ʼE Koutou Fakaʼaogaʼi Koa Te Kaupepa Fakamaʼua Moʼo Kamata He ʼu Ako Tohi-Tapu?
1 Kua koutou mahino koa, ʼe koutou fai he ako Tohi-Tapu, mo kapau ʼe koutou fai tuʼumaʼu he ʼu fai palalau faka Tohi-Tapu nounou mo he tahi ʼe loto kiai, ʼo fakatafito te fai palalau ʼaia ki he tohi peʼe ko he kaupepa? Ei, ʼe ko he ako Tohi-Tapu ʼaia, tatau aipe peʼe fai te ako ʼaia ʼi te gutu matapā peʼe ʼi te telefoni. He koʼe koa ʼe mole tou faiga anai lolotoga te ʼu māhina ʼo Maio pea mo Sūnio ke tou kamata he ako feiā ʼaki te kaupepa Fakamaʼua?
2 Tou Teuteu Ke Fua Lelei: Ka koutou tufa te kaupepa Fakamaʼua, ʼe tonu ke koutou ʼiloʼi lelei te ʼu meʼa ʼaē ʼe koutou fia talanoa kiai. Kapau ʼe koutou fai he ʼaʼahi, koutou fakakaukauʼi te ʼu meʼa ʼaē neʼe koutou talanoa kiai ʼi takotou ʼuluaki ʼaʼahi. Koutou fai te fehuʼi ʼaenī: ‘ ʼI te kaupepa ʼaia, koteā te ʼu palakalafe ʼaē ʼe feala ke ʼau fakaʼaogaʼi moʼo fakaloloto te fai palalau ke iku ki he ako Tohi-Tapu?’ Kapau ʼe koutou faka mafola ʼi te ʼu ʼapi, koutou vakaʼi te ʼu faʼahi ʼaē ʼe fia talanoa kiai he tūpulaga, he tahi kua matuʼa, he tagata, peʼe ko he fafine. Koutou vakaʼi te ʼu kapite ʼo te kaupepa, pea mo filifili he puani ʼe fia palalau anai kiai he tahi. Kapau kua koutou ʼiloʼi te meʼa ʼaē ka koutou talanoa kiai, pea koutou vakaʼi liuliuga ke koutou ʼiloʼi lelei. Ko he faʼahiga fai ʼaia ke fua lelei tokotou minisitelio.
3 ʼI te pepa ʼaē ʼe ʼalutahi mo Te Minisitelio ʼo Te Puleʼaga ʼo Sanualio 2002, neʼe ʼi ai te alatike “He ʼu Manatu Moʼo Fakahā Te Kaupepa Fakamaʼua,” moʼona faʼifaʼitaki e valu. Ko te talanoa “Kole Fakahagatonu Age,” ʼe ina fakahā mai peʼe fakaʼaogaʼi feafeaʼi te kaupepa ʼaia moʼo kamata he ʼu ako. ʼE feala hakotou fakaʼaogaʼi te ʼuluaki faʼifaʼitaki, ʼo fetogi ʼaki te ʼu puani ʼaē ʼe koutou fia lagaʼi:
◼ “ ʼE ke ʼiloʼi koa, ʼi he ʼu kiʼi minuta pe, ʼe feala ke ke maʼu he tali ki he fehuʼi maʼuhiga ʼo te Tohi-Tapu? Ohage la, he koʼe ʼe lahi te ʼu lotu ʼe nātou ʼui ʼe ko he ʼu lotu faka Kilisitiano? ʼE ke fia ʼiloʼi koa te tali ki te fehuʼi ʼaia?” ʼI tana ʼosi tali atu, koutou fuli age te ako 13 pea mo koutou fai palalau ki te ʼu ʼuluaki palakalafe e lua. Kapau ʼe maʼu hona temi, koutou lau age he vaega e tahi peʼe lua pea mo fai palalau kiai. ʼOsi ʼaia, pea koutou lau age te fehuʼi fakaʼosi ʼo te ʼu fehuʼi ʼaē ʼe tuʼu ʼi ʼoluga, pea mo ʼui fēnei age: “Ko te hoko atu ʼo te kapite ʼaenī, ʼe ina fakahā mai te ʼu faʼahi e nima moʼo ʼiloʼi te lotu moʼoni. ʼE ʼau toe fia liliu mai ke ʼau vakaʼi mo koe te ʼu faʼahi ʼaia.”
4 Koutou Haga Fai: Koutou fakaʼaogaʼi te ʼu faigamālie fuli moʼo fakahā ki te hahaʼi peʼe hoko feafeaʼi he ako Tohi-Tapu ʼaki te kaupepa Fakamaʼua. Koutou kole kia Sehova ke tokoni atu kia koutou. (Mat. 21:22) Kapau ʼe koutou haga fai feiā, pea ʼe koutou fiafia anai, he neʼe koutou tokoni ki he tahi ke ina tali te logo lelei!