Ko He ʼu ʼAʼahi ʼe Liliu Ko He ʼu Ako Tohi-Tapu
1. He koʼe ʼe maʼuhiga te ʼu ʼaʼahi?
1 Neʼe fekauʼi e Sesu tana kau tisipulo ke nātou fai faka mafola pea mo “fai ni ʼu tisipulo . . . ʼo . . . ako ia nātou.” (Mat. 28:19, 20, MN ) Ko he tahi ʼe fai faka mafola ʼe ina tala he logo, kae ʼe lahi age te gāue ʼaē ʼe fai e ia ʼe ina akoʼi he tahi. ʼE ina akoʼi, mo fakamahino, pea mo kumi he ʼu fakamoʼoni. Ko he faʼahiga fai moʼo akoʼi ʼo te hahaʼi, ʼe ko te ʼu ʼaʼahi kia nātou ʼaē ʼe fia logo, ʼaki te fakatuʼutuʼu ʼaē ke tou kamata hanatou ako Tohi-Tapu.
2. Ko ai ʼaē ʼe tonu ke tou ʼaʼahi?
2 Ko ai ʼaē ʼe tonu ke koutou ʼaʼahi? Koutou tokaga ʼo ʼaʼahi ia nātou fuli ʼaē neʼe nātou tali hanatou tohi, pe neʼe nātou fakahā ʼe nātou fia logo ki te logo lelei. Kapau ʼe koutou maʼu he tahi ʼe fia logo ʼi takotou fai fagonogono faigamālie, pea koutou faiga ke koutou ʼiloʼi tona tuʼasila peʼe ko tona numelo telefoni, ke feala hakotou toe ʼaʼahi ia ia. Koutou taupau te manatu ʼaē ʼe koutou kamata anai he ʼu ako Tohi-Tapu. Koutou haga kumi ia nātou ʼaē ʼe nātou tali anai hanatou ako Tohi-Tapu, pea ʼe mahino ia ʼe koutou maʼu anai he ʼu hahaʼi.—Mat. 10:11.
3, 4. Koteā ʼaē ʼe tonu ke fai ke fua lelei te ʼu ʼaʼahi?
3 Tou Tokagaʼi Te ʼu Meʼa ʼAē ʼe ʼUi e Te Hahaʼi: Kapau ʼe koutou loto ke fua lelei takotou ʼaʼahi, pea ʼe tonu ke tou teuteuʼi lelei takotou ʼuluaki fai palalau. Ko te kau fai faka mafola ʼo te logo lelei ʼaē ʼe gāue lelei ʼe nātou tokagaʼi te ʼu meʼa ʼaē ʼe ʼui e he tahi, pea ʼe nātou fakaʼaogaʼi te faʼahi ʼaia moʼo fakatafito kiai hanatou ʼu fai palalau ki ʼamuli. ʼE fua lelei ki ʼihi tanatou lagaʼi he fehuʼi ʼi tanatou ʼosi fai palalau, ke feala kia ia ʼo te ʼapi ke ina tali ke nātou toe liliu age. ʼUhi ko tatatou ʼofa fakamalotoloto ki te hahaʼi, ʼe tou haga manatuʼi tuʼumaʼu anai ia nātou ʼi tatatou ʼosi mavae, pea mo tou toe liliu fakavilivili anai ʼo ʼaʼahi nātou. Kapau ʼe feala, hili he ʼaho e tahi peʼe lua, koutou foimo ʼolo ʼo ʼaʼahi nātou, ʼi tanatou kei fia ʼiloʼi.
4 Ka koutou ʼaʼahi he tahi, koutou faiga ke koutou hoko atu takotou ʼuluaki fai palalau. Koutou fakatuʼutuʼu ʼi takotou ʼaʼahi, ke koutou vaevae mo ia he vaega faka Tohi-Tapu e tahi ʼe fakaloto mālohi, pea mo koutou fakalogo lelei. Koutou faiga ke koutou ʼiloʼi lelei ia ia. Pea ʼi takotou ʼu ʼaʼahi ki muli age, koutou vaevae mo ia he ʼu moʼoni ʼo te Folafola ʼa te ʼAtua ʼe ʼalutahi mo tona ʼaluʼaga.
5. ʼE tou lava kamata feafeaʼi he ʼu ako Tohi-Tapu?
5 Tou Manatuʼi Ke Tou Kamata He Ako Tohi-Tapu: Tou fai te ʼu ʼaʼahi ʼaki te fakatuʼutuʼu ʼaē ke tou kamata he ʼu ako Tohi-Tapu. ʼE tou lava fakahoko feafeaʼi te faʼahi ʼaia? Koutou fakahā age ʼe koutou fia vaevae mo ia he manatu ʼe maʼuhiga, pea koutou fakahā age he palakalafe ʼi te tohi ʼo Te ʼAtamai Mālama peʼe ko te kaupepa Fakamaʼua ʼe koutou fakafuafua ʼe fia logo anai kiai. Koutou lau age te palakalafe, mo vakaʼi te fehuʼi, pea mo koutou fai palalau ki he vaega faka Tohi-Tapu e tahi peʼe lua. ʼE feala ke koutou fai te faʼahi ʼaia ʼi tona gutu matapā ia minuta e nima peʼe hogofulu. Koutou fakaʼosi ʼaki he fehuʼi ʼe hoa kiai, pea koutou fakatuʼutuʼu ke koutou hoko atu te fai palalau ʼi he tahi ʼaho.
6. ʼE tou lava fakahā feafeaʼi ʼe tou mahino ki te maʼuhiga ʼo te ʼu ʼaʼahi?
6 Ko te ʼaʼahi ʼo te ʼu hahaʼi fuli ʼaē neʼe fia logo, ʼe ko he faʼahi maʼuhiga ʼaia ʼo tatatou minisitelio. Koia tou fakaʼaogaʼi he temi ʼi tatatou polokalama ʼi te vāhaʼa ke tou fai te ʼu ʼaʼahi. ʼE fua lelei age anai tatatou minisitelio pea mo tou fiafia moʼoni anai.