ʼE Feala Koa Hakotou Pionie Vaeluaʼi Temi?
1 Neʼe tokoniʼi e Sesu tana kau tisipulo ke nātou gāue fakamālohi ʼi te minisitelio pea neʼe ina ʼui age ko te muliʼi ʼo te ala ʼaia ʼe nātou maʼu ai he fiafia pea mo he ʼu tapuakina fakalaumālie (Mat. 10:8b; Gāue 20:35). ʼI malesio ʼo te taʼu kua ʼosi, ko te kau fai faka mafola ʼe laka ʼi te 117 neʼe nātou ʼiloʼi te fiafia ʼi te gāue ʼaia koteʼuhi he neʼe nātou pionie vaeluaʼi temi. ʼI te taʼu ʼaenī, ʼe koutou maʼu koa te ʼu fiafia ʼaia ʼi te pionie vaeluaʼi temi ʼi malesio pe ko ʼapelili, pe ʼe lagi ko te ʼu māhina ʼaia e lua?
2 Vakaʼi tokotou ʼaluʼaga: Lolotoga takotou lau te ʼu faʼifaʼitaki ʼe tuʼu ki muli mai, koutou fai te ʼu fehuʼi ʼaenī: ‘ ʼE ʼaoga koa he faʼifaʼitakiʼaga kia ʼau? ʼE feafeaʼi koa haku faigaʼi ke ʼau pionie vaeluaʼi temi?’
3 Logope ko tana ʼu toe e nima pea ʼe gāue, ko he tuagaʼane neʼe feala tana pionie vaeluaʼi temi. Neʼe feafeaʼi koa tona fakapale? Ko tona ʼohoana pea mo tana ʼu fānau neʼe nātou tokoni ki ai, pea, ʼaki tana faʼifaʼitakiʼaga lelei, neʼe liliu ai tona ʼohoana ʼo kau ki te kau fai faka mafola ʼi te māhina ki muli mai.
4 Ko te ʼu tagata ʼāfea fuli pea mo te ʼu tagata faifekau faka minisitelio ʼo he kokelekasio neʼe nātou toʼo te pionie vaeluaʼi temi lolotoga he māhina. Tokolahi ia nātou ʼaia ʼe gāue, kae neʼe nātou faiga mo tonatou loto katoa ki te ʼu gāue fakalaumālie ʼi te fakaʼosi vahaʼa. Ko tanatou faʼahiga takitaki pea mo fakatuʼutuʼu ʼo te fai faka mafola neʼe fua lelei ia ki te kokelekasio katoa. ʼI te māhina ʼaia, ko te 73 ʼi te kau fai faka mafola e 77 ʼo te kokelekasio neʼe nātou faigaʼi ʼo nātou toʼo he faʼahi gāue ʼo te selevisi pionie.
5 Ko he finemui e taʼu 15 ʼe kei ako neʼe ina fakaʼaoga leleiʼi tona ʼu vahaʼa mālōlō e lua ʼo toʼo te pionie vaeluaʼi temi. Neʼe ina ʼui fēnei: “Neʼe ʼau sio moʼoni ki te kehekehe, tāfito ʼi te ʼu fai palalau. Neʼe lahi ai taku palalau mo te ʼu hahaʼi ʼi te ʼu matapā.”
6 Ko nātou ʼaē kua letelete ʼe lahi te ʼu faʼahi ʼe nātou tuku ai ki muʼa te ʼu lelei ʼo te Puleʼaga. ʼI te ʼosi ʼo te mate ʼo tona ʼohoana, ko he tuagaʼane e taʼu 84 neʼe ina tohi te meʼa ʼaenī: “Ko taku fānau katoa neʼe kua lalahi, kua nātou ʼohoana pea kua ʼi ai mo tanatou ʼu fānau. Neʼe mole nātou līaki ia ʼau, kae ko tanatou ʼomai ʼo ʼaʼahi ʼau neʼe mole feala ke puli ai toku ʼu faigataʼa ia. Ko te tagata ʼāfea ʼi te kokelekasio neʼe ina ʼui mai ke ʼau toʼo te pionie vaeluaʼi temi. Neʼe ʼau lotolotolua, pea neʼe ʼau fakakaukauʼi leva ke ʼau ʼahiʼahi te fahaʼi ʼaia. Ko he meʼa fakafiafia! ʼI taku manatu, neʼe taupau ʼau e Sehova ʼo aʼu mai ki toku taʼu ʼaenī ke feala taku hu ki te selevisi ʼaenī. Mai te ʼaho ʼaia, ʼe ʼau pionie vaeluaʼi temi ʼi te māhina fuli.”
7 Ko he tagata ko tana gāue ko te lue ʼo te ʼu fale neʼe ina fetogi tona polokalama fai ʼaʼahi ki te ʼu nofoʼaga ke maʼu ai hona temi pea mo liliu ia ʼo pionie. Ko ʼihi neʼe nātou faigaʼi tonatou ʼu polokalama ke feala ai hanatou kau mālohi ki te gāue ʼaia.
8 Koutou fakatuʼutuʼu ʼi te temi nei: He koʼe ʼe mole koutou fakatuʼutuʼu ʼi te temi ʼaenī ke feala ai hakotou pionie vaeluaʼi temi ʼi malesio pea mo ʼapelili? Mo aʼu ki te fahaʼi ʼaia, ʼe tonu ke fakatuʼutuʼu he polokalama fakapotopoto. Ko te fahaʼi ʼaenī ʼe hā mai ʼi te faʼifaʼitakiʼaga ʼonatou ʼaē neʼe feala tanatou pionie vaeluaʼi temi kae ʼi ai tonatou ʼu maʼua faka famili, ʼonatou gāue ʼaho katoa pe ʼe ko niʼihi atu maʼua faka tohi-tapu. Koutou palalau mo nātou ʼaē neʼe nātou maʼu he lelei ʼi te gāue ʼaia ke feala ai hakotou fakaʼaogaʼi tanatou faʼifaʼitakiʼaga. Koutou faikole kia Sehova ke tokoni mai kia koutou. — Is. 40:29-31; Sake 1:5.
9 ʼE mole he mahalohalo ki te fahaʼi ʼaia, ko nātou ʼaē ʼe nātou faigaʼi ke nātou pionie vaeluaʼi temi ʼe nātou ʼiloʼi te ʼu fiafia lahi. Kapau neʼe mole heʼeki koutou toʼo te selevisi ʼaia, ʼe feala koa hakotou kau ki te fakafiafia ʼaia? Kapau ʼe koutou faigaʼi ke haʼele ki muʼa takotou kau ki te faka mafola ʼo te logo lelei, ko Sehova ʼe ina foaki mai ānai kia koutou he ʼu manuʼia lahi. — Mal. 3:10.