ʼU Pule Famili—Koutou Fai Tuʼumaʼu He ʼu Fakatuʼutuʼu Fakalaumālie

¹ Logola ko Taniela neʼe nofo lolotoga ni ʼu taʼu ʼi te lotolotoiga ʼo te tauhi tamapua pea mo te aga fakahehema ʼo Papiloni, kae neʼe ʼiloʼi e te hahaʼi neʼe ko he tagata neʼe tauhi “tuʼumaʼu” kia Sehova. (Tan. 6:16, 20) Neʼe ina taupau feafeaʼi tona maʼuli fakalaumālie? ʼE fakamatala ʼi te Tohi-Tapu, neʼe ina fai tana ʼu fakatuʼutuʼu moʼo fakahoko tuʼumaʼu tana ʼu gāue ʼo ʼuhiga mo te tauhi moʼoni. Ohage la, neʼe ko hana agamāhani te faikole tuʼa tolu ʼi te ʼaho, ʼi tona kogafale ʼi te laufata. (Tan. 6:10) ʼE mahino ia, neʼe ina fakatuʼutuʼu te tahi ʼu gāue fakalaumālie, ohage ko te lau ʼo te Lao. Koia, ʼi te temi ʼaē neʼe hoko ai te faigataʼaʼia ki tona maʼuli, ko Taniela neʼe pipiki maʼu ki tana tauhi kia Sehova, pea neʼe hāofaki faka milakulo ia ia.—Tan. 6:4-22.

² ʼO toe feiā pe ia ʼaho nei, ʼe tonu ke tou faiga mālohi ke tou “nonofo ʼalaʼala tuʼumaʼu.” (Ef. 6:18, MN ) Ko te malamanei ʼaē ʼe tou maʼuʼuli ai, ʼe “takoto ʼi te pule ʼo te agakovi.” (1 Soa. 5:19, MN ) ʼE feala ke hoko fakapunamaʼuli mai he ʼu fakafeagai ʼe nātou ʼahiʼahiʼi ai tatatou tui. Lolotoga te fakamamahi lahi, ʼe fakahoko anai he tau mālohi e Koke ʼo Makoke ki te ʼu kaugana ʼa te ʼAtua, pea ʼe hage ʼe mole feala anai hanatou hāo mai ai. ʼE tonu anai ʼi te lakaga ʼaia ke tou falala katoa kia Sehova.—Esk. 38:14-16.

³ “Ko te faʼahi ʼaē ʼe maʼuhiga tāfito, ko te fai tuʼumaʼu e te famili hanatou lau ia te Tohi-Tapu, hanatou ako pea mo he ʼu fai palalau.” Neʼe ko te ʼu ʼuluaki palalau ʼaia neʼe fai ʼi te akonaki ki te kiʼi gaoʼi “ ʼU Famili—Koutou Lau Te Tohi-Tapu ʼi Te ʼAho Fuli!” ʼo te fakatahi faka tisitilike ʼo te taʼu 1998. Neʼe hoko atu fēnei: “Ka fai tuʼumaʼu e te ʼu famili he polokalama feiā, pea mo nātou fai ke hage ʼe maʼuli te ʼu fakamatala ʼa te Tohi-Tapu, pea ʼe feala ki te fakatuʼutuʼu faka Tohi-Tapu ʼaia ke ʼi ai hona ʼu fua lelei ki te famili. ʼE fakatuputupu ai tatatou ʼatamai mālama. ʼE fakamālohiʼi tatatou tui. Pea ʼe tou talanoa ai ki te ʼu hahaʼi neʼe nātou tuku mai he ʼu faʼifaʼitaki lelei—ko te ʼu tagata mo te ʼu fafine ʼo te temi muʼa neʼe nātou maʼu he tui mālohi—ʼe nātou fakaloto mālohiʼi tatou, pea mo uga tatou ke tou lagolago ki te moʼoni.” ʼI tatatou vakaʼi te ʼu agaaga kehekehe ʼo he fakatuʼutuʼu fakalaumālie ʼe fai tuʼumaʼu, ʼe tonu anai ki te ʼu pule famili ke nātou vakaʼi he agaaga e tahi peʼe lua moʼo hikihiki te polokalama fakalaumālie ʼo tonatou famili.

⁴ Koutou Vakaʼi Te Folafola ʼa Te ʼAtua ʼi Te ʼAho Fuli: “Ka pule faʼitaliha anai te Puleʼaga ʼa te ʼAtua pea mo fakahoko tona finegalo ʼi te kele ohage ko selo, pea ʼe mole toe ʼi ai anai he tagata agakovi—peʼe ko he manu—‘ ʼe ina fai anai he meʼa ʼe kovi pea ʼe ina fakatupu anai he maumau.’ (Isa. 11:9; Mat. 6:9, 10)” Ko te ʼu palalau ʼaia neʼe tuʼu ʼi te kiʼi tohi Tou Vakaʼi Te Tohi-Tapu ʼi Te ʼAho Fuli—2001 ʼi te talanoa ʼo te vaega ʼo te ʼaho 11 ʼo Sepetepeli. Ko te fakamanatu ʼaia neʼe ko he ʼu palalau fakaloto fīmālie! ʼI tou ʼuhiga pule famili, ʼe ke vakaʼi koa ʼi te ʼaho fuli mo tou famili, te koga tohi ʼo te ʼaho? ʼE maʼuhiga ʼaupito te faʼahi ʼaia. Kapau ʼe mole feala ʼi te uhu fuli ke koutou lau faka famili te koga tohi, pea ʼe lagi feala anai ke koutou fai ʼi he tahi lakaga ʼo te ʼaho. Neʼe ʼui fēnei e te tāmai: “Ko te temi kai ʼo te afiafi, ʼe ko he temi lelei ʼaia ke mātou fai palalau ai ki te koga tohi ʼo te Tohi-Tapu ʼaē ʼe tonu ke lau ʼi te ʼaho fuli.”

⁵ Kapau kua koutou fai tuʼumaʼu te lau faka famili ʼo te koga tohi, pea ʼe feala ke vikiʼi koutou ki te faʼahi ʼaia. Lagi ʼe feala hakotou hilifaki kiai te lau ʼo he kapite ʼo te Tohi-Tapu. Ko ʼihi ʼe ko hanatou agamāhani te lau ʼo te kapite katoa ʼaē ʼe toʼo mai ai te koga tohi ʼo te ʼaho. Ko ʼihi ʼe nātou lau hoholo te Tohi-Tapu, ʼo nātou filifili he tohi ʼi te Tohi-Tapu ke nātou ako. Ko te lau ʼo te Tohi-Tapu ʼi te ʼaho fuli, ʼe tokoni anai ki tokotou famili ke ina maʼu te manavasiʼi lelei ʼaē naʼa nātou fai he meʼa ʼe mole leleiʼia e Sehova, pea mo fakaloloto ai tanatou fia fai tona finegalo.—Teu. 17:18-20.

⁶ Ko te polokalama lau Tohi-Tapu ʼo tokotou famili, pea mo te lau ʼo te koga tohi ʼo te ʼaho, ʼe toe lelei age anai mo kapau ʼe koutou lava toʼo he ʼu kiʼi minuta moʼo talanoa ki te ʼaoga ʼo te ʼu puani ʼaia. ʼI te pasina 60 ʼo te tohi École du ministère, ʼe maʼu ai te tokoni ʼaenī: “ ʼE feala ke koutou . . . filifili he ʼu vaega ʼo te ʼu kapite faka Tohi-Tapu ʼaē neʼe fakatuʼutuʼu ki te vāhaʼa, mo koutou talanoa ki tonatou faka ʼuhiga, pea mo koutou lagaʼi te ʼu fehuʼi ʼaenī: ‘Koteā te tokoni ʼaē ʼe tou maʼu ai? ʼE tou lava fakaʼaogaʼi feafeaʼi te ʼu vaega ʼaenī ʼi te minisitelio? Koteā ʼaē ʼe tou ako ai ʼo ʼuhiga mo Sehova, tana faʼahiga fai ʼo tana ʼu gāue, pea ʼe fakatupu feafeaʼi ia tatou he loto fakafetaʼi kia te ia?’ ” Ko te ʼu faʼahiga fai palalau fakalaumālie ʼaia ʼe tokoni anai ki tokotou loto fale katoa ke “haga mahino pe koteā te finegalo ʼo Sehova.”—Ef. 5:17, MN.

⁷ Te Ako Faka Famili: Ko te fai tuʼumaʼu ʼo te ako faka famili ʼi te vāhaʼa fuli, ʼe ko he ʼaluʼaga lelei ʼaia ki te ʼu pule famili, ke nātou fakahā ki tanatou fānau ʼe tonu ke fakamuʼamuʼa te ʼu faʼahi fakalaumālie. ʼE manatuʼi fēnei e te tūpulaga: “ ʼI ʼihi temi, neʼe haʼu Papa mai tana gāue, kua gaʼegaʼe ʼosi, pea neʼe faigataʼa hana nofo ʼalaʼala, kae logola te faʼahi ʼaia, neʼe mātou fai tamatou ako faka famili, pea neʼe mahino ai kia mātou te maʼuhiga ʼo te ako ʼaia.” ʼE feala mo te ʼu fānau ke nātou lagolago lelei ki te ako ʼaia. ʼE ʼi ai te taumatuʼa mo tanā fānau e toko hiva, ʼi te uhu fuli, ʼe nātou ʼaʼala ake ʼi te hola nima, moʼo fai tanatou ako faka famili koteʼuhi ʼe mole he tahi temi ʼe nātou ava ai.

⁸ Kapau ʼe loto e te pule famili ke lelei te ako faka famili, pea ʼe tonu ke ‘tokaga tuʼumaʼu ki tana faʼahiga faiako.’ (1 Tim. 4:16, MN ) ʼE ʼui fēnei ʼi te tohi École du ministère, ʼi te pasina 32: “ ʼE feala ke tou ʼui papau, kapau ʼe tou loto ke lelei tatatou ako faka famili, pea ʼe tonu muʼa ke fai he ako ʼo mulimuli ki te ʼu faʼahi ʼaē ʼe ʼaoga ki tokotou famili. ʼE tuputupu feafeaʼi tokotou famili ʼi te faʼahi fakalaumālie? . . . Ka koutou fai faka mafola mo takotou fānau, ʼe nātou ufiufi koa ʼi te fakahā ki tonatou ʼu kaugā ako ko nātou ko te kau Fakamoʼoni ʼa Sehova? ʼE nātou leleiʼia koa takotou polokalama faka famili ʼaē ko te lautohi pea mo te ako faka Tohi-Tapu? ʼE nātou mulimuli moʼoni koa ʼi tonatou maʼuli ki te ʼu meʼa ʼaē ʼe fakatotonu mai e Sehova? Kapau ʼe vakavakaʼi lelei te ʼu faʼahi ʼaia e te ʼu pule famili, pea ʼe feala anai hanatou fai he ʼu fakatuʼutuʼu moʼo fakatupu pea mo fakamālohiʼi he ʼu kalitate fakalaumālie ʼi te ʼu hahaʼi kehekehe ʼo tonatou loto fale.”

⁹ Te ʼu Fono ʼo Te Kokelekasio: Ko takotou teuteuʼi ia te ʼu fono pea mo takotou kau kiai, ʼe tonu ke kau ki te ʼu faʼahi maʼuhiga ʼaē ʼe koutou fai tuʼumaʼu ʼi te vāhaʼa. (Hep. 10:24, 25) ʼI ʼihi temi, ʼe lagi feala ke koutou teuteuʼi faka famili ʼihi fono. Ke ʼaua naʼa koutou teuteuʼi tauhala, ʼe feala hakotou fakatuʼutuʼu ke koutou teuteuʼi fakatomuʼa. Kapau ʼe koutou fakatuʼutuʼu lelei te faʼahi ʼaia, pea ʼe feala anai hakotou hikihiki takotou faʼahiga teuteuʼi ʼo te ʼu fono, pea mo koutou maʼu tona ʼu fua lelei.—Taag. 21:5.

¹⁰ Ke ʼi ai he fua ʼo tatatou ʼu fakatuʼutuʼu fakalaumālie ʼe tonu ke fai lelei pea mo fai tuʼumaʼu. E feafeaʼi mo kapau ʼe faigataʼa hakotou teuteuʼi te ʼu fono fuli, ʼuhi ko takotou ʼu ʼaluʼaga takitokotahi? ʼE foaki mai te tokoni ʼaenī ʼi te tohi École du ministère, ʼi te pasina 31: “ ʼE mole ko he meʼa lelei hakotou lau fakavilivili te ʼu tohi ʼaē neʼe tonu ke teuteuʼi ki te ʼu fono, ʼaki te manatu ʼaē kehe pe ke koutou lau, peʼe ko te tahi faʼahi leva ʼe mole lelei, ko te mole ako he tohi heʼe koutou manatu ʼe mole maʼu hokotou temi moʼona fai. Kae koutou filifili te ʼu faʼahi ʼaē ʼe koutou lava ako, pea koutou ako fakalelei. Koutou fai te faʼahi ʼaia ʼi te vāhaʼa fuli. ʼAki te temi, koutou faigaʼi ke koutou hilifaki he tahi ʼu fono ki takotou teuteu ʼaia.”

¹¹ Ka ʼōmai fakatomuʼa te ʼu famili ki te ʼu fono, ʼe feala ai kia nātou ke nātou teuteuʼi lelei tonatou ʼatamai moʼo fakavikiviki kia Sehova, pea mo fakalogo ki te ʼu ako ʼaē ka ina tuku mai. ʼE fai māhani koa e takotou famili ia te faʼahi ʼaia? Moʼo fakahoko te faʼahi ʼaia, ʼe tonu ke fai he ʼu fakatuʼutuʼu lelei, pea mo lagolago kiai ia te loto fale katoa. Kapau ʼe koutou tau tokagaʼi ko tokotou famili ʼe nātou feʼohoʼaki ʼi te ʼu afiafi ʼaē ʼe fai ai te ʼu fono, peʼe nātou hoha fau, ʼe feala koa hakotou fai he ʼu fetogi ki te faʼahi ʼaia? ʼE ʼi ai koa he ʼu faʼahi ʼe feala ke fai fakatomuʼa? Kapau ʼe ʼi ai he tahi ʼi te famili ʼe lahi ʼaupito tana ʼu gāue ʼe tonu ke ina fai, ʼe feala koa ki ʼihi ke nātou tokoni ki ai? ʼE feala koa ki te famili ke mole hoha fau, mo kapau ʼe nātou tokalelei fuli ke nātou ʼolo fakatomuʼa ai ki te fono? Kapau ʼe fai he fakatuʼutuʼu lelei, pea ʼe feala anai ke lagolago te faʼahi ʼaia ki te tokalelei ʼa te famili pea mo te kokelekasio.—1 Ko. 14:33, 40.

¹² Te Fai Faka Mafola: Ko te tahi fakatuʼutuʼu lelei ʼi te faʼahi fakalaumālie, ko te fakatuʼu he temi ki te fai faka mafola. ʼE manatuʼi fēnei e te talavou ʼe higoa ko Jayson: “ ʼI taku famili, neʼe mātou ʼolo tuʼumaʼu ʼi te ʼu Moeaki uhu ʼo fai faka mafola. Neʼe lelei te faʼahi ʼaia kia ʼau, koteʼuhi ʼi taku kau lahi ki te fai faka mafola, neʼe ʼau sio ai ki tona ʼu fua lelei, pea neʼe ʼau fiafia ʼaupito ai.” Ko te tokolahi ʼaē neʼe lahilahi ake mo he ʼu mātuʼa ko he ʼu Fakamoʼoni, ʼe nātou manatu feiā, ko te fakatuʼutuʼu ʼi te vāhaʼa fuli he temi ki te fai faka mafola, neʼe tokoni kia nātou ke nātou tuputupu ʼi tonatou ʼuhiga minisi Kilisitiano.

¹³ Ko he fakatuʼutuʼu ʼe fakaʼaluʼalu lelei, ʼe toe lava tokoni ke fiafia pea mo fua lelei te temi ʼaē ʼe fakaʼaogaʼi e tokotou famili ki te fai faka mafola. ʼE lava fakahoko feafeaʼi te faʼahi ʼaia? Ko Te Tule Leʼo ʼo te ʼaho 1 ʼo Sūlio 1999, ʼi te pasina 21, ʼe maʼu ai te tokoni ʼaenī: “ ʼE koutou fakaʼaogaʼi koa he temi ʼi te lolotoga ʼo te ako faka famili moʼo tokoni ki tokotou loto fale ke nātou teuteuʼi tanatou gāue fai faka mafola ʼo te vāhaʼa? ʼE feala ke fua lelei kia koutou mo kapau ʼe koutou fai te faʼahi ʼaia. (2 Tim. 2:15) ʼE feala ki te faʼahi ʼaia ke tokoni kia nātou ke nātou leleiʼia tanatou minisitelio pea ke nātou maʼu ai he ʼu fua. ʼI ʼihi temi, ʼe lagi feala anai ke koutou fakaʼaogaʼi te temi katoa ʼo tokotou ako faka famili moʼo teuteuʼi te gāue fai faka mafola. Kae ʼi te agamāhani ʼe feala ke koutou fai palalau nounou ki te faʼahi ʼaia ʼi te fakaʼosi ʼo te ako peʼe ko te tahi temi ʼi te vāhaʼa.” Kua ʼahiʼahi koa e tokotou famili ia te faʼahi ʼaia?

¹⁴ Koutou Haga Tuputupu: ʼAki te manatu ʼaia, neʼe koutou sio koa ki he ʼu faʼahi ʼe gāue lelei ai tokotou famili? Koutou vikiʼi nātou, pea koutou faigaʼi ke koutou fakatuputupu te ʼu faʼahi ʼaia. Kapau ʼe koutou sio ʼe lahi te ʼu faʼahi ʼaē ʼe tonu ke gāueʼi, koutou vakaʼi he faʼahi e tahi peʼe lua, pea koutou ʼuluaki gāueʼi muʼa ʼaia. Kapau kua koutou fai tuʼumaʼu te faʼahi ʼaia ʼi takotou ʼu fakatuʼutuʼu fakalaumālie, pea koutou hiki atu ki he faʼahi e tahi peʼe lua. Koutou loto falala pea mo fakapotopoto. (Filp. 4:4, 5) ʼE tonu ke tou faiga mālohi moʼo fai he ʼu fakatuʼutuʼu fakalaumālie ki totatou loto fale, kae ʼe ʼaoga ʼaupito te faʼahi ʼaia, heʼe fakapapau mai e Sehova: “Kia ia ʼaē ʼe mulimuli ki he ala kua hinoʼi kiai, ʼe ʼau fakasio anai kia ia te fakamaʼuli ʼo te ʼAtua.”—Pes. 50:23.