Te Fakatahi Faka Tisitilike ʼo Te Taʼu 1999 “Te ʼu Folafola Faka Polofeta ʼa Te ʼAtua”
1 ʼI te nofo ʼaē ʼa te kau Iselaelite ʼi te toafa, neʼe fakatotonu e Sehova kia Moisese ke ina faʼu ʼaki te siliva he ʼu fakatagi pupuhi e lua. Kapau neʼe fakatagi he fakatagi pupuhi e tahi, pea neʼe tonu ke fakatahitahi te ʼu pule ʼo te ʼu telepi ʼi te hūʼaga ʼo te fale fehikitaki ʼo te fono. Ko te fakatatagi ʼo te ʼu fakatagi pupuhi e lua, neʼe tonu ai ke ʼōmai fakatahi ia Iselaele katoa. (Fkau. 10:1-4) Ia ʼaho nei, ʼe mole tou fiafia koa la mokā tou logo ki te tala mai ʼaē, ohage ko te fakatatagi ʼo te ʼu meʼa fakatagi pupuhi, ke tou fakatahitahi ʼi tatatou ʼu fakatahi faka tisitilike ʼaē ʼe fai ʼi te taʼu fuli? ʼI tatatou ʼu fakatahi ʼaia, ʼe tou maʼu ai te ʼu fakatotonu mai ia Sehova pea mo tana takitaki ʼaki tana Folafola pea mo tana ʼu tagata fakafofoga fakanofo. ʼE tokoni mai te faʼahi ʼaia ke tou haga tauhi tuʼumaʼu ki te ʼAtua. ʼE mole tou fiafia koa la ʼi tatatou sio ki te fakatahitahi ʼa he toko afe—peʼe lagi ko te toko hogofulu afe—hahaʼi tauhi agatonu ʼi te ʼofa pea mo te tokalelei? Ei ʼe tou fiafia!—Pes. 122:1, 7, 8.
2 Mai te māhina ʼo ʼAukusito ki te māhina ʼo Sepetepeli 1998, ko te ʼu Fakatahi Faka Tisitilike pea mo Faka Malamanei e tolu ʼaē ko tona kupu tāfito “Te Faʼahiga Maʼuli ʼAē ʼe Fakamaʼua Mai e Te ʼAtua,” neʼe fai ʼi Vila pea mo Niumea. Neʼe fai te tahi ʼu fakatahi feiā ʼi te malamanei katoa, neʼe kau ai te ʼu hahaʼi mai te malamanei katoa. Ko te ʼu tēhina mo te ʼu tuagaʼane ʼi Montréal (ʼi Kanata), mo Brisbane pea mo Sydney (ʼi Ositalalia) neʼe nātou tali te ʼu telekē e teitei toko 100 ʼo Niu-Kaletonia pea mo Vanuatu, pea ko te tahi ʼu telekē mai te ʼu fenua ʼo te malamanei, neʼe toe kau mo nātou ki te ʼu Fakatahi Faka Malamanei ʼaia. ʼI te ʼu fakatahi ʼaia, ko te kehekehe ʼo te ʼu lea, neʼe mole ko he fihifihia ki te feʼofaʼofani ʼa te ʼu tēhina mo tuagaʼane. Neʼe toe liliu te kau misionea pea mo te ʼu hahaʼi gāue faka malamanei ki tonatou fenua ke nātou kau ki te ʼu fakatahi ʼaia. Ko tanatou kau kiai neʼe ko he fakaloto mālohi ki te hahaʼi fuli ʼi te faʼahi fakalaumālie.
3 Ko te tahi meʼa maʼuhiga neʼe hoko ʼi tatatou Filiale, neʼe ko te avahi ʼo te Fale Fakatahi ʼo Normandie pea mo te ʼu pilō ʼo tatatou Filiale foʼou. Neʼe tou fiafia lahi ʼi tatatou fakalogo ʼaē ki te akonaki neʼe fai e te Tēhina ko Lloyd Barry ki te avahi ʼo tatatou ʼu fale, pea ʼi te uhu ake, ʼi te Fakatahi Makehe ʼaho tahi, neʼe ina fai te tahi ʼu akonaki e lua. Ko te ʼu tēhina ʼaē neʼe nātou tali te ʼu telekē matāpule neʼe nātou maʼu ai he fiafia lahi ʼi tanatou fakatahi mo nātou. ʼI tatatou fakatahi faka tisitilike ʼo te taʼu 1999, ʼe tou maʼu anai te tahi ʼu faigamālie ke tou ʼiloʼi ai te lelei ʼo totatou ʼu tēhina mo tuagaʼane pea mo tou fakafetaʼi kia Sehova, ʼuhi ko te logo tahi ʼaē ʼe ina foaki mai.
4 ʼI te taʼu 1999, ʼe fai anai tatatou Fakatahi Faka Tisitilike ʼi Vanuatu ʼi Luganville, ʼi Santo, ʼi te ʼaho 20 ki te ʼaho 22 ʼo ʼAukusito 1999. Logope la ʼe fakatuʼutuʼu ke fai te fakatahi ʼi te Fale ʼo te Puleʼaga ʼo Luganville ʼi te ʼu ʼaho ʼaia, kae ʼe feala ke fetogi te ʼaho pea mo te koga meʼa ʼaē ka fai ai te fakatahi, koia ʼe hoki vakaʼi anai he tonu ʼo ʼuhiga mo te faʼahi ʼaia. ʼE fakahā anai ki te ʼu kokelekasio ʼo Vanuatu he tahi ʼu logo ki muli age. ʼI Niu-Kaletonia, ʼe tou fai anai te ʼu fakatahi faka Tisitilike e lua ʼi tatatou Fale Fakatahi ʼo Normandie ʼi te ʼaho 3 ki te ʼaho 5 ʼo Sepetepeli pea mo te ʼaho 10 ki te ʼaho 12 ʼo Sepetepeli 1999. ʼE fakahā anai ki te ʼu kokelekasio te tahi ʼu logo ke nātou ʼiloʼi peʼe ko te fakatahi fea ʼaē ʼe nātou kau kiai.
5 Koia, ʼe mātou fakaloto mālohiʼi koutou ke koutou fai he ʼu fakatuʼutuʼu ʼi te temi nei ke feala hakotou kau ki te ʼu ʼaho fuli ʼaia e tolu ʼo te Fakatahi Faka Tisitilike “Te ʼu Folafola Faka Polofeta ʼa te ʼAtua” ʼi te taʼu 1999. ʼE tou fakaʼamu ke tou fakalogo ki te “kalaga fakafiafia pea mo te fakafetaʼi” fakalaumālie ʼo te hahaʼi kaugamālie ʼaē ʼe tauhi ki te ʼAtua, ʼi te logo tahi. (Pes. 42:4) ʼOfa pe ke tapuakina e Sehova te ʼu fakatuʼutuʼu fuli ʼaē ʼe fai ke hoko atu te fakakoloa ʼo tatou ʼi te faʼahi fakalaumālie!
[Talanoa ʼo te pasina 3]
Te ʼu Hola
Feliaono pea mo te Moeaki
Hola 9 vaelua ʼi te uhu ki te hola nima afiafi.
ʼAhotapu
Hola 9 vaelua ʼi te uhu ki te hola fā afiafi.