Tou Fakapipiki Tatatou ʼUluaki Palalau Ki Te Tohi
1 Moʼo teuteuʼi tatatou fakahā ʼi te māhina ʼaenī, ʼe feala ke tou fakakaukau ki te ʼu faigataʼaʼia tāfito ʼe tau mo te hahaʼi ʼi totatou kolo, ʼosi pea tou kumi ʼi te ʼu nusipepa fakamuli pe ʼe ko he kaupepa ʼo fakahā ai he ʼu manatu ʼe hā ai pe ko te tonu moʼoni fea ʼaē ka hoko anai ʼaki te fakahā mai e te Tohi-Tapu.
2 ʼI ʼihi telituale, ʼe tuʼania ia e te hahaʼi te lahi ʼo te hahaʼi ʼaē mole hanatou gāue pea mo te totogi kovi ʼo te ʼu meʼa ʼe ʼaoga ki te maʼuli. Kapau ʼe feiā ʼi totatou telituale, ʼe feala hatatou palalau ki te fahaʼi ʼaia ʼi tatatou ʼuluaki palalau.
ʼE feala ke tou ʼui age:
◼ “Neʼe mātou fai palalau mo tokotou ʼu vāhaʼa fale ʼo ʼuhiga mo te meʼa ʼe tonu ke tou fai ke tou takitahi mo te gāue pea mo te nofoʼaga. ʼI takotou manatu, ʼe feala koa hatatou falala ʼe foaki mai anai te ʼu meʼa ʼaia e lua e te ʼu puleʼaga fakatagata? [Tuku ke fai mai hana tali.] ʼE ʼi ai te tahi ʼe ina ʼiloʼi pe ʼe feafeaʼi te pulihi ʼo te ʼu faigataʼa ʼaia. Koutou sio ki te fakapapau fakatupu fiafia ia Isaia 65:21-23. [Lau.] Ko totatou Tupuʼaga neʼe ina faigaʼi ke tohi te fakapapau ʼaenī moʼo tou fakafiafia, pea ʼe ʼaoga kia tatou fuli ʼi te temi ʼaenī kua haʼele kovi? ” — rs, p. 11.
3 ʼOsi ʼaia ʼe feala hatatou fakapiki tahi te ʼuluaki palalau ʼaia mo he manatu ʼo te ʼu nusipepa fakamuli pe ʼe ko he kaupepa. Kapau ʼe tou fakahā te ʼu nusipepa, tou fili he manatu ʼaoga ʼi te alatike “Ko te ʼamanaki ʼe mālo ia ʼi te loto heʼe ʼamanaki!” neʼe hā ʼi Te Tule Leʼo ʼo te ʼaho 1 ʼo sūlio. Kapau ʼe tou fakahā te kaupepa “Voici”, he koʼe mole fakahā age te paki ʼi te tuaʼi kaupepa ʼaia, paki ʼe hā ai te meʼa ka hoko ki te kele mokā ʼe tou takitahi mo he nofoʼaga pea mo he gāue? ʼE feala tatatou avahi te kaupepa ke sio ia ia ʼaē ʼe palalau mo tatou ki te paki.
4 ʼI te fahaʼi ʼaē ʼe tuʼania ia e te hahaʼi te ʼu faʼahiga meʼa kehekehe, ʼe lelei ke fakaʼaoga he ʼuluaki palalau, lagi ko te lua ʼo te ʼuluaki palalau ʼaē ʼi te tohi Comment raisonner ʼi te kupu “Royaume”.
ʼE feala ke tou ʼui age:
◼ “Neʼe akoʼi mai e Sesu ke tou faikole ke haʼele mai te Puleʼaga ʼo te ʼAtua pea ke fai Tona finegalo ʼi te kele ohage ko te lagi. ʼI takotou manatu kapau ʼe hoko te meʼa ʼaia ʼi he ʼaho ʼe liliu moʼoni koa te kele ko he palatiso? ” ʼI te ʼosi ʼo tana tali, tou fakaʼaoga pea mo lau ia Fakahā 21:3-5.
ʼOsi ʼaia, kapau ʼe tou fakahā te kaupepa Puleaga, tou lau te ʼu manatu ʼo te ʼuluaki palakalafe ʼo te pasina 3, tāfito te manatu ʼaē: “ ʼE ko te Puleʼaga, ʼaē ka fakagata ʼaki anai e te ʼAtua te ʼu tau, te pakupaku, te mahaki, te fakapō, kae ina ʼaumai anai te faʼifaʼitahi pea mo te tokalelei.” Tou fehuʼi age ki ai pe ʼe ko te mamahi fea ʼe mata faigataʼa kia ia.
Kapau ʼe tou fakahā “Te Tule Leʼo” ʼo te ʼaho 15 ʼo sūlio, ʼe feala ke tou ʼui age:
◼ “ ʼE lahi te hahaʼi ʼe nātou fia tui ʼe hoko anai te fakapapau ʼaia, kae mole nātou ʼiloʼi papau pe ʼe feala tanatou falala ki te Tohi-tapu. ʼE ʼau ʼiloʼi papau ko te alatike ʼaenī ko tona kupu ‘ ʼE fefakafeagai koa te Tohi-Tapu?’ ʼe ina fakaloto mālohiʼi anai takotou tui.”
5 Ko te kau tūpulaga ʼe feala foki, mo nātou, ke nātou fakahā fakapotopoto te logo ʼo te Puleʼaga, pea ʼe feala ai foki tanatou fakahā ki te hahaʼi kua matutuʼa.
Moʼo fakahā ia Isaia 65:21-23, ʼe feala ke ʼui age e te kau faka mafola kei tūpulaga:
◼ “ ʼE ʼau ʼiloʼi ʼuhi ko tou taʼu ʼe lahi maumau tou poto ia te ʼau, kae ko te vaega ʼaenī ʼe ina foaki mai kia tatou fuli he fakafiafia.”
6 ʼI te temi fuli pe ʼe tou tuku ai he kaupepa, tou manatuʼi ʼo tohi fakaleleiʼi. Tou tohi pe ko te kaupepa fea pe ʼe ko te ʼu nusipepa fea neʼe tou tuku, heʼe ʼaoga kia tatou te ʼu manatu ʼaia mokā tou toe liliu mai ʼo fai te ʼaʼahi ʼaia.