ʼE Feala Koa Ke Koutou Kamata He Ako Tohi-Tapu?
1 ʼE ʼi ai koa hakotou ako Tohi-Tapu? Kapau ʼe mole ʼi ai, pea ʼe koutou loto koa ke koutou fai he ako Tohi-Tapu? Neʼe fakahā mai e Sesu, ʼo hilifaki ki tatatou ʼolo ʼo fai faka mafola ki te hahaʼi, ʼe toe maʼua foki ke tou tokoni ki te hahaʼi ʼaē ʼe nātou fia logo, ke feala hanatou tuputupu ʼi te faʼahi fakalaumālie. (Soane 4:39-42) Kae ʼe hā mai ʼi te ʼu kiʼi pepa tānaki gāue, ʼe tokolahi te kau fai faka mafola neʼe mole heʼeki nātou maʼu te pilivilesio ʼaē ke nātou fai he ako Tohi-Tapu. Pea ko ʼihi ʼaē neʼe nātou fai te faʼahi ʼaia ʼi muʼa atu, ʼe mole kei ʼi ai hanatou ako Tohi-Tapu ʼi te temi nei.
2 Kapau ʼe tou teuteuʼi pea mo fai tuʼumaʼu he ako Tohi-Tapu, pea ʼe tapuakiʼi anai e Sehova tatatou ʼu faiga. Koutou fai palalau mo nātou ʼi te kokelekasio ʼaē ʼe nātou fai he ʼu ako Tohi-Tapu ʼe fua lelei, pea ʼe nātou fia fakamatala atu anai te fiafia ʼaē ʼe nātou maʼu ai.
3 Ko te kaupepa “Fakamaʼua” ʼe ko he tokoni lelei ʼaia moʼo kamata ʼaki he ʼu ako Tohi-Tapu. ʼE feala ke tou ʼuluaki vakaʼi te ʼu akonaki tāfito ʼo te Tohi-Tapu ʼo tou ako katoa te kaupepa ʼaia. ʼOsi ʼaia, pea ʼe feala ke tou fakaafe ia ia ʼaē ʼe ako ke ina ako te tohi Te ʼAtamai Mālama ohage ko tona ʼui e te kaupepa.
4 E Feafeaʼi Te Kamata ʼo He Ako Tohi-Tapu: Kapau ʼe ʼi ai he tahi ʼe ina fia ʼiloʼi moʼoni te ʼu meʼa ʼaē ʼe talanoa kiai te kaupepa, pea ʼe mole maʼua ke tou foimo mavae atu aipe ʼi tona ʼapi mokā tou ʼosi tuku kia ia te kaupepa. ʼE feala ke tou kamata atu aipe hana ako Tohi-Tapu. ʼE feala ke tou fili he kapite ʼi te kaupepa ʼe ina leleiʼia anai. ʼOsi ʼaia, pea tou lau te ʼu fehuʼi ʼaē ʼe tuʼu ʼi ʼoluga ʼi te pasina, pea mo te ʼu palakalafe ʼaē ʼe maʼu ai te tali, pea tou vakaʼi te ʼu vaega faka Tohi-Tapu tāfito.
5 ʼO hilifaki ki te ʼu faigamālie ʼaia ʼi te gāue fai faka mafola, neʼe tou faiga koa la ke tou kamata he ʼu ako Tohi-Tapu mo totatou ʼu vāhaʼa fale, pea mo totatou ʼu kaugā gāue, peʼe ko totatou ʼu kāiga? Tatau aipe pe neʼe tou fai te faʼahi ʼaia ʼi te temi muʼa, kae ʼe kei tou fai koa ʼi te temi ʼaenī? Ko te ʼu fehuʼi ʼaē ʼe fai mai e tatatou ʼu kaugā gāue, peʼe ko tatatou ʼu kaugā ako, pea mo te ʼu faiako, ʼe feala ke liliu ko he ʼu fai palalau ki te Tohi-Tapu pea mo he ʼu ako Tohi-Tapu. ʼAki tatatou fai he ʼu tali ʼe mahino lelei, mo nounou, pea mo fakaloto mālohi ʼo fakatafito ki te Tohi-Tapu, ʼe feala ke tou fakamoʼoni ʼaki ai ʼe ʼaoga te Tohi-Tapu kia tatou. ʼE feala ke fai te ako ʼaia ʼi te temi mālōlō ʼi te fetapā, peʼe ʼi te ʼosi ʼo te gāue, peʼe ʼi tatatou ʼosi mavae ʼi te faleako, peʼe ʼi te temi pe ʼaē neʼe koutou fakatuʼutuʼu kiai, heʼe mole tonu ke fakalaka te fai palalau ʼaia ʼi te ʼu minuta e 15 peʼe 20.
6 ʼE mahino papau ia, ʼe maʼuhiga ke tou teuteu lelei. Ka koutou fai he ʼaʼahi, ʼe tonu ke koutou ʼiloʼi lelei te ʼu meʼa ʼaē ka koutou talanoa kiai. ʼI takotou teuteuʼi te ʼaʼahi ʼaia, ʼe lelei ke koutou fakakaukauʼi peʼe lava feafeaʼi anai hakotou kamata he ako Tohi-Tapu ʼaki te ʼaʼahi ʼaia.
7 ʼI tatatou lau te koga tohi ʼo Gāue 20:35, ʼe tou ʼiloʼi ai te fiafia ʼaē ʼe tou maʼu mokā tou vaevae mo ʼihi te ʼu meʼa ʼaē ʼe tou ʼiloʼi. Ko te fai ʼo he ako Tohi-Tapu ʼe ko he faigamālie lelei ʼaia ke tou maʼu ai te fiafia ʼaia. Tou fakatuʼutuʼu ke tou fakahoko te faʼahi maʼuhiga ʼaia ʼo tatatou minisitelio.