Tou Tokoni Ki Niʼihi Ke Nātou ʼIloʼi Te ʼAlo ʼo Te ʼAtua, Ko Sesu Kilisito
1 Ko tesepeli ko te māhina ʼe lahi ai te manatu ʼa te tokolahi ʼaē ʼe ʼui maʼa nātou ʼe nātou kau ki te kau kilisitiano, kia Sesu ʼi he tahi age temi ʼo te taʼu. Koia, ʼe ko he māhina lelei moʼo fakahā ʼo te tohi Le plus grand homme de tous les temps. ʼI te maʼuhiga ʼo te tohi ʼaia, ʼe tonu anai ke tou ʼiloʼi peʼe loto lelei ia ia ʼaē ʼe fakalogo mai ke lahi tana ʼiloʼi te ʼAlo ʼo te ʼAtua ia muʼa ʼo tatatou tuku ki ai te tohi. E feafeaʼi koa tatatou fai te faʼahi ʼaia?
2 Tou faigaʼi fakahagatonu ke fai hatatou fai palalau ki te Tohi-Tapu ʼo talanoa tāfito kia Sesu.
ʼI te ʼosi ʼo takotou fakamālo age ki ai, ʼe feala hakotou ʼui age fēnei:
◼ “ ʼE mātou fakafehuʼi ʼomātou vāhaʼa fale pe koteā tanatou manatu mokā ʼe nātou lau te maʼuli heʼegata ʼi tanatou Tohi-Tapu. [Tuku ke fai mai hana tali.] ʼE ko he manatu maʼuhiga ʼaia koteʼuhi ʼe talanoa te Tohi-Tapu ki te fealagia ʼaia ʼo tuʼa fagofulu. Koteā te faka ʼuhiga ʼo te taʼi maʼuli ʼaia kia tatou? Koutou fakatokagaʼi mai te manatu ʼe tuʼu ia Fakahā 21:4. [Tou lau.] Neʼe koutou fakatokagaʼi koa pe koteā te fakapapau? [Tuku ke fai mai hana tali.] ʼE feafeaʼi koa tatatou maʼu te maʼuli heʼegata?” Tou lau ia Soane 17:3, pea ke tou fakahā age ʼe ʼaoga ke maʼu te ʼatamai mālama ki te ʼAtua pea mo tona ʼAlo, ko Sesu Kilisito. Kapau ʼe ina fakahā mai tana fia logo, tou fakahā age ia te tohi Le plus grand homme, ʼo tou fakaʼaogaʼi te ʼu kupu tāfito ʼi te kamataʼaga ke lahi ai tana fia logo.
3 Kapau neʼe fakafisi ia ki te tufa ʼo te ʼu numelo foʼou ʼo Te Tule Leʼo pea mo te nusipepa Koutou ʼaʼala! peʼe ko te kiʼi pepa lotu Ko te malamanei ʼo te temi ʼaenī ʼe hāo anai koa?, tou fakahā age he puani makehe e tahi peʼe lua ʼo te nusipepa ʼaē neʼe tou fakahā. Tou ʼui age ʼe tou fia liliu mai ʼi he temi ʼe lotolelei ki ai ʼo hoko atu te fai palalau.
4 Kapau ʼe hage ʼe maʼumaʼua ia ia, ʼe ko he aga fakapotopoto mokā ʼe tou fakanounou te faʼahiga palalau ʼaē ʼe tuʼu ʼi ʼoluga. Ko te kau fai faka mafola foʼou ʼe feala foki ke faigafua kia nātou tanatou fakaʼaogaʼi ʼo te faʼifaʼitaki ʼaē ka hoko mai.
ʼI te ʼosi ʼo tatatou ʼuluaki palalau, ʼe feala hatatou ʼui age:
◼ “ Ia ʼaho nei ʼe mātou fehuʼi ki tomatou vāhaʼa fale pe koteā tanatou manatu mokā ʼe nātou lau ʼi tanatou Tohi-Tapu ʼo ʼuhiga mo te maʼuli heʼegata. Ohage la, ke koutou fakatokagaʼi pe koteā te talanoa ʼa Sesu ia Soane 17:3. [Tou lau.] Moʼo tokoni ki te hahaʼi ke lahi tanatou ʼiloʼi ia Sesu Kilisito pea mo te meʼa neʼe ina akonakiʼi, neʼe tā ai leva te tohi ʼaenī.” Tou avahi te tohi Le plus grand homme (Te tagata lahi) ʼo fakahā age he ʼu paki matalelei. Tou fuli age te ʼuluaki palalau, pea tou lau te palakalafe lua ʼi lalo ʼo te kupu “Apprenons à le connaitre pour notre bien” (Tou ako ke tou ʼiloʼi ia ia ke fua lelei kia tatou). ʼAua naʼa tou lotolotolua ʼo fakahā ki ai te tohi.
5 Kapau ʼe koutou tufa te tohi, koutou faiga ʼo teuteuʼi he ako faka faka tohi-tapu ʼo fakaʼaogaʼi te ʼuluaki kapite, “Des messages venant du ciel” (Te ʼu fagonogono mai lagi) ʼi he temi peʼe ʼi he ʼaʼahi ki ʼamuli. ʼAua naʼa koutou fakahā age ki ai he loaloaga ʼo he temi ʼe koutou fakaʼaogaʼi ʼi te ʼaʼahi, koutou ʼui age ʼe feʼauga pe ʼi he ʼu kiʼi minuta, ʼo feala ke lahi ai te ʼu meʼa lelei ʼe ina ako ʼo ʼuhiga mo Sesu Kilisito mai te Folafola ʼa te ʼAtua, te Tohi-Tapu.
6 ʼOfa pe ke tou fakaʼaogaʼi fuli te ʼu temi mālōlō ʼo te malamanei moʼo fakatokagaʼi ʼo te hahaʼi ki te moʼoni ʼo te ʼAlo ʼo te ʼAtua, ia Sesu Kilisito, moʼo tokoni ki niʼihi ʼi te ala ke nātou maʼu ia te maʼuli heʼegata. — Mat. 7:14.