli moʼoni koa? Fepualio: Te Tagata ʼAē ʼe Lahi Tokotahi ʼi Te ʼu Temi Fuli ki te 400. Malesio: Te ʼAtamai Mālama ʼAē ʼe Ina Taki Ki Te Maʼuli Heʼegata ki te 150. ʼE tou faiga tāfito anai ke tou kamata he ʼu ako Tohi-Tapu.

◼ ʼE tonu ke kamata fakaʼui e te ʼu kokelekasio te ʼu foʼi tohi ʼo Te Tule Leʼo pea mo te Réveillez-vous! ʼo te taʼu 1998, pea mo tanatou ʼu tohi ʼaē neʼe nātou kole ki te māhina ʼo Tesepeli. ʼE feala ke koutou maʼu te ʼu volumes reliés ʼi te lea Fakapilitānia, mo te lea Fakafalani, pea mo te lea Fakaʼuvea. ʼO aʼu ki takotou maʼu te ʼu volumes reliés pea mo tona fakamomoli atu, ʼe tohi anai “Fakatalitali” ʼi te ʼu pepa ʼaē ʼe tohi ai te falā ʼaē ʼe tonu ke huʼi e te kokelekasio. Ko te ʼu volumes reliés ʼe tonu ke fakaʼui.

◼ ʼE tonu ke lau e te taupau pelesita peʼe ko he tahi neʼe ina hinoʼi, te falā ʼo te kokelekasio ʼi te ʼaho 1 ʼo Tesepeli, kapau ʼe mole feala ʼi te ʼaho ʼaia, pea ke ina foimo fai ʼi te ʼu ʼaho ʼaē ʼe hoa kiai. ʼE fakahā anai ki te kokelekasio mokā ʼosi fai te faʼahi ʼaia.

◼ Ko te ʼAho Fakamanatu ʼo te taʼu 1999 ʼe fai anai ʼi te Felianima, ʼaho 1 ʼo ʼApelili, ʼi te ʼosi tō ʼo te laʼā. Ki te taʼu 2000, ʼe fai anai ʼi te Feliafā, ʼaho 19 ʼo ʼApelili, ʼi te ʼosi tō ʼo te laʼā. Mai tona ʼuhiga ʼaē ʼe maʼuhiga te ʼaho ʼaia, koia ʼe filifili anai e te kolesi ʼo te kau tagata ʼāfea, he tagata ʼāfea ʼe poto lelei ʼi te faiakonaki, kae ke ʼaua naʼa nātou fesuisuiʼaki, peʼe nātou fakaʼaogaʼi te tēhina māhani ʼi te taʼu fuli. Kae kapau ʼe ʼi ai he tagata ʼāfea fakanofo ʼe feala ke ina fai te akonaki, pea ʼe mole ʼaoga anai te tokoni ʼaē neʼe fai ʼi ʼoluga.

◼ ʼUhi ʼaē ko fakaʼosi vāhaʼa e nima ʼi te māhina ʼo Sanualio, koia ʼe ko he temi lelei ke toʼo ai e he tokolahi te selevisi pionie vaeluaʼi temi.