Koutou Haga Tuputupu ʼi Te Faʼahi Fakalaumālie!

KO TE ʼAHO ʼAĒ NEʼE TOU PAPITEMA AI ʼE KO TE ʼAHO ʼAĒ ʼE TONU KE TOU LELEIʼIA TUʼUMAʼU PEA MO MANATUʼI TUʼUMAʼU. ʼE MOʼONI, ʼE KO TE ʼAHO ʼAIA ʼAĒ ʼE TOU FAKAHĀ AI KI TE HAHAʼI KUA TOU FOAKI TOTATOU MAʼULI MOʼO TAUHI KI TE ʼATUA.

KI TE tokolahi ʼo te hahaʼi, ʼe ko he toe meʼa faigataʼa hanatou kaku ki te papitema​—heʼe maʼua ke nātou līaki tanatou ʼu aga ʼaē ʼe kovi, mo mavae ʼi tonatou ʼu fakakaugā kovi, pea mo fetogi he ʼu faʼahiga aga pea mo he ʼu faʼahiga manatu neʼe nātou leleiʼia.

Logope la ko te papitema ʼe ko he lakaga fakafiafia pea mo maʼuhiga ʼi te maʼuli ʼo he Kilisitiano, kae ʼe ko te kamata pe ʼaia ʼo tona maʼuli faka Kilisitiano. Neʼe ʼui fēnei e te ʼapositolo ko Paulo ki te kau Kilisitiano ʼaē neʼe kua papitema ʼi Sutea: “ ʼI tatatou kua tuku te akonaki ʼo te kamata ʼo ʼuhiga mo Kilisito, tou laka fakavilivili ki te ʼuhiga hahaʼi fakapotopoto.” (Hepeleo 6:1) Ei, ko te kau Kilisitiano fuli ʼe tonu ke nātou “aʼu ki te logo tahi ʼi te tui pea mo te ʼatamai mālama totonu ʼo ʼuhiga mo te ʼAlo ʼo te ʼAtua, ki te ʼuhiga tagata lahi, ki te fakafuafua ʼo te ʼaluʼaga ʼo te katoa ʼa Kilisito.” (Efesi 4:​13) ʼE hoki feala anai ke tou “mālohi ʼi te tui,” mo kapau ʼe tou tuputupu ʼo aʼu ki te ʼuhiga tagata katoa ʼaia.​—Kolose 2:7.

ʼI te ʼu taʼu ʼaenī kua hili, ko te toko lauʼi teau afe kau atolasio foʼou neʼe nātou hū ki te kokelekasio faka Kilisitiano. Lagi ʼe koutou kau ia nātou ʼaia. Ohage ko tokotou ʼu tēhina ʼo te ʼuluaki sēkulō, ʼe mole koutou fia nonofo ko he ʼu tamaliki ʼi te faʼahi fakalaumālie. ʼE koutou fia tuputupu, pea mo haʼele ki muʼa! Kae e feafeaʼi te fai ʼo te faʼahi ʼaia? Pea koteā te ʼu faʼahi ʼaē ʼe feala ke koutou tuputupu ai?

Koutou Tuputupu ʼAki Te Ako Takitokotahi

Neʼe ʼui e Paulo ki te kau Kilisitiano ʼi Filipe: “ ʼE ʼau haga faikole ʼo ʼuhiga mo te potu ʼaenī, ke tuputupu aipe tokotou ʼofa ʼaki he ʼatamai mālama totonu pea mo he fakasiosio totonu ʼe katoa.” (Filipe 1:9) Ko takotou tuputupu ʼi te “ ʼatamai mālama totonu” ʼe maʼuhiga ʼaupito kia koutou mo kapau ʼe koutou fia tuputupu ʼi te faʼahi fakalaumālie. Ko takotou ‘ako te ʼiloʼi ʼo Sehova ʼAtua pea mo Sesu Kilisito’ ʼe ko he meʼa ʼe fai hoholo, kae ʼe mole ko he meʼa ʼe fakagata ʼi takotou ʼosi papitema.​—Soane 17:3.

Ko te tuagaʼane ʼe higoa ko Alexandra neʼe papitema ʼi tona taʼu 16, neʼe mahino lelei ki te faʼahi ʼaia kae kua taʼu hogofulu tana papitema. Neʼe lahilahi ake ʼi te moʼoni pea neʼe kau tuʼumaʼu ki te ʼu fono faka Kilisitiano pea mo te gāue fai faka mafola. ʼE ina ʼui fēnei: “ ʼI te ʼu māhina ʼaenī kua ʼosi, neʼe mahino kia ʼau ʼe ʼi ai toku fihifihia. Koia neʼe ʼau fakatotonu ai leva ke ʼau sivi ia ʼau totonu, mo te ʼu meʼa ʼaē neʼe ʼau logoʼi ʼi toku loto ʼo ʼuhiga mo te moʼoni, pea mo vakaʼi pe koʼe ʼe kei ʼau nofo ʼi te moʼoni.” Koteā te meʼa ʼaē neʼe mahino kia ia? ʼE ina toe ʼui fēnei: “Neʼe mahino kia ʼau, neʼe mole ʼau ʼiloʼi lelei pe koʼe ʼe ʼau nofo ʼi te moʼoni. Neʼe ʼau manatuʼi, ʼi taku kei veliveli neʼe faka maʼuhigaʼi te ʼu fono pea mo te fai faka mafola. Neʼe ʼau manatu ai, ʼe faigafua anai taku fai taku ako takitokotahi pea mo faikole tuʼumaʼu. Kae ʼi taku sivi fakalelei toku maʼuli, neʼe mahino ai kia ʼau neʼe mole hoko moʼoni te faʼahi ʼaia.”

ʼE fakaloto mālohiʼi fēnei tatou e te ʼapositolo ko Paulo: “Logope he faʼahi kua tou aʼu kiai ʼi ʼatatou ʼu faiga, tou haga haʼele fakalelei ʼi te fai pe ʼaia.” (Filipe 3:16) Ko te fai tuʼumaʼu ʼo he meʼa ʼe feala ke tokoni kia tatou ke tou haʼele ki muʼa. ʼI muʼa ʼo takotou papitema, ʼe mahino ia neʼe koutou fai tuʼumaʼu ʼi te vāhaʼa fuli takotou ako Tohi-Tapu mo te tēhina pe ko te tuagaʼane faiva ʼaē neʼe ina fai takotou ako. ʼI takotou ʼāsili leleiʼia te ako, neʼe koutou teuteuʼi lelei age takotou ako, ʼo koutou vakaʼi te ʼu vaega faka Tohi-Tapu. Talu mai takotou papitema, neʼe koutou haga ‘haʼele fakalelei koa ʼi te fai pe ʼaia’?

Kapau neʼe mole koutou fai te faʼahi ʼaia, pea ʼe lagi tonu anai ke koutou toe vakaʼi pe koteā te ʼu meʼa ʼaē ʼe koutou fakamuʼamuʼa, ‘ ʼo koutou vakaʼi te ʼu meʼa ʼaē ʼe maʼuhiga tāfito.’ (Filipe 1:​10) Ko tatou fuli ʼe tou maʼumaʼua, pea ʼe ʼaoga ke tou loto lolomi moʼo fakatuʼutuʼu he temi ki te lau ʼo te Tohi-Tapu pea mo tona akoʼi. Kae ʼe lelei ke tou faiga ki te faʼahi ʼaia heʼe tou maʼu ai anai tona ʼu fua lelei. Koutou fakatokagaʼi te meʼa ʼaē neʼe hoko kia Alexandra. ʼE ina fakamoʼoni fēnei, “Ko taku kau ki te moʼoni lolotoga te ʼu taʼu e 20 ʼaenī kua hili, neʼe gata pe ki taku kau ki te ʼu fono pea mo te minisitelio.” Kae ʼe ina toe ʼui fēnei, “neʼe mahino kia ʼau, logope la ʼe maʼuhiga ʼaupito te ʼu faʼahi ʼaia, kae ʼe mole feʼauga moʼo tokoni kia ʼau mokā hoko mai he ʼu faigataʼaʼia. Neʼe ʼasi mai ki tuʼa te ʼu meʼa fuli ʼaia koteʼuhi neʼe mole ʼi ai haku ako tokotahi, pea neʼe mole loloto taku ʼu faikole. Kua mahino kia ʼau, ʼe tonu ke ʼau fetogi taku faʼahiga manatu pea mo kamata he polokalama ako ke ʼau ʼiloʼi moʼoni ia Sehova pea mo ʼofa kia ia, pea mo leleiʼia te ʼu meʼa ʼaē neʼe foaki mai e tona ʼAlo.”

Kapau ʼe ʼaoga kia koutou he tokoni moʼo fakatuʼutuʼu hakotou ako takitokotahi ʼi te vāhaʼa fuli, pea ʼe ko he meʼa fakafiafia anai ki te kau tagata ʼāfea pe ko he tahi ʼu Kilisitiano fakapotopoto ʼi takotou kokelekasio ke nātou tokoni atu kia koutou ʼo ʼuhiga mo te faʼahi ʼaia. Tahi ʼaē meʼa, ʼe maʼu he ʼu tokoni lelei ʼi te ʼu alatike ʼo Te Tule Leʼo ʼo te ʼaho 1 ʼo Maio 1995; mo te ʼaho 15 ʼo ʼAukusito 1993; pea mo Te Tule Leʼo Fakafalani ʼo te ʼaho 15 ʼo Maio 1986.

ʼE ʼAoga Ke Koutou Fakaōvi Ki Te ʼAtua

Ko te tahi faʼahi ʼaē ʼe tonu ke koutou faiga ke koutou tuputupu ai, ʼe ko takotou ʼu felogoi mo te ʼAtua. Ko ʼihi ia koutou, ʼe lagi maʼuhiga ʼaupito ke nātou fai te faʼahi ʼaia. Koutou fakatokagaʼi te faʼifaʼitaki ʼo Anthony, ʼaē neʼe papitema ʼi tana kei veliveli. ʼE ina fakamatala fēnei, “Neʼe ko ʼau te ʼuluaki papitema ʼo te fānau. ʼI taku ʼosi papitema, neʼe fāʼufuaʼaki mālohi kia ʼau taku faʼe. Neʼe ko taku hoki sio ʼaē ki te fiafia feiā ʼo taku faʼe. Neʼe lahi ʼaupito taku fiafia, pea neʼe ʼau logoʼi kua ʼau mālohi.” Kae ʼaki te temi neʼe fetogi te ʼaluʼaga ʼaia. ʼE toe ʼui fēnei e Anthony, “lolotoga he temi loaloaga, neʼe mole papitema ai he tūpulaga ʼo tomatou kokelekasio. Koia neʼe tupu ai haku fialahi. Neʼe ʼau toe fialahi ʼi taku ʼu tali pea mo taku ʼu akonaki ʼaē neʼe ʼau fai ʼi te ʼu fono. Neʼe kua maʼuhiga age kia ʼau toku vikiʼi pea mo toku ʼofainaʼi e te hahaʼi ʼi haku fakavikiviki kia Sehova. Neʼe mole ʼau felogoi moʼoni pea mo ia.”

Ohage ko Anthony, neʼe lagi foaki e ʼihi tonatou maʼuli ki te ʼAtua moʼo fakafiafia ʼihi ka mole ʼuhi ko tanatou fia fakafiafia ia Sehova. Kae ʼe fakamaʼua e Sehova kia nātou ʼaia ke nātou fakahoko tanatou fakapapau ʼaē neʼe nātou fai ke nātou tauhi kia te ia. (Vakaʼi ia Tagata Tānaki 5:4.) Kae kapau ʼe mole nātou pipiki ki te ʼAtua, pea ʼe faigataʼa anai hanatou fai te faʼahi ʼaia. ʼE manatuʼi fēnei e Anthony: “Ko te fiafia lahi ʼaē neʼe ʼau maʼu ʼi taku ʼosi papitema neʼe mole hoko fualoa. Neʼe mole heʼeki katoa te taʼu ʼaia pea ʼau fai te agahala mamafa neʼe tonu ke fakatonutonuʼi e te kau tagata ʼāfea ʼi te kokelekasio. ʼI taku fai liuliuga te agahala ʼaia, neʼe tupu ʼaki ai toku fakamavae ʼi te kokelekasio. Hili kiai taʼu e ono ʼi taku ʼosi foaki toku maʼuli kia Sehova, pea ʼave ʼau ʼo pilisoniʼi he neʼe ʼau fakapogi te tahi.”

Koutou Felogoi Lelei Mo Sehova

Tatau aipe pe koteā tokotou ʼaluʼaga, kae ʼe feala ki te kau Kilisitiano fuli ke nātou tali te fakaafe ʼaenī ʼa te Tohi-Tapu: “Koutou fakaōvi ki te ʼAtua, pea ʼe fakaōvi anai kia koutou.” (Sake 4:8) ʼE mahino ia, neʼe koutou ōvi ki te ʼAtua ʼi te temi ʼaē neʼe koutou kamata ako ai te Tohi-Tapu. Neʼe koutou ako ai ko te ʼAtua ʼe mole ko te ʼAtua faka misitelio ʼaē ʼe atolasio ki ai te hahaʼi ʼo te Keletiate, kae ʼe ko he tahi ʼe maʼuli moʼoni pea ʼe higoa ko Sehova. Neʼe koutou toe ako foki ʼe ʼi ai tona ʼu kalitate lelei, ʼe ko he “ ʼAtua manavaʼofa pea mo agaʼofa, tuai ʼi te ʼita pea mo mahu ʼi te lotoʼofa.”​—Ekesote 34:​6.

Kae moʼo fakahoko takotou fakapapau ʼaē ke koutou tauhi ki te ʼAtua, ʼe tonu ke toe mālohi age takotou fakaōvi kia te ia! ʼO feafeaʼi? Neʼe faikole fēnei te tagata fai pesalemo: “Fakahā mai kia te ʼau tau ʼu ala, Ê Sehova! Akoʼi mai kia te ʼau tau ʼu ala foufou.” (Pesalemo 25:4) Ko te ako takitokotahi ʼo te Tohi-Tapu pea mo te ʼu tohi ʼa te Sosiete, ʼe feala ke tokoni kia koutou ke koutou ʼiloʼi lelei age ia Sehova. ʼE toe maʼuhiga foki ke koutou faikole fakamalotoloto tuʼumaʼu. ʼE fakaloto mālohiʼi fēnei tatou e te tagata fai pesalemo: “Koutou fakahā tokotou loto kia te ia.” (Pesalemo 62:8) Ka koutou sio anai ʼe tali e te ʼAtua takotou ʼu faikole, pea ʼe mahino anai kia koutou ʼe tokagaʼi moʼoni koutou e te ʼAtua. Ko te faʼahi ʼaia ʼe tokoni anai kia koutou ke toe mālohi age takotou felogoi mo ia.

Ko te ʼu faigataʼaʼia pea mo te ʼu fihifihia ʼaē ʼe tau mo tatou, ʼe ko he tahi ʼu fealagia ʼaia ke tou fakaōvi ai ki te ʼAtua. ʼE lagi tau mo koutou he ʼu fihifihia pea mo he ʼu ʼahiʼahi ʼo ʼuhiga mo takotou tui, ohage la ko te mahaki, te ʼu fihifihia ʼi te faleako pea mo te fale gāue, peʼe ko he ʼu fihifihia faka paʼaga. ʼE lagi faigataʼa kia koutou takotou polokalama faka teokalatike māhani, ʼaē ko te kau ki te minisitelio, mo te ʼu fono, peʼe ko te ako ʼo te Tohi-Tapu mo takotou fānau. ʼAua naʼa koutou tauʼi tokotahi pe te ʼu fihifihia ʼaia! Koutou kole mamahi kia Sehova ke tokoni atu kia koutou, pea mo ina takitaki koutou. (Tāʼaga Lea 3:​5, 6) Koutou kole age kia ia ke ina foaki atu tona laumālie maʼoniʼoni! (Luka 11:13) ʼI takotou logoʼi te tokoni ʼofa ʼa te ʼAtua kia koutou, ʼe koutou fia fakaōvi tuʼumaʼu pe anai kia te ia. Ohage ko tona ʼui e te tagata fai pesalemo ko Tavite, “koutou ʼahiʼahi pea ʼe koutou sio anai ko Sehova ʼe lelei. . . . Manuʼia te tagata mālohi ʼaē ʼe hola kia te ia.”​—Pesalemo 34:8.

Koteā te meʼa ʼaē neʼe hoko kia Anthony? ʼE ina manatuʼi fēnei, “Neʼe ʼau kamata fakakaukauʼi te temi ʼaē neʼe lahi ai te ʼu fakatuʼutuʼu fakalaumālie neʼe ʼau fai moʼo fakahoko te finegalo ʼo Sehova. Neʼe fakatupu lotomamahi kia ʼau. Kae logope la toku lotomamahi, neʼe ʼau manatuʼi te ʼofa ʼa Sehova. ʼI te kamata, neʼe mole ʼau lava faikole kia Sehova, kae neʼe ʼau fai te faʼahi ʼaia, pea neʼe ʼau avahi toku loto kia te ia, ʼo kole age ke fakamolemole mai kia ʼau. Neʼe ʼau kamata lau te Tohi-Tapu, pea neʼe ʼau punamaʼuli ʼi te kua lahi ʼo te ʼu meʼa ʼaē kua ʼau galoʼi pea mo te veliveli ʼo te ʼu meʼa neʼe ʼau ʼiloʼi ʼo ʼuhiga mo Sehova.” Logope la ʼe kei tonu ke nofo ia Anthony ʼi te fale pilisoni ʼuhi ko te fakapō ʼaē neʼe ina fai, kae ʼe tokoni age kia ia te kau Fakamoʼoni ʼa Sehova ʼo te kolo, pea ʼe fakahaʼuhaʼu ʼo lelei ʼi te faʼahi fakalaumālie. ʼAki he loto fakafetaʼi, ʼe ʼui fēnei e Anthony: “ ʼAki ia Sehova pea mo tana kautahi, kua ʼau lava fetogi toku ʼulugaaga ʼāfea, pea ʼe ʼau faiga ke ʼau gāueʼi toku ʼulugaaga foʼou ʼi te ʼaho fuli. ʼI te temi nei, kua maʼuhiga ʼaupito kia ʼau taku felogoi lelei pea mo Sehova.”

Koutou Tuputupu ʼi Tokotou Minisitelio

Neʼe fakatotonu e Sesu Kilisito ki tana kau tisipulo ke nātou faka mafola te “logo lelei ʼo te puleʼaga.” (Mateo 24:14) Kapau neʼe hoki koutou kamata faka mafola age pe te logo lelei, ʼe mahino ia ʼe mole lagi koutou faʼa poto ʼi te minisitelio. Kae ʼe lava feafeaʼi hakotou tuputupu ke ‘koutou fakahoko katoa tokotou minisitelio’?​—2 Timoteo 4:5.

ʼUluaki, ʼe tonu ke koutou maʼu te manatu ʼaē ʼe lelei. Koutou faka ʼuhiga te gāue faka mafola ohage ko he “koloā,” pe ko he pilivilesio. (2 Kolonito 4:7) ʼE ko he fealagia ʼaia ke tou fakahā totatou ʼofa, mo tatatou agatonu kia Sehova. Ko te gāue ʼaia ʼe ina toe faka fealagia kia tatou ke tou fakahā totatou ʼofa ki te kāiga. Ko tatatou ʼu faiga fakamalotoloto ʼi te gāue ʼaia ʼe feala moʼoni ke fakatupu fiafia kia tatou.​—Gāue 20:35.

Ko Sesu totonu neʼe ina maʼu te manatu ʼaē ʼe lelei ʼo ʼuhiga mo te gāue fai faka mafola. Ko te vaevae ʼo te ʼu moʼoni faka Tohi-Tapu mo te hahaʼi, neʼe hage ko hana “meʼa kai.” (Soane 4:​34) Ko tana fia tokoni ki te hahaʼi ʼe feala pe ke fakanounou ʼi tana ʼu palalau ʼaenī, “ ʼE ʼau loto kiai.” (Mateo 8:3) Neʼe ʼofa ia Sesu ki te hahaʼi, tāfito kia nātou ʼaē neʼe “ ʼāhua pea mo mavetevete” ʼuhi ko te mālama ʼa Satana. (Mateo 9:​35, 36) ʼE koutou “loto” koa mo koutou ke koutou tokoni kia nātou ʼaē ʼe nonofo ʼi te fakapōʼuli fakalaumālie pea ʼe ʼaoga kia nātou te mālama ʼo te Folafola ʼa te ʼAtua? Kapau koia ʼaia, pea ʼe koutou logoʼi ʼe ko hakotou maʼua ke koutou fakalogo ki te fakatotonu ʼaenī ʼa Sesu: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe.” (Mateo 28:19) ʼE mahino ia, ʼe koutou kau anai ki te gāue ʼaia ʼo mulimuli pe ki tokotou ʼaluʼaga pea mo te meʼa ʼaē ʼe koutou lavaʼi.

Ko te tahi puleʼaki ke koutou tuputupu ai ʼe ko takotou kau tuʼumaʼu ki te minisitelio​—ʼi te vāhaʼa fuli mo kapau ʼe feala. Ko te fai ʼo te faʼahi ʼaia ʼe feala anai ke ina fakasiʼisiʼi te mataku ʼaē ʼe ina tāʼofi ia ia ʼaē ʼe mole faka mafola tuʼumaʼu. Ko takotou kau tuʼumaʼu ki te fai faka mafola ʼe toe fua lelei anai kia koutou ʼi te tahi ʼu faʼahiga ʼaluʼaga. ʼE toe mālohi age anai takotou leleiʼia te moʼoni, mo takotou ʼofa kia Sehova pea mo te kāiga, pea ʼe koutou manatuʼi tuʼumaʼu anai te ʼamanaki ʼo te Puleʼaga.

Kae e feafeaʼi mo kapau ʼi te temi nei, ko takotou ʼaluʼaga ʼe ina faka tuʼakoi takotou fai faka mafola? Kapau ʼe mole feala ke koutou fetogi te ʼaluʼaga ʼaia, pea koutou fakafimālie tokotou loto, ʼo koutou ʼiloʼi ʼe fiafia ia Sehova, tatau aipe pe koteā ʼaē ʼe koutou lavaʼi, pea kapau ʼe koutou fai te faʼahi ʼaia ʼaki he loto katoa. (Mateo 13:23) ʼE lagi feala ke koutou tuputupu ʼi ʼihi faʼahiga ʼaluʼaga, ohage la ko te hikihiki ʼo takotou poto ʼi te fai faka mafola. ʼI te kokelekasio, ʼe akoʼi tatou ki te faʼahi ʼaia ʼaki te Ako ʼo te Minisitelio Faka Teokalatike pea mo te Fono Gāue. ʼE mahino ia, kapau ʼe tou faiva ʼi te minisitelio, ʼe tou fiafia ai anai pea mo tou sio ki tona ʼu fua lelei.

Koia ʼe hā lelei mai, ko takita tuputupu ʼi te faʼahi fakalaumālie ʼe mole gata ʼi te ʼaho ʼaē ʼe kita papitema ai. ʼO ʼuhiga mo tana ʼamanaki ʼaē ke kaku ki te maʼuli tuputupua ʼi selo, neʼe tohi fēnei e te ʼapositolo ko Paulo: “Naʼi tēhina, ʼe mole ʼau faka ʼuhiga kua ʼau maʼu te meʼa ʼaia, kae ʼe ʼi ai te meʼa e tahi ʼo ʼuhiga mo te meʼa ʼaia: ʼe ʼau galoʼi te ʼu meʼa ʼaē ʼi muli kae ʼau haga ki te ʼu meʼa ʼaē ʼe ʼi muʼa, ʼe hoko atu taku lele ki te fakatuʼutuʼu ʼo te totogi ʼo te pāui ʼa te ʼAtua, te pāui ʼaē ki selo, ʼaki ia Kilisito Sesu. Koia, ko tatou fuli ʼaē kua tou fakapotopoto, tou maʼu te faʼahiga manatu ʼaia; pea kapau ʼe kehe takotou manatu ʼi he faʼahiga meʼa pe, pea ʼe fakahā atu anai e te ʼAtua te manatu pe ʼaia kia koutou.”​—Filipe 3:​13-​15.

Ei, ko te kau Kilisitiano fuli, tatau aipe peʼe nātou ʼamanaki ki te maʼuli tuputupua ʼi selo pe ki te maʼuli heʼegata ʼi te kele, kae ʼe tonu ke nātou ‘haga ki te ʼu meʼa ʼaē ʼe ʼi muʼa’​—ʼo nātou faiga mālohi ke nātou kaku ki te maʼuli! Neʼe ko he meʼa lelei takotou papitema, kae ʼe mole tonu ke gata ai. Koutou haga faiga ke koutou tuputupu ʼi te faʼahi fakalaumālie. ʼAki te ʼu fono pea mo takotou ako takitokotahi, “koutou liliu ko he ʼu hahaʼi lalahi ʼi te faʼahi ʼo te ʼu fealagia fakakaukau.” (1 Kolonito 14:20) Koutou faiga ke koutou “mahino . . . ki te laulahi, mo te loa, mo te māʼoluga, pea mo te loloto” ʼo te moʼoni. (Efesi 3:​18) Ko takotou tuputupu ʼi te temi nei, ʼe tokoni anai kia koutou ke koutou maʼu te fiafia, kae ʼe toe tokoni atu anai ke koutou kau moʼoni ki te mālama foʼou ʼaē neʼe fakapapau mai e te ʼAtua pea ʼe takitaki anai e tona Puleʼaga, ʼaē ʼe feala ai anai ke koutou tuputupu ʼo heʼegata!

[Paki ʼo te pasina 29]

ʼE tonu ke tou faiga mālohi moʼo taupau hatatou temi ki te ako takitokotahi

[Paki ʼo te pasina 31]

Ko te manatu ʼaē ʼe lelei ʼe feala ke tokoni kia tatou ke tou fiafia ʼi te minisitelio