Te Fakatahi Faka Tisitilike 2006 ʼa Te Kau Fakamoʼoni ʼa Sehova—“Kua Ōvi Mai Ia Te Hāofaki”
1. ʼI te temi muʼa, neʼe fakahā feafeaʼi e te ʼu kaugana ʼa te ʼAtua ia tonatou loto fakafetaʼi ki te tauhi moʼoni, pea koteā te fakatuʼutuʼu ohage ko te temi muʼa ʼe tou maʼu iā ʼaho nei?
1 Ko Esekiasi te Hau ʼo te Suta ʼāfea neʼe ina fekauʼi te kau ʼave logo ke nātou ʼolo ʼo tufa te ʼu tohi moʼo fakaafe ʼo te hahaʼi ke nātou toe liliu mai ki Selusalemi. (2 Fkma. 30:6, 13) ʼAki te tali ʼaē neʼe fai e te hahaʼi ʼo ʼuhiga mo te pāui ʼaia ʼa te hau, neʼe ʼiloga ai tanatou faka maʼuhigaʼi ia te tauhi moʼoni. (2 Fkma. 30:10-12) ʼI te ʼu māhina ʼaē ka tuʼu mai, ʼe maʼu anai e te ʼu kaugana ʼa Sehova ia te faigamālie moʼo fakahā tonatou loto fakafetaʼi ki te pilivilesio ʼaē ke nātou fakatahitahi moʼo tauhi kiā Sehova. Neʼe ʼavatu te tohi ki tokotou kokelekasio ʼe fakaafe ai koutou ki te Fakatahi Faka Tisitilike ʼaē ko tona kupu tāfito “Kua Ōvi Mai Ia Te Hāofaki.” ʼE koutou tali anai koa ia te fakaafe ʼaia?
2. Koteā te fakatuʼutuʼu ʼaē ʼe tou lava fai ʼi te temi nei ke feala hatatou kau ki te polokalama kātoa ʼo te fakatahi?
2 Tou Fai He ʼu Fakatuʼutuʼu ʼi Te Temi Nei: Ke tou maʼu te ʼu fua lelei fuli ʼo te polokalama fonu ʼi te ʼofa ʼaē neʼe teuteuʼi maʼa tatou, ʼe tonu ke tou kau ki te polokalama kātoa. ʼO kamata atu ʼi te ʼaho nei, koutou fai he ʼu fakatuʼutuʼu ke feala kiā koutou mo tokotou famili ke koutou kau ki te ʼu ʼaho e tolu ʼo te fakatahi. (Taag. 21:5) ʼI te ʼu fakatuʼutuʼu ʼaia, ʼe lagi tonu anai ke koutou kole ki tokotou patolo hokotou ʼu ʼaho mālōlō, ke koutou fakahā takotou ʼu fakatuʼutuʼu ki tokotou hoa mo kapau ʼe mole ko he Fakamoʼoni, ke koutou kumi hokotou nofoʼaga, peʼe koutou tali kāiga, pea mo tokoni ki te kau ako Tohi-Tapu ke nātou kau ki te ʼu ʼaho ʼaē e tolu ʼo te fakatahi. ʼAua naʼa koutou fakatuatuai ʼi te fai ʼo te ʼu faʼahi maʼuhiga ʼaia. Koutou faikole kiā Sehova ke tokoni atu ʼo ʼuhiga mo te ʼu fakatuʼutuʼu ʼaia, ʼo falala kiā te ia ‘ ʼe ina fai anai he puleʼaki maʼa koutou.’—Pes. 37:5.
3. He koʼe ʼe tonu ke tou lagolago ki te ʼu fakatuʼutuʼu ʼaē neʼe fai ʼo ʼuhiga mo te ʼu nofoʼaga?
3 Neʼe gāue kinakina ia te kautahi ʼa Sehova ke lahi he ʼu nofoʼaga moʼo tali kāiga ki totatou ʼu tēhina mo tuagaʼane ʼaē ka ʼōmai anai ki te fakatahi. Ko tatatou fakafetaʼi ki te ʼu sākilifisio ʼaē ʼe fai e totatou ʼu tēhina moʼo tokoni ki te ʼu fakatuʼutuʼu ʼaia, pea mo totatou ʼofa ki totatou ʼu tēhina mo tuagaʼane matāpule, pea mo tatatou fakaʼapaʼapa ki te fakatuʼutuʼu faka teokalatike, ʼe ko he ʼu faʼahi ʼe nātou uga anai tatou ke tou lagolago ki te ʼu tokoni ʼaē ʼe tou maʼu ʼi te alatike ʼaenī.—1 Ko. 13:5; 1 Tes. 5:12, 13; Hep. 13:17.
4, 5. Koteā te fakatuʼutuʼu ʼe fai maʼa nātou ʼaē ʼe ʼaoga tāfito ki ai he tokoni?
4 Te ʼu Fakatuʼutuʼu ʼo ʼUhiga Mo Te ʼu Nofoʼaga Pea Mo Te ʼu Feʼaluʼaki: ʼE ʼui fēnei iā Tāʼaga Lea 3:27: “ ʼAua naʼa ke fakafisi te meʼa ʼaē ʼe lelei kiā nātou ʼaē ʼe tonu ke fai kiai, mo kapau ʼe feala ki tou nima ke ina fai te faʼahi ʼaia.” Koteā te meʼa lelei ʼaē ʼe koutou lava fai maʼa ʼihi ʼo ʼuhiga mo te fakatahi? ʼE ʼōmai anai ki te fakatahi ia te ʼu kau fai faka mafola mai te vao pea mo te ʼu motu. ʼE tonu anai ke fai he ʼu fakatuʼutuʼu ʼo ʼuhiga mo he ʼu nofoʼaga pea mo te feʼoloʼaki. Ko te ʼu tēhina mo tuagaʼane mātutuʼa, mahahaki, pea mo nātou ʼe kau ki te selevisi temi kātoa, pea mo ʼihi, ʼe lagi ʼaoga anai ke fetuku nātou peʼe kumi honatou ʼu nofoʼaga. ʼE ko te ʼu famili totonu ʼaē ʼe ʼuluaki fakamaʼua kiai ia te faʼahi ʼaia. (1 Tim. 5:4) Kae kapau ʼe mole feala ʼi tonatou potu, ʼe feala anai ki te ʼu tēhina mo tuagaʼane ke nātou foaki ia te tokoni ʼaia. (Kal. 6:10) ʼE tonu ki te ʼu tēhina taupau ʼo te ʼu Ako Tohi, ke nātou vakaʼi fakatomuʼa ʼi tanatou ʼu Ako Tohi peʼe ko ai ʼaē ʼe ʼaoga ki ai te taʼi tokoni ʼaia.
5 ʼE ʼi ai te ʼu pepa kole nofoʼaga maʼa nātou ʼaē ka kau ki te fakatahi. ʼE fakaloto mālohiʼi te ʼu tēhina fuli ke nātou fakaʼui fakatomuʼa ia te faʼahi ʼaia. ʼE tonu ki te Komite Gāue ʼo Te Kokelekasio ke ina vakaʼi te maʼuli fakalaumālie ʼo te ʼu tēhina mo tuagaʼane ʼaē ʼe tāu mo te faʼahi ʼaia. ʼE fai ia te fakatuʼutuʼu ʼaia maʼa te ʼu tēhina mo tuagaʼane ʼaē ʼe nātou tuku he faʼifaʼitaki lelei, ʼo feiā mo tanatou ʼu fānau.
6. Ko te faʼahi fea ʼaē ʼe feala ai ke tou kau ki te fiafia ʼo te fakatahi ʼaē ka hoko mai?
6 ʼE ʼAoga He Kau Gāue Lotolelei: ʼE tou ʼiloʼi ko nātou fuli ʼaē ka nātou kau ki te fakatahi, ʼe nātou kai anai ia te ʼu meʼa kai fakalaumālie pea mo maʼu anai ia te ʼu faigamālie ke nātou fakatahitahi mo he ʼu fakakaugā fakaloto mālohi. ʼE toe lahi anai totatou fiafia mo kapau ʼe tou lotolelei ke tou tokoni ki te ʼu gāue ʼaē neʼe fakatuʼutuʼu ki te fakaʼaluʼalu lelei ʼo te fakatahi. (Gaue 20:35) ʼE fakaafe atu anai koutou e te ʼu komite ʼo te fakatahi ʼo te kolo ki te ʼu gāue ʼaia. ʼE feala koa hakotou lagolago ki te ʼu gāue ʼaia?—Pes. 110:3.
7. ʼE koutou leleiʼia koa te fakatahi faka tisitilike ʼaē ʼe fai ʼi te taʼu fuli, pea koteā ʼaē ʼe tonu ke koutou tukupau kiai?
7 ʼI tana kau ki te fakatahi faka tisitilike, neʼe ʼui fēnei e te kiʼi tama ʼe taʼu nima: “Ko te fakatahi faka tisitilike ʼe ko he koga ʼe au leleiʼia ʼaupito ʼi te tauhi ʼaē kiā Sehova.” Ko te fakafetaʼi ʼaia ʼa te kiʼi tama, ʼe tokoni mai kiā tatou fuli ke tou mahino ki te fiafia lahi ʼaē ʼe tou maʼu mo kapau ʼe tou kau ki tatatou fakatahi faka tisitilike ʼaē ʼe fai ʼi te taʼu fuli. ʼE hage ko te hiva ʼa te tagata fai pesalemo: “Ko he ʼaho e tahi ʼi tou malaʼe ʼe lelei age ia ʼi ni ʼaho e afe ʼi he tahi age faʼahi.” (Pes. 84:10) ʼAki tana hiva, neʼe fakahā e Tavite tana fia ‘nofo ʼi te ʼapi ʼo Sehova ʼi te ʼu ʼaho fuli ʼo tona maʼuli, ke feala hana sio ki te matalelei ʼo te fale lotu ʼo Sehova.’ (Pes. 27:4) Neʼe fiafia ʼaupito ia Tavite ʼi tana kau ʼi te ʼu kaugana ʼa Sehova. ʼOfa pe mo tatou ke tou faʼifaʼitakiʼi tona loto fakafetaʼi ʼaia ki te tauhi moʼoni, mo kapau ʼe tou kau ki te ʼu ʼaho ʼaē e tolu ʼo te Fakatahi Faka Tisitilike “Kua Ōvi Mai Ia Te Hāofaki.”
[Talanoa ʼo te pasina 3]
Te ʼu Hola ʼo Te Polokalama
Te Feliaono Pea Mo Te Moeaki
ʼi te hola hiva vaelua uhu ki te hola nima ʼosi nima ʼi te afiafi
Te ʼAhotapu
ʼi te hola hiva vaelua uhu ki te hola fā ʼosi hogofulu ʼi te afiafi
[Talanoa ʼo te pasina 4]
Fakatahi Faka Tisitilike 2006 Te ʼu hola pea mo te ʼu kolo
Niu-Kaletonia
◼ ʼAho 15 ki te ʼaho 17 ʼo Sepetepeli 2006
Niumea: Fale Fakatahi ʼi Normandie.
◼ ʼAho 22 ki te ʼaho 26 ʼo Sepetepeli 2006
Niumea: Fale Fakatahi ʼi Normandie.
Uvea
◼ ʼAho 30 ʼo Sepetepeli ki te ʼaho 1 ʼo ʼOketopeli 2006 (ʼaho e lua)
Uvea: Fale ʼo Te Puleʼaga ʼo Malaʼe ʼi Hihifo.
Vanuatu
◼ ʼAho 1 ki te ʼaho 3 ʼo Sepetepeli 2006
Vila: Fale ʼo Te F.O.L. Vila.