Ko Tatatou Tui ʼe Ina Uga Tatou Ke Tou Fai He ʼu Gāue Lelei
1 Ko te tui neʼe ina uga ia Noe, mo Moisese, pea mo Laape ke nātou fai he ʼu gāue. Neʼe faʼu e Noe te aleka. Neʼe fakafisi ia Moisese ki te ʼu lelei faka temi ʼo te fale hau ʼo Falaone. Neʼe fakanono e Laape te ʼu malomu, pea neʼe fakalogo ki tanā ʼu fakatotonu, ʼo ina hāofaki ai tona famili. (Hep. 11:7, 24-26, 31) Koteā te ʼu gāue lelei ʼaē ʼe uga tatou e tatatou tui ke tou fai ia ʼaho nei?
2 Te Fagonogono: Ko te tui ʼe ina uga tatou ke tou palalau ʼo ʼuhiga mo totatou ʼAtua fakatalakitupua, pea mo tana ʼu fakatuʼutuʼu ke tou maʼu te fiafia heʼegata. (2 Ko. 4:13) ʼI ʼihi temi ʼe lagi tou tuʼania ʼi te fagonogono ki te hahaʼi. Kae kapau ʼe tou ‘tuku tuʼumaʼu ia Sehova ki ʼotatou muʼa,’ pea ʼe tou lotomālohi ai pea mo loto falala. (Pes. 16:8) Pea ʼe uga tatou e tatatou tui ke tou tala te logo lelei ʼi te ʼu temi faigamālie fuli pe, ki totatou ʼu kāiga, ki te ʼu vāhaʼa fale, ki te ʼu kaugā gāue, ki te ʼu kaugā ako, pea mo ʼihi atu hahaʼi.—Loma 1:14-16.
3 Tou ʼOlo ʼo Fono: Ko te ʼolo tuʼumaʼu ki te ʼu fono, ʼe ko he tahi gāue lelei ʼaia ʼa te tui. Koteā tona tupuʼaga? Koteʼuhi kapau ʼe tou ʼolo ki te ʼu fono, pea ʼe tou fakahā ai ʼe tou faka tui ko Sesu ʼe nofo mo tatou, ʼaki te laumālie maʼoniʼoni ʼa te ʼAtua. (Mat. 18:20) ʼE tou fakahā ai ʼe tou fia “logo ki te meʼa ʼaē ʼe ʼui e te laumālie ki te ʼu kokelekasio.” (Apk. 3:6, MN ) ʼE tou fakalogo lelei ki te ʼu akonaki ʼaē ʼe fai ai, koteʼuhi ʼaki tatatou tui ʼe tou mahino ai ʼe akoʼi tatou e tatatou Faiako Lahi, ia Sehova.—Isa. 30:20.
4 Te ʼu Meʼa ʼAē ʼe Tou Filifili: Ko tatatou tui mālohi ki te ʼu moʼoni ʼaē ʼe mole tou sio kiai, ʼe ina uga tatou ke tou fakamuʼamuʼa te ʼu meʼa fakalaumālie. (Hep. 11:1) ʼE lagi tonu ke tou fai he ʼu sakilifisio ʼi te faʼahi ʼo te ʼu koloā. Ohage la, ko he tagata ʼāfea ʼe fakafisi anai ki he gāue ʼe ina hikihiki anai tona tuʼulaga peʼe ko tona totogi, koteʼuhi ʼe mole toe kau anai ki ʼihi fono, mo mamaʼo ʼi tona famili, pea mo ina tuku tana gāue pionie. ʼO toe feiā mo tatou, tou falala katoa ki te fakapapau mai ʼa te Tohi-Tapu, ko Sehova ʼe tokoni anai kia nātou ʼaē ʼe nātou “haga kumi muʼa te puleʼaga pea mo tona faitotonu.”—Mat. 6:33, MN.
5 ʼE tokagaʼi e te hahaʼi te mālohi ʼa te tui ʼi totatou maʼuli. Ei, ʼi te malamanei katoa, kua sio te hahaʼi ki tatatou tui. (Loma 1:8) Koia, ʼofa pe kia tatou fuli ke tou fakahā ʼe maʼuli tatatou tui, ʼo tou fai he ʼu gāue lelei.—Skp. 2:26.