ʼE ʼAoga Te ʼu Fono Ki Te Kau Tūpulaga
1 Neʼe ʼui fēnei e te kiʼi taʼahine: “ ʼE ʼau manatu ʼi ʼihi temi, ko te temi tūpulaga ʼe ko he temi faigataʼa ʼaia ʼo te maʼuli. ʼE mātou felāveʼi mo te hahaʼi ʼe nātou fai folonikasio, mo toloke, pea mo ʼinu kava.” ʼE koutou manatu feiā koa? Kapau koia ʼaia, pea koteā ʼaē ka tokoni anai kia koutou ke koutou lava tauʼi te ʼu meʼa kovi ʼaia? ʼE ʼaoga kia koutou te tui, he tui mālohi ki te ʼu ala faitotonu ʼa Sehova, he kapau ʼe mole koutou tui pea ‘ ʼe molemo feala ke koutou lelei kia te ia.’ (Hep. 11:6) Ko takotou kau ki te ʼu fono ʼo te kokelekasio, ʼe tokoni atu anai ke koutou fakamālohiʼi takotou tui faka Kilisitiano, pea mo takotou fia līaki te ʼu meʼa ʼaē ʼe kovi.
2 ʼE Lahi Te ʼu Lelei ʼe Koutou Maʼu ʼi Te ʼu Fono: Koteā ʼaē ʼe lelei mokā koutou kai he meʼa kai lelei mo hokotou ʼu kaumeʼa? ʼE mole koa la ko te mahōlō lelei ʼo takotou kai he meʼa kai lelei pea mo he ʼu hahaʼi lelei? Pea ʼe toe feiā mo tatatou ʼu fono, ʼe tou maʼu ai te fiafia ʼaia ʼi te faʼahi fakalaumālie.
3 Ko te ʼu meʼa ʼaē ʼe tou palalau kiai ʼi te ʼu fono, ʼe ko he ʼu meʼa fakaloto mālohi, heʼe talanoa ai ki te ʼu fihifihia ʼaē ʼe tau mo tatou ʼi te ʼaho fuli, pea ʼe tou ako ai mo te ʼu lea faka polofeta fakaofoofo ʼo te Tohi-Tapu. ʼE akoʼi atu kia koutou te ʼu meʼa ʼaoga, ke koutou maʼu ai he maʼuli fiafia, pea mo koutou lava tauʼi te ʼu fihifihia ʼaē ʼe hoko kia koutou. Ko te ʼu fakakaugā ʼaē ʼe lelei ʼaupito kia koutou, ʼe ko te ʼu fakakaugā ʼo te ʼu fono, pea ʼe ko he meʼa fakafiafia pea mo lelei te ʼu felogoi fakalaumālie ʼaē ʼe kita maʼu ai. (Pes. 133:1) ʼE mole tou punamaʼuli ki te ʼui fēnei ʼa te kiʼi finemui: “ ʼI te ʼaho katoa ʼe ʼau nofo ʼi te faleako, pea ʼe ko he kavega kia ʼau. Kae ko te ʼu fono ʼe hage ko he ʼu vai ʼi he toafa, ʼe ʼau ʼalu ʼo fakafimālie ai taku fia ʼinu, ke feala haku lotomālohi ki te ako ʼi te ʼapogipogi ake.” Neʼe ʼui fēnei e te tahi finemui: “Neʼe ʼau fakatokagaʼi ko takita fakatahi tuʼumaʼu mo te hahaʼi ʼaē ʼe ʼoʼofa kia Sehova, ʼe tokoni mai ke ʼau nofo ōvi kia te ia.”
4 Kapau ʼe koutou kau ki te Ako ʼo Te Minisitelio Faka Teokalatike, pea ʼe koutou ako ai anai peʼe feafeaʼi hakotou maʼu he ʼu manatu faka Tohi-Tapu, tona fakaʼaogaʼi moʼo fai ʼaki he akonaki, pea mo tona fai ki te kokelekasio ʼi te Fale ʼo te Puleʼaga. Koutou fakakaukauʼi age te ʼu fua lelei ʼaē ka koutou maʼu ʼaki te ako ʼaia, ʼi takotou poto lelei ʼi te akoʼi ki te hahaʼi te ʼu moʼoni ʼo te Folafola ʼo te ʼAtua, ʼaē ka ina foaki te maʼuli! Kofea he tahi potu ʼe lava maʼu ai e te kau tūpulaga te taʼi ako lelei ʼaia?
5 E Feafeaʼi Hakotou Maʼu Te Lelei ʼo Te ʼu Fono: Ke koutou leleiʼia katoa te ʼu fono, ʼe ko meʼa maʼuhiga e tolu ʼe tonu ke koutou fai. Koutou teuteuʼi, koutou fai he ʼu tali, pea mo koutou maʼuliʼi te ʼu faʼahi ʼaia.
6 Koutou Teuteuʼi Te ʼu Fono: Koutou fakatuʼutuʼu he temi moʼo teuteuʼi tuʼumaʼu ai te ʼu fono. ʼAua naʼa koutou tuku ki takotou ʼu gāue ʼi te faleako, takotou ʼu kiʼi gāue koga ʼaho, peʼe ko takotou ʼu temi mālōlō; ke nātou kaihaʼa tokotou temi ʼaē ʼe ʼaoga moʼo teuteuʼi fakatomuʼa te ʼu meʼa ʼaē ka vakaʼi ʼi te ʼu fono. ʼE fua lelei anai kia koutou mo kapau ʼe koutou fai māhani te faʼahi ʼaia. Ko te meʼa tāfito ʼaē ʼe tonu ke koutou ʼuluaki fai, ko takotou lau tuʼumaʼu te ʼu kapite ʼo te Tohi-Tapu ʼo te vāhaʼa ʼaē ʼe tuku atu ki te Ako ʼo Te Minisitelio Faka Teokalatike. ʼI te ʼaho fuli, ʼe lauʼi minuta pe te lau pea mo te metitasioʼi ʼo te ʼu kapite ʼaia. Koutou fai ohage ko ʼihi, heʼe nātou teuteuʼi ʼi he ʼaho e tahi peʼe lua ki muʼa atu, te ʼu fono ʼo te ako tohi pea mo te Ako ʼo Te Tule Leʼo. Kapau leva ʼe feala, pea koutou fai feiā ki te ʼu koga ʼo te Fono Gāue ʼo te vāhaʼa fuli.
7 Fai Hakotou ʼu Tali ʼi Te ʼu Fono ʼAia: ʼE fakahā mai e te Tohi-Tapu, ʼi te taʼu 12 ʼo Sesu, neʼe maʼu atu ia ia ʼi te fale lotu, ʼe fakalogo, mo fakafehufehuʼi, pea mo fai tana ʼu tali. (Luka 2:46, 47) Ko tona faka ʼuhiga, neʼe kau katoa ki te fai palalau ʼaia. ʼE koutou maʼu katoa anai te lelei ʼo te ʼu fono, mo kapau ʼe koutou faiga ke koutou fai hakotou ʼu tali.—Taag. 15:23.
8 ʼE tonu ke koutou tuku katoa tokotou ʼatamai ki te ʼu meʼa ʼaē neʼe akoʼi atu ʼi te ʼu fono. ʼI ʼihi temi, ʼe faigataʼa age he fakalogo ki he akonaki ʼi he fai ʼo he akonaki. Koteā tona tupuʼaga? Koteʼuhi ʼe lava hēʼia tokotou ʼatamai mokā palalau atu he tahi kehe. Koteā te puleʼaki ki te faʼahi ʼaia? Koutou tohi he ʼu manatu ʼo te akonaki. Koutou tohi te ʼu puani maʼuhiga ʼaē ka koutou vakaʼi. Kapau ʼe koutou tohi he ʼu nota, pea ʼe tokoni anai kia koutou ke tuku katoa tokotou ʼatamai ki te polokalama ʼo te fono. Pea tahi ʼaē, koutou kumi te ʼu vaega Tohi-Tapu, pea koutou mulimuli ki tona lau mai e te tēhina faiakonaki.
9 Tahi ʼaē meʼa, koutou fakatuʼutuʼu ke koutou fai hakotou ʼu tali ʼi te ʼu fono ʼaē ʼe fai ai he ʼu fehuʼi. ʼE koutou toe maʼu anai he ʼu fua lelei, mo kapau ʼe koutou fakakaukauʼi lelei te ʼu manatu ʼaē ʼe koutou fia talanoa kiai. Heʼe ʼui fēnei e te Tāʼaga Lea 15:28: “Ko te loto ʼo te faitotonu ʼe metitasio ke feala hana tali.”
10 Koutou Maʼuliʼi Te ʼu Meʼa ʼAē ʼe Koutou Ako: Ko te puani fakaʼosi, koutou tokaga ke “gaue ia koutou” te ʼu meʼa ʼaē ʼe koutou ako. (1 Tes. 2:13) ʼE koutou fakaōvi anai kia Sehova ʼAtua, mo kapau ʼe koutou maʼuliʼi te ʼu puani lelei ʼaē ʼe koutou ako ʼi te ʼu fono fuli. ʼE liliu anai ia Sehova ko he tahi ʼe moʼoni kia koutou, pea ʼe koutou fiafia lahi he neʼe koutou filifili ke koutou “mauli . . . i te mooni.”—3 Soane 4.
11 ʼU tēhina pea mo tuagaʼane tūpulaga, ʼe koutou leleiʼia katoa anai te ʼu fono, mo kapau ʼe koutou teuteuʼi tuʼumaʼu, mo fai hakotou ʼu tali, pea mo maʼuliʼi te ʼu meʼa ʼaē ʼe koutou ako. Tahi ʼaē meʼa, ʼe koutou maʼu anai te ʼu fua lelei fuli ʼo te ʼu fono ʼaia. ʼE mālohi anai takotou tui, ʼi takotou fia nofo agatonu ki takotou Tāmai ʼe ʼi selo, ko Sehova.—Pes. 145:18.