“ ʼO Feafeaʼi La . . . Mo Kapau ʼe Mole Takitaki ʼAu e He Tahi?”
1 ʼI te temi ʼaē neʼe fehuʼi ai e te tagata faka mafola evaselio ko Filipo ki te tagata Etiopea, pe neʼe mahino ki te meʼa ʼaē neʼe ina lau ʼi te Folafola ʼa te ʼAtua, neʼe tali fēnei e te tagata ʼaia: “ ʼO feafeaʼi la haku mahino mo kapau ʼe mole takitaki ʼau e he tahi?” Neʼe fiafia Filipo ʼi te tokoni ki te tagata ʼaia ke mahino ki te logo lelei ʼo ʼuhiga mo Sesu, pea neʼe papitema atu aipe. (Gaue 8:26-38, MN) Neʼe fakalogo ia Filipo ki te fakatotonu ʼa Kilisito ke ‘fai he ʼu tisipulo ʼi te ʼu puleʼaga fuape, ʼo papitema nātou pea mo akoʼi nātou.’—Mat. 28:19, 20.
2 Ohage ko Filipo, ʼe tonu ke tou fakalogo ki te fakatotonu ʼaē ke tou fai ni ʼu tisipulo. Kae ko te taʼi tuputupu vave ʼaia ʼi te faʼahi fakalaumālie ʼa te tagata Etiopea, ʼe hoko tahitahiga ʼi te hahaʼi ʼaē ʼe tou fai tanatou ako Tohi-Tapu. Ko te tagata ʼaia, neʼe ko te poloselite Sutea neʼe ina ʼiloʼi lelei te Tohi-Tapu, pea neʼe tali lelei e tona loto te logo, pea neʼe ʼaoga pe ia ke ina tali ʼe ko Sesu te Mesia ʼaē neʼe fakapapauʼi mai. ʼE mole ko he meʼa faigafua mo kapau ko te hahaʼi ʼaē ʼe tou fai tanatou ako ʼe mole nātou ʼiloʼi lelei te Tohi-Tapu, mo kapau neʼe kākāʼi nātou ʼaki te ʼu akonaki faka lotu loi, peʼe nātou tau mo he ʼu fihifihia. Koteā ʼaē ka tokoni anai kia tatou ke tou lava taki tatatou kau ako Tohi-Tapu ke nātou foaki tonatou maʼuli ki te ʼAtua pea mo nātou papitema?
3 Koutou Tokagaʼi Te ʼu Meʼa Fakalaumālie ʼAē ʼe ʼAoga Ki Takotou ʼu Ako Tohi-Tapu: Ko te pepa ʼaē neʼe tufa tahi mo Te Minisitelio ʼo Te Puleʼaga ʼo ʼAukusito 1998, neʼe talanoa ki te temi loaloaga ʼaē ʼe feala ke fai ai te ako ʼa te hahaʼi, ʼaki te kaupepa Fakamaʼua pea mo te tohi Te ʼAtamai Mālama. Neʼe fai ai te tokoni ʼaenī: “ ʼE tonu ke tou fakafuafua te vave ʼo te ako ʼo mulimuli ki te ʼu fealagia pea mo te ʼaluʼaga ʼo ia ʼaē ʼe ako. . . . ʼE mole tou fia tāʼofi te mahino lelei ʼa he tahi ki te moʼoni ʼuhi pe ko tatatou fia fakaʼosi vave tana ako. ʼE ʼaoga ki te kau ako fuli ke mālohi te tafitoʼaga ʼo tanatou tui ki te Folafola ʼa te ʼAtua.” Koia ʼe lagi lelei age ke mole tou fakavave te ako ʼo te tohi Te ʼAtamai Mālama, ʼi tatatou faiga ʼaē ke fai katoa ia māhina e ono te ako ʼo te tohi ʼaia. Ko ʼihi hahaʼi ʼe lagi ʼaoga ke laka age ia māhina e ono, ke feala hanatou aʼu ki te papitema. Kapau ʼe koutou fai he ako ʼi te vāhaʼa fuli, pea ʼe lelei ke koutou fakaʼaogaʼi te temi ʼaē ʼe ʼaoga moʼo tokoni ki takotou ako, ke feala hana mahino pea mo tali te ʼu meʼa ʼaē ʼe ina ako ʼi te Folafola ʼa te ʼAtua. ʼI ʼihi ako, ʼe lagi ʼaoga te ʼu vāhaʼa e lua peʼe tolu moʼo fai te kapite e tahi ʼo te tohi Te ʼAtamai Mālama. ʼE maʼu ai hokotou temi ke koutou lau pea mo fakamahino te ʼu tuʼuga vaega ʼaē ʼe tuʼu ʼi te tohi.—Loma 12:2.
4 Kae e feafeaʼi mo kapau ʼi takotou ako katoa te tohi Te ʼAtamai Mālama, ʼe koutou fakatokagaʼi ko ia ʼaē neʼe koutou fai tana ako, ʼe kei ʼaoga ke ina hikihiki tana mahino ki te ʼu moʼoni, peʼe koutou fakatokagaʼi ʼe mole heʼeki fia kau katoa ki te moʼoni, pea mo foaki tona maʼuli ki te ʼAtua? (1 Ko. 14:20) Koteā te tahi ʼu meʼa ʼaē ʼe feala ke koutou fai moʼo takitaki ia ia ki te ala ʼo te maʼuli?—Mat. 7:14.
5 Koutou Foaki Te ʼu Meʼa Fakalaumālie ʼAē ʼe ʼAoga Ki Takotou ʼu Ako Tohi-Tapu: Kapau ʼe hā lelei ko he tahi ʼe tuputupu ʼi tana ako, tatau aipe peʼe tuputupu māmālie, pea ʼe tuputupu tana leleiʼia ia te ʼu meʼa ʼaē ʼe ina ako, pea koutou hoko atu tana ako Tohi-Tapu ʼi te tahi tohi, kapau kua ʼosi ina ako te kaupepa Fakamaʼua pea mo te tohi Te ʼAtamai Mālama. ʼE mole lagi ʼaoga anai te faʼahi ʼaia ki te kau ako fuli, kae kapau ʼe ʼaoga, pea koutou hoko atu te ako ʼi te tohi Paix véritable, te tohi Logo Tahi ʼi Te Tauhi, pe ko te tohi Parole de Dieu. Ko te tokolahi ʼo te kau fai faka mafola ʼe nātou maʼu te ʼu tohi ʼaia, pea ʼe feala ke fakaʼaogaʼi mo kapau ʼe mole maʼu ʼi te kokelekasio. Ko te tohi Parole de Dieu, ʼe ko te tohi pe ʼaia e tahi ʼe feala ke koutou fakaʼui ki Brooklyn. Ko te meʼa ʼaē ʼe maʼuhiga, ʼe tonu muʼa ke ʼuluaki ako te kaupepa Fakamaʼua pea mo te tohi Te ʼAtamai Mālama. Ko te ako Tohi-Tapu, te ʼu ʼaʼahi, pea mo te temi ʼaē ʼe koutou fakaʼaogaʼi moʼo hoko atu te ako, ʼe tonu ke koutou faka au pea mo koutou tohi ʼi takotou pepa tānaki gāue, tatau aipe pe kua papitema ia ia ʼaē ʼe ako, ka heʼeki katoa tana ako te lua tohi.
6 Ko tona faka ʼuhiga koa, ʼe tonu kia nātou ʼaē neʼe hoki papitema, kae neʼe nātou ako pe te tohi e tahi, ke toe fai age he tahi tokoni moʼo ako te lua tohi? Kailoa. Kae ʼe mole lagi kei nātou fai faka mafola, peʼe mole lagi nātou tuputupu ʼi te moʼoni, pea ʼe lagi nātou loto ke fai age he ʼu tokoni ke feala hanatou mulimuli lelei age ki te moʼoni ʼi tonatou maʼuli. ʼE tonu muʼa ke ʼuluaki vakaʼi te tagata taupau ʼo te gāue, ʼi muʼa ʼo he toe fai ʼo he ako ʼo he tahi kua papitema. Kae kapau ʼe koutou ʼiloʼi he ʼu hahaʼi neʼe nātou ako ki muʼa atu te tohi Te ʼAtamai Mālama, kae neʼe mole heʼeki nātou aʼu ki te foaki ʼo tonatou maʼuli ki te ʼAtua pea mo papitema, ʼe lagi koutou fia vakaʼi anai peʼe nātou toe fia fai tanatou ako Tohi-Tapu.
7 ʼE ko he ʼofa faka Kilisitiano hatatou tokaga fakalelei ki te ʼu hahaʼi takitokotahi ʼaē ʼe tou fai tanatou ako. ʼE tou fakatuʼutuʼu ke tou tokoni kia ia ʼaē ʼe ako, ke mahino lelei ki te moʼoni ʼo te Folafola ʼa te ʼAtua. Pea hoki feala ai leva ke ina filifili lelei te moʼoni, he kua mahino kiai, pea mo foaki tona maʼuli kia Sehova, ʼo ina fakahā te faʼahi ʼaia ʼi tana papitema ʼi te vai.—Pes. 40:8; Ef. 3:17-19.
8 ʼE koutou manatuʼi pe koteā ʼaē neʼe hoko ʼi te ʼosi papitema ʼa te enuke Etiopea? “Nee ina hoko atu tona fagona mo fakafiafia” ʼi tona ʼuhiga tisipulo foʼou ʼa Sesu Kilisito. (Gaue 8:39, 40) ʼOfa pe kia tatou pea mo te hahaʼi ʼaē ʼe tou takitaki lelei ʼi te ala ʼo te moʼoni, ke tou maʼu he fiafia lahi ʼi tatatou tauhi kia Sehova ʼAtua—ʼi te temi nei ʼo talu ai!