Tou Fiafia Lahi Mokā Tou Kau ʼi Te ʼu Fono
1 ʼE maʼuhiga ʼaupito te ʼu fono ki te lelei ʼo totatou maʼuli fakalaumālie. Ko te fiafia ʼaē ʼe tou maʼu ai, ʼe fakalogo ki te ʼu meʼa ʼaē ʼe tou fai ʼi muʼa ʼo te fono, ʼi te lolotoga fono, pea ʼi te ʼosi fono. ʼE tou lava tokoni feafeaʼi kia tatou totonu pea mo ʼihi ke tou fiafia lahi mokā tou kau ʼi te ʼu fono?
2 ʼI Muʼa ʼo Te Fono: ʼE ʼi ai te pikipikiga ʼo tatatou teuteuʼi te ʼu fono pea mo te fiafia ʼaē ʼe tou maʼu ʼi te ʼu fono ʼaia. Ka tou teuteuʼi fakalelei, pea ʼe tou fia fakalogo pea mo fai he ʼu tali. Tahi ʼaē meʼa, ko te ʼu kiʼi akonaki fuli ʼaē ʼe hinoʼi mai ke tou fai, ʼe tonu ke tou teuteuʼi ke mahino lelei ki te kokelekasio pea ke nātou fia logo. ʼE tonu ke tou lau liuliuga te ʼu akonaki ʼaia. Ka tou fai ke lelei te fono pea ke fakaloto mālohiʼi te kokelekasio katoa, pea ʼe hā lelei tatatou tuputupu ʼi te faʼahi fakalaumālie pea ʼe tou fiafia ai.—1 Tim. 4:15, 16.
3 ʼI Te Lolotoga Fono: Kapau ʼe tou fai he ʼu tali ʼi te ʼu fono, pea ʼe tuputupu anai totatou fiafia. Ko te ʼu akonaki ʼaē ʼe fai ʼaki te ʼu fehuʼi pea mo te ʼu tali, ʼe feala ke ʼui ʼe ko te akonaki ʼa tatou takitokotahi ʼi te kokelekasio. ʼE ʼaoga tāfito te ʼu tali ʼaē ʼe nounou pea ʼe maʼu ai te manatu tāfito. Kapau ʼe tou fakamatala fakanounou te meʼa fakaloto mālohi ʼaē neʼe hoko kia tatou, pea ʼe toe fakaloto mālohi anai ki te kokelekasio, pea ʼe tonu ke tou vakaʼi ʼi te polokalama ʼo te ʼu fono pe koteā te ʼu akonaki ʼaē ʼe feala ke fai ai te faʼahi ʼaia. (Taag. 15:23; Gaue 15:3) Ka tou fai hatatou kiʼi palapalalau ʼi te fono, pea ʼe tonu ke sio te kokelekasio ʼe tou fiafia pea mo tui papau ki te ʼu meʼa ʼaē ʼe tou palalau kiai, ʼo tou fai ke nātou fia logo kiai, pea ke ʼaoga kia nātou.
4 ʼI Te ʼOsi Fono: Kapau ʼe tou fai he ʼu palalau lelei ki ʼihi, mo tou fakaʼalofa kia nātou, pea mo tou talanoa ki he ʼu puani maʼuhiga neʼe tou vakaʼi ʼi te fono, pea ʼe fua lelei anai kia tatou fuli. Kapau ʼe tou fakahā totatou fiafia ʼi te fai tali ʼa te kau tūpulaga, mo te hahaʼi matutuʼa, pea mo nātou ʼaē ʼe foʼofoʼou mai, pea ʼe toe ʼāsili anai totatou ʼofa fakatautehina. ʼAua naʼa tou fatufatuʼi ia nātou ʼaē ʼe pupuli ʼi te ʼu fono, kae tou vaevae mo nātou te fiafia ʼaē neʼe tou maʼu ai, ʼo tou fakaloto mālohiʼi nātou ke nātou kau ʼi te ʼu fono.—Hep. 10:24, 25.
5 ʼAua naʼa tou tō ʼi te ʼu fono ʼaia ʼaē ʼe feala ai ke tou fefakaloto mālohiʼaki. (Loma 1:11, 12) Kapau ʼe tou faiga fuli, pea ʼe feala anai ke tou taupau totatou fiafia mokā tou kau ʼi te ʼu fono faka Kilisitiano.