Ke Liliu Te Kau Ako ʼo Te Tohi-Tapu Ko He ʼu Tisipulo
1 “Koteā koa ʼaē ʼe ina tāʼofi ʼau ke ʼau papitema?” Ko te fehuʼi ʼaia neʼe fai e te enuke Etiopea ʼi te ʼosi “tala age [e Filipo] kia te ia te logo lelei ʼo ʼuhiga mo Sesu.” (Gāue 8:27-39) Ko te enuke ʼaia neʼe ʼofa ia ki te folafola ʼa te ʼAtua, pea ʼi te ʼosi tokoni age ʼa Filipo kia te ia ʼi te faʼahi fakalaumālie, neʼe kua loto ia ke liliu ko he tisipulo. Kae ʼe mole ko te hahaʼi fuli ʼaē ʼe nātou ʼiloʼi ʼe maʼuhiga kia nātou ke nātou vakavakaʼi te Tohi-Tapu.
2 Meʼa lelei foki, neʼe foaki e te kautahi ʼa Sehova te kaupepa foʼou, Un livre pour tous, moʼo fakaloto mālohiʼi te hahaʼi ke nātou vakavakaʼi te logo ʼo te Tohi-Tapu ʼo ʼuhiga mo totatou temi. Ko te ʼu manatu ʼaē ʼe tuʼu ʼi te kaupepa ʼaia, ʼe ina taki mai anai te hahaʼi fakamalotoloto ʼaē ʼe lagi popoto, kae veliveli tanatou mālama ki te Tohi-Tapu. Neʼe fai te kaupepa lelei ʼaia moʼo uga te hahaʼi ke nātou fia vakaʼi te Tohi-Tapu.
3 Kapau ʼe koutou kamata he ako Tohi-Tapu, ʼe lelei anai hakotou toe vakaʼi te ʼu tokoni lelei ʼaē neʼe hā ʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūnio 1996, ʼe ina fakahā ai peʼe lava feafeaʼi te fai ʼo he ako ʼe tuputupu ʼaki te tohi Te ʼAtamai Mālama. Lolotoga te ako, koutou vakaʼi te tuputupu ʼo ia ʼaē ʼe ako, ke feala hakotou ʼiloʼi te ʼu faʼahi ʼaē ʼe tonu ke tokaga tāfito kiai. Koutou fakaloto mālohiʼi ia ia ʼaē ʼe ako ke ina teuteuʼi fakatomuʼa tana ʼu kapite, pea mo kumi te ʼu vaega ʼo te Tohi-Tapu. Ko te ʼu tali ʼaē ʼe ina fai ʼaki tana ʼu palalau totonu, ʼe hā ʼaki ai anai tana leleiʼia ʼaupito ia te moʼoni. ʼI te agamāhani, ko nātou ʼaē neʼe tuputupu vave neʼe ko nātou ʼaē neʼe nātou lau te ʼu tohi ʼo te Sosiete pea mo kau tuʼumaʼu ki te ʼu fono ʼo te kokelekasio. Koutou fakaloto mālohiʼi ia ia ke palalau ki te hahaʼi ʼo ʼuhiga mo te ʼu meʼa ʼaē ʼe ina lolotoga ako. Koutou fakahā fakalelei kia ia ʼe tonu ke tuputupu ʼi te faʼahi fakalaumālie. ʼE mole tonu ke koutou hoko atu te fai ʼo he ako Tohi-Tapu mo te hahaʼi ʼaē ʼe mole nātou ʼiloʼi pe koteā te tonu ʼaē ʼe tonu ke nātou fai. ʼE tonu ke kumi ʼe nātou ʼaē ʼe ako ke nātou ako he tahi age ʼu meʼa, mo nātou pipiki mālohi ki te moʼoni, pea mo tuputupu ʼo aʼu ki tanatou foaki tonatou maʼuli ki te ʼAtua pea mo nātou papitema.
4 ʼI te tahi ʼu famili, ʼe lahi te ʼu ako Tohi-Tapu ʼaē ʼe fai ai te ʼu ako kehekehe ʼa te hahaʼi ʼo te famili. Kae ʼi te tahi ʼu ʼaluʼaga, ʼe lelei age te fai he ako faka famili, heʼe tokoni anai te faʼahi ʼaia ki te logo tahi ʼa te famili ʼi te faʼahi fakalaumālie.
5 Neʼe fakatotonu mai e Sesu ke tou ʼolo ʼo fai ni ʼu tisipulo. (Mateo 28:19) Moʼo fakahoko ʼo te faʼahi ʼaia, ʼe tonu ke tou fai he ʼu ako Tohi-Tapu ʼe tokoni ki te kau ako ke nātou tuputupu ʼo aʼu ki tanatou ʼui fēnei: “Koteā koa ʼaē ʼe ina tāʼofi ʼau ke ʼau papitema?”