Te Fakatahi Faka Tisitilike ʼa Te Kau Fakamoʼoni ʼa Sehova ʼo Te Taʼu 2002 “Te Kau Fai Faka Mafola Faiva ʼo Te Puleʼaga”
1 “Neʼe ʼau fiafia ʼi tanatou ʼui mai kia te ʼau: ‘Tou ʼolo ki te ʼapi ʼo Sehova.’ ” (Pes. 122:1) Kapau ʼe tou vakavakaʼi te ʼu palalau ʼa te tagata fai pesalemo, ʼe tou tokagaʼi ai (1) te meʼa ʼaē neʼe ina logoʼi ʼi tona fakaafe ʼaē ke kau ki te tauhi kia Sehova, (2) tana fakakaugā lelei, he neʼe ko te ʼu hahaʼi neʼe nātou leleiʼia moʼoni te tauhi moʼoni, pea (3) mo te fakatuʼutuʼu ʼaē neʼe tonu ke fai moʼo fai te fakaafe, mo fakatahitahi te hahaʼi, pea mo fai te folau ki te ʼapi ʼo te ʼAtua.
2 ʼE mole fakahā koa e te ʼu palalau ʼo te tagata fai pesalemo te ʼu meʼa ʼaē ʼe tou logoʼi, mokā fakahā mai te ʼu fakatuʼutuʼu ʼaē ʼe fai ki tatatou fakatahi? ʼE tou fakaʼamu ke hoko mai la te ʼaho ʼaia, heʼe tou manatuʼi te ʼu fakatahi fakafiafia ki muʼa atu, pea mo te ʼamanaki ʼaē ke tou toe kau ki he fakatahi makehe mo totatou ʼu tēhina mo tuagaʼane ʼaē ʼe ʼofainaʼi e Sehova. ʼI te taʼu ʼaenī, neʼe fakatuʼutuʼu ke fai te ʼu Fakatahi Faka Tisitilike ʼaho tolu ʼi Niu Kaletonia pea mo Vanuatu, ko tona kupu tāfito “Te Kau Fai Faka Mafola Faiva ʼo Te Puleʼaga.” Tou fakatuʼutuʼu atu ʼi te temi ʼaenī ke tou kau kiai, pea mo fakaʼaogaʼi te ʼu tapuakina fuli mai te meʼa kai fakalaumālie ʼaē ka foaki mai.
3 ʼI te taʼu ʼaenī, ko te Fakatahi Faka Tisitilike “Te Kau Fai Faka Mafola Faiva ʼo Te Puleʼaga” ʼe fai anai ʼi Vanuatu, ʼi Port-Vila ʼi te ʼaho 23 ki te ʼaho 25 ʼo ʼAukusito pea ʼi Niu-Kaletonia ʼi te fale fakatahi ʼo Normandie, ʼi te ʼaho 6 ki te ʼaho 8 ʼo Sepetepeli, pea mo te ʼaho 13 ki te ʼaho 15. ʼI te Feliaono pea mo te Moeaki, ʼe kamata anai te polokalama ʼo te uhu ʼi te hola 9 vaelua pea ʼosi ʼi te hola 5 afiafi pea ʼi te ʼAhotapu uhu ʼi te hola 9 vaelua ʼo aʼu ki te hola 4. Ko te hoki fakatuʼutuʼu ʼaē e te Sosiete ke fai he Fakatahi Faka Tisitilike ʼaho lua ʼi Uvea ʼi te ʼaho 5 pea mo te ʼaho 6 ʼo ʼOketopeli 2002. ʼAki te fakahā fakatomuʼa ʼaenī, koteā ʼaē ʼe feala ke tou fai takitokotahi ʼo ʼuhiga mo te fakatahi?
4 Koutou Fakatuʼutuʼu Ke Koutou Kau Ki Te ʼu ʼAho e Tolu: ʼE tonu koa ke koutou kole ki takotou patolo he ʼu ʼaho mālōlō, ke feala hakotou kau ki te ʼu ʼaho fuli ʼo takotou fakatahi? ʼE mahino kia Sehova ko ʼihi patolo ʼe nātou “faigataʼa.” (1 Pet. 2:18, MN ) Kae ko tatatou ʼu fakatahi ʼe maʼuhiga ʼaupito, pea ʼe tou fia faiga mālohi ke tou kau ki te polokalama katoa. Koutou faikole kia Sehova ʼo ʼuhiga mo te ʼu faʼahi ʼaia, pea koutou kumi tana takitaki ke ʼi ai hona ikuʼaga lelei.—Neh. 2:4.
5 Koutou Kau Ki Te Kau Gāue ʼo Te Fakatahi: Lolotoga te fakatahi, ko te toko teau kau gāue ʼe nātou tokoni ki te haʼele lelei ʼo te ʼu gāue kehekehe. ʼI te ʼaho ʼaia ʼe ʼi ai te ʼu tēhina moʼo hinoʼi te ʼu hekaʼaga ki te hahaʼi pea mo leʼoleʼo tatatou ʼu motokā ʼi te taulaga motokā. Ko te pilivilesio ʼo te Selevisi Fakamaʼa ʼe ko te tokaga ke tou taupau totatou ʼuhiga maʼa, ʼo fakamaʼa te fale ʼaē neʼe fai ai te tauhi ohage pe ko tona maʼa ʼi muʼa ʼo tatatou fakaʼaogaʼi. ʼE feala koa ke tou tokoni kia nātou ʼaia peʼe ko te tahi ʼu gāue? ʼE koutou “fakatahi” anai koa mo tokotou ʼu tēhina moʼo tokoni ki te ʼu gāue ʼaia?—Sofo. 3:9.
6 ʼOfa pe ke tatau tatatou aga mo te Hau ko Tavite, ʼaē neʼe fiafia fakatomuʼa ʼi te ʼalu ki te fale tauhi ʼo Sehova. Ko tatatou ʼu fakatahi faka tisitilike ʼe ko he ʼu lakaga maʼuhiga ke tou maʼu ai te meʼa kai fakalaumālie pea mo he faigamālie makehe ke tou feʼofaʼofani ai. Koia ʼaki he loto fiafia ʼe mātou fakaafe koutou ke koutou kamata fai he ʼu fakatuʼutuʼu ke koutou kau ki te polokalama katoa ʼo te ʼu ʼaho e tolu ʼo te Fakatahi Faka Tisitilike ʼo te taʼu ʼaenī, “Te Kau Fai Faka Mafola Faiva ʼo Te Puleʼaga.”