ʼE Lava Feafeaʼi Ki He ʼu Famili Ke Mālolohi ʼi Te Faʼahi Fakalaumālie?
1 ʼE tokoni ki te ʼu famili Kilisitiano ke nātou ‘maʼuliʼi te aga faka lotu ʼi tonatou loto fale.’ (1 Tim. 5:4) Kae ʼe lahi ʼaupito te ʼu fakaneke kovi ʼi te temi nei ʼe feala ke nātou fakavaivai tatatou tui, koia ʼe maʼuhiga ai ke faiga mālohi te ʼu famili ke nātou nonofo mālolohi ʼi te faʼahi fakalaumālie. ʼE lava fakahoko feafeaʼi te faʼahi ʼaia?
2 Faʼifaʼitaki Te ʼUhiga Pule ʼo Kilisito: ʼE tonu ke faʼifaʼitaki e te ʼu pule famili ia Sesu Kilisito ʼi tanatou fakahoko tonatou maʼua ʼaē ke fakaloto mālohiʼi tonatou loto fale. Neʼe mole fakahā tuʼa tahi pe e Sesu tana ʼofa kia tatou ʼi tana mate faka sakilifisio, kae neʼe haga hoko atu tana “fafaga mo fakapelepeleʼi” te kokelekasio. (Ef. 5:25-29) ʼE mulimuli te ʼu mātuʼa ʼofa ki te faʼifaʼitaki ʼofa ʼaia, ʼo nātou tokakaga ʼi te ʼaho fuli ki te ʼu meʼa ʼaē ʼe ʼaoga ki tonatou famili ʼi te faʼahi fakalaumālie. ʼE kau kiai te fai ʼo he ako Tohi-Tapu faka famili ʼi te vāhaʼa fuli, mo te fai palalau ki he ʼu manatu fakalaumālie ʼi te temi fuli pe ʼaē ʼe feala ai, pea mo te fakatokatoka ʼo te ʼu fihifihia neʼe hoko.—Teu. 6:6, 7.
3 ʼI Te Fai Faka Mafola: ʼE tonu ke mahino ki te famili ko te faka mafola ki te hahaʼi ʼo ʼuhiga mo Sehova pea mo tana ʼu fakatuʼutuʼu, ʼe ko he faʼahi maʼuhiga ʼaia ʼo tanatou tauhi. (Isa. 43:10-12) Kapau ʼe koutou loto ʼu mātuʼa ke liliu takotou ʼu fānau ko he kau Fakamoʼoni ʼa Sehova agatonu, pea ʼe tonu ke koutou kamata tautonu te teuteuʼi ʼo tonatou loto ki te minisitelio. Koutou fai palalau ʼo ʼuhiga mo te ʼu tupuʼaga ke maʼu he loto faka sakilifisio ʼi te selevisi, pea mo kau kiai ʼi te vāhaʼa fuli. (Mat. 22:37-39) Pea koutou fai he ʼu fakatuʼutuʼu mo nātou ke koutou kau fakatahi tuʼumaʼu ʼi te faka mafola.
4 Kapau ʼe tou loto ke maʼuhiga ki te famili te fai faka mafola, pea ʼe tonu ke toʼo he temi ʼi te ako faka famili ʼi te vāhaʼa, moʼo teuteu pea mo fai liuliuga te fakahā ʼo te tufa peʼe ko te ʼu nusipepa. Koutou akoʼi takotou ʼu fānau takitokotahi ki te fai faka mafola, ʼo tokoni kia nātou ke nātou tuputupu ʼo mulimuli ki tonatou taʼu pea mo te ʼu meʼa ʼe nātou lavaʼi. Hili takotou fai faka mafola fakatahi, koutou fai palalau mo nātou pe neʼe feafeaʼi tanatou sio tonu ki te agalelei ʼa Sehova. Koutou fakamatala he ʼu hisitolia ʼe ina fakaloto mālohiʼi ai tanatou tui. Kapau ʼe faiga te ʼu famili ke lahi tanatou “ahiahi te lelei o te Aliki,” pea ʼe tuputupu anai tanatou felogoi lelei mo Sehova, ʼo nātou mālolohi moʼo tauʼi “te agakovi fuape.”—1 Pet. 2:1-3.
5 ʼI Te ʼu Fono: ʼE ko he meʼa lelei mokā fetokoniʼaki te famili ke nātou kau ki te ʼu fono fuli, tāfito la mo kapau ko he tahi ia nātou ʼe gaʼegaʼe, peʼe lotovaivai, peʼe lotohoha. Neʼe ʼui fēnei e te tuagaʼane kei finemui: “Ka haʼu taku tāmai ki fale ʼi tana ʼosi gāue, kua gaʼegaʼe. Kae ʼe ʼau vaevae mo ia he puani lelei ka palalau anai kiai te fono ʼo te afiafi, pea ʼe fakaloto mālohi ai ia ia ke haʼu. Pea ka ʼau gaʼegaʼe, ʼe ko ia ʼaē ʼe ina fakaloto mālohiʼi ʼau ke ʼau ʼalu ʼo fono.”—Hep. 10:24, 25.
6 Koutou Gāue Fakatahi: ʼE tonu ke fai fakatahi e te ʼu famili he ʼu gāue, ohage ko te ʼu gāue ʼo te loto fale. ʼE tonu ke toe fakaʼaogaʼi he temi ki he ʼu fakafiafia lelei. Ko te kai ʼi tuʼa, mo te haʼele, mo te fai ʼo he ʼu gaoʼi, pea mo te folau moʼo ʼaʼahi he ʼu kāiga peʼe ko he ʼu kaumeʼa, ʼe ko he ʼu lakaga fakafiafia ʼaia pea mo he ʼu suvenia lelei.—Tnk. 3:4.
7 Ko te ʼu famili mālolohi ʼe nātou tauʼi te ʼu ʼaluʼaga ʼaē ʼe feala ke fua kovi kia nātou ʼi te faʼahi fakalaumālie. Kapau ʼe nātou fakaōvi lelei kia Sehova, pea ʼe nātou maʼu ai te mālohi ʼaē ʼe ina foaki.—Ef. 6:10.