Tou Kau Fakatahi Ke Fua Lelei Totatou Minisitelio Fakamaʼuli Hahaʼi
1 Ko te ʼapositolo ko Paulo neʼe ina fakaʼaveʼave tana fakahā ʼo te logo lelei koteʼuhi “ke ina foimo hāofaki niʼihi”. (1 Ko. 9:19-23.) Tahi ʼaē meʼa, ʼe tou maʼu anai he fua lelei ʼi totatou minisitelio mokā ʼe tou nonofo tokaga ʼo fakasiosio lelei te ʼu meʼa ʼaē ʼe ʼaoga ki he tahi pea mo teuteu ʼo fakaʼaveʼave tatatou fai palalau ki tana ʼu manatu. ʼE mole faigataʼa anai mokā ʼe tou foaki age Te Tule Leʼo pea mo te Koutou ʼaʼala! peʼe ko he kaupepa ʼi tatatou ʼu kaupepa lalahi.
2 ʼI te ʼosi ʼo takotou fakamālo, ʼe feala hakoutou kamata ʼui age fēnei ʼaki ʼakotou palalau māhani:
◼ “Tokolahi ʼe nātou loto heʼe ʼamanaki ki te mole fealagia ʼa te ʼu puleʼaga fakamālama ʼo nātou foaki mai he ʼu tonu lelei ki te ʼu faigataʼaʼia ʼo totatou temi. ʼE ʼi ai ʼihi ʼe nātou tukuga koviʼi te ʼu puleʼaga ʼo ʼuhiga mo tanatou ʼu faigataʼaʼia. ʼI tau manatu ʼe ʼi ai koa he puleʼaga ʼe feala ke ina foaki fakalelei mai te ʼu meʼa fuli ʼaē ʼe ʼaoga kia tatou? [Tuku he fealagia ke fai mai hana tali.] ʼE ke ʼiloʼi koa ʼe ʼi ai te fakapapau moʼoni ʼo he puleʼaga ka ina pulihiʼi fuli anai te ʼu faigataʼaʼia ʼe tau mo tatou?” Fakalogo fakalelei ki te tali ʼa te pule ʼo te loto fale. ʼAki tana tali mai, ʼe tou faiga ʼo fakahā age he faʼifaʼitaki ʼi te ʼu faʼifaʼitaki atu ʼaē.
3 Kapau ʼe hā mai ʼi tana tali ʼe ina ʼui ko ia ko te kilisitiano, ʼe feala ke tou fehuʼi age peʼe ina fai te faikole ʼaenī ko te “Tāmai ʼe ʼi selo”. Kapau ʼe ina ʼio kiai, ʼe feala ke tou fakamanatuʼi age te faikole ʼaia ʼo aʼu ki te puani ʼaē ʼe ʼui ai, “ke hoko mai tou puleʼaga! Ke fai tou finegalo ʼi te kele, ohage ko selo!” (Mat. 6:9, 10). ʼE hā mai ai ko te finegalo ʼo Sehova ka fakahoko anai ʼi he ʼaho ʼi te kele. ʼE feala ke koutou fakaʼaogaʼi he alatike ʼe ʼaoga ʼi Te Tule Leʼo peʼe ko te Koutou ʼaʼala! peʼe ko he kaupepa lahi ʼe ʼalu tahi mo te ʼu manatu ʼaē ʼe fakahā, ohage ko te pasina 3 ʼo te kaupepa Kote puleaga ae ka ina fakatuu anai te Palatiso.
4 Kapau ʼe hā mai ko he tahi ʼe mole tui ki te ʼAtua, ʼe feala ke fakaʼaogaʼi ia Hepeleo 3:4 pea mo te pasina 4 ʼo te kaupepa ʼE tokaga moʼoni koa te ʼAtua kia tatou? Lau ia te ʼu palakalafe 1 pea mo te 2 pea mo fai te fehuʼi ʼe tuʼu ʼi te lalo pasina. Peʼe feala ke ke fakahā age he alatike ʼo he nusipepa fakamuli.
5 Kapau ko he tahi ʼe hage ʼe fiafia ʼi tona faʼahiga maʼuli, ʼe feala ke koutou fehuʼi age:
◼ “He koʼe ʼe tonu ke tou vakaʼi fakalelei peʼe koteā te ʼui mai ʼa te Tohi-Tapu ʼo ʼuhiga mo te ʼu puleʼaga ʼi te temi ka haʼu?” Kapau ʼe tou fakaʼaogaʼi te manatu ʼaē ʼe tuʼu ʼi te tohi Comment raisonner ʼi te pasina 175, ʼo fakahā fakanounou age he manatu ʼi te ʼu tupuʼaga ʼaē e valu ʼe tuʼu ʼi ai. Kapau ʼe ina fakahā mai tana fia logo, tou fakaʼaogaʼi te kiʼi pepa lotu Ko te malamanei ʼo te temi ʼaenī ʼe hāo anai koa? ʼo kamata ʼaki te ʼuluaki palakalafe ʼo te pasina 2, moʼo fakahoko atu ʼo te fai palalau.
6 Ko takotou ʼuluaki felogoi ʼe mole feala ke fua lelei mo kapau ʼe mole koutou uga tana fia logo ki he tahi ʼaʼahi. Koia, ʼe tou ʼiloʼi papau ko te fai ʼo he fehuʼi lelei pea mo fakapapau age ʼe tou ʼomai anai ʼo tali mokā tou toe liliu mai.
7 ʼAki te ʼu manatu ʼaē neʼe kua tou vakaʼi, tou fili he palalau ʼe tou faigamalie ai. Faiga ke ʼalu tahi te ʼu manatu ʼaia mo tokotou telituale. Ke tou fakamamahani mo te ʼu kaupepa lalahi, te ʼu kiʼi pepa lotu, pea mo te ʼu alatike ʼo te ʼu nusipepa ʼaē ʼe koutou fakaʼaogaʼi, ʼe feala ai ke koutou fakaʼaveʼave fakavilivili takotou fai palalau ki te ʼu meʼa ʼaē ʼe ʼaoga ki ai. ʼE feala ke tou teuteuʼi fakalelei ʼatatou ʼu fakahā “ ʼuhi ko te logo lelei” pea ke tou faiga ke fua lelei ʼi te minisitelio fakamaʼuli hahaʼi ʼaia. — 1 Ko. 9:23.