Koteā Takotou Palalau Mokā Koutou Toe Liliu Mai?
1 Moʼo faiva ʼi totatou minisitelio, ʼe tonu ke tou teuteu. ʼI te fahaʼi ʼaia, kapau ʼe tou liliu ʼo ʼaʼahi te hahaʼi ʼaē neʼe fia logo ki te moʼoni ʼi tatatou ʼuluaki ʼalu atu, ʼe feala ai hatatou tokoniʼi pea mo hoko atu tatatou fai palalau. Kae ʼe feafeaʼi tatatou aʼu ki ai?
2 ʼAki te ʼofa ʼo te ʼu kilisitiano moʼoni ki te kāiga, ʼe feala ke koutou fakahā age he fahaʼi neʼe koutou ako ʼi takotou ʼuluaki fai palalau pea ʼe ʼaoga ki ai.
Ki he tahi neʼe ina fakamahino atu ʼe ina tuʼania ia te tuʼutāmaki, koʼeni takotou ʼui age:
◼ “ ʼI tatatou palalau talu mai ai, neʼe koutou ʼui mai ʼe koutou tuʼania ia te tuʼutāmaki ʼe hoholo tona hoko. ʼI takotou manatu ʼe feala ānai ke molehi te fahaʼi ʼaia mo ka na pau ʼe lahi ni kau polisi? ”
Kapau ko he tahi ʼe ina tuʼania ia te ʼu fetofetogi ʼo te mālama ʼaeni, koʼeni takotou ʼui age:
◼ “Lolotoga tatatou palalau fakamuli, neʼe koutou ʼui mai te meʼa maʼuhiga ʼo ʼuhiga mo te puli ʼaē ʼo te tokalelei ʼi te malamanei. ʼE koutou manatu koa ko te ʼu tagata lalahi ʼo te mālama ʼaeni ʼe natou fakatuʼutuʼu ānai he mālama foʼou? ”
Ki he tahi kua loto fula ʼuhi ko te loto mānumānu, koʼeni takotou ʼui age:
◼ “ ʼI tatatou felogoʼi talu mai ai, neʼe koutou palalau mai ʼo ʼuhiga mo te mānumānu ʼa te hahaʼi ʼi te temi nei. Kia koutou, koteā te manatu ʼa te ʼAtua ki te ʼu hahaʼi ʼaē ʼe mānumānu? [Tuku ke tali mai.] Koʼeni te fakahā mai ʼa te Tohi-Tapu ia Efesi 5:5.”
3 Koʼeni niʼihi manatu ʼe ʼaoga ki te fahaʼi ʼaia:
◼ “Neʼe ʼau leleiʼia tatatou felogoʼi fakamuli, ʼo feala ai ke ʼau kumi te manatu ʼaenī moʼo fakahā atu ko Sehova ʼe ina manatuʼi te mamahi ʼa te hahaʼi ʼaē ʼe mole ʼi ai honatou nofoʼaga. Koʼeni te manatu ʼe tou lau ʼi te Tohi-Tapu ia Isaia 65:21-23.”
◼ “Neʼe ʼau leleiʼia te meʼa neʼe koutou ʼui mai: ko te mālama ʼaenī ʼe ʼaoga ke ʼi ai hona puleʼaga lelei.”
◼ “Neʼe koutou fai mai te fehuʼi lelei ʼi takotou ʼui mai pe ʼe ko te ʼAtua ʼe ina tali te ʼu lotu fuli.”
◼ “Neʼe feala ke ʼau fakakaukau ʼi takotou palalau mai ʼaē ʼo ʼuhiga mo te mataʼi tohi.”
◼ “Neʼe ʼau toe manatuʼi tatatou fai palalau, pea neʼe ʼau maʼu ʼi te tohi ʼaeni Le plus grand homme de tous les temps he manatu ʼaoga, ʼe koutou leleiʼia ānai. [Fakahā te ʼu puani tāfito ʼo te tohi.]”
Ko te ʼu ʼuluaki palalau ʼaenī ʼe fakahā ai neʼe tou leleiʼia tatatou felogoʼi ʼuluaki pea ʼe tou loto ke toe hoko atu tatatou fai palalau.
4 ʼI muʼa ʼo te ʼalu ʼo fai te ʼaʼahi foʼou, fakakaukauʼi muʼa pe koteā takotou palalau ka fai. Faigaʼi ke lelei takotou fakahā ki te ʼu hahaʼi takitokotahi.
5 Kapau ʼe maʼumaʼua ia ia ʼaē ʼe koutou ʼolo ʼo ʼaʼahi, ʼe feala pe takotou faiva ʼo ʼui fēnei:
◼ “ ʼE ʼau ʼiloʼi ʼe mole lahi hokotou temi, kae koʼeni he manatu ʼe feala ānai ke koutou fakakaukauʼi mokā ʼosi takotou gāue. [Lau ia Mateo 5:3.]”
Pe ʼe feala ke koutou ʼui age:
◼ “Neʼe ʼau taʼofi te ʼu vaega ʼaeni e tolu moʼo fakahā atu. Kae koʼeni foki ʼe mole maʼu he temi ke tou palalau ai, tuku mai he fealagia ke ʼau tuku atu te ʼu vaega ʼaeni, pea ʼi taku toe liliu mai, ʼe ʼau loto ke tou palalau ki te fahaʼi ʼaenī ʼaki pe he ʼu minuta e nima.”
6 Ko te ʼu ʼuluaki palalau ʼe mole ʼaoga ke fai: Ko te ʼu fehuʼi ʼaē ʼe feala ke fai mai he tahi ʼe mole ʼaoga pe ʼe feala ke fakalainoaʼi ai he tahi ʼe mole fua lelei ia. “Neʼe kua koutou lau koa te ʼu tohi ʼaē neʼe ʼau tuku atu? ” “ ʼE ʼi ai koa hakotou ʼu fehuʼi? ” “ ʼE kei koutou manatuʼi koa ia ʼau? ” “ ʼE ʼau haʼu pe ʼe koutou loto moʼoni ke tou palalau ʼo ʼuhiga mo te ʼu fakatuʼutuʼu ʼo te ʼAtua ki te kele.”
7 Kapau ʼe tou teuteu ʼo ʼave he tokoni ʼaoga ki te hahaʼi ʼaē neʼe fia logo ki te moʼoni, ʼe ia tatou te fia liliu ʼo fakasiosio natou.