Tou “Palalau Fakanounou!”
1 Neʼe kua tuʼusi koa la takotou palalau e te hahaʼi logola neʼe koutou teuteuʼi fakalelei te ʼu palalau ʼaia, ʼo nātou ʼui fēnei atu: “Fakalelei age kae ʼe feala hatā palalau fakanounou! Koteā te fekau ʼaē ʼe ke haʼu ai?” Koteā te meʼa ʼaē ʼe feala ke tou tāʼofi mai te faʼahi ʼaia?
2 Ia ʼaho nei, ko te tokolahi ʼo te hahaʼi ʼe nātou fakavilivili. ʼE nātou fia ʼiloʼi pe ko ai tatou pea mo te tupuʼaga ʼo tatatou ʼōmai kiō nātou. Ka nātou ʼiloʼi ʼe tou fia palalau ki te Tohi-Tapu, ʼe lagi nātou fakafisi mai anai. Ki te hahaʼi tokolahi, ʼe mole maʼuhiga te lau ʼo te Tohi-Tapu pea mo te ʼu fai palalau ʼo ʼuhiga mo te ʼu meʼa faka lotu. ʼE lava feafeaʼi hatatou fakalotoʼi te hahaʼi ke nātou palapalalau mo tatou ʼo ʼuhiga mo he puani faka Tohi-Tapu?
3 Te ʼu Faʼahiga Fai ʼAē ʼe Fua Lelei: Ko te meʼa ʼaē ʼe maʼuhiga tāfito, ʼe tonu ke tou fakahā ki te hahaʼi, ʼe feala hanatou maʼu ʼi te Tohi-Tapu he ʼu puleʼaki ki tonatou ʼu fihifihia, pea ʼe tonu ke tou palalau fakanounou. Ko te ʼu fai palalau ʼaē ʼe fua lelei, ʼe kamata ʼaki he fehuʼi ke feala ki te hahaʼi ke nātou fakakaukauʼi, ʼosi ʼaia pea tou fakahā age kia nātou he vaega Tohi-Tapu ʼe ina tali anai ki te fehuʼi ʼaia. ʼE lagi koutou fiafia anai mo kapau ʼe koutou ʼahiʼahi te ʼu faʼifaʼitaki ʼaenī. Ko te ʼu faʼifaʼitaki ʼaenī ʼe tokoni mai anai ke tou “palalau fakanounou” pea ke tou fakatupu te fia logo ʼa te hahaʼi.
4 ʼI te ʼu telituale ʼaē ʼe tau ʼui e te hahaʼi ʼe mole nātou fia logo, koutou lagaʼi he fehuʼi ʼe pipiki ki tonatou maʼuli:
◼ “ ʼI tatatou fakaōvi ki te taʼu 2000, ʼe ke loto falala koa ʼo ʼuhiga mo te ka haʼu peʼe ke lotolotolua? [Tuku ke fai mai hana tali.] Neʼe fakakikite e te Tohi-Tapu te ʼu maveuveu ʼaē ʼe tou sio kiai ia ʼaho nei, pea mo tonatou ikuʼaga.” Koutou lau ia 2 Timoteo 3:1, 2, 5 mo Tāʼaga Lea 2:21, 22.
◼ “ ʼI totatou fenua, ʼe tokolahi te hahaʼi ʼaē ʼe nātou tuʼaniaʼi te ʼu mahaki. ʼE ke ʼiloʼi koa la ʼe fakapapauʼi mai e te ʼAtua ʼe ina pulihi anai te ʼu mahaki ʼo talu ai?” Koutou lau ia Apokalipesi 21:3, 4.
◼ “ ʼI tau manatu, koteā anai te ʼu fua ki totatou kolo, mo kapau ʼe maʼuliʼi e te hahaʼi fuli ʼaē ʼe nonofo ʼi henī, te ʼu pelesepeto faka Tohi-Tapu?” Koutou lau ia Mateo 22:37-39.
5 Mai tona ʼuhiga ʼaē ʼe ko tatatou maʼua ko te faka mafola te logo lelei ʼo te Puleʼaga, koia ʼe tonu ai ke tou faiga mālohi ke tou fakatokagaʼi ki te hahaʼi te ʼu gāue ʼaē ka fai e te Puleʼaga. ʼE feala hakotou ʼui fēnei:
◼ “ ʼE ke ʼiloʼi koa la ko te tohi ʼāfea tokotahi ʼo te malamanei, te Tohi-Tapu, neʼe kua ina fakakikite ʼe puleʼi anai te malamanei katoa e te Puleʼaga pe e tahi?” Koutou lau ia Taniela 2:44.
◼ “ ʼI tau manatu, ʼe feafeaʼi anai te ʼaluʼaga ʼo te malamanei mo kapau neʼe puleʼi e Sesu Kilisito te kele?” Koutou lau ia Pesalemo 72:7, 8.
6 ʼI te ʼu telituale ʼaē ʼe tauhi lotu lelei ai te hahaʼi, ʼe feala hakotou ʼahiʼahi te ʼu ʼuluaki palalau ʼaenī:
◼ “Ko te tokolahi ʼo te hahaʼi ʼe fakakeheʼi nātou heʼe nātou fafine, peʼe tagata, peʼe ʼuhi ko tanatou lotu, peʼe ko tanatou lanu. ʼI tau manatu, ʼe tali koa e te ʼAtua te ʼu aga fakapalatahi ʼaia?” Koutou lau ia Gaue 10:34, 35.
◼ “ ʼE tou ʼiloʼi neʼe lahi te ʼu milakulo neʼe fakahoko e Sesu Kilisito ʼi tona temi. Kapau neʼe feala hau kole age ke ina fakahoko he tahi milakulo, koteā te milakulo ʼaia?” Koutou lau ia Pesalemo 72:12-14, 16.
7 Kapau ʼe mole fia avahi atu te matapā, ʼe feala hakotou fai te palalau ʼaenī:
◼ “Ko te tokolahi ʼo te hahaʼi kua nātou fiu ʼi te logo ki te ʼu fihifihia. ʼE nātou fia fakalogo ki he ʼu puleʼaki ʼo ʼuhiga mo te ʼu faʼahi ʼaia. ʼE ʼau mahalo, ʼe toe feiā mo koe. Kae kofea koa ʼaē ʼe feala ke tou maʼu ai te ʼu puleʼaki moʼoni ki totatou ʼu faigataʼaʼia?” Tuku ke fai mai hana tali. Koutou lau ia 2 Timoteo 3:16, 17.
8 He Koʼe ʼe Mole Koutou ʼAhiʼahi Te ʼu Tokoni ʼAia? ʼI te agamāhani, ʼe feʼauga pe hakita fai he fehuʼi faigafua ke tupu ai he fia logo ʼa te hahaʼi. Ko te fafine neʼe fakafeagai ki te moʼoni ki muʼa atu, neʼe ina fakaafe te ʼu tuagaʼane e lua ki tona ʼapi, he neʼe fai age kia ia e te tahi tuagaʼane te fehuʼi ʼaenī: “ ʼE ke ʼiloʼi koa pe koteā te Puleʼaga ʼaē ʼe ke faikole kiai ʼi te Tāmai ʼaē ʼi selo?” Neʼe punamaʼuli te fafine ki te fehuʼi ʼaia pea neʼe ina tali ke fai hana ako Tohi-Tapu. ʼI te temi nei, kua ina foaki tona maʼuli kia Sehova!
9 Ka koutou fai palalau mo te hahaʼi, koutou aga fakamalotoloto. Koutou palalau ʼaki tokotou loto. ʼE tali gafua anai tatou e te hahaʼi mo kapau ʼe nātou sio ʼe tou loto tokaga moʼoni kia nātou.—Gaue 2:46, 47.
10 Ko te gāue ʼaē ko te faka mafola ʼo te logo lelei, ʼe ko he meʼa faigataʼa ia ʼaho nei. ʼE mole falala te hahaʼi kia nātou ʼaē ʼe mole nātou ʼiloʼi. Pea ko ʼihi ʼe nātou maʼumaʼua ʼaupito pea ʼe mole honatou temi ke nātou fai palalau mo tatou. Kae ʼe mahino lelei kia tatou, ʼe ʼi ai te ʼu hahaʼi ʼe tau mo feʼauga ke nātou ʼiloʼi te moʼoni. (Mat. 10:11) ʼE fua lelei anai tatatou ʼu faiga ke tou maʼu te hahaʼi ʼaia, mo kapau ʼe tou foimo fai tatatou fekau pea mo tou “palalau fakanounou!”