Tou Tali Te Maʼua ʼAē Ko Te Fai ʼo He ʼu ʼAʼahi Foʼou
1 ʼE lahi te ʼu faʼahiga meʼa ʼe ina ʼekenaki ai tatou ke tou fai fakaleleiʼi te ʼu ʼaʼahi foʼou. Ohage ko Paulo, ʼe tou holi ānai ʼo fai fakamalotoloto te gāue neʼe tuku mai kia tatou (Gāue 20:21, 24). Kapau ʼe tou faiga fakamalotoloto ʼo liliu ʼo toe ʼaʼahi te ʼu hahaʼi neʼe fia logo ki te moʼoni, ʼe ia tatou he leʼo ʼo loto ʼe lelei, koteʼuhi he neʼe tou faigaʼi ʼo fakahoko fakaleleiʼi totatou minisitelio. — 2 Tim. 4:5.
2 Ko te ʼiloʼi ʼo te moʼoni ʼe ina fakamaʼua tatou: ʼE lahi te ʼu maʼuli ʼe tonu ke hāofaki; koʼena te fahaʼi ʼe ina uga ai tatou ke tou faʼa fai ʼi tatatou ʼu ʼaʼahi foʼou (Soane 17:3). ʼAki tatatou mahino ki te ʼaho fakamāu ʼo Sehova pea mo te kua ōvi mai ʼo Alamaketone, ʼe tonu ke ia tatou he holi mālohi, mole gata ʼaki pe te fakahā ki te kau agakovi, kae toe tokoniʼi foki ʼonatou ʼaē ʼe ‘mamahi pea mo tagi ʼuhi ko te ʼu meʼa fakalialia fuli ʼe hoko ʼi te kele’. (Esk. 9:4.) ʼE tonu ke natou hu ki te kautahi ʼo Sehova ʼi te kele.
3 ʼE ʼaoga ke tokoniʼi te hahaʼi ke natou mahino tāfito ki te moʼoni (Gāue 8:30, 31; 18:26). Kia tatou e ko te tahi ʼaia tupuʼaga ʼo tatatou tali te maʼua ʼaē ko te liliu ʼo toe ʼaʼahi te hahaʼi pea mo “fakavai” te ʼu fua ʼo te moʼoni neʼe kua ʼosi to. ʼE aʼu ki fea tatatou faiga ki te ʼu meʼa kai fakalaumālie mo ka na pau neʼe mole haʼu he tahi ʼo tokoniʼi tatou ke tou ʼiloʼi te moʼoni ʼo ʼuhiga mo Sehova pea mo tona finegalo fakatalakitupua? — Mat. 7:12.
4 Tou agaʼofa pea mo faiva: Ko te ʼu ʼaʼahi foʼou ʼe ko he faʼahi ʼaia ʼe fakahā ai totatou ʼofa ki te kāiga. Neʼe ʼui fēnei e te tehina kivi e pionie katoa: “Mai te ʼaho neʼe ʼau papitemaʼi ai, neʼe ia te ʼau te holi ke ʼau vaevae te ʼu meʼa neʼe ʼau ako ʼi te Tohi-Tapu. Neʼe ʼau fiafia ʼuhi ko toku mahaki neʼe mole ina fakatapuʼi ʼau ki te fahaʼi ʼaia. (...) Neʼe ʼau akoʼi foki ʼo manatuʼi te ʼu ʼapi ʼi he ala, ʼo feala ai haku toe ʼalu ʼo ʼaʼahi natou ʼaē ʼe fia logo ʼaki he ako faka tohi-tapu.” Ko te tehina kivi ʼaia ʼe sio ia ʼaki tona loto, pea ʼe mole lotololua ia ʼo fakahā tona ʼofa fakakilisitiano ʼo ʼalu ʼo fai he ʼu ʼaʼahi foʼou.
5 ʼI te ʼu ʼaʼahi foʼou, ʼe tou fakaʼaoga fakaleleiʼi te Tohi-Tapu pea mo fakahā te tupuʼaga ʼo te falala ʼe ia tatou (1 Petelo 3:15). ʼUluaki, ko te fahaʼi ʼaia, ʼe tokoni ai ki he tahi pea, lua, ʼe toe faigaʼi ai tatatou faiva pea mo totatou fakafetaʼi ki te moʼoni. Ko te ʼu ʼaʼahi foʼou ʼe ina foaki mai ānai he fiafia lahi ʼe mole feala ke tou toe maʼu ʼi he tahi atu fahaʼi. Pea ko te fiafia ʼaia ʼe mole toe puli ānai ia. ʼE feala ke tou fakafoʼou ʼo tuʼumaʼu tatatou fiafia ʼo faiva ʼi te ʼu ʼaʼahi foʼou. — Taag. 10:22.
6 ʼE tonu ke tou fai fakaleleiʼi totatou maʼua ʼaē ko te fai ʼo te ʼu ʼaʼahi foʼou. Ko te kau kaugana ʼa Sehova ʼe mole natou fakafisi ki te fai ʼo he meʼa ʼe lelei ki he kāiga, ʼe hā te fahaʼi ʼaia ʼi te gāue neʼe tou fai ʼi te malamanei katoa lolotoga ʼo te taʼu gāue 1991 (Taag. 3:27). Neʼe tou fai te ʼu ʼaʼahi foʼou e 344 926 952 pea mo te ʼu ako faka tohi-tapu e 3 947 261 ʼi te ʼu ʼapi. ʼO hoko atu ki ai mo te 300 945 tisipulo foʼou neʼe foaki tonatou maʼuli kia Sehova pea natou fakahā ʼaki tanatou ʼolo ʼo papitema. Ko te tupu ʼaia neʼe mole hoko mo ka na pau neʼe mole tou tali fakaleleiʼi te maʼua ʼaē ko te fai ʼo he ʼu ʼaʼahi foʼou. — 1 Tes. 2:8.