“Tou Haʼele Mo Te ʼAtua” Te Fakatahi Faka Tisitilike 2004 ʼa Te Kau Fakamoʼoni ʼa Sehova
1 Koteā ʼaē ʼe koutou leleiʼia tāfito ai ʼi te ʼu fakatahi faka tisitilike ʼaē ʼe fai ʼi te taʼu fuli? Ko te ʼu akonaki fakaloto mālohi pea mo te kiʼi gaoʼi ʼaē neʼe teuteuʼi maʼa tatou e “te tagata kaugana agatonu mo poto”? (Mat. 24:45-47, MN ) Ko te ʼu tohi foʼou, ʼaē ʼe maʼu ai te meʼa kai fakalaumālie ʼe foaki mai ʼi tona temi totonu? Ko te ʼu fakamatala ʼa te ʼu tēhina mo tuagaʼane ʼaē ʼe nātou fakahā te ʼu fetogi lelei ʼaē neʼe nātou fai ʼi tanatou ako ia te Tohi-Tapu? Te ʼu tānaki ʼo ʼuhiga mo te tuputupu ʼo te gāue fai faka mafola ʼi te tahi ʼu fenua? Takotou fakatahi mo te ʼu tēhina mo tuagaʼane ʼo te ʼu taʼu kehekehe? Ei, ʼe tou fakaʼamu ke foimo hoko mai tatatou ʼu fakatahi, ʼuhi ko te ʼu faʼahi ʼaia pea mo te tahi ʼu faʼahi. ʼI te ʼu telituale ʼo tatatou filiale, ko te ʼuluaki fakatahi ʼe fai anai ʼi Vanuatu, ʼi te ʼaho 27 ki te 29 ʼo ʼAukusito, ʼi Niumea ʼe fai ʼi Sepetepeli, ʼi te ʼaho 10 ki te 12, mo te ʼaho 17 ki te 19, pea ʼi Uvea mo Futuna, ʼe fai ʼi te ʼaho 2 mo te 3 ʼo ʼOketopeli.
2 Tou Kau Ki Te Fakatahi ʼi Te ʼu ʼAho e Tolu: ʼAki ia Moisese, neʼe fakatotonu fēnei e Sehova: “Fakatahiʼi te hahaʼi . . . ke nātou fakalogo pea ke nātou ako.” (Teu. 31:12) ʼAki te kalasi ʼo te tagata kaugana agatonu mo poto, neʼe teuteuʼi e Sehova maʼa tatou he polokalama ako makehe ki te ʼu ʼaho takitahi ʼo te fakatahi. Mai tona ʼuhiga ʼaē ʼe ina akoʼi tatou ‘ke ʼaoga kia tatou,’ koia ʼe tou fia logo anai ki te ʼu akonaki fuli. (Isa. 48:17) Kapau ʼe koutou kole hokotou ʼaho mālōlō ki takotou patolo, koutou faikole kia Sehova pea koutou ʼolo ʼo fakaʼui tokotou ʼaho ʼaia, ʼo mulimuli ki te faʼifaʼitaki lototoʼa ʼa Nehemia. (Neh. 1:11; 2:4) Tahi ʼaē meʼa, kapau ko tokotou famili ʼe mole ko he kau Fakamoʼoni, pea ʼe lelei ke koutou foimo fakahā age kia nātou ʼe koutou ʼolo anai ki takotou fakatahi.
3 Te Tahi ʼu Faʼahi ʼe Tonu Ke Tokagaʼi: Neʼe fakamanatuʼi e Paulo ki te ʼu kokelekasio ʼo Kalate, ke nātou “fai te meʼa ʼaē ʼe lelei ki te hahaʼi fuli pe, kae tāfito foki kia nātou ʼaē ko ʼotatou ʼu kāiga ʼi te tui.” (Kal. 6:10, MN ) Ko te ʼu tēhina mo tuagaʼane matutuʼa, te hahaʼi māʼimoa, te ʼu tāmai peʼe ko te ʼu faʼe ʼaē ʼe nātou taupau tokotahi tanatou fānau, peʼe ko he ʼu tēhina mo tuagaʼane ʼe pionie katoa, ʼe mole nātou kole atu anai ke koutou tokoni age, kae ʼe lagi faigataʼa hanatou ʼōmai ki te ʼu fakatahi. ʼE feala koa hakotou “fai te meʼa ʼaē lelei” kia nātou ʼaia ʼo koutou tokoni age kia nātou? Ko nātou ʼaē ka nātou vakaʼi tāfito anai ia te faʼahi ʼaia, ʼe ko tanatou ʼu famili Kilisitiano pea mo te kau tagata ʼāfea.
4 ʼI te fakatahi ʼa te hahaʼi ʼa Sehova, neʼe fai kua hili kiai taʼu e 2 500, ko Esitalasi mo tona ʼu tēhina Levite, neʼe nātou lau te Folafola ʼa te ʼAtua, pea neʼe nātou fakamahino ki te hahaʼi ʼaē neʼe maʼopoʼopo mai ki te fakatahi. Neʼe koteā tona fua? ʼE fakamatala ia Nehemia 8:12 “ko te hahaʼi fuli neʼe nātou ʼolo ʼo . . . fai he fakafiafia lahi, heʼe kua nātou mahino ki te ʼu folafola ʼaē neʼe akoʼi age.” ʼE mole tou loto fakafetaʼi koa ki te kalasi ʼo te tagata kaugana fakanofo, ohage ko Esitalasi pea mo te kau Levite, ʼe nātou fakaʼaogaʼi te Folafola ʼa te ʼAtua, mo nātou fakamahino pea mo nātou fakahā mai peʼe feafeaʼi hatatou maʼuliʼi? ʼI tana fai ia te faʼahi ʼaia, ko te tagata kaugana ʼaia ʼe ina fakahā te ʼofa pea mo te fia tokoni ʼa Sehova ki Tana hahaʼi. Tou faiga mālohi ke mole tou tō ʼi he ʼaho ʼi te Fakatahi Faka Tisitilike “Tou Haʼele Mo Te ʼAtua.”
[Talanoa ʼo te pasina 3]
Te ʼu Hola ʼo Te Polokalama
Te Feliaono mo te Moeaki
9:30 uhu - ki te hola 5 ʼosi 10 hili hoʼatā
Te ʼAhotapu
9:30 uhu – hola 4 ʼosi nima hili hoʼatā