Tou Fakatuputupu He ʼu Agamāhani Fakalaumālie ʼe Lelei, Pea ʼe Tou Utu Anai He ʼu Tuʼuga Tapuakina
1. He koʼe ʼe lelei ke koutou vakavakaʼi takotou ʼu agamāhani ʼi te faʼahi fakalaumālie?
1 ʼI te temi ʼaē neʼe koutou liliu ai ko he Kilisitiano, lagi neʼe koutou faiga fakamalotoloto moʼo fakatuputupu hakotou ʼu agamāhani ʼi te faʼahi fakalaumālie, ohage la ko te ako Tohi-Tapu, mo te kau ki te ʼu fono, mo te fai faka mafola, pea mo te faikole. Pea ʼaki takotou ʼu faiga ʼaia, neʼe tapuakinaʼi koutou e Sehova, ʼo koutou tuputupu ʼi te faʼahi fakalaumālie. Lagi ʼi te temi nei, kua hili kiai ni ʼu tau talu mai takotou papitema. Kei koutou fakatuputupu koa te ʼu agamāhani fakalaumālie ʼaē neʼe koutou fai ʼi takotou liliu ʼaē ko he Kilisitiano?
2. ʼE fua lelei feafeaʼi kiā tatou te lau ʼo te Tohi-Tapu ʼi te ʼaho fuli?
2 Koutou Vakavakaʼi Takotou ʼu Agamāhani: ʼE ko hakotou agamāhani koa ia te lau ʼi te ʼaho fuli ia te Folafola ʼa te ʼAtua? ʼE koutou maʼu anai he tapuakina lahi mo kapau ʼe koutou fai ia te faʼahi ʼaia! (Sos. 1:8; Pes. 1:2, 3) ʼI te temi ʼo te kau Iselaele, neʼe tonu ke lau e te ʼu hau fuli ia te Lao ʼaē neʼe nātou hiki ‘ ʼi te ʼaho fuli ʼo tonatou maʼuli.’ Neʼe koteā tona ʼu fua? ʼE ina maʼu ai anai ia te agavaivai pea mo manavasiʼi kiā Sehova ke mole mamaʼo mai Tana ʼu fakatotonu. (Teu. 17:18-20) Ohage pe ko te temi nei, kapau ʼe tou lau ʼi te ʼaho fuli ia te Tohi-Tapu, ʼe ina puipui anai tatou mai te mālama kākā pea mo agakovi ʼaenī, ke tou aga maʼa pea mo poto. ʼE toe tokoni mai foki ke tou kātoa ki te minisitelio.—Filp. 2:15; 2 Tim. 3:17.
3. Koteā te ʼu fua lelei ʼe tou maʼu ʼi tatatou kau tuʼumaʼu ki te ʼu fono?
3 Neʼe ko te agamāhani ʼa Sesu hana ʼalu ki te sinakoka, ko he fale neʼe fai palalau ai ʼo ʼuhiga mo te Tohi-Tapu. (Luka 4:16) ʼE mahino ia, neʼe ko he faʼahi neʼe ina fakaloto mālohiʼi ia ia ʼo ʼuhiga mo te ʼu fihifihia ʼaē ka tau mo ia. ʼE toe fakaloto mālohiʼi foki mo tatou e te ako fakalaumālie ʼaē ʼe foaki mai ʼi te ʼu fono ʼo te kokelekasio pea mo tou maʼu ai he “fefakaloto mālohiʼaki” ʼe lelei. (Loma 1:12, MN ) Ko tatatou fakatahi mo totatou ʼu tēhina ʼe tokoni mai kiā tatou ke tou ʼutakiʼi te ʼu fihifihia ʼo te ʼu ʼaho fakamuli ʼaenī. (Hep. 10:24, 25) ʼE kei koutou haga kau ki te ʼu fono fuli?
4. ʼE fua lelei feafeaʼi anai kiā tatou ia tata kau ki te gāue fai faka mafola ʼi te vāhaʼa fuli?
4 ʼI te Tohi-Tapu, ʼe fakamatala ai ko te kau ʼapositolo neʼe nātou kau ki te faka mafola ʼo te logo lelei ʼi “te aho fuape . . . i te faletapu pea mo te u api.” (Gaue 5:42) ʼE lagi mole lava anai hatatou kau ʼi te ʼaho fuli ki te fai faka mafola, kae ʼe feala koa ke liliu ko hatatou agamāhani ia te kau ki te minisitelio ʼi te vāhaʼa fuli? Kapau ʼe tou fai feiā, ʼe mahino ia ʼe tou liliu anai ʼo faiva ʼi te fakaʼaogaʼi ʼo te Folafola ʼa te ʼAtua, pea ʼe tou maʼu anai mo te ʼu fua lelei ʼi tatatou fakahā ia te moʼoni ʼo te Tohi-Tapu ki te hahaʼi.
5. He koʼe ʼe maʼuhiga ke tou faikole tuʼumaʼu kiā Sehova?
5 Neʼe tapuakinaʼi ʼaupito ia te polofeta ko Taniela ʼi tana tauhi “tuʼumaʼu” ʼaē kiā Sehova. Neʼe ko hana agamāhani ia te faikole tuʼumaʼu kiā Sehova. (Tan. 6:10, 16, 20) ʼE mahino ia, ka tou fakaōvi tuʼumaʼu kiā Sehova ʼaki te faikole fakamalotoloto, ʼe ina tapuakina anai tatou ʼaki tona laumālie maʼoniʼoni. (Luka 11:9-13) ʼO mole gata aipe, ʼe tali mai anai e Sehova tatatou ʼu kole ʼaki hana fakaōvi mai kiā tatou, ʼo ina faka fealagia ai ke tou maʼu he felogoi lelei mo ia. (Pes. 25:14; Skp. 4:8) ʼE ko he fakapale taulekaleka! Koia, ʼofa pe ke tou gāue kinakina ʼo taupau he ʼu agamāhani fakalaumālie ʼe lelei, pea ʼe tou utu ai anai he ʼu tuʼuga tapuakina mai iā Sehova.