Tou Liliu Fakafiafia ʼo Tokoniʼi Te Hahaʼi ʼAē Neʼe Fia Logo
1 Ko nātou fuli ʼaē ʼe kau ki te fai faka mafola ʼi te ʼu ʼapi ʼe nātou holi ke nātou tokoniʼi te hahaʼi ʼaē ʼe fia logo. ʼI te foaki ʼo te taʼi tokoni ʼaia, ʼe tou maʼu ai te fiafia pea mo te loto fiafia lahi (Fakatatau mo Pesalemo 126:5, 6). Ko te meʼa ʼaia ʼe tonu ke tou teuteuʼi.
2 Moʼo teuteu ʼe tonu ke kamata tohi he ʼu manatu kehekehe ʼi tatatou ʼu pepa nota ʼo te ʼu ʼapi. Tohi te manatu ʼo te ʼuluaki fai palalau pea mo te aga ʼa he tahi. ʼE feala foki takotou tohi peʼe feafeaʼi takotou kamata palalau mokā ʼe koutou toe liliu mai.
3 Ohage la, mo kapau ʼe koutou ʼuluaki fakaʼaogaʼi te faikole Tāmai ʼe ʼi selo pea mo tuku te kaupepa “Puleaga” ʼe feala ke koutou ʼui age fakanounou fēnei:
◼ “ ʼI taku ʼaʼahi kua hili, neʼe tā palalau peʼe feafeaʼi te fai ʼo te finegalo ʼo te ʼAtua ʼi te kele pea ʼe fakatuʼu anai te fīmālie ʼi te ʼu faʼahi fuli ʼo te maʼuli. ʼI te kaupepa ʼaē neʼe ʼau tuku atu, koutou vakaʼi te talanoa ʼaē ʼi te pasina 29 ʼo ʼuhiga mo ʼihi ʼu tapuakina ʼe foaki mai anai e te Puleʼaga ʼo te ʼAtua ki te malamanei.”
4 Kapau ko he tahi ʼe lotolotolua ʼo ʼuhiga mo te ʼAtua, tou ʼui age fēnei:
◼ “ ʼI taku haʼu talu mai, neʼe tā palalau ki te puani neʼe tohi e Paulo ia Hepeleo 3:4, ʼe ina foaki mai he ʼu tupuʼaga lelei ke faka tui ai ko ia ko te Tupuʼaga poto ʼo te ʼu meʼa fuli.” Tou toe lau age te vaega pea mo fakaʼaogaʼi te ʼu pasina 4 ki te 9 ʼo te kaupepa ʼE tokaga moʼoni koa te ʼAtua kia tatou? toe hoko te fai palalau ʼi te faʼahi neʼe tuʼu ai ʼi te temi ki muʼa atu. Fai he fehuʼi pea ʼosi ʼaia pea lau te palakalafe, tuku age he fealagia ki he tahi ke fai mai hana tali ki te fehuʼi. Kapau ʼe feala, ʼui age ki ai ke ina toʼo tana kaupepa pea ke tou vakaʼi fakatahi te ʼu manatu.
5 Kapau ʼe hage ʼe fiafia ia, ʼi te faʼahi fakamālama peʼe ko he tahi ʼatu faʼahi, lolotoga takotou ʼuluaki palalau, ʼe feala ke koutou toe fakaʼaogaʼi te kiʼi pepa lotu Ko te malamanei ʼo te temi ʼaenī ʼe hāo anai koa? pea lau te meʼa ʼaē ʼe tuʼu ʼi te pasina 6. Fehuʼi age ki ai peʼe fia maʼuli ʼi he palatiso fakatalakitupua ʼi te kele. Moʼo tokoniʼi ke koutou fakafuafua peʼe lahi tana fia logo, koutou fehuʼi age pe koteā tana manatu mo fakaloto mālohiʼi ia ʼaki he ʼu paki peʼe ko he manatu ʼe tuʼu ʼi te nusipepa ʼaē ʼe koutou fakaʼaogaʼi.
6 Toe fai feiā pe ʼaki te fakaʼaogaʼi ʼo te alatike neʼe koutou fai palalau ki ai ʼi Te Tule Leʼo peʼe ko te Koutou ʼaʼala! Faka maʼuhigaʼi te alatike ʼaē neʼe koutou fakaʼaogaʼi ʼi takotou ʼuluaki ʼaʼahi pea ʼosi ʼaia fakahā age he tahi puani ʼe ʼaoga ʼi te alatike ʼaia peʼe ko he tahi nusipepa ʼe ia koutou. Kapau ʼe feala, lau fakatahi he vaega pea fehuʼi age ki ai pe koteā tana manatu.
7 ʼAua naʼa koutou lotolotolua ʼo fakahā te apone. Koutou fakahā age te ʼu tapuakina ʼe koutou maʼu mai ai, tāfito te maʼu ʼaē ʼo he lautohi fakaloto mālohi tuʼumaʼu.
8 Vakaʼi naʼa galo ko tokotou fakatuʼutuʼu ko te kamata ʼo he ako faka Tohi-Tapu. ʼI te agamahani ʼe tonu ke lahi he ʼu fai palalau ke tuputupu ai te lahi ʼo te fia logo. Fakahā age ki ai ʼe koutou tokaga ki tana fia logo ʼo koutou toe liliu fakavilivili age.
9 Ko te logo lelei ʼaē ʼe tou faka mafola ʼe tupu ai he fiafia lahi (Luka 2:10). Kapau ʼe tali fakalelei e te hahaʼi tatatou ʼu faiga, ʼe ko he tupuʼaga moʼoni ʼaia ʼo te fiafia (Filp. 4:1). ʼE tou utu anai he fiafia feiā mokā ʼe tou liliu ʼo tokoniʼi te hahaʼi ʼaē neʼe fia logo ʼaē neʼe felāveʼi mo tatou ʼi te fai faka mafola.