Fakahā Ki Te Hahaʼi Fuli Ko Te Tokalelei Pea Mo Te Maʼuli Fīmālie Moʼoni Kua Ōvi Mai
1 Kua vave pe, ko te “Aliki ʼo te tokaleleʼi” ka ina fakatuʼu te tokalelei pea mo te maʼuli fīmālie ʼi te kele katoa. Ko tatatou tui ki te fakapapau ʼaia ʼa te TohiTapu ʼe uga ānai tatou ke tou fakahā te fahaʼi ʼaia ki totatou kāiga (Is. 9:6, 7; Mikea 4:3, 4). ʼI sanualio, ʼe tou fakahā te tohi ʼaē Le plus grand homme de tous les temps.
2 ʼI te pasina 8 ʼo te Minisitelio ʼo te Puleʼaga ʼaenī ʼe tuʼu ai he ʼu ʼuluaki palalau ʼe lagi ʼaoga ānai ki ta kotou fai faka mafola ʼi sanualio. Kae ki te ʼu hoko ʼo te palalau ʼe tolu ʼe tuʼu ʼi te ʼu palakalafe ki muli mai, ʼe ko he tokoni ʼaia kia koutou ke koutou faigaʼi ai te hahaʼi ke natou toʼo te tohi ʼaia.
3 Hoko ʼo te palalau n° 1: ʼI te ʼosi ʼo takotou ʼuluaki palalau pea mo te lau ʼo Isaia 9:6, 7, fehuʼi age kia natou: “Ko ai te ʼAliki ʼo te Tokalelei?” Tuku age he faigafua kia ia ke fai mai hana tali pea koutou fakaʼaogaʼi te pasina 3 ʼo te kamataʼaga ʼo te tohi ʼi te kupu ʼaē “Ko ai koa ia ia moʼoni?”. Koutou fakaʼaogaʼi te ʼu manatu ʼe tuʼu ʼi te pasina fakaʼosi ʼo te kamataʼaga ʼo te tohi moʼo fakamahino ai te ʼu manuʼia ʼo te ʼiloʼi lelei ʼaē ʼo Sesu Kilisito, pea ʼosi ʼaia pea koutou ʼui age: “Ko te tohi ʼe ina fakamahino pe ʼe feafeaʼi te tuku mai ānai ʼe Sesu Kilisito te tokalelei pea mo te maʼuli fīmālie moʼoni. ʼE koutou fia lau koa te tohi ʼaenī pea mo akoʼi te ʼu akonaki ʼa Sesu Kilisito?” Fakahā faka fiafia te tohi ʼaia ko tona totogi ʼofa ko te 400 F.
4 Hoko ʼo te palalau n° 2: ʼI te ʼosi lau ʼo Luka 23:43, avahi te tohi ʼi te hisitolia 133 pea koutou fehuʼi age ki ai: “Koteā te faʼahiga maʼuli ʼe hā mai ʼi te fakatā ʼaenī?” Tuku age he fealagia ke fai mai hana tali, ʼosi ʼaia pea toe hoko atu: “Ko te hahaʼi ʼe natou maʼuli ʼi te tokalelei. ʼE ʼi ai ʼihi ʼe natou manatu ko te ʼu puleʼaga fakatagata ʼe feala ānai hanatou fakatuʼu he tokalelei fēnei. Kae ko te tokalelei pea mo te maʼuli fimālie moʼoni ʼaē ʼe fakahā mai e te Tohi-Tapu ʼe fakatuʼu ia e te ʼAtua, ka mole feala te fahaʼi ʼaia e te tagata. ʼE fēnei koa takoutou manatu?” ʼI te ʼosi ʼo takotou fakalogo ki tana tali mai, koutou fakaʼaoga te ʼu manatu ʼi te kapite 133, pea fakamahino age ki ai ko te tohi ʼaenī ʼe ina tuku mai he ʼu tali ki te ʼu fehuʼi ʼo ʼuhiga mo te Puleʼaga ʼo te ʼAtua pea mo te gāue ka fai ānai e Sesu Kilisito ʼo ʼuhiga mo te malamanei katoa. Fakahā fakafiafia te tohi ʼaia ko tona totogi ʼofa ko te 400 F.
5 Hoko ʼo te palalau n° 3: ʼI te ʼu kolo ʼaē ʼe māhani ai te hahaʼi ʼi te heleʼi ʼo takoutou palalau pea mole natou tuku ke fakaʼosi takoutou manatu, ʼe feala ha koutou ʼui age: “ ʼE feala ke ʼau fai atu he fehuʼi?” Kapau ʼe ina tali, pea toe hoko atu takotou palalau ʼo fēnei: “Neʼe mole heʼeki koutou fehuʼi koa pe ko te ʼAtua ʼe ina tuʼania ia te ʼu mamahi ʼe tau mo te ʼu tagata? Koteā takotou manatu?” Tuku age he fealagia ke fai mai hana tali, ʼosi ʼaia pea koutou ʼui age: “ ʼE tou maʼu he tali ki te fahaʼi ʼaia mokā ʼe tou fakasiosio te aga ʼo tona ʼalo, ia Sesu Kilisito, lolotoga tana nofo ʼi te kele; ko te kapite 25 ʼo te tohi ʼaenī ʼe ina fakamālamaʼi tatou ki te fahaʼi ʼaia.” Fakaʼaogaʼi te ʼu manatu ʼo te kapite 25, pea fakahā te aga ʼa Sesu pea mo te meʼa ka ina fai ānai ma te hahaʼi katoa.
6 ʼE lagi neʼe kua ʼosi takotou fili he ʼuluaki palalau ʼe koutou leleiʼia ʼi te pasina 8 ʼo te Minisitelio ʼo te Puleʼaga. ʼI te ʼosi ʼo takotou lau, ʼe lagi ʼe ʼi ai he manatu moʼo hoko ʼo takotou palalau ʼi te alatike ʼaenī ʼe ʼaoga kia koutou. Koutou fakamamāhani mo te ʼuluaki palalau ʼaia pea mo he manatu moʼo hoko ʼo takotou palalau ʼi mʼuʼa ʼo takotou ʼolo ʼo fai faka mafola. Kapau ʼe koutou teuteu pea mo tui moʼoni ko Sesu Kilisito ʼaē ka ina foaki mai ānai te ʼu manuʼia lahi ki te hahaʼi, ʼe koutou fakahā ānai te tohi Le plus grand homme de tous les temps ʼaki he tui mālohi pea mo te loto fiafia.