ʼE Koutou Fai Koa Takotou ʼu ʼAʼahi?

¹ Ko totatou maʼua ʼotatou ʼaē ko te kau minisi ʼo te logo lelei ko te fai ʼo ni ʼu tisipulo (Mat. 28:19, 20). ʼI te fahaʼi ʼaia, ʼe ʼaoga tāfito ke fai he ʼu ʼaʼahi. ʼE mahino kia tatou ʼe lahi te ʼu maʼuli ʼe tonu ke hāofaki pea, ko ia ʼaē, ʼe tou faigaʼi fakamalotoloto ʼo toe ʼolo kia nātou neʼe fia logo mai ʼi tatatou ʼuluaki ʼalu atu.

² ʼE tonu ke tou ʼiloʼi lelei ko te hahaʼi fuli ʼaē ʼe nātou tali te ʼu tohi ʼe ʼaoga ke tou ʼolo ʼo toe ʼaʼahi nātou. Ko te tuku ʼo he tohi ʼe mole ko te tupuʼaga pe ʼaia ʼo te fai ʼo te toe ʼaʼahi. ʼIo, ʼe lahi te ʼu hahaʼi ʼe nātou fia palalau ki te logo ʼo te Tohi-Tapu kae nātou fakafisi ki te ʼu tohi. Ko ia ʼaia, kapau ʼe tou sisio ifo ki he tahi ʼe fia logo ki te meʼa ʼaē ʼe tou palalau ki ai, ʼe tonu ke tou ʼolo ʼo toe ʼaʼahi ia ia pea ke tou faigaʼi ke toe hoko atu te fai palalau.

³ Tou ʼolo ʼo ʼaʼahi nātou ʼaē neʼe nātou fia lau tatatou ʼu tohi: ʼE lahi tatatou tuku te ʼu tohi ki te ʼu hahaʼi ka mole tou ʼolo ʼo toe ʼaʼahi nātou. Ko te ʼu faʼahiga meʼa ʼe foaki mai kia tatou ke tou haʼele ai ki muʼa ʼe lahi ʼaupito. Ko he pionie neʼe ina tuku he tohi ki he tahi, pea sio ifo ia neʼe mole faʼa fia logo age kia ia. ʼI he hoʼatā, ʼi te ʼosi fuli ʼo te fai ʼo tana ʼu ʼaʼahi, neʼe fakatotonu leva e te tēhina ʼaia ke toe liliu ʼo toe ʼaʼahi te fafine ʼaia. Neʼe kamata ai te ako faka tohi-tapu.

⁴ Ko he tahi tēhina neʼe ina fakahā te ʼu nusipepa e lua ki he tagata, ʼosi ʼaia neʼe mole kei ina tuʼania ia te tagata ʼaia, ko tana manatu neʼe mole fia logo age ia. ʼI he ʼu ʼaho ki muli mai, neʼe faitohi te tagata ʼaia ki te kokelekasio ʼo te kolo ʼo kole ke papitemaʼi ia. Ko he tuagaʼane misionea neʼe ina tokoniʼi te ʼu hahaʼi e 74 ʼo nātou liliu ko te kau fai faka mafola. ʼI tona fakafehuʼi age pe koteā, ʼi tana manatu, te meʼa ʼaē neʼe tokoni ai ki te fahaʼi ʼaia, neʼe ina tali age: “ ʼE mātou fakahā tuʼumaʼu te ʼu nusipepa pea ʼe ʼau ʼaʼahi tuʼumaʼu te ʼu hahaʼi ʼaē neʼe nātou toʼo te ʼu nusipepa ʼaia ʼo aʼu ki te temi ʼe feala ai taku kamata he ako faka tohi-tapu.”

⁵ ʼI he tahi fahaʼi, ʼi tatatou ʼuluaki ʼalu atu, ʼe feala pe ke tou tuku he kiʼi pepa lotu kia ia ʼaē ʼe palalau mo tatou. Lolotoga te toe ʼaʼahi, ko te ʼu kiʼi pepa lotu ʼe ʼaoga tuʼumaʼu moʼo fakahā pe ʼe feafeaʼi tatatou fai he ako ʼo te Tohi-Tapu mo te ʼu hahaʼi. Ko he taupau faka silikosikilipisio neʼe fai faka mafola mo he tuagaʼane ʼo ina tuku he kiʼi pepa lotu ki he fafine. Logope ko te fai palalau neʼe mole loaloaga, neʼe ina tokoniʼi te tuagaʼane ke toe ʼalu ʼo ʼaʼahi te fafine ʼaia. Neʼe toe liliu te tuagaʼane ʼo ʼaʼahi te fafine ʼaia pea kamata aipe tana ako faka tohi-tapu.

⁶ Kapau ʼe fia logo mai he tahi: Kapau ko ia ʼaē ʼe ina tali tatou neʼe mole ina tali he tohi ʼi tatatou ʼuluaki ʼalu atu, ʼe mole fakahā mai ʼi ai ʼe mole fia logo mai ia. Ko he tahi ʼi te kau fai faka mafola neʼe ʼalu ʼo toe ʼaʼahi he tau matuʼa kei tūpulaga ʼo ina ʼiloʼi ai kua ʼi ai tanā ʼu tohi pea neʼe kua ʼosi toʼo tanā ako faka tohi-tapu ʼi muʼa atu. Neʼe tali e te tau matuʼa ke toe fai tanā ako faka tohi-tapu. Ko he pionie makehe neʼe ina sio ki he fafine ʼe fia logo ka ki muʼa atu neʼe fakafisi tuʼumaʼu ia ki te ʼu nusipepa. Neʼe mole ina fakahā age te ʼu nusipepa pea ko te fafine ʼaia neʼe fia logo ʼo nā palalau ai ki he ʼu palakalafe ʼo he kaupepa. ʼOsi pe he ʼu ʼaʼahi ki muli mai, pea kamata ai tana ako faka tohi-tapu ʼo tuʼa lua ʼi te vahaʼa.

⁷ Ko nātou fuli ʼaē kua foaki tonatou maʼuli maʼa Sehova ʼe tonu ke nātou ʼiloʼi tonatou maʼua ʼaē ko te fai ʼo he ʼu tisipulo. Kapau ʼe tou ʼaʼahi tuʼumaʼu te ʼu hahaʼi fuli ʼaē ʼe fia logo mai, ʼe tou maʼu ānai hona fua lelei, ʼo tou maʼu ai he ʼu manuʼia lahi, kia tatou, ‘kae feiā foki kia nātou neʼe fakalogo mai’. — 1 Tim. 4:16.