Te ʼu ʼUluaki Palalau ʼe Uga Ai Te Hahaʼi Ke Natou Fakalogo
1 Ko te temi fea ʼaē ʼe maʼuhiga kia tatou mokā tou ʼolo ʼo fai palalau ʼi te ʼu ʼapi? ʼE lahi ia tatou ʼe faiʼaki ki te ʼui ʼaē ko te ʼuluaki palalau. Kapau ʼe mole feala hatatou uga he tahi ke fakalogo mai ʼaki tatatou ʼuluaki palalau ʼi te ʼu ʼuluaki sekonita e 30, ʼe feala ānai ke ina fakagata mai tatatou fai palalau.
2 Koteā te ʼu manatu ʼe tonu ke tou fakaʼaogaʼi moʼo teuteuʼi ai he ʼuluaki palalau ʼaoga? Ke koutou ʼiloʼi te ʼu agaʼi fenua pea mo te meʼa ʼe ʼaoga ki te hahaʼi ka felogoʼi ānai mo koutou. ʼE natou māhani koa ʼi te palalau ki he ʼu meʼa noa, pe ʼe natou loto ke fakahā age te tupuʼaga ʼo tatatou ʼomai? ʼE ʼi ai koa he ʼu tau mātuʼa kei tūpulaga ʼi tokotou kolo? Koteā te meʼa ʼe natou tuʼania ia? Ko te ʼu hahaʼi ʼo tokotou kolo ʼe natou mahino koa ki te ʼu faigataʼa ia ʼe tau mo te mālama katoa?
ʼE koutou uga ānai natou ke natou fakalogo atu ʼo koutou ʼui age he meʼa fēnei:
◼ “Mālo, tagata (pe ʼe fafine). Ko toku higoa ko ... ʼE ko he meʼa mamahi te lau ʼaē ko te hahaʼi ʼe mate pakupaku pe ʼe mamate ʼi te ʼu tau. ʼE koutou mamahi koa ʼuhi ko te fahaʼi ʼaia?” Koʼeni ʼihi fehuʼi ʼe tokoni kia koutou ke feala ai ha kotou fai palalau. Ohage la ko te ʼu faʼifaʼitaki ʼaenī: “Koteā koa te tonu ki te ʼu faigataʼa ia ʼo te mālama?” “I ta koutou manatu, ʼe ʼi ai koa he tahi ʼe feala ke ina pulihi te ʼu malaʼia ʼe hoko ʼi te kele ʼi te temi nei?” “Koteā ta koutou manatu mo ka na pau ʼe ʼi ai he tagata takitaki ʼe ia ia he mālohi ohage ko te meʼa ʼe tuʼu mai ia Isaia 9:6, 7? [Lau pea fakamahino age te vaega ʼaenī.]”
3 ʼI ihi telituale, ko te hahaʼi ʼe lahi age tanatou tuʼania ia ni meʼa ka hoko mai ki tonatou loto fale pea mo tonatou famili ʼi te tokalelei ʼaē ʼi te mālama.
ʼE feala ha koutou uga natou ʼaki te ʼu fehuʼi ʼaenī:
◼ “ ʼI takotou manatu, ko te maʼuli fea ʼe kotou maʼu ānai, pea mo tokotou famili, ʼi te ʼu taʼu e hogofulu ka hoko mai? Ko te meʼa ʼe fakahā mai e te Tohi-Tapu ʼo ʼuhiga mo te temi ka haʼu e ko he meʼa fakafiafia ia: ʼe ina fakahā mai te pule neʼe kua ʼosi fakanofo ʼo fai ānai tana pule ʼo maʼuliʼi te ʼu tokoni haohaoa. Vakaʼi te manatu ʼe tuʼu ia Isaia 9:6, 7 ʼo ʼuhiga mo ia”
4 ʼE koutou nofo koa ʼi he kolo ʼe hoko hoholo ai te ʼu mate pea mo te tokakovi? ʼI te fahaʼi ʼaia, ʼe ʼi ai ānai niʼihi ʼe fakalogo atu kia koutou mokā ʼe koutou fakaʼaogaʼi te ʼuluaki palalau ʼe tuʼu ʼi te kupu ʼaē “Crime/Sécurité” ʼi te pasina 11 ʼo te tohi Comment raisonner.
ʼE feala ha koutou ʼui age:
◼ “Mālo, tagata (pe ʼe fafine). ʼE matou palalau mo te hahaʼi ʼo ʼuhiga mo te maʼuli fimālie takitokotahi. ʼE lahi te ʼu tokakovi ʼe hoko ʼi ʼotatou tafa, pea ʼe feala foki ke tou mamahi ai.” ʼOsi ʼaia, pea ʼe feala ānai ke kamata ha koutou fai palalau ʼo fehuʼi age ki ai: “Koteā koa te tonu?” pe ʼe: “ ʼI takotou manatu, ʼe ʼi ai koa he tahi ʼe feala hana fakagata te faigataʼa ʼaia?” pe ʼe: “Kapau ʼe ʼi ai he pule mālohi ʼi te ʼu tagata politike ohage ko ia ʼaenī?” ʼE feala leva takotou lau ia Isaia 9:6, 7.
5 Ko tatou fuli, tatau aipe mo te kau tūpulaga ʼaē kei ako, ʼe feala hatatou fakaʼaogaʼi te ʼu ʼuluaki palalau ʼaenī pea mo fakahā he vaega e tahi. ʼE lagi ʼe koutou fia fakaʼaogaʼi ānai he ʼuluaki palalau mokā koutou fakahā te ʼu nusipepa. ʼE matou fakatui ʼe lahi ānai ia tatou ʼe natou fakaʼaogaʼi fakafiafia te ʼu ʼuluaki palalau ʼaenī ʼi sanualio, moʼo fakahā fakaleleiʼi te ʼu nusipepa tatau aipe mo te tufa ʼo te māhina.
6 Kapau ʼe koutou fakaʼaogaʼi fakalelei te ʼu ʼuluaki sekonita e 30 ʼi takotou ʼolo ki te hahaʼi, ʼaki he aga pea mo he ʼu palalau lelei, ʼe koutou aʼu ānai ki te puani maʼuhiga ʼaē: ko te uga ʼo te hahaʼi ke natou fakalogo.