ʼE Logo Tahi Te ʼu Famili Kaugamālie ʼi Te Tauhi Ki Te ʼAtua

Neʼe tohi fēnei e te tagata fai pesalemo: “Ko te ʼu foha ʼe ko he tofiʼa mai ia sehova; ko te fua ʼo te fatu ʼe ko he fakapale. Ohage ko he ʼu kauʼi nahau ʼi te nima ʼo he tagata mālohi, ʼe toe feiā mo te ʼu foha ʼo te temi tūpulaga. Manuʼia te tagata mālohi ʼaē neʼe ina fakafonu ʼaki tana ʼaiʼaga nahau.”​—Pesalemo 127:​3-5.

ʼE MOʼONI, ko te fānau ʼe feala ke liliu ko he tapuakina mai ia Sehova. Pea ohage pe ko te fiafia ʼa he tagata fana nahau heʼe ina ʼiloʼi te faʼahi ʼaē ke ina fakahaga kiai tana ʼu kauʼi nahau ʼaē ʼe ʼi tana ʼaiʼaga nahau, ʼe toe fiafia feiā mo te ʼu mātuʼa ʼi tanatou takitaki tanatou fānau ʼi te ala ʼaē ʼe ina taki ki te maʼuli heʼegata.​—Mateo 7:​14.

Kua fualoa kiai, neʼe ko he meʼa māhani ʼi te ʼu famili ʼo te hahaʼi ʼo te ʼAtua ke nātou ‘fakafonu tanatou ʼu ʼaiʼaga nahau’ ʼaki he ʼu fānau kaugamālie. Ohage la, ʼi te ʼu taʼu ʼaē neʼe nātou ʼaunofo ai ʼi Esipito, ʼe ʼui fēnei: “Neʼe fanaunau te ʼu foha ʼo Iselaele pea mo nātou kamata kaugamālie; pea ʼi hona ʼaluʼaga fakaofoofo neʼe nātou tuputupu pea mo ʼāsili mālolohi, ʼo nātou fakafonu ai te fenua.” (Ekesote 1:⁠7) Ka tou fakatatau te kaugamālie ʼo te kau Iselaelite ʼaē neʼe hū ki Esipito mo te kaugamālie ʼo nātou ʼaē neʼe mavae mai ai, ʼe tou fakatokagaʼi ai neʼe lahi te ʼu famili ʼaē neʼe teitei ke toko hogofulu ʼanatou fānau!

Ki muli age, neʼe lahilahi ake Sesu ʼi he famili ʼe lagi kaugamālie kia mata ʼo te tokolahi ia ʼaho nei. Neʼe ko Sesu te ʼuluaki, kae neʼe maʼu e Sosefo mo Malia te tahi ʼu toe tagata e toko fā pea mo tanā ʼu taʼahine. (Mateo 13:​54-​56) ʼAki te kaugamālie ʼaia ʼo tanā fānau kua tou mahino ai pe koʼe neʼe mole tokagaʼi e Malia pea mo Sosefo te puli ʼa Sesu ʼi te hahaʼi ʼaē neʼe nātou liliu fakatahi ki Selusalemi.​—Luka 2:​42-​46.

Te ʼu Famili Kaugamālie Ia ʼAho Nei

Ia ʼaho nei, ko te tokolahi ʼo te kau Kilisitiano ʼe mole nātou loto ke lahi fau tanatou fānau, ʼuhi ko te ʼu fihifihia ʼi te faʼahi fakalaumālie, faka ekonomika, faka sosiale, peʼe ko he tahi ʼu fihifihia. Kae ʼe lahi te ʼu sosiete, ʼe kei lahi ai te ʼu famili ʼaē ʼe kaugamālie ʼanatou fānau. Ohage ko tona ʼui ʼi te tohi The State of the World’s Chil­dren 1997, ko te koga meʼa ʼaē ʼe lahi tokotahi ai te fanaunau ʼa te hahaʼi fafine ʼe ko te Potu Toga ʼo Afelika. ʼI te ʼu fenua ʼaia, ko he meʼa māhani ki te hahaʼi fafine ke nātou maʼu ʼanatou ʼu toe ʼe toko ono.

Maʼa te ʼu mātuʼa Kilisitiano ʼaē ʼe kaugamālie tanatou fānau, ʼe mole faigafua tanatou taupau tanatou fānau ke nātou lalahi ake ʼo ʼofa kia Sehova, kae tokolahi ia nātou ʼaia neʼe nātou lavaʼi. ʼE tonu ke logo tahi te famili ʼi te tauhi maʼa, mo kapau ʼe nātou loto ke lava lelei te faʼahi ʼaia. Ko te ʼu palalau ʼaē neʼe fai e te ʼapositolo ko Paulo ki te kokelekasio ʼo Kolonito, ʼe toe maʼuhiga ki te ʼu famili Kilisitiano ia ʼaho nei. Neʼe ina tohi fēnei: “E au kole atu kia koutou, u tehina . . . ke koutou mau fuli he lea e tahipe, naʼa i ai he u mavetevete ia koutou, pea koutou fautahi i te manatu mo te fakakaukau.” (1 Kolonito 1:​10, Tauhi Foou) ʼE lava hoko feafeaʼi te logo tahi ʼaia?

ʼE Tonu Ke Leleiʼia e Te ʼu Mātuʼa Te ʼu Meʼa Fakalaumālie

ʼE maʼuhiga ki te ʼu mātuʼa ke nātou tauhi ʼaki tonatou loto katoa ki te ʼAtua. Koutou fakatokagaʼi te meʼa ʼaē neʼe ʼui e Moisese ki te kau Iselaelite: “Fakalogo mai, e Iselaele: Ko Sehova totatou ʼAtua, ʼe ko te ʼAtua pe e tahi. Pea ʼe maʼua ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou mālohi maʼuli katoa. Pea ko te ʼu folafola ʼaenī ʼaē ʼe ʼau fakatotonu atu kia te koe ʼi te ʼaho nei, ʼe tonu anai ke nofo ʼi tou loto; pea ʼe tonu anai ke ke akoʼi ki tou foha pea mo ke talanoa kiai mokā ke heka anai ʼi tou loto fale, mokā ke haʼele anai ʼi te ala, mokā ke takoto anai pea mokā ke tuʼu ake anai.”​—Teutalonome 6:​4-7.

Koutou fakatokagaʼi, neʼe fakahā lelei e Moisese ko te ʼu fakatotonu ʼa te ʼAtua neʼe tonu ke nofo ‘ ʼi te loto’ ʼo te ʼu mātuʼa. ʼE ko te meʼa pe ʼaia e tahi ʼaē ka ina uga anai te ʼu mātuʼa ke nātou akoʼi tanatou fānau ʼi te faʼahi fakalaumālie. ʼI tona fakahagatonu, kapau ʼe mālohi te ʼu mātuʼa ʼi te faʼahi fakalaumālie, pea ʼe nātou fia ako moʼoni anai ki tanatou fānau te ʼu meʼa fakalaumālie.

Kapau ʼe tou fia leleiʼia te ʼu meʼa fakalaumālie pea mo ʼofa kia Sehova ʼaki totatou loto katoa, pea ʼe maʼuhiga ke tou lau te Folafola ʼa te ʼAtua, mo metitasioʼi, pea mo maʼuliʼi tuʼumaʼu. Neʼe tohi e te tagata fai pesalemo, ko te tagata ʼaē ʼe ina leleiʼia te lao ʼa Sehova pea mo ina lau “ ʼi te ʼaho mo te po” ʼe “liliu anai ko he fuʼu ʼakau neʼe to ōvi ki te vaitafe, ʼaē ʼe fua ʼi tona temi totonu pea mole fefe tona ʼu lau, pea ko meʼa fuli ʼaē ʼe ina fai, ʼe lava lelei anai.”​—Pesalemo 1:​2, 3.

Ohage pe ko te maʼuli lelei ʼa he fuʼu ʼakau mo kapau ʼe fakavai tuʼumaʼu, ʼo toe feiā pe, ko te ʼu famili ʼaē ʼe nātou kakai ʼi te faʼahi fakalaumālie, ʼe nātou maʼu anai he ʼu fua lelei, ʼo vikiʼi ai Sehova. ʼE feiā te famili ʼo Uwadiegwu, ʼe nonofo ʼi te Potu Hahake ʼo Afelika. Logope la ko fānau e toko valu ʼo Uwadiegwu mo tona ʼohoana, kae ʼe nā pionie katoa toko lua, peʼe ko he ʼu Fakamoʼoni ʼa Sehova ʼe fai faka mafola ʼi te temi katoa. ʼE ina ʼui fēnei: “Neʼe mātou fai tuʼumaʼu tamatou ako faka famili ʼo te Tohi-Tapu talu mai taʼu e 20 tupu. Neʼe ma akoʼi ki tamā fānau te Folafola ʼa te ʼAtua talu mai tanatou kei liliki, mole gata pe ʼi tamatou ako faka famili kae ʼi tamatou fai faka mafola pea ʼi te tahi ʼu lakaga. Ko tamā ʼu fānau fuli ko te ʼu kaugā fagona ʼo te logo lelei ʼo te Puleʼaga, pea ʼe gata pe ki te toe fafine muli, ʼaē ʼe taʼu ono, ʼe mole heʼeki papitema.”

Koutou Gāue Ohage Ko He Foʼi Tau

ʼE ʼui fēnei e te Tohi-Tapu: “ ʼE mālohi anai he loto fale ʼaki te poto.” (Tāʼaga Lea 24:⁠3) Kapau ʼe maʼu te poto ʼaia ʼi he loto fale pea ʼe nātou gāue anai ohage ko he foʼi tau. Ko te tāmai ʼe ko te “kapiteni” ʼo te famili; ko ia ʼaē neʼe fakatuʼutuʼu e te ʼAtua ke pule ʼi te loto fale. (1 Kolonito 11:⁠3) Neʼe fakahā lelei e te ʼapositolo ko Paulo, ʼe maʼuhiga te maʼua ʼo te pule, ʼo ina tohi fēnei: “Kapau e i ai he tahi e mole tokaga ki ona kaiga, tafito natou o tona lotofale, kua fakafisi ki te tui, pe e koviʼage ia i he tagata pagani.”​—1 Timoteo 5:⁠8, Tauhi Foou.

ʼO mulimuli ki te tokoni ʼaia ʼe haʼu mai te Folafola ʼa te ʼAtua, ʼe tonu ke tokaga te ʼu tagata ʼohoana Kilisitiano ki te ʼaluʼaga fakalaumālie ʼo tonatou ʼohoana. Kapau ʼe mamafa fau ki te fafine tana ʼu gāue ʼi te loto fale, pea ʼe fua kovi anai ki tona maʼuli fakalaumālie. ʼI te tahi fenua ʼo Afelika, ko te tagata ʼohoana Kilisitiano neʼe hoki papitema neʼe meo ki te kau tagata ʼāfea ʼo tana kokelekasio, he neʼe hage neʼe meʼa noaʼi e tona ʼohoana te ʼu meʼa fakalaumālie. Neʼe ʼui age e te kau tagata ʼāfea ke tokoni te tēhina ʼaia ki tona ʼohoana. Koia, neʼe kamata tokoni te tagata ʼaia ki te fai ʼo te ʼu gāue ʼo te loto fale. Neʼe ina toe fakaʼaogaʼi tona temi moʼo tokoni ki tona ʼohoana ke hikihiki tana lautohi pea mo tana mahino ki te Tohi-Tapu. Neʼe tali lelei e tona ʼohoana, pea ʼi te temi nei kua logo tahi te famili katoa ʼi te tauhi ki te ʼAtua.

ʼE toe maʼua foki ke tokaga te ʼu tāmai ki te maʼuli fakalaumālie ʼo tanatou fānau. Neʼe tohi fēnei e Paulo: “Pea u tamai, aua tautou fakatupu ita ki autou fanau, kae koutou fakaʼako natou ki te fakalogo mo te u fakatokaga i te malama o te Aliki.” (Efesi 6:⁠4, Tauhi Foou) Kapau ʼe mulimuli te ʼu mātuʼa ki te tokoni ʼaē ke mole nātou fakatupu ʼita ki tanatou fānau, pea mo te fakatotonu ʼaē ke nātou akoʼi nātou, pea ʼe logoʼi anai e te ʼu fānau ʼe nātou gāue faka famili. ʼE feala anai ke hoko ai te fetokoniʼaki pea mo te fefakaloto mālohiʼaki ʼo te ʼu fānau moʼo fakahoko he ʼu fakatuʼutuʼu fakalaumālie.

Ko te ʼuhiga ʼo te gāue faka famili ohage he foʼi tau, ko te foaki ki te fānau he ʼu maʼua ʼi te faʼahi fakalaumālie, mokā feala ke nātou fai. Ko te tāmai, ʼe tagata ʼāfea pea ko ʼana ʼu fānau e toko 11, ʼe ʼala uhuuhu pea mo ina fai te ʼu ako ʼo ʼihi ʼo tana fānau ʼi muʼa ʼo tana ʼalu ʼo gāue. Ko nātou lalahi, ʼi tanatou ʼosi papitema, neʼe nātou fefetogiʼaki moʼo tokoni ki tonatou ʼu tokolua pea mo tuagaʼane veliveli, ʼo nātou akoʼi kia nātou te Tohi-Tapu. ʼE takitaki nātou e tanatou tāmai pea ʼe ina fakamālo ki tanatou ʼu faiga ʼaia. Ko te toko ono kua papitema, pea ʼe faiga te tahi ʼu toe ke nātou aʼu ki te faʼahi ʼaia.

Koutou Felogoi, ʼo Fai He ʼu Fakatuʼutuʼu

Ke logo tahi te ʼu famili ʼe maʼuhiga ke nātou felogoi ʼi te ʼofa pea mo nātou fai he ʼu fakatuʼutuʼu ʼi te faʼahi fakalaumālie. Ko Gordon, ko te tagata ʼāfea ʼe nofo ʼi Niselia, pea ko ʼana fānau e toko fitu, ko te muli ʼe taʼu 11, ko te ʼuluaki ʼe taʼu 27. Ko te toko ono ʼe nātou pionie, ohage ko te ʼu mātuʼa. Ko te tama muli, ʼaē neʼe hoki papitema, ʼe tautau kau fakatahi mo te toe ʼo te famili ki te gāue ʼaē ko te fai ʼo he ʼu tisipulo. Ko te ʼu tama lalahi e lua ʼe ko te ʼu tagata faifekau faka minisitelio ʼi te kokelekasio.

Neʼe fai e Gordon te ako Tohi-Tapu ʼo tana ʼu fānau takitokotahi. Pea ʼe katoa tanatou polokalama ako faka famili ʼo te Tohi-Tapu. ʼI te uhu fuli, ʼe nātou fakatahi moʼo vakaʼi te koga tohi ʼo te ʼaho pea mo nātou teuteu te ʼu fono ʼo te kokelekasio.

Ko te tahi fakatuʼutuʼu neʼe fai e te famili katoa, ʼe ko te lau ʼo te ʼu alatike fuli ʼo Te Tule Leʼo pea mo te Réveillez-vous! Mole heʼeki faʼa fualoa, neʼe nātou toe hilifaki ki tanatou polokalama te lau ʼo te Tohi-Tapu ʼi te ʼaho fuli. Ka nātou fai palalau ki te ʼu meʼa ʼaē neʼe nātou lau, pea ʼe fefakaloto mālohiʼaki te famili katoa ke nātou haga fai te ʼu meʼa ʼaia ʼaē kua nātou fai māhani.

Mai tona ʼaluʼaga ʼaē kua fakatuʼu lelei te ako faka famili ʼi te vāhaʼa fuli, koia ʼe mole kei ʼaoga hona fakamanatuʼi ki he tahi​—pea ʼe nātou atalitali fuli ki te ʼaho ʼaē ka fai ai te ako. ʼAki te temi, neʼe fetogi te ʼu tohi ʼaē neʼe ako, mo te fakatuʼutuʼu ʼo te ako faka famili, pea mo tona loaloaga, ʼo mulimuli ki te taʼu pea mo te ʼu meʼa ʼaē neʼe ʼaoga ki te fānau. Neʼe feʼofani lelei te famili ʼaia mo ʼihi kau kaugana agatonu ʼa te ʼAtua, pea neʼe fua lelei te faʼahi ʼaia ki te fānau.

ʼE fai fakatahi e te famili ʼaia ia meʼa fuli pea ʼe ʼi ai tonatou ʼu temi mālōlō. Tuʼa tahi ʼi te vāhaʼa ʼe nātou fai tanatou kiʼi “fakafiafia faka famili,” ʼe fai ai te ʼu kiʼi gaoʼi ʼaoga, mo te ʼu meʼa fakakata, mo nātou tā piano, mo fai te ʼu fakamatala, pea mo nātou fakafiafia fuli. ʼI ʼihi temi, ʼe nātou ʼolo ʼo maʼanu tai peʼe nātou ʼolo ki he tahi ʼu koga meʼa.

Koutou Falala Kia Sehova

ʼI te ʼu famili ʼaia, neʼe mole he tahi neʼe ina ʼui ʼe faigafua te taupau ʼo he famili kaugamālie. Neʼe ʼui fēnei e te tēhina: “ ʼE ko he meʼa faigataʼa ʼaupito ki he tāmai ʼo he toko valu ke ina fakahoko fakalelei tona ʼu maʼua. ʼE lahi te meʼa kai fakasino pea mo fakalaumālie ʼaē ʼe tonu ke ʼau foaki kia nātou; ʼe tonu ke ʼau gāue kinakina ke ʼau maʼu haku falā ʼe feʼauga moʼo foaki te ʼu meʼa ʼaē ʼe ʼaoga kia nātou. Kua aʼu te ʼu toe lalahi ki tonatou temi tūpulaga pea ʼe kei ako fuli taku ʼu toe ʼaia ʼe toko valu. E ʼau ʼiloʼi ʼe maʼuhiga te ako fakalaumālie kia nātou, kae ko ʼihi ia nātou ʼe ʼuigataʼa pea ʼe mole fia fakalogo. ʼE nātou fakaloto mamahi ʼau, kae ʼe ʼau ʼiloʼi ʼe ʼau fai ʼi ʼihi temi he ʼu meʼa ʼe mamahi ai te loto ʼo Sehova, pea ʼe ina fakamolemole mai. Koia ʼe tonu ke ʼau kātaki ʼo hoko atu te fakatonutonuʼi ʼo taku fānau ʼo aʼu ki tanatou mahino.

“ ʼE ʼau faiga ke ʼau mulimuli ki te faʼifaʼitaki ʼo Sehova, heʼe faʼa kātaki mo tatou heʼe loto ke aʼu te hahaʼi fuli ki te fakahemala. ʼE ʼau fai tamatou ako faka famili, pea ʼe faiga ʼihi fānau ke nātou aʼu ki te papitema. ʼE mole ʼau falala ki toku mālohi ʼo ʼoku ke ʼau maʼu he ʼu fua; ʼe mole lahi te ʼu meʼa ʼaē ʼe feala ke ʼau fai ʼaki toku mālohi. ʼE ʼau faiga ke ʼau fakaōvi kia Sehova ʼi te faikole pea mo maʼuliʼi te tāʼaga lea ʼaē ʼe ina ʼui fēnei: ‘Tuku tau falala kia Sehova ʼaki tou loto katoa pea ʼaua naʼa ke falala ki tou ʼatamai ʼo koe totonu. ʼI tou ʼu ala fuli tokagaʼi ia ia, pea ko ia, ʼe ina fakamatatonu anai tou ʼu ala foufou.’ ʼE tokoni mai anai Sehova ke ʼau fakahoko te akoʼi ʼo taku ʼu fānau.”​—Tāʼaga Lea 3:​5, 6.

ʼAua Naʼa Koutou Fiu!

ʼI ʼihi temi, ko te taupau ʼo te ʼu fānau ʼe lagi hage ko he gāue ʼe mole nātou leleiʼia, kae ʼaua naʼa koutou fiu! Koutou kātaki! Kapau ʼe mole tali lelei peʼe mole loto fakafetaʼi takotou fānau ki takotou ʼu faiga ʼi te temi nei, pea ʼe lagi nātou leleiʼia anai ki muli age. ʼE ʼaoga he temi loaloaga ki he tamasiʼi ke lahilahi ake ʼo liliu ko he Kilisitiano ʼe ina maʼu te fua ʼo te laumālie.​—Kalate 5:​22, 23.

Ko Monica, ʼaē ʼe nofo ʼi Kenia, ʼe kau ʼi te fānau e toko hogofulu. ʼE ina ʼui fēnei: “Neʼe akoʼi mai kia mātou e tamatou ʼu mātuʼa te Tohi-Tapu talu mai tamatou kei liliki. Neʼe mātou ako mo taku tāmai te ʼu tohi faka Kilisitiano ʼi te ʼu vāhaʼa fuli. ʼUhi ko tana gāue, neʼe fetogi tuʼumaʼu te ʼaho ʼaē neʼe fai ai tamatou ako. ʼI ʼihi temi, ʼi tana toe liliu mai ki fale ʼi tana ʼosi gāue, neʼe sio ki tamatou gaoʼi ʼi tuʼa pea ina ʼui mai ʼe tonu ke mātou ʼolo age fuli fakavilivili ki fale heʼe fai tamatou ako Tohi-Tapu. Hili tamatou ako Tohi-Tapu, neʼe ina fakaloto mālohiʼi mātou ke mātou fai he ʼu fehuʼi peʼe ke mātou fakahā age he ʼu fihifihia.

“Neʼe ina vakavakaʼi peʼe mātou fakakaumeʼa mo he ʼu fānau ʼo te moʼoni. Neʼe tau ʼalu taku tāmai ki te kau faiako moʼo fehuʼi age kia nātou peʼe feafeaʼi tamatou aga. ʼI tana tahi ʼaʼahi, neʼe fakahā age kia ia ko toku ʼu tokolua lalahi e toko tolu neʼe nātou fuhu mo te tahi ʼu tama pea ʼi ʼihi temi neʼe nātou agakovi. Neʼe fakatūʼa nātou e taku tāmai he neʼe kovi tanatou aga, kae neʼe ina toe fakaʼaogaʼi foki he temi moʼo fakamahino kia nātou ʼaki te Tohi-Tapu pe koʼe ʼe maʼuhiga ke nātou maʼu te aga ʼaē ʼe hā ai tanatou pipiki ki te ʼAtua.

“Neʼe fakahā mai e tamatou ʼu mātuʼa te ʼu fua lelei ʼo te kau ki te ʼu fono, he neʼe mātou teuteuʼi fakatahi te ʼu fono. Neʼe nā akoʼi mātou ke mātou liliu ko he ʼu kaugā fagona, he neʼe mātou fai he ʼu faʼifaʼitaki ʼi fale. Talu mai tamatou kei liliki, neʼe mātou fakatahi mo tamatou ʼu mātuʼa ʼi te gāue fai faka mafola.

“ ʼI te temi nei, ko toku ʼu tokolua lalahi e lua kua liliu ʼo pionie makehe, pea ko toku tahi tēhina veliveli ʼe pionie katoa, pea ko toku tahi tēhina lahi kua ʼohoana pea kua maʼu fānau, pea ʼe ko he Fakamoʼoni faiva. Ko toku ʼu tēhina veliveli e toko lua, ʼe nā taʼu 18 mo 16, ʼe ko he ʼu kaugā fai faka mafola kua papitema. Ko te ʼu tama muli e lua, ʼe nā akoako ki te faʼahi ʼaia. Neʼe ʼau gāue ʼi te filiale ʼo te kau Fakamoʼoni ʼa Sehova ʼi Kenia ia taʼu e tolu. ʼE ʼau ʼofa pea mo ʼau leleiʼia taku ʼu mātuʼa, heʼe ko he ʼu hahaʼi ʼe nā leleiʼia te ʼu meʼa fakalaumālie; neʼe nā tuku mai kia mātou he faʼifaʼitaki lelei.”

Tatau aipe peʼe kaugamālie takotou ʼu fānau, kae koutou haga tokoni kia nātou ke nātou haʼele ʼi te ala ʼaē ʼe ina taki ki te maʼuli heʼegata. ʼE tapuakina e Sehova takotou ʼu faiga, ʼo uga ai anai koutou ke koutou fai te ʼu palalau ʼa te ʼapositolo ko Soane ʼo ʼuhiga mo tana ʼu fānau fakalaumālie: “E mole lahiʼage toku fiafia ki niʼihiʼage mea i te mea aeni, i taku logo e mauli aku fanau i te mo­oni.”​—3 Soane 4, Tauhi Foou.