ʼE Tou Kumi He ʼu Ako Tohi-Tapu ʼe Lahi Age
1 ʼE tapuakina e Sehova ʼAtua tana kautahi ʼi te kele ʼo ina fai ke tuputupu tuʼumaʼu. ʼI te taʼu gāue ʼaenī kua hili, neʼe papitema te toko 375 923 ʼi te malamanei katoa—ʼo fakafuafua ko tisipulo foʼou e toko 1 000 tupu ʼi te ʼaho fuli, peʼe teitei ke toko 43 ʼi te hola! Logope la te ʼu taʼu ʼe lauʼi hogofulu ʼaē neʼe lahi ai te ʼu faigataʼaʼia ʼaē neʼe kātakiʼi e totatou ʼu tēhina ʼi te ʼu potu kehekehe ʼo te malamanei, ʼe hoko he ʼu tuputupu makehe ʼo te gāue ʼo te Puleʼaga. ʼI meʼa fakafiafia hatatou lau te haʼele ki muʼa ʼo te faka mafola ʼo te logo lelei!
2 ʼI te filiale ʼo Niu-Kaletonia ʼi te taʼu ʼaenī kua hili, neʼe tou toe sio foki ki te tuputupu ʼo te kau fai faka mafola, pea mo te ʼu pionie vaeluaʼi temi, pea mo te lahi ʼo te ʼu kaupepa, pea mo te ʼu nusipepa ʼaē neʼe tufa. Neʼe tuputupu te kaugamālie ʼo te kau papitema pea neʼe hahaʼi ʼaupito ia nātou ʼaē neʼe kau ki te ʼAho Fakamanatu. E feafeaʼi ʼo ʼuhiga mo te ʼu ʼaʼahi pea mo te ʼu ako Tohi-Tapu? ʼE maʼuhiga te ʼu faʼahi ʼaia ʼo te minisitelio moʼo fai ʼo he ʼu tisipulo. ʼI tona fakahagatonu, neʼe ʼai te kiʼi hifo ʼo te ʼu ʼaʼahi pea neʼe puli te ʼu ako Tohi-Tapu e 11 ʼi te teau. Neʼe lagi hoko te faʼahi ʼaia ʼuhi ko te ʼatu ʼu ako Tohi-Tapu ʼaē neʼe fakaʼosi, ʼi tatatou mole kei ako ia tohi e lua mo te hahaʼi. Kae lolotoga ni ʼu māhina, neʼe ʼi ai te tuputupu ʼi te ʼu ʼaʼahi pea mo te ʼu ako Tohi-Tapu, pea ʼe ko he meʼa fakaloto mālohi ki te temi ka haʼu. ʼO toe feiā ʼi Uvea pea mo Futuna, neʼe tuputupu te lahi ʼo te ʼu tohi ʼaē neʼe tufa, mo te ʼu hola, mo te ʼu ʼaʼahi, pea mo te ʼu ako Tohi-Tapu ʼaē neʼe fai. Neʼe tokolahi te ʼu kaugā fagona foʼou ʼaē neʼe nātou kamata fai faka mafola, pea neʼe aʼu ki te toko 36 kaugā fagona ʼi te māhina ʼo Novepeli. ʼE hā lelei mai, ʼe kei lahi pe te fia ako Tohi-Tapu ʼa te hahaʼi ʼo totatou ʼu telituale. Koteā ʼaē ʼe feala ke tou fai takitokotahi moʼo fakahaʼele ki muʼa te tuputupu ʼaia ʼo te fai ʼo te ʼu ʼaʼahi pea mo te ʼu ako Tohi-Tapu?
3 Ke Mālohi Totatou Holi ʼAē Ke Tou Fai He Ako: ʼE tonu ke tou tokaga tāfito ke tou mālolohi pea mo gāue ʼi te faʼahi fakalaumālie. Ko te kau tisipulo moʼoni ʼa Kilisito ʼe nātou “fakamalotoloto ki te fai ʼo te ʼu gāue lelei.” (Tito 2:14) Ka tou vakavakaʼi totatou minisitelio, ʼe feala koa ke tou ʼui ʼe tou hoko fakamalotoloto atu te ʼaʼahi ʼo te hahaʼi fuli ʼaē neʼe tou tuku kia nātou te ʼu tohi ʼi te fai faka mafola? ʼE tou fiafia koa ʼi te fakaafe ʼa te hahaʼi fuli ʼaē neʼe nātou fia logo ke nātou ako te Tohi-Tapu? (Loma 12:11) Peʼe tonu koa ke tou fakatuputupu ia tatou te holi ʼaē ke tou fai te ʼu ʼaʼahi pea mo kamata he ʼu ako Tohi-Tapu?
4 Ko te lau ʼo te Tohi-Tapu, mo te kau tuʼumaʼu ki te ʼu fono, pea mo te ako ʼo te ʼu tohi ʼe tokoni anai kia tatou ke tou mālolohi ʼi te faʼahi fakalaumālie pea mo tou maʼu te mālohi ʼo te laumālie ʼa te ʼAtua. (Efesi 3:16-19) ʼE ina fakamālohiʼi anai tatatou tui pea mo tatatou falala kia Sehova, pea mo tatatou ʼofa ki totatou kāiga. ʼE ina uga anai tatou ke tou akoʼi te moʼoni ki te hahaʼi, ʼo liliu ai totatou minisitelio ko he meʼa lelei ʼe ʼi ai hona ʼu fua, pea ʼe fakaloto mālohi kia tatou. Ei, ʼe tonu ke tou holi ke lahi age tatatou ʼu ako Tohi-Tapu!
5 Tou ʼUluaki Ako Muʼa Mo Totatou Famili: Ko te ʼu mātuʼa ʼaē ʼe kei nātou taupau tanatou fānau ʼe tonu ke nātou tokakaga ki tonatou polokalama ako faka famili ʼo te Tohi-Tapu ʼaē ʼe tonu ke fai tuʼumaʼu. (Teu. 31:12; Pes. 148:12, 13; Taag. 22:6) ʼE fua lelei anai ki te ʼu mātuʼa mokā nātou ako mo tanatou fānau te kaupepa lahi Fakamaʼua pea ki muli age, te tohi Te ʼAtamai Mālama, ke teuteuʼi ai nātou ke nātou liliu ko he ʼu kaugā fagona, pea ke nātou foaki tonatou maʼuli kia Sehova pea mo papitema. ʼE mahino ia, ʼe feala ke vakaʼi te tahi ʼu tohi, ʼo mulimuli ki te ʼu meʼa ʼaē ʼe ʼaoga ki te tamasiʼi pea mo tana taʼu. Ko he tāmai peʼe ko he faʼe ʼe ako mo hana tamasiʼi ʼe mole heʼeki papitema, ʼe feala ke ina lau te ako ʼaia, mo te temi, pea mo te ʼu ʼaʼahi, ohage ko tona fakahā ʼi te Tali Ki ʼAkotou ʼu Fehuʼi ʼo Te Minisitelio ʼo Te Puleʼaga Fakafalani ʼo ʼApelili 1987.
6 Tou Hikihiki Tatatou Fakatuʼutuʼu: ʼE tou fakatokagaʼi kua lahi te ʼu nusipepa, mo te ʼu kaupepa lalahi, pea mo te ʼu tohi ʼaē neʼe tufa, koia ʼe mahino ia ʼe lahi ʼaupito te ʼu pulapula ʼaē neʼe to. Ko te ʼu pulapula ʼaia ʼo te moʼoni ʼaē neʼe to, ʼe feala ke tupu ai he kau tisipulo foʼou. Kae ʼe fiafia moʼoni anai koa he tagata gāue kele peʼe ko he tahi ʼe gaohi ʼōloto, mo kapau ʼe ina to tuʼumaʼu pea hili tana gāue kinakina ʼaia, ʼe mole he temi ʼe ina utu ai? Kailoa. ʼO toe feiā mo tatou, ʼe tonu ke tou fai he ʼu ʼaʼahi ʼi totatou minisitelio.
7 ʼE koutou fakatuʼutuʼu tuʼumaʼu koa he temi ke koutou fai ai te ʼu ʼaʼahi? Koutou foimo liliu ʼo ʼaʼahi te hahaʼi fuli ʼaē neʼe fia logo. Koutou fai te ʼu ʼaʼahi ʼaki te fakatuʼutuʼu ʼaē ke koutou kamata he ako Tohi-Tapu. ʼE koutou tohi fakalelei koa takotou ʼu ʼaʼahi, ʼo taupau he ʼu nota ʼe maʼa, pea mo fakatuʼutuʼu lelei takotou ʼu ʼaʼahi ʼaia? ʼO hilifaki ki te higoa pea mo te tuʼasila ʼo takotou ʼaʼahi, koutou tokaga ʼo tohi te ʼaho ʼo takotou ʼuluaki fai palalau, te tohi ʼaē neʼe koutou tuku, mo koutou tohi fakanounou te ʼu meʼa ʼaē neʼe koutou talanoa kiai, pea mo he puani ʼe feala ke koutou palalau mo ia ʼi takotou tahi ʼaʼahi. Koutou tuku he faʼahi ʼi takotou pepa ke koutou hilifaki ai te tahi ʼu manatu ʼi takotou ʼosi fai te ʼaʼahi.
8 Tou Vakavakaʼi Te Faʼahiga Fai ʼo He ʼAʼahi: Ko te ʼu puani fea ʼaē ʼe tonu ke tou manatuʼi mokā tou ʼaʼahi he tahi ʼe fia logo ki te moʼoni? (1) Tou aga fakakāiga, mo agalelei, pea mo fiafia. (2) Tou palalau ki he ʼu meʼa ʼe fia logo kiai. (3) Ke faigafua takotou fai palalau pea mo fakatafito ki te Tohi-Tapu. (4) ʼI te ʼu ʼaʼahi fuli, koutou faiga ke koutou akoʼi age he meʼa foʼou, ʼe ina ʼiloʼi ʼe ʼaoga lahi anai kia ia. (5) Koutou fakaʼosi ʼo lagaʼi he fehuʼi ʼaē ʼe uga ia ia ke fakaʼamu ki te tahi ʼaʼahi. (6) ʼAua naʼa koutou nonofo fualoa. (7) ʼAua naʼa koutou fai he ʼu fehuʼi ʼe faigataʼa anai hana tali kiai. (8) Koutou maʼu te fakasiosio tonu, ke mole koutou tauteaʼi tana ʼu manatu hala peʼe ko tana ʼu aga ʼaē ʼe kovi, ʼi muʼa ʼo tana tali te ʼu meʼa fakalaumālie.—Vakaʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Malesio 1997, ke koutou maʼu ai te tahi ʼu tokoni moʼo fakahoko lelei te ʼu ʼaʼahi pea mo kamata he ʼu ako Tohi-Tapu.
9 Koutou Vakavakaʼi Te ʼu Faigamālie Fuli: ʼI te tahi kokelekasio, ko te ʼu kaugā fai faka mafola neʼe feala ke nātou maʼu te ʼu higoa pea mo te ʼu numelo ʼo te ʼu kogafale ʼo nātou ʼaē ʼe nonofo ʼi te fale laufata ʼaē ʼe mole feala hakita hū kiai. Neʼe nātou faitohi kia nātou takitokotahi, pea neʼe ʼai kiai te ʼu kiʼi pepa lotu e lua. ʼI te fakaʼosi ʼo te tohi, neʼe fai te fakaafe ki he ako Tohi-Tapu, pea neʼe tohi ai te numelo telefoni ke feala hana tali kiai. Hili kiai ni ʼu ʼaho, neʼe telefoni te tūpulaga ʼo ina kole ke fai hana ako. ʼI te ʼapogipogi ake, neʼe fai te ʼaʼahi pea neʼe kamata ai te ako ʼaki te tohi Te ʼAtamai Mālama. ʼI te po pe ʼaia, neʼe kau ki te Ako Tohi ʼo te Kokelekasio, pea neʼe hoko atu tana kau ki te ʼu fono. Mole tuai, pea neʼe ina kamata lau te Tohi-Tapu ʼi te ʼaho fuli pea neʼe haʼele lelei tana ako ʼo aʼu ki tana papitema.
10 Neʼe fakatuʼutuʼu e te ʼu kaugā fai faka mafola ke nātou fai fakatahi tanatou ʼu ʼaʼahi. ʼI te tahi ʼaʼahi neʼe fai e te tuagaʼane, neʼe mole ina maʼu ia ia ʼaē neʼe ina kumi, kae ko te tahi fafine neʼe ina avahi te matapā, ʼo ina ʼui fēnei: “Neʼe ʼau talitali atu kia koutou.” ʼI muʼa atu, neʼe foaki age e te kaumeʼa ʼo te fafine ʼaia te tohi Te ʼAtamai Mālama. ʼI te temi ʼaē neʼe ʼōmai ai te ʼu tuagaʼane ki tona ʼapi, neʼe kua ina lau tuʼa lua te tohi, pea neʼe ōfo ʼi te ʼu manatu ʼaē neʼe tuʼu ai. Neʼe ina ʼui age neʼe mole punamaʼuli ʼi tana sio ki he ʼu Fakamoʼoni ʼi tana ʼapi ʼi te ʼaho ʼaia, koteʼuhi neʼe faikole ia ke nātou ʼolo age pea ke nātou akoʼi age te Tohi-Tapu kia ia. Neʼe kamata tana ako Tohi-Tapu, mo kamata kau ki te ʼu fono ʼo te kokelekasio, pea neʼe tuputupu vave.
11 Mole heʼeki faʼa fualoa, ko te tuagaʼane kua teitei taʼu 25 tana kua papitema, neʼe ina foaki ki tana faʼe te tohi Te ʼAtamai Mālama. Ko tana faʼe ʼaē neʼe kau ʼi te ʼēkelesia, neʼe ina kamata lau te tohi. ʼI tana ʼosi lau te ʼu kapite e lua, neʼe telefoni ki tana taʼahine, pea neʼe ina ʼui fēnei ki ai, ʼo punamaʼuli ai tana taʼahine: “ ʼE ʼau fia liliu ko he Fakamoʼoni ʼa Sehova!” Neʼe kamata ako ai tana faʼe pea ʼi te temi nei, kua papitema.
12 Koutou ʼAhiʼahi Te ʼu Manatu ʼAenī: Kua koutou ʼahiʼahi koa la ke koutou fakaafe fakahagatonu he tahi ke fai hana ako? ʼE feala pe ke koutou kamata fēnei: “Kapau ʼe ke fia ako te Tohi-Tapu, pea ʼe feala haku fakahā atu ʼi he ʼu kiʼi minuta pe, peʼe feafeaʼi tona fai. Kapau ʼe ke leleiʼia te ako, pea ʼe feala hau hoko atu.” Tokolahi ʼe nātou tali te fakaafe ʼaia pea mo nātou fakalogo lelei ki takotou fakahā age te faʼahiga fai ʼo te ako Tohi-Tapu.
13 ʼI te kamata ʼo te ako, koutou fakahā age kia ia peʼe feafeaʼi hana teuteuʼi fakatomuʼa, ke ina lau te ʼu vaega faka Tohi-Tapu ʼaē ʼe tuʼu ai pea mo ina fakaʼiloga te ʼu kupu tāfito ʼaē ʼe tali ki te ʼu fehuʼi. Koutou fakatokagaʼi tāfito te ʼu puani maʼuhiga. Logope la ʼe mole tonu ke tou fakakinau fau ʼi te ʼu ʼuluaki ako, kae ʼe maʼuhiga ke tou fai tuʼumaʼu te ako. Koutou fakakaukauʼi peʼe feafeaʼi anai hakotou fakamahino age kia ia ʼaē ʼe ako te maʼuhiga ʼo te fai ʼo he kole ʼi te ako, pea mo teuteuʼi, ʼaki te Tohi-Tapu, ke ina kātakiʼi te fakafeagai. Koutou faigaʼi tāfito ke ina leleiʼia te ako!
14 ʼE mahino ia, ʼe mole tatau te tuputupu ʼo nātou fuli ʼaē ʼe nātou ako te Tohi-Tapu. Ko ʼihi ʼe mole lahi tanatou tokagaʼi te ʼu faʼahi fakalaumālie pea ko ʼihi ʼe mole nātou maʼuliʼi atu aipe te ʼu meʼa ʼaē ʼe nātou ako. Ko ʼihi ʼe lagi nātou maʼumaʼua ʼaupito pea ʼe mole feʼauga tonatou temi ke nātou vakaʼi he ʼu palakalafe lahi ʼi te ʼu vāhaʼa fuli. Koia, ʼe lagi tonu anai ke fai liuliuga te ako moʼo fai he kapite pe e tahi, pea ʼe mole feʼauga anai he taʼu katoa moʼo fakaʼosi te ako ʼo te tohi. ʼE mole kovi te faʼahi ʼaia, pea ʼe tuku ai kia ia ʼaē ʼe ako ke tuputupu māmālie ʼi tana mahino pea mo faiga ke ina maʼuliʼi te ʼu meʼa ʼaē ʼe ina ako. ʼE lahi te ʼu ako, ʼe feala ke tou ʼuluaki kamata muʼa ʼaki te kaupepa Fakamaʼua pea ki muli age, ʼaki te tohi Te ʼAtamai Mālama. Kapau kua tou kamata te ako Tohi-Tapu ʼaki te tohi Te ʼAtamai Mālama pea mo tou fakatokagaʼi ʼe faigataʼa kia ia ʼaē ʼe ako hana mahino kiai, pea ʼe lagi lelei anai ke toe kamata te ako ʼaki te kaupepa Fakamaʼua, tatau aipe pe neʼe kua lahi te ʼu kapite ʼaē neʼe kua koutou ʼosi vakaʼi ʼi te tohi ʼaia. Ka ʼosi tatatou ako te kaupepa ʼaia, pea ʼe feala ai leva ke koutou hoko atu ʼaki te tohi Te ʼAtamai Mālama, ʼo toe kamata mai te kamataʼaga ʼo te tohi. Ko te faʼahi ʼaia, ʼo hilifaki kiai tanatou kau ki te ʼu fono, ʼe tokoni anai kia nātou fuli ʼaē ʼe ako ke nātou mālohi ʼi te moʼoni.
15 Tou faikole tāfito ke tou maʼu hatatou ako Tohi-Tapu! (1 Soane 3:22) ʼE ko he fakapale lahi ki he Kilisitiano, tona fakaʼaogaʼi e Sehova ke tokoni ki he tahi ke liliu ko he tisipulo ʼo Sesu Kilisito. (Gāue 20:35; 1 Ko. 3:6-9; 1 Tes. 2:8) ʼE ko te temi ʼaenī ke tou fakahā ai tatatou gāue mālohi ʼi te fai ʼo te ʼu ako Tohi-Tapu, ʼo tou falala katoa ʼe tapuakina lahi anai e Sehova te ʼu faiga ʼaē ʼe tou fai ke toe lahi age te ʼu ako Tohi-Tapu!
[Talanoa ʼo te pasina 3]
ʼE koutou faikole koa ke koutou kamata hakotou ako Tohi-Tapu foʼou?