Tou Fai He Fakatafito ʼi Te ʼUluaki Fai Palalau
1 ʼE faigafua te fai ʼo he ʼu ʼaʼahi fakapotopoto mokā neʼe tou fai hona fakatafito ʼi tatatou ʼuluaki fai palalau. Ko te tohi Comment raisonner ʼe feala ke ina tokoniʼi tatou.
2 Ko te fakahā ʼaenī ka tou vakaʼi neʼe toʼo mai te lua ʼuluaki palalau ʼe tuʼu ʼi lalo ʼo te kupu ʼaē “Bible/Dieu”, ʼi te pasina 10 ʼo te tohi Comment raisonner.
ʼI te ʼosi ʼo tatatou fakamālo ki he tahi, ʼe feala ke tou ʼui age:
◼ “ ʼE mātou sio ʼe tokolahi te hahaʼi ʼe nātou fehufehuʼi peʼe maʼu ʼifea te ʼu tonu ʼe ʼaoga ki te ʼu faigataʼaʼia ʼo te maʼuli, ʼaē kua lahi ʼaupito. Neʼe kua koutou fakatokagaʼi koa la te fahaʼi ʼaia? [Tuku ke fai mai hana tali.] ʼI te temi muʼa, neʼe ko te agamahani te kumi tokoni ʼi te Tohi-Tapu. Kae ʼi te temi nei, tokolahi kua lotolotolua ki te fahaʼi ʼaia. Koteā takotou manatu ki te Tohi-Tapu?” Kapau ʼe lotolotolua mo ia ki tona moʼoni, tou toʼo ia te kiʼi pepa lotu Pourquoi avoir confiance en la Bible pea tou lau te lua mo te tolu palakalafe ʼo te pasina 2. Kapau ʼe ina ʼiloʼi ko te Tohi-Tapu ko te Folafola ʼa te ʼAtua, tou lau te ʼu vaega ʼe tuʼu ʼi te lua palakalafe ʼo te kiʼi pepa lotu, pea ke fakanounou tatatou palalau mo ia.
3 Kapau ʼe tokolahi te hahaʼi ʼo te telituale ʼe mole tui, tou faiga ʼo fakaʼaogaʼi te lua ʼuluaki palalau ʼo te pasina 11 ʼo te tohi Comment raisonner moʼo uga ai tanatou fia logo.
ʼE feala anai ke tou ʼui age:
◼ “ ʼUhi ko te ʼu faʼahiga meʼa ʼe fakatupu mamahi ki te mālama ʼaenī, tokolahi te hahaʼi fakamalotoloto ʼe faigataʼa tanatou tui ki te ʼAtua. Peʼe kapau, ʼe nātou tui kia te ia, kae ʼe mole nātou tui ʼe feala ke ina tokoniʼi ʼotatou ʼu faigataʼaʼia. Koteā koa takotou manatu? [Tuku ke fai mai hana tali.] Sio mai muʼa ki te meʼa ʼe fakahā mai e te kiʼi pepa lotu ʼaenī ʼo ʼuhiga mo te tagata, te poto fakatagata pea mo te Tohi-Tapu.” Tou lau te palakalafe nima ʼo te pasina 3 ʼo te kiʼi pepa lotu Pourquoi avoir confiance en la Bible.
4 Tou lagaʼi te ʼu fehuʼi ʼe tuʼu ʼi te kiʼi pepa lotu moʼo fakatafito ʼo he ʼaʼahi: Tou faigaʼi ke liliu te ʼuluaki felogoi ko he kamataʼaga ʼo he ʼu fai palalau ʼe ʼaoga. Ke ʼaua naʼa tou ʼui ʼe tonu ke tou palalau ki he ʼu meʼa lahi; ke ʼaua naʼa tou palalau fakahagatonu naʼa ʼui ai leva ʼe ia ʼaē ʼe fakalogo mai ʼe mole tou holi fakamalotoloto ki ai. ʼI te ʼosi lau ʼo te ʼu palakalafe e lua peʼe tolu ʼi te kiʼi pepa lotu, tou lagaʼi he fehuʼi ke feala ai he toe liliu mai ʼo ʼaʼahi ia.
5 Ohage la, ʼe feala ke tou fakatokagaʼi ia ia ʼaē ʼe palalau mo tatou ki te ʼuluaki palakalafe ʼo te pasina 5 pea mo fehuʼi age ki ai: “ ʼI takotou tonu, ʼe foaki mai koa e te Tohi-Tapu he ʼu fakamoʼoni lahi ke feala ai hatatou falala ki te maʼuli ki te temi ka haʼu ʼe ina fakahā mai?” Ko te fehuʼi ʼaia ʼe kamata ʼaki ai te ʼaʼahi ʼaē ʼe tou vakaʼi ai te ʼu kapite 9 pea mo 10 ʼo te tohi La Bible: Parole de Dieu ou des hommes?
6 Kapau ʼe tou tui moʼoni ki te maʼuhiga ʼo te ʼu manatu ʼaē ʼe tuʼu ʼi te tohi Parole de Dieu, ʼe tou fiafia anai mokā tou foaki te tohi ʼaia kia ia ʼaē ʼe palalau mo tatou. Vakaʼi naʼa galo ke tou fakahā te Tohi-Tapu Traduction du monde nouveau ʼi te temi fuli pe. Ko tatatou ʼu tohi ʼe foaki fakaʼofa ko tona totogi mole faʼa lahi; tou faiga ke tokolahi te hahaʼi ʼe nātou fakaʼaogaʼi moʼo hikihiki ʼo tanatou fia mahino ki te ʼu manatu faka tohi-tapu. ʼAua naʼa tou lotolotolua ʼo fakahā ki ʼotatou vāhaʼa fale pea mo ʼotatou famili.
7 Kapau ʼe tou sio ki he tahi ko he tisipulo mālohi, ʼe tou faigaʼi anai ʼi te fakaʼosi ʼo tatatou palalalau ke tou fai he fakatafito ʼo he ʼaʼahi.