Tou Haʼele Fakalelei ʼi Tatatou ʼu Gāue Māhani
1 Neʼe makehe te ʼofa ʼo te ʼapositolo ko Paulo ki te kokelekasio ʼo Filipe, ʼaē neʼe ina akoʼi. Neʼe ia te ia te loto fakafetaʼi ki te kokelekasio ʼaia ʼo ʼuhiga mo te tokoni fakasino fonu ʼi te ʼofa neʼe ina foaki age pea neʼe talanoa ia ki te kokelekasio ʼaia ko he faʼifaʼitaki lelei.—2 Ko. 8:1-6.
2 Ko te tohi ʼa Paulo ki te kau Filipe ʼe hā ai te loloto ʼo tona ʼofa. ʼI te tohi Auxiliaire, ʼi te ʼu pasina 1 176 ki te 1 177, ʼe tou lau fēnei: “ ʼI tana tohi ʼe ina fakaloto mālohiʼi te kokelekasio ʼo Filipe ke hoholo atu tanatou gāue lelei—ʼo nātou kumi he fakasiosio poto pea ke nātou pipiki maʼu ki te Folafola ʼo te maʼuli, ke mālohi tanatou tui, pea mo nātou ʼamanaki ki te fakapale ki te temi ka haʼu.” Neʼe nātou tali fakafiafia tana ʼu palalau, ʼo nātou fakamālohiʼi te felogoi ʼofa ʼaē ʼe nātou pipiki tahi ai mo te ʼapositolo. Ko te ʼu palalau ʼa Paulo ʼe ʼi ai tona ʼuhiga makehe kia tatou ia ʼaho nei, ʼe ina foaki mai he tupuʼaga lelei ke tou fakakaukauʼi fakalelei tana tokoni, tāfito la te manatu ʼaē ʼe tuʼu ia Filipe 3:15-17.
3 Ko Te Manatu Fakapotopoto ʼe Maʼuhiga: Ia Filipe 3:15, neʼe faitohi ia Paulo ohage he tagata neʼe ina maʼu te aga fakapotopoto. Neʼe mahino ia ki te tuputupu fakalaumālie ʼo te kau Kilisitiano ʼo Filipe, koia neʼe ina ʼui ai ʼo ʼuhiga mo nātou ko te kau Kilisitiano aga fakapotopoto. ʼI te temi ʼaē ʼe nātou maʼu ai te agavaivai pea mo te loto fakafetaʼi ʼaē neʼe fakahā e Sesu, ʼe hoholo atu tanatou ‘faitotonu pea mo tanatou agatonu, ko he ʼu fānau ʼa te ʼAtua ʼe mole hanatou hala . . . , ʼe nātou pipiki maʼu ki te folafola ʼo te maʼuli.’ (Filp. 2:15, 16) Mokā tou lau te ʼu palalau ʼa Paulo, ʼe tonu ke hage kia tatou ʼe palalau mai ia kia tatou. Koia ʼe tou holi ai ke tatau tatatou manatu mo Sesu pea ke tou fakahā ʼaki te agavaivai tatatou fakafetaʼi ʼo ʼuhiga mo tatatou ʼu pilivilesio. ʼE hoholo atu tatatou faikole kia Sehova, ʼo kole ki ai ke tokoni mai kia tatou ʼi te faʼahi ʼaia ʼo feiā aipe ki ʼihi ʼatu faʼahi.—Filp. 4:6, 7.
4 Ohage ko tona tuʼu ia Filipe 3:16, ʼe tonu ke tou faiga fuli ke tou tuputupu. Ko te kupu ʼaē “tuputupu” ko tona faka ʼuhiga “ke haga tuputupu, ko te faiga ke haʼele ki muʼa.” Ko te hahaʼi ʼaē ʼe holi ke nātou tuputupu ʼe nātou fia fai ki te ʼu manatu, ki te ʼu kumi peʼe ko te ʼu fakatuʼutuʼu foʼou. Neʼe loto ia Paulo ke mahino te kau Kilisitiano ʼo Filipe ko te lotu faka Kilisitiano ʼe mole nofo maʼu pea ko nātou ʼaē ʼe nātou kau kiai ʼe tonu ke hoholo atu tanatou tuputupu. Ko tanatou fia tuputupu ʼe tonu ke nātou fakahā ʼaki tonatou lotolelei ʼo fakasiosio ia nātou totonu, ke nātou ʼiloʼi ʼonatou ʼu vaivaiʼaga, pea mo nātou fakaʼaogaʼi te ʼu fealagia fuli moʼo hikihiki te maʼuhiga ʼo te meʼa ʼaē ʼe nātou fai. Ia ʼaho nei ko te kautahi fakakelekele ʼa Sehova ʼe hoholo tana haʼele ki muʼa, ʼo faka fālahi tana gāue ʼi te minisitelio pea mo tana mahino ki te Folafola ʼa te ʼAtua. Ko tatou takitokotahi ʼe tonu ke tou haʼele fakatahi mo te kautahi, ʼo fakaʼaogaʼi ia meʼa fuli ʼe ina foaki mai pea mo tou kau katoa ki tana gāue.
5 Ko Te Tuputupu ʼe Fakamaʼuaʼi Ke Tou Haʼele Fakalelei ʼi Tatatou ʼu Gāue Māhani: Neʼe hoko atu te palalau ʼa Paulo ʼo ina fakaloto mālohiʼi tona ʼu tēhina ke nātou “haga haʼele fakalelei ʼi te fai pe ʼaia.” (Filp. 3:16) Ko te fakatonutonu ʼe fakamaʼuaʼi ke tou tuku te hahaʼi pea mo te ʼu fealagia ki te faʼahi ʼaē ʼe tonu ke fakatuʼutuʼu kiai pea ke tou maʼu he aga ʼe lelei. Ko te kau Kilisitiano ʼo Filipe neʼe nātou nonofo maʼu ʼi ʼonatou tuʼulaga, ʼo nātou ōvi ki te kautahi ʼa Sehova pea mo ʼonatou ʼu tēhina. Ko tonatou maʼuli neʼe taki e te lao ʼo te ʼofa. (Soane 15:17; Filp. 2:1, 2) Neʼe fakaloto mālohiʼi e Paulo ia nātou “ke tāu tanatou aga mo te logo lelei.” (Filp. 1:27) Ko te fakatokatoka pea mo he aga ʼe lelei ʼe maʼuhiga ʼaupito ki te kau Kilisitiano ia ʼaho nei.
6 Ko te gāue māhani ko te fakahoko ʼo he meʼa neʼe kua ʼosi fakatuʼutuʼu. Ko he ʼu meʼa ʼe tou māhani ʼi tona fai. Ko te fai ʼo te gāue māhani ʼe feala ke liliu ko he meʼa lelei kia tatou koteʼuhi ʼe mole tou lotolotolua pea mo tou tuʼu muʼa ʼo fakakaukauʼi he ʼu puleʼaki ʼo te ʼu meʼa ke tou fai—neʼe kua tou fakatuʼutuʼu he faʼifaʼitaki ʼe tou mulimuli māhani kiai.
7 Ko te haʼele faka teokalatike ko tona faka ʼuhiga ko tatatou fakalogo ki te ʼu aga māhani ʼe maʼa, mo ʼaoga, mo tou maʼuliʼi te aga faka lotu—ʼaki te fakatuʼutuʼu ʼaē ke fua lelei ki totatou faʼahi fakalaumālie, ʼo tou tokoni ki niʼihi, pea, mokā ʼe feala, ke lahi tatatou gāue ʼaē kia Sehova. Ke lava lelei te fakahoko ʼo te ʼu faʼahi ʼaia ʼe maʼua ke tou fakatuʼutuʼu pea mo tou taupau maʼu he aga māhani ʼe kau ai te ako takitokotahi, te kau tuʼumaʼu ʼaē ki te ʼu fono pea mo te kau ki te fai faka mafola.
8 Ko He ʼu Faʼahi Maʼuhiga: Ko he tahi faʼahi ʼe maʼuhiga ko te “mālama totonu pea mo he fakasiosio poto.” (Filp. 1:9) Ko te ako takitokotahi ʼe fakaloto mālohiʼi ai tatatou tui, mo fakatuputupu totatou loto fakafetaʼi ki te moʼoni, pea ʼe uga ai tatou ke tou fai he ʼu gāue ʼe lelei. Kae, ko ʼihi ʼe mata faigataʼa kia nātou tanatou fakatuʼutuʼu tanatou ako ʼi tanatou ʼu gāue māhani. Ko te tupuʼaga tāfito ko te mole maʼu ʼo he temi.
9 Ko te ʼu fua lelei ʼe maʼu ʼi te lau ʼo te Tohi-Tapu ʼi te ʼaho fuli ʼe mole toe fetogi anai. Ko te ako ʼo te Tohi-Tapu ʼe “ ʼaoga” ʼi te ʼu faʼahi fuli. (2 Tim. 3:16, 17) E feafeaʼi koa hatatou maʼu he temi moʼo ako ʼo te Tohi-Tapu ʼi tatatou ʼu aga māhani ʼi te ʼaho fuli? Ko ʼihi ʼe ʼalaʼala uhu ʼo fai te faʼahi ʼaia, ʼi te temi ʼaē ʼe faigafua ai te tāʼofi ʼo te ʼu meʼa ʼaia ʼi te fakakaukau. Ko ʼihi ʼe nātou leleiʼia tanatou lau ʼi he ʼu minuta ia muʼa ʼo tanatou momoe. Ko te ʼu fafine ʼohoana ʼaē ʼe nonofo ʼi tonatou ʼapi ʼe nātou fakatuʼutuʼu he kiʼi temi ʼi te hoʼatā ia muʼa ʼo te tau mai ʼa nātou ʼaē mai te gāue peʼe ko te ako. ʼO hilifaki ki te lau tuʼumaʼu ʼo te Tohi-Tapu, ko ʼihi ʼe nātou lau te tohi Prédicateurs ʼi tanatou ʼu ako māhani ʼaē ʼe fai ʼi te vāhaʼa.
10 Mokā tou fakatuʼu he ʼu aga māhani foʼou, ʼe mahino papau ia ʼe fakafihi anai mo te ʼu aga ʼāfea. ʼI te temi muʼa, neʼe lagi tou faka fealagia ki he ʼu meʼa ʼe mole faʼa maʼuhiga ke nātou toʼo totatou temi. Ko te tuku ʼo te faʼahi ʼaia ʼe mole faigafua. ʼE mole he tahi ʼe ina fakatotonuʼi mai he ʼu aga māhani ʼo ʼuhiga mo tatatou ako; pea ʼe mole fakamaʼuaʼi tatou ke tou fakahā ki he tahi te meʼa ʼaē ʼe tou fai ʼi te faʼahi ʼaia. Ko te lelei ʼo tatatou ako ʼaē ʼe fai māhani ʼe fakalogo ki tatatou leleiʼia “te ʼu meʼa maʼuhiga” pea mo tatatou lotolelei ke tou “totogi te temi” ke feala ai hona fua lelei kia tatou.—Filp. 1:10; Ef. 5:16.
11 Ko te ʼu fono faka Kilisitiano ʼe ʼi ai tona maʼuhiga ʼi tatatou tuputupu fakalaumālie, koteʼuhi ʼe nātou foaki mai te ako pea mo te ʼu palalau fakaloto mālohi ʼe ʼaoga kia tatou. Koia, ko te kau tuʼumaʼu ki te ʼu fono ʼe ko he tahi ʼaia faʼahi maʼuhiga ʼo tatatou ʼu aga māhani. Neʼe talanoa ia Paulo ki te maʼuhiga ʼaē ʼo te ʼu fono. Ko te kau ʼaē ki te ʼu fono faka Kilisitiano ʼe mole ko he faʼahi ia ʼe tonu ke tou fili.—Hep. 10:24, 25.
12 E feafeaʼi koa tatatou fakahā ʼe tou haga haʼele mokā ʼe tou fakatuʼutuʼu tatatou polokalama ʼo ʼuhiga mo te gāue ʼi te vāhaʼa? Ko ʼihi ʼe nātou fakatuʼutuʼu he ʼu temi makehe ʼo ʼuhiga mo tonatou ʼu maʼua takitokotahi, pea ʼe nātou tuku te ʼu fono ki te temi ʼaē ʼe nātou ava ai, kae ʼe tonu ke ʼaua naʼa fai feiā. Ko ʼatatou ʼu fono ʼi te vāhaʼa ʼe tonu ke tou fakamuʼamuʼa pea ko te ʼu gāue age ʼaē ʼe tonu ke nātou muli mai.
13 ʼE fakamaʼuaʼi te famili ke ʼi ai he polokalama lelei pea mo he felogoi tahi ke feala ai hatatou kau tuʼumaʼu ki te ʼu fono. ʼI te lolotoga vāhaʼa, tokolahi ia tatou ʼe maʼumaʼua ʼo mole maʼu ai hotatou temi. Ko tona faka ʼuhiga, mokā ʼe feala, ke tou kakai fakatomuʼa ʼi te afiafi ke feala ai te kakai fakatahi ʼa te famili, ʼo nātou teuteu pea ke nātou kaku atu ʼi muʼa ʼo te kamata ʼo te fono. Moʼo fai ʼo te faʼahi ʼaia ʼe feala ke felogoi tahi te famili ʼi te ʼu faʼahi kehekehe.
14 Ko te kau tuʼumaʼu ki te fai faka mafola ʼe maʼuhiga mokā ʼe tou loto ke tou haga tuputupu ʼi tatatou ʼu gāue māhani. ʼE mahino kia tatou fuli totatou maʼua ʼaē ko te faka mafola ʼo te logo ʼo te Puleʼaga. Ko te faʼahi la ʼaia ʼe faka ʼuhiga ai tatou ko te kau Fakamoʼoni ʼa Sehova. (Is. 43:10) ʼUhi ko te gāue ʼaia ʼe ko te faʼahi maʼuhiga ke fakahā pea mo ʼaoga ke tou fai ia ʼaho nei, ʼe mole tonu ke tou ʼui ko te faʼahi ʼaia ʼe tuʼulaga lua ʼi tatatou ʼu gāue māhani. Neʼe fakaloto mālohiʼi fēnei e Paulo: “Tou momoli tuʼumaʼu ki te ʼAtua he sakilifisio fakavikiviki, ko tona faka ʼuhiga ko te fua ʼo te ʼu laugutu ʼaē ʼe nātou fai te fakahā ia muʼa ʼo te hahaʼi ki tona huafa.”—Hep. 13:15.
15 Mokā ʼe tou fakatuʼutuʼu tatatou gāue ʼi te vāhaʼa fuli, ʼe tonu ke tou toʼo he temi ki te fai faka mafola. E lagi fakatuʼutuʼu e te kokelekasio te ʼu fono ʼo tuʼa lahi ʼi te vāhaʼa ʼo ʼuhiga mo te fai faka mafola, pea ʼe feala pe ke tou fakatuʼutuʼu pe ko te fono fea ʼaē ʼe tonu ke tou lagolago kiai. ʼE lelei anai ke tou faigaʼi ke tou kau ki te ʼu faʼahi kehekehe ʼo te gāue, ohage la ko te tufa ʼo te ʼu nusipepa peʼe ko ʼihi ʼu tohi ʼi te ʼu ʼapi, pe ko te fai ʼo te ʼu ʼaʼahi pea mo te fai ʼo te ʼu ako faka Tohi-Tapu. ʼE feala ke tou fakatuʼutuʼu ke tou kau ki te fagonogono faigamālie ʼo tou toʼo he ʼu tohi pea mo fakaʼaogaʼi te ʼu fealagia fuli moʼo kamata ʼo he ʼu fai palalau. ʼUhi ʼe tou ʼolo ʼo fai faka mafola mo ʼihi, ʼe feala ke tou fehuʼi te fakaʼaluʼalu ʼo tonatou polokalama ke feala ai hatatou fakatuʼutuʼu ke tou gāue tahi mo nātou.
16 ʼE tonu ke tou taupau maʼu te aga māhani ʼaē ko te fai faka mafola logope la te mole fia logo ʼa te hahaʼi ʼo te telituale. ʼE tou ʼiloʼi fakatomuʼa ʼe tokosiʼi anai ia nātou ʼaē ʼe nātou tali lelei. (Mat. 13:15; 24:9) Neʼe fekauʼi ia Esekiele ke ʼalu ʼo fai faka mafola ki te hahaʼi ‘agatuʼu, fialahi, pea mo loto fefeka.’ Neʼe fakapapau e Sehova kia Esekiele ʼe ina fakaliliu tona “laʼe ʼo fefeka ʼaupito age ia ʼi ʼonatou laʼe,” ko te faʼahi ʼaia “ ʼe tatau mo he taimani, ʼo fefeka age ia ʼi te maka afi.” (Esk. 2:3, 4; 3:7-9) Ko te kau tuʼumaʼu ʼaē ki te fai faka mafola ʼe fakamaʼua kiai te faʼa kātaki.
17 Te ʼu Faʼifaʼitaki Lelei Ke Tou Muliʼi: Tokolahi ia tatou ʼe fai faka mafola mokā ʼe ʼi ai he tahi ʼe ina tuku he takitaki lelei. Ko Paulo pea mo ʼona kaumeʼa neʼe nātou tuku he faʼifaʼitaki lelei, pea neʼe nātou uga ai ʼihi ke nātou mulimuli kia nātou. (Filp. 3:17) ʼI tana aga māhani neʼe tokaga ai ia ki te ʼu faʼahi fuli ke feala ai tana nofo mālohi ʼi te faʼahi fakalaumālie.
18 Ia ʼaho nei, ʼe tapuakina tatou, koteʼuhi ke tou maʼu he ʼu faʼifaʼitaki lelei. Ia Hepeleo 13:7, neʼe ʼui fēnei e Paulo: “Koutou manatuʼi ia nātou ʼaē ʼi ʼokotou ʼu fuga ʼulu, . . . pea koutou fakatokagaʼi te ikuʼaga ʼo tanatou aga, koutou faʼifaʼitaki ki tanatou tui.” ʼE mahino ia, ko Kilisito ko totatou Faʼifaʼitakiʼaga, kae ʼe feala ke tou muliʼi te tui ʼa nātou ʼaē ʼi ʼotatou fuga ʼulu. Ohage ko Paulo, ʼe tonu ke tokakaga te ʼu tagata ʼāfea ki te maʼuhiga ʼaē ʼo te foaki ʼo te ʼu faʼifaʼitaki lelei ki niʼihi. Tatau aipe la peʼe fetogi tonatou ʼu ʼaluʼaga, ʼe tonu ke nātou fakahāhā ʼe nātou nonofo maʼu pea mo nātou haʼele ʼi tanatou aga māhani ʼo nātou fakamuʼamuʼa te ʼu meʼa ʼe ʼaoga ki te Puleʼaga. Tatau aipe peʼe nātou maʼumaʼua ʼi te faʼahi faka famili, ʼe tonu ke tokakaga te ʼu tagata ʼāfea ke nātou fai tuʼumaʼu tanatou ako takitokotahi pea mo nātou kau ki te ʼu fono, pea mo nātou foaki he faʼifaʼitaki ʼi te fai faka mafola. Kapau ʼe fakahā e te ʼu tagata ʼāfea ʼe nātou ‘puleʼi fakalelei ʼonatou loto fale,’ ʼe fakaloto mālohiʼi anai te kokelekasio katoa ke hoholo atu tana haga haʼele ʼi tana ʼu gāue māhani.—1 Tim. 3:4, 5.
19 Te ʼu Fakatuʼutuʼu Ki Te Taʼu Gāue Foʼou: Ko te kamata ʼo te taʼu foʼou ʼe ko he temi lelei ʼaia ke tou fakakaukau ai ki tatatou haga haʼele ʼi tatatou ʼu gāue māhani. Koteā koa te meʼa neʼe hā ʼi tatatou gāue ʼi te taʼu kua hili? Neʼe feala koa ke tou taupau maʼu, peʼe ko te fakatuputupu, ʼo tatatou gāue? Neʼe lagi tou fakatuputupu te loloto ʼo tatatou ako takitokotahi? E lagi neʼe tou kau tuʼumaʼu ki te ʼu fono pea mo fakatuputupu tatatou fai faka mafola ʼaki tatatou toʼo te pionie vaeluaʼi temi. E lagi ʼe feala hatatou fakahā he ʼu faʼahi neʼe hā ai totatou manavaʼofa ki niʼihi ʼi te kokelekasio peʼe ko totatou famili. Kapau neʼe tou fai te faʼahi ʼaia, ʼe feala ke tou fiafia ʼuhi he neʼe tou haʼele ʼi he ʼu ala ʼe leleiʼia e te ʼAtua, pea ʼe ʼi ai te tupuʼaga lelei ʼaē ʼo tatatou “haga fai katoa te faʼahi ʼaia.”—1 Tes. 4:1.
20 Kae e feafeaʼi koa la mokā ko ʼatatou ʼu aga māhani neʼe mole kei fai tuʼumaʼu? Neʼe tou mahahaki fakalaumālie koa? Neʼe ʼi ai koa he ʼu meʼa neʼe mole nātou faka fealagia tatatou tuputupu? Ko te tuputupu ʼe tou maʼu ʼaki tatatou kole te tokoni ʼa Sehova. (Filp. 4:6, 13) Koutou palalau mo tokotou famili ʼo ʼuhiga mo te ʼu meʼa ʼaē ʼe ʼaoga kia koutou; koutou kole age kia nātou ke nātou tokoni kia koutou ke feala ai hakotou fakatonutonuʼi te ʼu agaaga ʼo ʼakotou ʼu aga māhani. Kapau ʼe koutou faigataʼaʼia koutou kole ki te ʼu tagata ʼāfea ke nātou foaki atu he ʼu tokoni. Kapau ʼe tou fai he faiga makehe pea mo tou tali te taki ʼa Sehova, ʼe feala hatatou ʼiloʼi papau ʼe mole feala anai ke tou “liliu ʼo fakaʼaoga noa peʼe noa.”—2 Pe. 1:5-8.
21 Ko te haʼele ʼi tatatou ʼu gāue māhani ʼe tou maʼu ai te ʼu tapuakina ʼe maʼuhiga ai tatatou faiga. ʼI takotou fakatuʼutuʼu ke koutou tuputupu ʼi takotou ʼu gāue māhani, “ke ʼaua naʼa fakatuatuai takotou gāue. Ke holi tokotou laumālie kiai. Ke koutou kaugana kia Sehova.” (Lom. 12:11)—Kapau ʼe koutou loto ke lahi he ʼu manatu ʼe koutou maʼu, koutou vakaʼi te alatike ʼo Te Tule Leʼo (fakafalani) ʼo te ʼaho 1 ʼo Maio 1985, ʼi te ʼu pasina 13 ki te 17.