Ko Te Teuteu—Ko He Fakatuʼutuʼu Ki He ʼu ʼAʼahi ʼe Fua Lelei
1. Neʼe mafola feafeaʼi ia te minisitelio Fakakilisitiano?
1 Neʼe teuteuʼi fakalelei e Sesu ia tana kau tisipulo ke natou liliu ko he kau fai fakamafola faiva ʼo “te logo lelei ʼo te puleʼaga.” (Mat. 4:23; 9:35) Neʼe akoako nātou e Sesu ke natou fai fakamafola pē ʼi Palesitina. Kae, ʼi muʼa ʼo tana hake ki te lagi, neʼe fakahā e Sesu ʼe mafola lahi anai ia te minisitelio Fakakilisitiano ʼo ʼuhiga mo te “fai ʼo ni ʼu tisipulo ʼi te hahaʼi ʼo te ʼu fenua fuli pē.”—Mat. 28:19, 20.
2. Koteā ʼaē ʼe ʼaoga ke tou fai ke tou fakalogo ai ki te fakatotonu ʼa Sesu ʼaē ‘ki te fai ʼo ni ʼu tisipulo’?
2 Ko te gāue ʼaia ʼe ko te toe liliu ʼo ʼaʼahi ia te hahaʼi ʼaē neʼe natou tali ia te logo lelei ʼo te Puleʼaga ʼo te ʼAtua pea mo akoʼi age kiā nātou ke natou mulimuli ki te ʼu meʼa fuli ʼaē neʼe fakatotonu mai e Kilisito. Ke fua lelei tatatou ʼu ʼaʼahi, ʼe tonu ke tou teuteu fakalelei.
3. ʼI takotou ʼuluaki fai palalau, ʼe feafeaʼi hakotou teuteuʼi ia he ʼaʼahi?
3 Tou Teuteu Fakatomuʼa: Ko ʼihi kau fai fakamafola ʼe natou lagaʼi ia he fehuʼi ʼi te fakaʼosi ʼo te ʼuluaki fai palalau pea natou fakapapau age ʼe natou toe liliu mai pea mo tali ki te fehuʼi. ʼE natou fakatokagaʼi ʼi tanatou fakatafito ia tanatou fai palalau ki te tohi Te Ako Mai Te Tohi-Tapu ʼo ʼuhiga mo tanatou toe liliu ʼo fai te ʼaʼahi, ʼe tokoni kiā nātou ke natou kamata he ako Tohi-Tapu.
4. He koʼē ʼe mole tonu ke tou fakatuatuai ia tatatou toe liliu ʼo fai ia te ʼaʼahi ki te hoki tau mai ʼo te ʼu nusipepa foʼou?
4 Ko te tuku ʼo he ʼu nusipepa ʼi te māhina fuli ʼe mole fakaʼuhiga leva ke tou ʼatalitali ke hoki tau mai ia te ʼu nusipepa foʼou pea hoki tou toe liliu ʼo fai te ʼaʼahi. ʼE feala pē ke tou uga ia te fia logo ʼa te hahaʼi ʼaki te ʼu manatu ʼo te nusipepa ʼaē neʼe kua tuku age.
5. He koʼē ʼe lelei ke kotou fai hakotou fakatuʼutuʼu mo kapau ʼe kotou toe liliu ʼo ʼaʼahi he tahi?
5 Tou Fai He Fakatuʼutuʼu: ʼI muʼa ʼo takotou toe liliu ʼo fai te ʼaʼahi, kotou toʼo he ʼu kiʼi minuta ke kotou toe vakaʼi takotou ʼu nota pea mo fakakaukauʼi ia te manatu ʼaē kā kotou talanoa kiai. Ohagē lā, kotou talanoa ki he puani ʼo te tohi ʼaē neʼe kua kotou tuku age peʼe ko he tahi age tohi ʼe ʼalutahi mo te ʼu manatu ʼaē neʼe kua kotou ʼuluaki palalau kiai. Kapau neʼe kotou lagaʼi he fehuʼi ʼi takotou ʼuluaki fai palalau, pea ʼe mahino ia ʼe kotou fakatuʼutuʼu anai ke kotou tali ki te fehuʼi ʼaia. Kotou faigaʼi ke kotou lau age he vaega ʼi te Tohi-Tapu moʼo fakamoʼoni ʼaki he puani ʼe tonu ke fakamahino.
6. Koteā ʼaē ʼe tou fakatuʼutuʼu kiai mokā ʼe tou toe liliu ʼo ʼaʼahi he tahi?
6 Te Fakatuʼutuʼu ʼAē ʼe Tonu Ke Tou Faiga Kiai: ʼE mahino ia, ʼe tou fakatuʼutuʼu ke tou kamata ia he ako Tohi-Tapu. ʼI te ʼaʼahi ʼa te tehina, neʼe ina fakaʼui age ki te tagata ke fai hana ako Tohi-Tapu, kae neʼe fakafisi age te tagata. Neʼe toe liliu ia te tehina pea mo te ʼu nusipepa fakamuli pea neʼe ina ʼui fēnei age ki te tagata ʼaia: “ ʼI tamatou fai fakamafola ʼaenī, ʼe matou tali ki te fehuʼi Fakatohi-tapu ʼe ʼaoga ki te hahaʼi iā ʼaho nei.” ʼI te kua tali age ʼa te tagata ki te fehuʼi, pea neʼe lau age e te tehina ia te vaega Tohi-Tapu pea mo te palakalafe ʼo te tohi ako Tohi-Tapu. Ko he faʼahi neʼe feala ke fai tuʼumaʼu ai hana ako Tohi-Tapu.
7. ʼE tokoni feafeaʼi atu ia takotou teuteu lelei ke kotou kamata ia he ako Tohi-Tapu?
7 Ko te temi ʼaē ʼe tou fakaʼaogaʼi moʼo teuteuʼi ai tatatou ʼu ʼaʼahi ʼe ʼi ai anai tona ʼu fua lelei. ʼE tuputupu ai anai totatou fiafia, pea ʼe tou maʼu ai anai ia te pilivilēsio ʼaē ke tou tokoni ki he tahi e “lotolelei” ke haʼele ʼi te ala ʼo te maʼuli.—Gāue 13:48.