Tou Kamata He ʼu Ako Faka Tohi-Tapu ʼAki Te Tohi Le plus grand homme
1 Ko te fai ʼo he ako faka tohi-tapu ʼi he ʼapi ʼe feala ke lelei pea mo ʼaoga kia koutou pea mo ia ʼaē ʼe fai palalau mo koutou. ʼE mole ʼi ai he meʼa ʼe tatau mo te fiafia ʼaē ʼi te vaevae ʼo te mālama ʼo te Tohi-Tapu mo niʼihi. — Taag. 11:25.
2 Fakaʼiloga ʼo te ʼu ʼaho fakamuli: Kapau neʼe koutou fakaʼaogaʼi te manatu ʼi te alatike ʼi ʼoluga pea mo kamata takotou fai palalau ʼaki te kiʼi pepa lotu Ko te malamanei ʼo te temi ʼaenī ʼe hāo anai koa?, ʼe feafeaʼi koa takotou kamata ʼi te temi nei he ako ʼo fakaʼaogaʼi te kapite 111 ʼo te tohi Le plus grand homme? Avahi te tohi ʼi te kapite 111, pea lau te ʼu ʼuluaki palakalafe e tolu. Pea feala ke koutou fai te ʼuluaki fehuʼi ʼi te fakaʼosi ʼo te kapite: “Koteā te tupuʼaga ʼo te fehuʼi ʼa te kau tisipulo, kae koteā te meʼa neʼe lagi nātou manatu kiai?” Tokoni ki ai ke ina maʼu te tali, pea fakaʼaogaʼi te paki moʼo akonakiʼi. ʼI te ʼosi lau ʼo te palakalafe fā ʼo aʼu ki te ono, fai te lua fehuʼi: “Koteā te faʼahi ʼo te lea faka polofeta ʼa Sesu neʼe hoko ʼi te taʼu 70 ʼo totatou temi, kae koteā te meʼa neʼe mole hoko ʼi te temi ʼaia?” Kapau ʼe hā mai tana fia logo pea kapau ʼe fealagia te temi, pea hoko atu takotou fai palalau.
3 Kapau ʼe hā mai ʼe ina leleiʼia he tahi temi, ʼe feala ke koutou fehuʼi age: “ ʼE ke fia ʼiloʼi koa niʼihi manatu ʼo ʼuhiga mo te faʼahiga meʼa ʼo te tuʼu ʼaenī?” ʼE feala ke koutou fai he fakatuʼutuʼu ke kotou liliu ʼo tali ki te fehuʼi.
4 ʼE feala koa he fīmālie ʼi te mālama? Kapau ʼe koutou fakaʼaogaʼi te kiʼi pepa lotu Une vie paisible dans un monde nouveau moʼo fakahā ʼo te tohi Le plus grand homme, ʼe feafeaʼi koa te kamata ʼo he ako faka tohi-tapu ʼaki te kapite 133?
ʼI te ʼosi lau ʼo 2 Petelo 3:13, ʼe feala takotou lau peʼe fakamatala fakanounou te palakalafe lua ʼo te pasina 3 ʼo te kiʼi pepa lotu pea koutou ʼui age:
◼ “Ko Sesu Kilisito, te ʼAlo ʼo te ʼAtua, ʼe ko ia anai ka Hau ʼi te Puleʼaga ʼo Sehova. Fakatokagaʼi peʼe feafeaʼi te fakahāhā ʼo Sesu ʼi te tohi Le plus grand homme de tous les temps pea mo fakahā mai kia tatou te meʼa ʼaē ka ina fakahoko anai ʼi te temi ka haʼu.” ʼOsi ʼaia pea koutou lau fuli te kapite. Fai age te ʼuluaki fehuʼi ʼaē ʼe tuʼu ʼi te fakaʼosi ʼo te kapite: “Koteā te pilivilesio maʼuhiga ʼe maʼu anai e te hahaʼi ʼaē ʼe maʼuʼuli ʼi Halamaketone pea mo tanatou ʼu fānau?’ [Tuku ke fai mai hana tali. Fai feiā ʼo ʼuhiga mo te fehuʼi ka hoko mai.] ʼE koutou loto koa ke koutou kau ki te kele foʼou ʼaē ka puleʼi anai e te Hau ko Sesu? ʼE ʼau loto ke ʼau haʼu ʼi te vāhaʼa fuli ʼo tokoniʼi koe ke ke vakaʼi ʼi te Tohi-Tapu peʼe feafeaʼi te ʼaoga ʼo te meʼa ʼaenī kia te koe.”
5 Ko ʼihi hahaʼi e lagi ʼe nātou loto anai ki he tahi ʼaʼahi moʼo fai palalau ʼo ʼuhiga mo Sesu Kilisito.
ʼE feala hakotou ʼui age:
◼ “Neʼe fai he faiga ʼi te tohi ʼaia moʼo fakahā ʼo te maʼuli ʼo Sesu ʼi te kele ohage pe ko tona tuʼu ʼi te ʼu Evaselio ʼaē e fā. ʼE ke loto koa ke lahi age tau ʼiloʼi he ʼu meʼa ʼo ʼuhiga mo te maʼuli ʼo Sesu ʼi te kele?” Kapau ʼe loto ia ki ai, ʼe koutou fai palalau anai ki te ʼuluaki milakulo ʼa Sesu ʼi te kapite 15.
6 ʼE kei ʼi ai pe te hahaʼi agatonu ʼe ʼoʼofa ki te faitotonu pea ʼe nātou kumi he ʼu tonu ki te ʼu faigataʼaʼia ʼe tau mo nātou. ʼIo, ko tatatou kau ki te ako ʼo te hahaʼi ʼo ʼuhiga mo Sesu Kilisito ʼaki he ako faka tohi-tapu ʼe fakapale anai tatatou ʼu faiga.